Ke Aloha Aina, Volume VIII, Number 45, 8 November 1902 — Page 7

KE ALOHA AINA. POAONO. NOVEMABA 8 1902.

--------------------------------------------------------------------------------------------

MOOLELO HOONI PUUWAI

-NO-

Kuu Aloha i na Pua, Kuu Ipo o na Launahele!

_____

Ka Makaikiu Kupaianaha!

_____

Mokuna XI,V.

KE TELEGARAPA PALE KAUOHA- KA HAALELE OIHANA PALE RULA

_____

            O ka hihia pohihihi o kela lede a me keia haku poino mamuli o na hana apuku a kaumakaia a keia kanaka hanohano, owau pu no ilaila, a imua o na lani a i mua o kela lede, ua hoopaa au i kuu hoohiki e haawi au i ka'u mau kokua ana nona ina minute apau e makemake ia ai ka'u mau kokua ana e ia, ua hooko au ia hoohiki a'u a hiki i ko laua hoohui hou ia ana he kane a he wahine, e like me ia au e ike nei.

            Ma kela la o ka lono weliweli i hooholo pupule ia ai ka laina kaa ahi helu- o ka hui- ua hoea aku malaila a hoopakele i kela mau ola he mau haneri, no ka mea, o keia lede no au i hoopaa ai i kau hoohiki me kana kane kekahi maluna o ua kaaahi ala. Nolaila, ma kela hoohiki a'u i hoopaa mua loa ai me kela lede, ua lilo ia i berita paa loa ma waena o maua, a o ka make wale no ka mea e pau ai. Ina aia au i ka hapa komohana o ka poepoe honua, na aina puniole o Europa, a ina wahi no a pau, a ke hoea ae kana kauoha ia'u no kona pilikia e hoi koke mai ana au me ka awiwi nui a hooko ina mea a pau e waihoia mai ana ma ka'u mau lawelawe ana, a oiai au he kauwa ma kou keena e hooko a e lawelawe ana ina kauoha a me na hana a pau e waiho ia mai ana ma ko'u lima, ua hiki ole loa iho la ia'u ke pale a ke kue ia kauoha a haalele wale hoi i ka hana me ke kumuole, aka, no kela hoohiki au i hoohikipaa ai, no laila, i ka wa i loaa ae ai kana kahea ia'u ma ke telegarapa oiai au e lawe a e hooko ana i kau hana, ua waiho koke aku la au i ka'u hana a hoouna maila i ka'u lipoke, a oi@i no he mea maikai ole ka hoike ana mai i ka'u lipoka a hoike pu ole mai no ko'u waiho i ka hana, nolaila, ua hoouna mai au i ka'u pane e halele ana i kau mau kauoha a e haalele pu hoi i ka hana. Ano e ke poo kiekie o ke keena oihana makaikiu o Ledana, o keia ka'u pane e kue ana i ke kauoha a me ka haalele oihana. Ina i makemake oe e hopu mai ia'u no ke kipi, ua makaukau au e haawi aku ia'u iho he paahao malalo nae o na rula naauao, a ina aole pela, alaila ma kahi au e ku la a huli aku no kela puka e hamama mai la, he kanaka ola oe. O kahi a'u e ku aku nei he make kupapau wale no ko laila. O ko'u pili oihana eia mai ma ka lala o ko'ū papale.

            Na keia pane a ke kiu i hookaakaa pono ae i ua maka o ka oihana makai e okalakala ai kona mau lauoho a wela ke kumupepeiao, aka, o kela makeea me kela minamina no iloko ona, aole no ia i emi aku i hope aole no hoi i nee aku imua, aka, o kana hana wiwole ole loa o ke koa malalo o ka hanohano o ka oihana ona e paa ana, au ku ae oia me ka oiwi kino maloeloe, kapai ae la oia i kona lima akau iluna, alaila, me ka leo malie a kuoo pane maila oia me ka moakaka.

            Heneri Beleinahama; ma ka inoa o na lani kiekie loa, aole loa au i hele mai nei e hopu aku ia oe, a aole hoi ma kekahi ano e ahewa ana ia oe. O ke aloha, ka makee, a me ke minamina o ka makua no kana keiki oia ka Haida i hele mai nei e lohe no keaha la i haalele mai ai ke keiki ana i minamina nui ai, a o oe hookahi no hoi ka mea a kou makuahine (keena oihana) i olioli loa ai. O kou haalele ana mai iaia o kou hoonele ana aku no ia i ke ola a me ka hauoli iloko ona , a e lilo auanei oia i makua i nele me ka malamala a noho iloko o ka po uli o na pouli. O kou hookohu oihana a me kela Hoku o ka puali, a aole loa au e lalau iho ia mau mea a lawe ae mai a oe mai. E aho e kipoka mai oe ia'u mamua, alaila haalele a waiho iho oe i ka hana, a ina ua makaukau oe- Ano- Eia mai kuu umauma- Ki ia mai- hoounaia mai kau poka iloko ona, a fee wela kaua.

            Alaila, iho malie iho la ka lima o ka oihana kiu mai kona kau ana i ka lewa a pili ma kona aoao a haka pono mai la ia maluna o kana kiu no kona hooko aku i ka hana i kauoha ia mai iaia. Aka, hala hookahi minute, elua, akolu, aha, alima, ia wa i kauoha hou mai ai ka leo kuoo o kona poo oihana- Eaha ana ka hoi oe e Beleinahama, a no keaha ke kali ana o kau poka? Aole au e huli ae ana a hele no ka hemo ana ma kela puka ma ke ano he kanaka hoohe wale, aka, e ku aku ana au i mua o kou alo a halawai me ko'u hopena ma ka waha o kau pu panapana a me kona huaale kepau. Ano-Faea! Ki mai! Gona!

            E like me ke kuoo o ka leo a me na olelo a ke poo o ka oihana makai kiu e kauoha ana ia makaikiu Heneri Beleinahama, e hoouna pololei mai i kana poka iloko o kona umauma, ina ua manao ua kilu la aia he mau manao enemi kekahi iloko o na poo oihana a me na olelo ku i ke aloha a ua poo oihana nei i haawi mai ai, na ia mea i kauoha koke ia Heneri e hele mai imua aole me na manao lili o ka enemi, aka me na puili lima ana a ke aloha oiaio iaia paha i hoomanao ae ai o keia kanaka e ku aku nei imua ona a ha

_____________________________________________________________

E nana ma ka aoao 8.

 

HALE INU RAMA BOSETONA.

_____

Alanui Hotele ma Ewa o

Alanui Nuuanu

_____

Eia me makou na wai hoomalule kino e ko'u ai ka puu

Wisike, Gini, Bia, a pela aku.

Nona ka inoa i hooheno ia Elua kana i ke Ala Mokihana. E ike ia kana hoa kanaka he Hawaii au, Hawaii oe hipuu paa i ke Aloha a mai poina i kou io ponoi me ke Aloha. Eia ma keia hale ko oukou makamaka Hawaii R W. Davies. a na iini e halawai me oukou.

 

PAPAI OPIO.

--------------------------------------------------------------------------------------------

 

Kuai Hoemi Nui o na Hainaka

_____

 

Mawaena o na waiwai hou a makou i hiki mai la he 500 kakini Hainaka. I keia pule eia lakou ke hoikeia nei no ka wa mua loa. Ua hiki no ia oukou ke kapa iho he kuai hiki mua e loaa ai na hainaka no ke Karisimaka. Ua hoemi lakou iloko o na ano eha, penei ko lakou mau kumukuai:

 

5c

10c

15c

25c

Pakahi

He nani ko lakou mau hiohiona, he manoanoa a Lahilahi i kupono no na opio hele kula. He nui na hainaka kae lihilihi e hoohikilele ia ai oe no ka emi o ko lakou mau kumukuai. Eia makou ke kuai hoemi nei i na Hainaka Swiss a me Farani no ke kumukuai 50c, 75c a me $1 00.

 

Whitney & Marsh, Ltd.

Honolulu, Alanui Papu.

--------------------------------------------------------------------------------------------

HOOLAHA KUAI A KA MEA PAA MORAKI

_____

            Ke hoolaha aku nei ma keia no ka hooko ana aku i ka mana hoolilo o kekahi moraki i hana ia ma ka la 30 o Sepatemaba, 1901, e Tom Lum, Pang Lum, Man Gem, Tom Mon, Sun Wo a me Chock Wa, no Honolulu, Mokupuni o Oahu, Teritori o Hawaii nei, lakou a pau, aoao mua ia Andrew Dempster o Lihue, mokupuni o Kauai, Teritori o Hawaii i oleloia, aoao elua, a i hoopaaia ma ke Keena Kope Aupuni, Oahu, buke 236, aoao 434-6, ke manao nei ka aoao elua e hooko i ua moraki ala i oleloia no ka hahakiia o ka aelike, oia ka uku ole ia o ke kumupaa a me ka ukupanee i ko laua wa uku.

            Ke hoolaha hou ia aku nei ma keia o ka waiwai i hoakaka, kuai, a hoolilo ia ma ua moraki ala e kuai kudala ia ana, ma ke keena kudala o James F. Morgan, Alanui Moiwahine, Honolulu, Poaono, la 29 o Novemaba, 1902, hora 12 awakea.

NA WAIWAI I HOAKAKA IA MA KA MORAKI

 

            Oia kela aelike hoolimalima i hanaia ma ka la 1 o Mei, 1900, mawaena o Hattie K. V@v@chases o Honolulu ma ke ano mea hoolimalima a me Tom Lum, Pang Lum, Man Gem, Sun Wo a me Chock Wa mea paa hoolimalima no ka manawa o 20 makahiki mai ka la 1 aku o Iune, 1900, ma ia e haawi ana i na pono, inoa a me ke kuleana a pau o ka aina i na mea paa hoolimalima ma kela apana a i ole mahele o ka aina e waiho ana ma Kapalama, Honolulu i oleloia, maloko oia au hoakaka ia e hookuu pu ia mea na waiwai a pau.

 

ANDREW DEMPSTER,

Mea Paa Moraki.

            Kuike ke dala ma ke gula Amerika; lilo palapala kuai ma ka aoao o ka mea kuai. No na mea i koe e ninau ia Holmes me Stanley, na loio o ka mea paa moraki.

Honolulu, Okatoba 11, 1902.

Oct 15, 22, 19, Nov. 5.

 

Palapala Hooia Hoahu

E like me ia i Hoopukaia e ka

HUI HAWAIIAN REALTY A ME MATURITY KAUPALENA IA

Hoahu Maraki 30, 19@1

Huina Waiwai $50,000

5,000 MAHELE; $10.00 PAKAHI;

UKU PAU IA

____________________

Heaha na Kumu

            1. Aole makou e koi aku ana ia oe e uhaai i kau dala.

            2. E haawi ana makou i kekahi alahele palekana e hiki ai ke hoopukapuka a loaa ke dala ma muli o ka hoohui i na huina liilii i kela a me keia mahina, a mamuli o ia mea, e koe ana he huina dala mai ka hoolilo ia ma kekahi ano e ae, a e loaa ole ana ia oe kekahi wahi pomaikai mai loko mai oia mea.

            3. O ka nui o na makahiki a me ka oihana a hana a ka mea hoahu, aole loa ia he kumu hoanoe a hoololi, no ka mea, ua hiki i na kane, na wahine a me na keiki ke lilo i poe hoahu.

 

Hooia Hoahu

            4. Na makou e kukulu i mau home no oukou a e hoopuka no ho makou i Huina Hoahu Hoopukapuka e hookaa ia iloko o 75 mahina, me eha (4) Palapala (Coupons) Hooia o $50 pakahi i hoopiliuia. O ka averika no ka puunaue iloko 19 mahina, a e ohi ana makou $150, a e loaa ana ia oe $200. O kou puka $33.33 no kela a me keia dala pakahi i hoahu ia e loaa ana ia oe he 33.33 keneta puka.

            5. No ka mea aole oihana hoopukapuka i keia i oi aku ka pomaikai ma mua o keia. E kakau mai i na hoakaka piha. E hauoli mau ana ka Hui e hoike a e hoakaka piha aku i na mea a pau a me na lawelawe ana ke makemake ia., ke kakau ia mai ma ka leta a ke ninau kino ia mai.

 

HUI HAWAIIAN REALTY A ME MATURITY KAUPALENAIA.

            McIntyre Hale kihi o na Alanui Papu a me Moi. Rumi 3 a me 4. Pahu Let: 262,

L, K KENEWELA,

Paresidena