Ke Aloha Aina, Volume VIII, Number 21, 24 May 1902 — Page 1

KE ALOHA AINA

BUKE VIII. HONOLULU, POAONO, MEI 24, 1902.

 

NUI NA HANA INO A NA AMERIKA

 

            Knockville, Tenesi, Mei 4. Ma ka huli hoi ana mai la o C C Brewer, he koa Amerika i ike i ke kaua ma Pilipine a me Samar, a i noho malalo o Kenerala Smith no eono mahina ua hooiaio mai oia i kela kauoha weliweli a Kenerala Smith i haawi aku ai maluna o na koa e pepehi aku lakou i na lio a me na bipi a pau a e puhi aku i na hale a pau i ke ahi, a e kipu aku i na kane, wahine a me na keiki e holo aku ana mai a lakou aku.

            He mea oiaio, ua like no keia kauoha me ke kauha ana aku i na koa e luku aku i na mea a pau no ka mea, he kakaikahi loa na wahine a me na keiki e hiki ole ana ke holo. Ua kue na koa i keia kauoha, a ua like me ka pepehi kanaka , aka, mahope nae o kela luku ia ana, he 46 Amerika, ua pepehia he 146 koa kipi. Ua luku ia e kek kuke o ka puali nona na koa i luku mainoino ia he 16 me kana paha, a o kekahi he 9 me ka laau hili popo. Ua hoihoi pu mai keia haole me ia ka laau hili popo i kaukae i ke koko no ka malama ana i mea hoomanao.

            No ka mea e pili ana no na hoopai hoomainoino ma ka hoopiha ana i ka waha i ka wai, ua olelo ae oia he oi aku ke ino o keia mamua o kou hoolewalewa ia ana me kou manamana lima. Ua ike oia i ka wahine a kekahi alakai Pilipine i hoolewalewa ia ana ma kona lima no eono hora i wahi nona e hahai ai i kahi a kana kane i hele aku ai.  A mahope o ka hiki hou ole ana i keia wahine ke hoomanawanui i na ehaeha ua hoike aku la oia. Ua hauoli au i koʻu kaawale ana mai wahi a Brewer, a aole hoi au e aa e hoa hou aku i kela mau hana.

 

            E lawe nui i KE ALOHA AINA,  i ke mau i na mea hou o keia mau la e nee nei.

 

IKE IA NA HIONA O KA LUAI PELE

 

            I ke ahiahi Poaha nei i ka wa a la la i napoo aku ai, aia hoi, ua ike ia aku la kekahi mau hiona kamahao iluna o na aouli oia kekahi ula wena me he hale pauahi ala me ke kahuli ae a ua like me ka ula o ke koko. He nui na poe i hoopihoihoi ia no keia ula kupaianaha oia liula ahiahi, a ua manao kuhihewa kekahi poe ua pau na malalo o Waianae i ke ahi.

            Aole nae pela ka manao o na poe akeakamai o keia kulanakauhale. Ua olelo ae lakou o keia mau hiona kupaianaha i ike ia a e ike mau ia nei mamua o ka puka a mahope o ka napoo ana o ka la, a hana ia no ia e ka uwahi a pele i manaoia mai ka luapele mai o Mauna Pele, nana i hooneoneo aku i ke kalanakauhale o Sana Pierre. O ka uwahi oia luai pele nui ua pahola ae ia mana kihi eha o ka honua nei a hoea loa mai la i Hawaii nei.

            Ma ka lakou hoike ua piha ka lewa i keia wa me ka uwahi a pele, a ua hiki no ia ke ikeia aku e na mea a pau me ka hoohana ole ia o na ohe hoonui ike.

            Ma ka hoike a na poe kahiko, o na hiona e ike ia nei i keia mau la ua like loa no ia me kela luai pele nui i ike ia ma Karakota. Ua pouli ka lewa me kona uwahi a ua hoea loa mai i Hawaii nei. O ka mamao o Karakota mai Hawaii aku nei he 18, 400, aka, iloko nae o eiwa wale no la mahope iho o kona pahu ana, ua ike ia ka uwahi pele maanei. Oia luai pele he nui no na ole i poinao, aka, aole nae i loaa aku ka weliweli o ia luku e like me ka luku ia ana mai nei o Sana Pierre.

 

            O ke kanaka hupo hoolilo no oia i ka wahine i hoa paio nona a o ke kanaka naauao he hilahila loa oia i ka paio ana me ka wa niue.

 

HOOKAAWALE IA MAI KA HOOMANA.

 

Mr. Lunahooponopono o ka Nupepa ALOHA AINA.

Aloha oe:

            E oluolu oe e hookomo iho i kela mau manao i hoike ia maluna ae. Pauwela, Mei 17, 1902. I ka la 20 o ka mahina o Aperila i hala aku la, ua noho ka Aha Mokupuni o ka ekalesia o ka Hoomana Karistiano Naauao, ma kahi a me ka manawa i hoike ia maluna ae nei, a ma ia noho ana o ua Aha Mokupuna ala i noho hoomalu ia e Rev. J.E. Kekipi , ka persidena oia ahahui, ua laweia mai he olelo hooholo a me palapala hoopii i kakauinoa ia e 32 inoa o ua ekalesia ala e kekahi Lunakahiko o ka ekalesia no ka hookaawale ana aku ia J.P. Kapihe mai keia ekalesia aku ma na ano a pau, no na kumu hoopii he 15 oia hoi ka hoao ana e wawahi i ka ekalesia o ka Hoomana Karistiano Naauao i kukuluia ma Pauwela, Hakaualoa, mokupuni o Maui, ma ka noonoo pono ia ana o keia mau kumu i hoopii ia ai o J.P. Kapihe, ua hooholo ua Aha mokupuni ala e hookaawale loa ia o J.P. Kapihe mai keia ekalesia aku a mai keia hoomana aku. E like me ka Iesu i hoike ai ma Ioane mok. 15:2.

            O kela laau a me keia laau i hoohua ole mai i ka hua maikai e kua ia oia ilalo o hoopau iaia aku i ke ahi pio ole, i ike mai ai na hoahanau a pau e noho ana ma keia paeaina iloko o keia ekalesia a me keia hoomana, ua hookaawale ia ko kakou hoa paahana mai ka hana aku o keia hoomana.

Me ka mahalo,

Rev. Daniel Kaleialoha.

Rev. J E Kekipi, Peresidena o ka Aha Mokupuni o Maui.

 

E @@@wa ae e na makamaka he lah@@ i ka hoolaha a K. Isoshima e puka ae o nei ma ka pepe o @@@@.

 

MAKE O DAVID KANEWANUI.

 

            Me ka minamina a me ka luuluu makou e hoike aku nei i ka lehulehu o David Kaukaha Kalawaianui Kanewanui, ua hala ua nalo, ua moe aku la i ka moe kapu o Niolopua, a ua pau hoi kana hana ma keia ao inea. Ua hoea mai kona hopena mahope o kona hoopino ia ana e kekahi poka mai ka pu panapana aku a kekahi o kona hoa kula nona ka inoa o dan Io, he mau pule i hala ae nei. Ua hoihoi ia aku oia ma ka haukipila me ka manaolana ia malaila e loaa ai iaia na lapaau maikai ia ana. Aka, aole nae pela ka manao o ka Mea Mana Loa, no ka mea ma ka hora 1:45 p.m. Poaha nei, ua oluolu i kona mana oikelakela ka lalau ana mai i ka hanu ola iloko o David Kanewanui a lawe palanehe aku la iwaena o na makua a me ka ohana e poai puni ana i kona moe.

            Mohope iho o ka make ana o Davide Kanewanui ua hoihoi ia mai la  kona kino puanuanu no ka hale hana kupapau o Mrs. Williams, aia oia malaila kahi i waiho ai a hiki i ke kakahiaka La Pule a ma ia wa e lawe ia aku ai oia no ka halepule o ke Kula Kamehameha, a mailaila e malama ia mai ai kona anaina hoolewa no ka ilina o Kawaiahao.

qUa hanauia o david Kaukaha Kalawaianui Kanewanui, ma Hanalei, Kauai, i ka la 25 o Iulai, 1875, mai ka puhaka ma o Mr. a me Mrs. Samuel Kanewanui. I kona wa 6 makahiki ua komo oia i ke kula apana o Hanalei malalo o ka noho kumu ana a Hnery Van Geisen. I ka 12 o kona mau makahiki ua komo oia i ke kula o Kamehameha, a oia kekahi o na haumana mua loa i ka wa i hoomake ia ai o ia kula malalo o ke ao ana a Mr. Oleson. He ehiku makahiki o kona noho ana maloko oia kula ua puka po-

 

E nana ma la aoao @