Ke Aloha Aina, Volume VIII, Number 35, 30 August 1902 — Page 6

KE ALOHA AINA, POAONO, AUGATE 30, 1902.

 

WELIWELI NA HANA

A KEKAHI PUPULE

 

            Imua o kekahi anaina kanaka nui i hiki aku maluna o na tausani lele mai ai kekahi kanaka pupule nona ka inoa o Aka mai luna mai o kaupoku o ka hale keaka Pake e ku nei ma Aala no lalo o ka lepo, a nona hoi ke kiekie he 50 kapuai mai ka honua ae, ua laki ka pakele mahunehune ana mai o kona ola, me kahi poino iki o ka haki ana o kona uha.

            O ke kumu i ulu mai ai ke ano opulepule iloko o keia kanaka ua oleloia ae ua hoea mai no ia mahope o kekahi hoopaapaa i hanaia muwaena ona a me kana wahine ma ka Poaono nei. O na lono hoonuinui nae i hoea ia aku i ka halewai ua pepehi keia kanaka i kana bebe a make loa, nolaila, ua hoouna ia mai na makai no ka hopu ana aku iaia a lawe aka e hoopaa iaia i ka halewai.

            I ka ike ana o Aka eia na makai ke hele mai nei e hopu iaia, ua haalele koke iho la oia i ka hale ana e noho ana ma ka aoao makai iho o ka hale keaka Pake kahiko me ka pii koke ana aku no luna o ka hale keaka Pake. I ka hiki ana mai o na makai aia ua kanaka pupule nei e okuu mai ana iluna o kaupoku, ua haawi ia aku na olelo oluolu no ka iho ana mai i lalo, aka, ua hoole loa mai oia.

            I ka ike ana o na makai aole he alahele e ae nona e paa ai, aka, o ka pii wale aku no i luna o na hale kiekie ala a haawi aku i ka lakou mau hoao ana e hopu ia Aka, nolaila na pii aku la o makai Dunpau a me McDuffie no luna o kau poku hale, aole i liuliu mahope iho ikeia aku la o Garcia, he keiki Porto Rico makaikiu me kakahi kaula e paa ana ma kona puhaka, a i kona hoea ana aku ma kahi a na makai e noho mai ana, ua haawi aku la ia i ka piko o ke kaula i na makai a iho aku la ia ma ka aoao o kaupoku hale no ka hoao ana e ho pu ia Aka ke kanaka opio pupule. Aole o Aka i makau i ka makai e hoao ana a hopu iaia, aka, ua ku mai la oia me ka makaukau no ka halawai ana mai me ia no ke ola a me ka make. I ko laua hui ana ae he alo he alo, oia no ka wa i malama ia ai o kekahi hakaka weliweli ua ikeia aku o Aka e hoao ana e kiola aku ia Garcia no lalo o ka honua, aka ua hiki ole ke hooko ia kona manaohehena, oiai, na makai e paa ana i ke kaula i hooopaaia ma puhaka o ke Porto Rico me ka ikaika nui. Ua pii hou aku he ekolu mau koa Amerika a haawi ina kokua ana ma ka paa ana i ke kaula.

            Iloko o keia wa i pii hou aku ai he makai uo ka haawi ana i na kokua ia Garcia me ka hoao pu aku e hopu ia Aka, aka, e like me kana i hoole loa ai i kona hopu ola ia ana e na makai ua iho loa mai la oia no lalo o ka aoao o kaupoku, a mamua o ka hiki ana ina makai ke hopu mai iaia. Ua ikeia aku la oia i ka paa ana ae i kona mau lima maluna o kona poo. A luu poo mai la hoi iloko o ka menemene o na mea a pau no ka minamina ole iloko o ka mea pupule no kona ola iho.

            Ua laki nae i kona wa i iho mai ai me ka ikaika ua hamama kona waha, aia malalo pono o keia wahi ana e iho mai nei he uwea kaulai lole, a ma kekahi ulia laki ua komo aku la ka uwea iloko o kona waha, a na ia mea i hoomama ike ae i ka ikaika o kona haule ana mai, a i kona pa loa ana aku iluna o ka lepo ua hookui aku oia ma ka aoao a haki iho la kekahi o kona uha, ua lawe koke ia aku la oia no ka hau kipila kahi e lapaau ia nei o kona mau palapu.

            Mahope koke iho no o keia hana weliweli ua malamaia he hakaka ma waena o kekahi makai a me kekahi poe pake malalo ae nei o Aala. Ua ulu ae he hoopaapaa mawaena o ka makai a me keia mau pake, a o ka hopena i ikeia ua hahau ia ka makai me kekahi pauku laau ma ke poo, a ikeia aku la ke koko e hoai mai ana mai ana mai kona poo mai. He elua mau pake i hopu ia a i ike ia, o laua kekahi i komo pu ma ka hoeha ana i ka makai. Mamua o ko laua lawe loa ia ana aku i ka halewai, ua haawi kalo paa ia aku laua e ka makai a laua i haeha ai. Ia wa hookahi no a na kanaka e mui muia nei, ua ike hou aku la lakou i kekahi hiona weliweli, oia hoi ka hookui ana o kekahi kaapio me ke kaa uwila ma ke kihi o ke alanui Aala a me Moi. Ua kiola ia aku ke kalaiwa kaapio no lalo o ka lepo, a o kona kaa hoi ua onou ia aku a pili i kekahi pou telepona ua lepe ka ihu. Ua hoehaia ke kalaiwa kaapio, a ke hooili nei oia i ka hewa a pau maluna o ke kalaiwa kaa uwila. O na hiona ae la keia i ikeia malalo a Aala ae nei ma ka auina la Pule nei.

 

HE AMELIKA KAAHELE HONUA.

            Bloemfontein, Aug. 9. Ma ka la inehinei i hoea mai ai ianei o Mr Schilling, he kanaka Amerika, e kaapuni ana i ka honua maluna o kona mau kapuai wawae wale no.

            Ua haalele aku oia ia Nu Ioka maka la 30 o Augate, 1897, me ke kahiko ia iloko o kekahi aahu i hanaia mailoko mai o na nupepa, me ka nele pu hoi i ka papale, kamaa me ke dala. Ua lawelawe oia i keia hana malalo o kekah ipili o L4,000 no ka hele kaapuni ana i ka honua maloko o elima makahiki, aole oia e noi, a i ole e aie a i ole e aihue, aka na na poe e aloha mai ana e haawi mai i na kokua ana iaia, a i ka pau ana o ke@ huakai e loaa pa hoi iaia he L1,000. Mai kona haalele ana ia Nu Ioka a hiki i kona hoea ana mai la ianei, ua like me 29,700 mile i hele ia eia, a ua kaahele ia eia o Amerika Huipuia, Canada, Mekiko, Auseteralia, Tasamania, Nu Kilani, Inia, Bormaha, Kina, Siama, Iapana, Siberia, Pilipine, a me kekahi hapa o Aferika Hema nei. O na wahi i koe ana e kaahele ai, o Aigupita, Soudan, Auseturia, Rusia Geremania, Holani, Italia, Farania me Enelani a ua like ia me 8,000 mile i koa ana e hele ai maloko o umikumamakolu mahina.

            Iloko o keia huakai a Mr. Schilling ua makaikaiia eia he eha kaua, kaua mawaena o Sepania a me Amerika, kaua o Pilipine, Kina a me Aferika Hema—ua powa ia oia e na Mekiko me ka laweia aku o kona mau waiwai a pau, a pela no hoi me na poe Boxer ma Kina, a he nui na manawa ona i kipa ia ai. O ka hana ana e imi ai i kona ola oia no ka haiolelo ana ma na taona a pau ana e kipa aku ai. O na mea a pau ana e ike nei ua moni iho oia.

 

            MOKU LAWEKOA POINO.

 

            Ma ka kakahiaka Poaono nei i hekau mai ai i ka nuku o Mamala ka moku lawekoa Bufor ma ke alahele e huli hoi ana no Kapalakiko mai Manila mai ma ke alahele mai o Iokohama.

            Oiai, ka mokuahi e holo pololei ana no Kapalakiko, a he elima hoi la holo ma ka moana mai ke awa hope mai ua ike ia iho la ua poino kekahi mau ipuhao mahu a oiai, o Honolulu nei ke awa kokoke loa i ke alahele au moana o ua moku ala, nolaila, ua kipa mai ia oia i keia awa. Eia ke lapaau ia nei keia pilikia nui o ka moku a i ka wa e paa ai o keia poino i ke pahonohono ia e hoomau aku ai oia i kana huakai no Kapalakiko.

            E hoihoi ana ka Bufor he mau paulikoa no Amerika Huipuia i pau ko lakou manawa noho ma Pilipine a pela hoi me na aliikoa. O ka nui o na koa a pau ua hiki aku no ia ma kahi he 1000 a oi. Piha koa hou na alanui o ke kalanakauhale nei i keia mau la.

 

HE POWA I HOOHANOHANO IA.

            Athens, Aug. 9. O Papoulos, kekahi o na powa Helene ino loa, ua haawi ia aku na leo ohohia nona i kona wa e lawe ia ana mai Patras aku no ka halepaahao ma Rio.

            Ua kiola ia na pua iloko o kona kaa, me ka hoao pu aku o na wahine e honi iaia. Ua like oia me kekahi alii nui, me ka wehe ae i kona papale a ani ae la hoi i kona lima i ka wa a na kanaka e haawi aku ana i ko lakou mau leo huro nona.

            I kona hoea ana aku i ka halepaahao ua lawe ia aku la oia iloko o kekahi rumi nani, malaila i hoolauna aku ai ke Kiaaina iaia imua o na lunakanawai, a ua apo aku lakou i ka malihioi me ke ohaoha.

            He nui na @ a i hoopuka ia ae e na nupepa n@ kana mau hana a me na olelo, a nolaila, ua ike aku na kanaka iaia ma ke ano he koa wiwo ole.

 

I NA KINI O’U.

            Mai Hawaii a Hiihau. A i na hoaloha o’u a pau o ka Papa Hooko o ka aoao kalaiaiua Home Rula, a i na poe heluhelu o ka nupepa Kuakoa Home Rula a me na hoa hookele o na nupepa Hawaii o kakou a’u i paio aku ai imua o ko oukou alo. Aole pololei o ka oukou alakai ana.

            I keia la, a mau loa aku, e kapa mai oukou ia’u he Aloha Aina Demokalaka no ka pono o kuu aina, kuu alii, kuu hae a me kuu lahui, No ka oiaio o keia, ke kau nei au i ko’u inoa.

            Daniel A. Mahuka, Honolulu, Oahu, T. H.

 

PAPA HOOPAA INOA O KA MOKUPUNI O OAHU NEI.

            E hoomaka ana mai keia Poalua aku, Sepatemaba 2, e noho ai ka Papa Hoopaa Inoa Koho Balota o ka mokupuni o Oahu nei. O na hoa o loko o keia papa oia no o Lorrina Andrews Lunahoomalu, W J coelho a me M A Gonsalves.

            O ka hapanni o ka manawa o keia papa e noho ana ia ma Honolulu nei, ma kekahi keena o Honolulu Hale a hiki i ka la 10 o Okatoba, ka la hope a ke kanawai i kauoha ai. O na la a lakou e kaahele aku ai ma na apana mawaho aku nei e hoolaha ia aku ana ia ma keia mua aku.

            O na poe a pau i hoopaa i ko lakou inoa ma kela kau hoopaa inoa koho balota i hala aku, e hele hou ae no lakou e hoopaa i ko lakou inoa i keia papa hooopaa inoa e noho mai ana, no ka mea, o ka poe i paa ole na inoa i keia papa hoopaa inoa hou e kue loa ia no lakou mai ka ae ia ana e loaa ka mana koho i keia kau. E like no me ka lawelawe ia ana o na hana i kela kau aku nei, ma ke ana naauao e loaa ai ka mana koho, pela no i keia makahiki. Nolaila, e na Hawaii a pau i loaa ka pono koho balota mai poina i ka hele ae e hoopaa hou i ko oukou inoa imua o keia papa e noho mai ana.