Ke Aloha Aina, Volume VIII, Number 31, 2 August 1902 — Page 1

KE ALOHA AINA

BUKE VIII.   HONOLULU, POAONO, AUGATE 2, 1902.         HELU 31

 

JEFFRIES KA MOHO LANAKILA

 

            Ma ka Moana i hoea mai la mai Vanekoua mai, ma ka auina la inehinei ua lawe mai la oia i ka lono telegarapa o ka lilo hou ana o ka lanakila o ka hakaka kuikui puupuu nui no ka inoa moho o ke ao nei mawaena o Jefferies a me Fitzsimmons i ka inoa mua iloko o na puni ewalu.  Ina puni mua eono ua ike ia ko Fitsimmons eleu, aka, ua nawaliwali nae oia i na puni hope.

 

KANAKOLU ILIKINI I KIPU IA.

 

            Tuscon, Oregona, Iulai 23.  O S N Jacks, i hoea mai ia i keia la mai Fort Worth mai, ua lawe mai la oia i kekahi hoike o ke kipu ia ana he 90 Ilikini e na koa mekiko, he poe hoi i ae ole aku i ka manao o Kenerala Torres, a i mahuka aku no na mauna a i paa i ka hopu hou ia ma na mauna.

            O keia poe a pau he poe i ike ia no loko o na ohana puni kaua, a nolaila, ua hooholo iho ia na luna koa he mea pono i kipu ia aku lakou mamua o ko lakou kipaku ia ana aku no kekahi wahi okoa aku.  He nui na poe maina mekiko a me Amerika i walo aku ia Kenerala Torres no ka hoopakele ia ana o keia mau pio, aka, aole nae i hoolohe ia mai.

            Ua halawai na Ilikini me ko lakou make me ka wiwo ole.  Aole lakou i maopopo mua i ko lakou make a hiki i ko lakou kaawale ana aku mawaho.  Alaila, ua hoopuka ia ae la na leo hawanawana mawa ena o lakou no ko lakou kipu ia, aole lakou i kulou iho ilalo, aka, ua lawe ae lakou i ko lakou kahua o ka make me he la, aole he hopena weliweli e hoea mai ana ia lakou.

            Ua ki pakahi ia na Ilikini e eli ma mau koa ki pololei.  I ka wa e make ai o ka Ilikini mua ua lawe ae la kona hope ia kulana mahope o kona hoahuwale ana i kona umauma i hoailona no ka poka e ki la aku ai.  I ka pau ana o keia kipa ana a na koa mekiko ua haawi ae la he paina hauoli.

 

KU KA AOAO KUOKOA MA HILO

 

Hale Halawai ma Puueo, Iulai 24, 1902

            Malamaia ka halawai a ka aoao Home Rula, hora 10 a. m, Peresidena ma ka noho, a hoomaka ia na hana ma ka himeni a me ka pule a Kaluaokahaku.

            Heluheluia ka moolelo o ka halawai i hala a apono loa ia.

            Noi mai o J. Oliva e kapaeia na rula i lawe mai oia he olelo hoolo, aponoia.

            Ua ku hou mai oia a heluhelu i ka olelo hooholo e hoololi ana i ka inoa Home Rula o keia ahahui i ahahui kalaiaina Kuokoa, a e ikeia keia ahahui ma keia inoa ma keia mua aku.  E lilo keia ahahui kalaiaina Kuokoa i ahahui kuwaena no ka mokupuni o Hawaii, a e hookumuia aku no ma keia la 24 o Iulai, 1802, ma Hilo Taona.  Kokua ia mai keia olelo hooholo me ka hoopaapaa ole a hooholo loa ia.

            Na luna nui i koho ia no ka manawa, D. K. Ewaliko, Peresidena; J. Oliva, Kakauolelo; Kaluaokahuku, Puuku.

            Ku mai ka Peresidena D. K. Ewaliko a waiho mai i ke kumuhana imua o ka hale no ka hoo makaukau ana o keia ahahui i mau komite nona iho, e ku makaala i na wa a pau e kue aku ia Mossman, Kalauokalani ame Wilikoki a me na poe e ae no a pau e kakoo ana ia D. kalauokalani, ina lakou e hiki mai ana ma ka apana ekahi, a i ole ma Hilo Taona.  Kokua ia keia kumuhana apono a hooholo loa ia.

            Ku mai o J. P. Hale a waiho mai i 15 lala o ke komite no lakou na inoa, penei: D K Ewaliko W B Nailima, D Keliipio, Rev. S L Desha a me S Kahana no Hilo Taona; J P Hale, J M Kepoo a me J K Paahao no Puueo kai; N Kuekaa, D M Kualii a me J Oliva no Puueo uka; Lilikalani no Waiakea; Kaena no Kalepolepo; Z Mahaiula no Haaheo; D Kaluaokahaku no Paukaa.  Ma ka noonoo ia ana o keia poe inoa, apono loa ia.

            Hapai ia mai ka noonoo ana i komite hoopaa inoa, aponoia.

            Koho mai ka Peresidena Ewaliko i kela mau homite mua no o 15 lala o lakou no na poe hoopaa inoa, apono a hooholo loa ia.

            Noi mai ka Peresidena e hoihoi aku na komite hoopaa inioa i ka lakou hoike ma ka Poaha Iulai 31, 1902, aponoia.

            Noi mai kekahi hoa e hoopanee ia ka halawai a noho hou ma ka Poaha Iulai 31, 1902, apono a hooholo loa ia.

            O ke kope oiaio keia o ka halawai a na Home Rula i lilo i poe kalaiaina Kuokoa.

            J. OLIVA,

Kakauolelo, Ahahui Kuokoa ma Hilo Taona.

 

E nana ae i ka makou mau hoolaha hou e puka aku nei.

 

NA KAUKA HANA NIHO NOEAU

Aohe Eha o ka Huki Ana

 

            O na Kauka Hana Niho W. E Ellen a me F. @. Ferguson, i hana mua iho nei ma ke Keena Hana Niho Nu Ioka, e loaa no laua ma ko laua KEENA HOU ma ka ARLINGTON HALE, HELU 215 ALANUI HOTELE, kahi o laua e hauoli loa ai no ka halawai ana me ko laua mau hoaloha a me na poe a laua e hana nei i na niho.

            Ua hiki loa ia maua ke hana a oi loa aku ka maikai mamua o na kauka hana niho o Honolulu nei, a i ole o ke ao nei. Aole he eha o ka huki ana.  O ka maua mau hana no keia au hou.  No ka hana ana aole he uku.  E hoomaopopoia e loaa no maua ma ka Arlington Hale, Helu 215, alanui Hotele, makai o ke alanui Uniona.

Papa Niho Gula           $5

Papa Niho Dala           $5

Papa Niho Maoli         $5

Hoopiha me ke Gula   $1 a pii aku

Hoopiha me ke Dala   50 keneta

No ka Huki Ana          50 keneta

            NA HORA HANA: Ma na la noa e pau ana i ka 6 p. m.; Poaono, e pau ana i ka po; La Pule, e pau ana i ka hora 12.

 

HE ULIA POINO WELIWELI

 

            Hamburg, Iulai 21.  Ua loaa mai la na hoike i anei no ke piholo ana o ka mokuahi Primus me 185 ohua maluna ona.  Ua oki pu ia oia iloko o na mahele elua e ka mokuahi kolo Hansa ma ka muliwai Elbe, ma ka hora 12:80 o keia kakahiaka.

            No ka nui o kapioo maluna o ka mokuahi Primus i kona wa i hookui ai me ka Hansa ua aneane hiki hiki ole na ohua ke hoopaakele ia.  Ua hoea koke mai nae ka mokuahi Dolphin a hoopakele ae la he 60 ohua o ka moku poino, a ua hoea pu mai hoi he mau moku e ae no ka haawi ana aku i na kokua i na olulo!

            O ka hoike a na poe i pakele mai ua hikiwawe loa ka hoea ana mai o keia poino, nolaila, ua loaa ole he wa kupono no kela a me keia e hoopakele ai i kona ola iho.  Wahi a ka @kou hoike e puhi ana ka bana a e hulahula ana kekahi poe maluna o ka oneki i ka wa i lohe ia aku ai kekahi leo papaaina e like me ka hekili.  Ua hoomaka koke aku la ka moku e hio e hiki ole ai na ohua ke ku maluna o ko lakou mau wawae.  O na poe maloko o ka moku ua pii mai lakou ma na alapii aka, he hapanui nae o lakou i koe aku mahope a i hoi pu aku me ka moku no lalo o ka hohonu.  He nui na kane i hoopakele aku i ko lakou ola me ka nana ole ai ia hai.

            Iloko o keia wa o ka pioo, ua pahu ae la na ipuhao o ka moku, a he nui na poe i hoeha i a e na apana laau.

            He nui na poe makaikai i hele mai Hamburg mai no kahi o ka poino i ike ia ai, a iwaena o lakou he mau ohana kekahi a me na hoaloha o na poe i hoopoino ia.  He nui na hiohiona kaumaha i ka wa e pae mai ai ke kino make o ka lakou mau mea aloha, a i ole i lawe ia mai e na poe luu no uka o ka aina.  O ka nui o na kino make i loaa he 45, a o ka nui o na poe i piholo ua koho wale ia, mawaena no ia o ke 50 a me ke 60

 

            Eia mai ke oili pulelo aku nei ka makou hoo@@ha aupuni hou ma kekahi kolamu o ka kakou pepa e puka aku @@i.  He mau pehu no ia a Ke Aloha Aina.