Ke Aloha Aina, Volume VIII, Number 44, 1 November 1902 — Page 4

KE ALOHA AINA

POAONO, NOVEMABA 1, 1902.

 

 

KE ALOHA AINA

Hookumuia no ka Pomaikai o ka Lehulehu, a he Nupepa no ka Lahui Hawaii.

EDWARD L. LIKE. Lunahooponopono

JOSEPH K. LIKE. Luna Hoopuka

ALEX. NAWAHI. Luna Hoohana

EMMA A . NAWAHI. Puuku o KE ALOHA AINA.

 

PUKA PULE.

 

E hoopuka ia ana ma na kakahiaka Poaono a pau.

 

KEENA HANA.

            Ma alanui Moi, Leleo, Helu 370. Kokoke ma ka Hale Hoolulu Kaaahi. Pahu Leta 513.

No ka Makahiki. $2.00

No ka Eono Mahina. 1.00

No ke Kope Hookahi. .05.

 

HONOLULU. NOV. 1, 1902

 

E KA LAHUI E KUPAA ME KA LOKAHI I LANAKILA MAU AI O HAWAII A KAU I KA PUA ANEANE.

 

            He mea pono ia oukou e na Hawaii a pau e lokahi like ma ke koho ana i na paa balota lahui a ka aoao Home Rula me Demokalaka i hui ia. O ko kakou palekana ke komo nui o na Hawaii kupono manaoio hana iloko o keia Kau Ahaolelo, alaila, i ae e kamau kahi hanu i ka puka iho o ka lahui Hawaii. A, ina aole, o ka hope loa no keia nou e ke kanaka Hawaii e ikea ai, a o ka hopena aku e like aku ana kakou me na Illikini ahiu noho kuahiwia o Amerika ke kipaku ia e hoi a ka lae laau noho mai. E koho i ka paa balota lahui i pakele kakou.

 

INA HE MAKEMAKE IO KO OUKOU E KA LAHUI E LOAA KE AUPUNI KALANA ME KULANAKAUHALE

 

             Pehea e ko ai ko oukou makemake,  na ka poe repubalika anei a haawi laelae mai ia mea ia oukou? Aole: Aole o lakou manaoio ia mea, ua like ia me he akua lapu ala ia lakou, oiai, he pino nui no ia no ka poe waiwai he mea hoopilikia ia ia lakou, he mea kupono nae ia no kakou ka lahui, alaila, e kaa ana ka mana o na mea a pau iloko o ko kakou lima, a e hoopomaikai ia no na Hawaii me na hana like ole iloko oia Aupuna Kalana, Kaona paha a pela aku, pela e pahemo mai ai ka mana alunu o ka poe hookele aupuni popopo. No laila, koho i na paa balota lahui, i ahona iki kakou. Mai ae e lanakila na enemi maluna o kakou.

 

            Ua hala aku la ka Elele Wilikoki ma kekahi huakai kaapuni i ka mokupuni o Oahu nei, no ka halawai hopa ana me kona mau hoa makaainana hoea mai ka la @@@ balota i ka Poalua ae nei. @@@@ hou mai ana oia i keia la.

 

HE PAINA INU TI.

 

            Ka Mrs. Irene Kahalelaukoa Halloway i haawi ae ai ma ka auina la Poalua nei ma kona home hou mauka o ke kihi o na Alanui Liliha a me Kauka, no ka hanohano o ka Moiwahine Liliuokalani. He mau lede Hawaii wale no na hoa i konoia no ka hooluana pu ana me ke alii a me ua aliiwahine waipahe ala a Keoni Ii. Malaila ae ka Hui himeni Kawaihau kahi i hoonanea ai i na malihini a ua Haku hale puuwai hamama ala , mahope o ka hookuu ana o ke anaina a huli hoi ka Moiwahine, ua kau aku la na mea apau ma ke kaa lio ole na ka uwila mageneki ka hana, e hoonee ana i ke alahao. Ua hoi mai na mea apau me ka hoomanao poina ole i ka lokomaikai i pahola ia mai e ka Lede Kahalelaukoa.

 

KUPANAHA NO KA HOI O WILLIAM MOKIMANA.

 

            Ua hele ia mai makou e kama ilio, ua lohea kona leo e hoinoino ana i ka aoao Demokalaka, a e aʻo pu aku ana i ka poe koho balota, mai koho i na moho oka aoao Demokalaka. Eia hoi ke kupanaha a makou e olelo ae la. Na na o Mokimana ma poni no i koi aku i kekahi Demokalaka a lakou no i ike ai he kanaka Demokalaka oiaio oia ma ke Kau i hala a hiki no i keia la, oia o Pama Woods, a wae ae la ia Demokalaka i moho Sentoa na lakou.

            Aolei haawi koke aku keia keonimana i kona ae, aka, holo kino mai la oia Honolulu nei, a hele aku la oia ma ke Keena Mana Hooko o kona aoao kalaiaina Demokalaka, a malaila oia i hoike aku ai i keia mea imua o o kona mau hoa, no keia noi a na Home Rula e makemake ana iaia e lilo i moho na lakou a pehea la ka manao o na hoa o kona aoaoa Demokalaka. Me ka manao maikai hukihuki ole, ua ae aku la kona aoao a hookuu laelae aku la ia Demokalaka me lakou. Aia la ma ia komo ana aku nei oia keoni mana a ke Demokalaka iloko o laila. Aole anei ia i like me keia wahi olelo kaulana o kakou, "hookahi no hawae lauhue kona: ua like loa. Eia hoi ka ninau: Auhea iho nei ua wahi Mokimana hoino Demokalaka hololua nei? Aia aku la hoi i Hawaii, he wahi lunahooikaika balota no ua keiki lalawai Demokalaka nei o ka makani Apaapaa o Kubala. E ike ia ana paha kona mau helehelena ma kona Apana Koho Elima i ka la koho balota ae nei, aole paha, a malia o noho loa aku oia i Kohala i Puehuehu a pau ke koho balota huli hoi mai.

            Ma ka lohe mai, he wahi balota nawaliwali loa ia. Aohe aohe pina o kahi poe, o ua wahi Mokumana ala no ia o ke Kau i hala. O ua wahi Mokumana hoino nei no hoi keia ia ka Nupepa KE ALOHA AINA, me he ʻla no paha ua hemolelo ka hookaeoeo wale iho no, i ka olelo ia o ke kipe. A oia Mokumana hookahi no kai keehi iho nei i ka mana o ka Aha Elele Home Rula o lakou no ka wae ia ana o ka Pake, a kukalike ae nei e holo Moho Kuokoa no ka paio ana aku me ka mana o ka Aha Elele. Ke mahalo nei KE ALOHA AINA  no kona kapae ia ana mawaho o keia Kau Ahaolelo ae.

 

HOOKAHI KAU I KOE O R.W. WILIKOKI E NOHO HOU AI MA KA AHAOLELO O AMERIKA.

 

            Ina no  e kohoia a koho ole ia paha o Wilikoki ma keia kau koho balota o ka la 4 ae o Novemaba, e holo hou aku ana no oia ma keia mahina ae no ka noho ana e hoopau i ke koena o kona manawa i kohoia ai he Elele no na Kau elua o ka Ahaolelo Nui o amerika, oia ke Kau Pokole o 56 a me ke Kau Loihi o 57. Ina no e kohoia ke Keikialii Kalanianaole i ka la e 4 ae nei o Novemaba, aole no oia e holo ana e noho ma keia kau Ahaolelo hope o Amerika a hiki iloko o Decemaba o keia makahiki 1903 ae. Aohe Ahaolelo hou o Amerika a hiki iloko oia mahina hope. He wa hoomaha ia no na hoa o ka Ahaolelo.

 

HE OIAIO ANEI KEIA LOHE.

           

            Ina ka e puka ana ke Keikialii i Elele, o W.O. Kamika ka mea a kona aoao kalaiaina e manao nei e hoouna i Kakauolelo nana i Wasinetona. Ina he oiaio keia wahi lohe alaila aole no o hai ke ike ana i na pilikia o na Hawaii no, oiai ua ike kakou o ka poe no keia nana kaou i hoopilikia, a e hoopilikia mau aku ana no ma keia hope aku, oia nei kekahi i loheia ae makemake e hoopau ia ka pono koho laula i haaweea mai i na kanaka Hawaii oiai oia ma Wasinetona No keaha mai la ke kumu ? No ko lakou nei ake maoli no e kinai make ia na poe Hawaii hanau nona ka aina a lakou i haawi aku ai ia Amerika, i ole ai e loaa he wahi mana a he wahi leo no na Hawaiia ma ko kakou aina, i hele lanakila ai ka lakou mau hana imi waiwai apau me ka hoopahua ole ia. Ina he oiaio keia lohe, aole no e hiki i ke Alii Opio ke pale ae i ko lakou nei leo ina ia o ka makemake o na Repubalika nei kana e hooko aole o kona ponoi iho, oiai he kanaka oia na ka lehulehu.

 

            E na Hawaii; Nana ae ia Kimo Boe e kaiehu ia nei e na Repubalika, a noonoo iho e koho i ka balota lahui.

 

MAI KONA KAI OPUA I KA LAI MAI

 

            Ma ke ku ana mai nei a ka Mauna Loa mai na aekai malino mai a Ehu, ua hoouna ia mai la i ke Keena o KE ALOHA nei kekahi wahi apana pepa uuku, me ke kauoha e hookomoia keia mau wahi lalani mele malalo iho i haku ia e "Hawaii" o Laiana paha ia, ka mea haku mele kaulana o Hawaii nei ia mau la. Nolaila, ke hooko nei makou e like me ia noi. Ua hoouna ia mai keia leta me keia wahi mele mai kekahi Hawaii ponoi mai o Kona, he mea i makee nui no ka aina, na ʻlii a me ka lahui, penei:

E KE ALOHA AINA.

 

Aloha oe:

            E oluolu e lawe aku i kaʻu wahi ukana uuku e hoouna aku la e hookomo iho ma kahi kaawale o kou wahi kino lahilahi a nau e pahoia ae imua o ka lehulehu, i ike mai ai na kini o kana mai ka la kau a ka la komo i neia wahi mea uuku iki he iko nae aia iloko. Ke hoouna aku nei au maloko o keia leta, he wahi apana pepa me kekahi mele himeni i hakuia e Laiana, ua oku ae nei au noloko mai o kekahi o ko kakou mau nupepa Hawaii kahiko. "Ko Hawaii Pae Aina" a Jos. U. Kawainui me B.W. Kawainui, na Luna Hoopuka a Luna Hooponopono. Honolulu, Poaono, Iune 16, 1883. Eia ua wahi mele pakli nei i hakuia he 19 makahiki me na malama keu i hala ae nei:

A MANʻS A MAN FOR ALL THAT

Leo ma carmine Sacra Aoao 29.

Pauku 1

Aole hilahila e,

aole e kaumaha

Ke hoohenehene ia mai,

He ui Hawaii au la,

Hawaii, Hawaii,

He kuaaina au la,

He nani nae la ko na ʻalii.

He ui Hawaii au la

 

Pauku 2.

Ua hanohano na Moi,

A me na Kiaaina,

Mahalo ia na Luna e,

He ui Hawaii au la,

Hawaii, Hawaii

A oiaio au la,

A noonoo e a pololei,

Ka mea oi keia

 

Pauku3.

He wa maikai, kokoke mai,

Ke kuikahi like,

A hui aku, hui mai,

America me Hawaii,

Hawaii, Hawaii,

He ui Hawaiia au la,

A lilo no na mea a pau.

I poe hoa aloha.

 

HAWAII.

 

            Eia na olelo hope a ua mea nei nana keia wahi ukana i hooili mai nei. Eia ka, aole io no e kala kahiko loa i kuko ai na mkua o ka pono uhane o kakou e hoohui o Hawaii nei me America. Ke hoomanao nei au i kekahi

 

(E nana ma ka aoao 5.)