Ke Aloha Aina, Volume VIII, Number 20, 17 Mei 1902 — Page 8

KE ALOHA AINA

8          KE ALOHA AINA, POAONO, MEI 17, 1902.

 

MOOLELO HOONI PUUWAI

- NO KE -

KAKELA LANAFODA

- KA -

Ipuka o ke Kuewa me ka Aea.

- KA -

Pua Lilia Ahiu o Sandela.

            He hora mahope iho ai ke kakela holookoa iloko o na eheu meha anoano o ka hakanu a me ka hamau, a na ka malamalama o ke kakahiaka o kela la kamahao o ka haakokohi a hanau ia ana mai o ka hooilina o ke kakela i hoala aku i na ola uhane a pau e moe ana malalo o kona mau eheu e ala ae a e hauoli pu me ka mea nona ka la.

            Ua hoike mai na lani i ka nani a kalae o kona mau paialewa, a o na huina auoli hoi i ka nani a me ka malamalama o ka la me he la o laua pu kekahi iloko o na ohohia hauoli ana me ka mea nona ka la kua koko.

            Ma ka papaaina hoomanao hauoli a ka mea nona ka la hanau ma ua kakahiaka ala, ua inu a ua ai alawa i ka lokomaikai me na leo kalokalo e hoolaupai ia mai ke kihapai o ka hooilina o ke Kakela Lanafoda me na mamo a hooilina hou aku e hoonalowale ole ia ai ka hale o Lanafoda ma ka hoomanaoia ana mailoko mai o ia hale i puka a i hoie mai ai he koa kaulana ina la o ka Moi Kale o na Pelekane.

            Oiai kela papaaina e ohohia a e hauoli ana i ka lokomaikai o ka mea nona ka la hanau, aia ke kaoo lio o na moho lealea ke moe kahi mai la no ke kakela, a ua hookipa ia aku lakou no ke kuea laula o Leinafoka Paka no ke kukulu ana ae i ko lakou mau hale hoolulu a hoomaha mamua o ke komo ana aku i ka laina lealea.

            O ka make wai a me ka make a ka pololi ai ua hoolawa ia mai lakou me ia mau mea, a hiki i ko lakou haalele ana ia Lanfoda a huli hoi aku no ko lakou mau home me na manaolana poho o keia huakai moewaa o ka hele ana mai.

            Hala aku la ka la hanau me kona mau hauoli, a o keia la hou e ike ia nei, o ka la no ia e hooko ia ai ka iini a me ka pula kaumaka o na moho hookelakela ikaika no ke kaili ana ae i ka hanohano o ka inoa moho a me ka papahi haaheo ana i ka makana.

            E like me na mea i ike mau ia iluna o na kahua mokomoko a pau ka loaa ana he ilamuku no ka la a me ka papa hoonohonoho o na lealea i hoike ia a me ka manawa e hoomaka ai pela no keia. Ua lilo ae o Haku Semafila i ilamuku no ka la, a o kona kanaka puhi o-le no hoi ka mea nana e puhi ka o-le hoailona.

            No kekahi mau minute na hooponopono ana ua kukala mai la ka ilamuku ua makaukau oia e hooko i kana hana ma ka akoakoa ana aku o na moho a pau i makaukau e komo iloko o na lealea i hoikeia, ke kaka pahi, hoolele koi kaua, oniu laau ihe, kaa laau, mokomoko kulakulai a nui wale aku o na hakoko oia au kahiko, a iwaena o keia papa hoonohonoho o na lealea a ka ilamuku i helu papa aku ai, ua ike ia he elua wale no mahele o ka papa hoonohonoho o na lealea i komo ai na moho hookelakela a koe hookahi oia wale no ka moho i aa e paio i na lealea a pau me like me ka papa hoonohonoho i helu ia aku ai e ka ilamuku, a o na lealea hoi a kona mau hoa moho i aa ai e hoike i ko lakou ikaika iluna o kahi lealea oia no ke kaka pahi maluna o na lio a me ka oniu ana i na laau ihe maluna no o ka hokua o na lio.

            He 21 ka nui o keia poe moho, a he 20 o lakou ma kela mau lealea ae, a o ka mea hookahi iho i koe, ua aa oia e halawai me kona hoa paonioni ma na lealea a pau, aka o ka mea apiki wale no owai auanei ka moho e aa aku ana iaia, a ua lilo no hoi keia aa ana a ua moho ala i mea pihoihoi no kona mau hoa a ninau ia lakou iho owai la hoi keia diabolo o na medala klia a mai na kaiaolu heu mai la o Ladana oia i hoea mai ai.

            O keia ninau a ua poe ala he ninau paakiki a pohihihi no ia e loaa ole ai he makaula nana e hoikeike mai i ke ano a me ka mea nona ua oiwi kino ala a lakou e hoohuoi nei, a ina lakou e mahui a lohe iki, he mea oiai me ka hoopaapaa ole e kiola no lakou i ka lakou mau mea kaua ilalo o ka honua, a auhee aku lakou mai Lanafoda me ka huaolelo ua auhee a ua haule pio lakou mailuna aku o ke kahua lealea. No ka mea, o ua kanaka a moho ala a lakou i hoohuoi wale iho ai no e kuu mea heluhelu aole ia he mea e ae, aka, o ka hooilina no ia o Lanafoda ka liona opio o ke kahua mokomoko.

 

KA MANA PIHA I LOAA IA KAPENA.

            I ka la mamua o ka haalele ana iho o ka moku lawekoa Buford no Kapalakiko, ua haawi ia ke kauoha i ke kapena o ua moku ala mai ke kauka o ke awa nei e loaa no iaia he palapala hookuu mai keia awa aku ina e pau na koa maluna o kona moku i ka hoi e aku mamua o ka napoo ana o ka la, no ka mea, he moku oia i holo mai mai kahi ma'i mai. Ua ae aku ke kapena i keia manao o ke kauka me ka hookuu ana i na koa, na luina a me na aliikoa no uka nei o ka aina me ka haawi aku i ke kauoha e hoi aku lakou i ka moku ma ka hora 6 o ke ahiahi, a o kahi poe hoi ma ka hora 11. Aka, i ka hala ana ae o keia mau hora i kauoha ia ai, aia ma kahi o iwakaluakumamalua mau luina o ka moku a me 75 koa i hoea ole mai ia manawa, nolaila, iloko o ka piha inaina o ua kapena ala ua haawi koke ae la oia i kana kauoha aole e ae ia keia poe kue kauoha e hoi aku iluna o ka moku, a e hookiki ia aku lakou i ka wai i wahi no lakou e hookaawale aku ai mai luna aku o ka uwapo. O keia kauoha ua hookoia e na poe oluna o ka moku, a ua kikiia mai na poe a pau e maalo ae ana maluna o ka uwapo, a iwaena o na poe i hoole ia ko lakou hoi ana aku no luna o ka moku he mau aliikoa kekahi. Ua hoole loa ke kapena o ka Buford i ka hoi ana aku, a malalo wale no o kona hoomalimali ia ana i ae mai ai oia, aka, ua haawi aku no nae oia he kauoha oolea e hookaawale loa ia keia poe kue kauoha ma kekahi okoa aku o ka moku.

 

HE AHAMELE NUI MA KAWAIAHAO.

            Ke haawi ia ana no ka pomaikai o ia ekalesia ma ka hora 8 o ke ahiahi o keia Poaha aku, Mei 22, ma ka hale malalo. He nui na puukani e hoea ae ana ma ia po. Nolaila, ke konoia aku nei na mea a pau e naue ae ma keia po lea o Halalii.

Papa Kuhikuhi.

1. Chorus - Norma Cometh     Kawaiahao Choir

2. Duet - Tell me pretty maiden          Mrs. Alapai and Mis J. Keliiaa

3. Song - Kiulani                     Moana Quintett Club

4. Hawaiian Chant - He Inoa no Kamehameha          Kamehameha

5. Selection -

            a Flute Solo Always    Kealakai

            b Sexphone Solo Star  D Nape

            c Duet Alice                            D Nape & Kealakai

6. Song - E o e Liliu    Hawaiian Double Quartet

Hoomaha.

7. Song - Ching-a-Ling-a-Ling                       Hawaiian Double Quartet

8. Song - Uina ka Wai o na Molokama           Moana Quintet Club

9. Song - When Charming Spring draws near            J H Naone

10. Song - Nuuanu      Kamehameha Boys' Glee Club

11. Duet - The Larboard Watch          J H Hakuole & E K Lilikalani

12. Song - Tom the Piper's Son           Kamehameha Boys' Glee Club.

            He 50 keneta ka uku komo.

 

He Makana!

            Ua makemakeia ka helu o ka LAHUI HAWAII o ka la 8 o Iune 1901. O ka mea e loaa ana o keia kope e lawe mai ma keia keena a e loaa no ka makana.

Hawaii @@@@@@@ Lahui.

 

            Ke hoao nei o Kapena Johnson e lawe ia kona puali i Sana Lui e hoikeike a e hookuku ai hoi me kela a me keia puali o na mokuaina a me na teritori o Amerika e hoea ana malaila. No ka mea, he waihona dala kekahi i hoahu ia no na puali lahui.

 

(Mai ka aoao 7 mai.)

He oiaio ua pii ae la ke kulana o ua Amada nei iloko o ka hiehie a me ka ui, ka oluolu a me ka waipahe, a o keia makaukau a pau i loaa i ka wahine opio mai kona makuakane hookahi wale aku no.

            Hala ae la he mau makahiki a ko Osaka kaawale ana, aia hoi, ua kipa hou mai la o Konela Belegave i ka home o kona luaui makuakane i make. O keia wa a Belegave i kipa hou aku la mahope koke no ia o kona mare ana i ka wahine, aka, aole nae oia i lawe pu mai.

            Ma kela kipa mua ana mai a Konela Belgrave e uuku ana no o Amada, aka, i keia ike hou ana he wahine opio oia e haiamu ia ana e ka ui a me ka nani, a mai ia sekona mua loa i haule aku ai ka onohi ike a ua konela nei maluna o na nanaina nohea o Amada, aia na kuko lapuwale ke hana mao ole ala no ka wawahi ana i ka maluhia o ka wahine opio.

            Ua hoolauna ia aku o Amada e kono makuakane imua o Konela Belgrave, a mai ia wa mai ua hoomaka iho la oia e imi i ke alahele ehookoia ai kona mau kuko lapuwale maluna o ke kaikamahine a kona hoaloha. Haawi ae la o Belgrave he mau paina no Amada me ka hoao ana i kela a me keia wa e loaa iaia na manao aloha o ka wahine opio. Iloko o keia mau hana a pau a ua konela ala, aole loa i komo na manao hoohuoi iloko o Fitizilana oia he pakaha ke hoohalua nei i kona mau ipuka. Ua haawi aku oia i na paulele ana maluna o kona hoaloha i ka maluhia o kana kaikamahine, me he hoahanau ponoi ala, ua hookuu aku oia ia laua e noho kokoolua, a e hele holoholo me ka hopohopo ole.

            Pela no me Amada ua haawi aku oia i kona mau hoolaulea ana no ka hanohano o ka laua malihini ma ka himeni a me na hookaau olelo ana, me ka mahui ole ae eia keia mau hana ke hahao aku nei ia laua iloko o na popilikia.

            I ka hiki hou ole ana i ua konela ala ke uumi hou iho i na manao uilani a kona maemake ua hoike aku la oia i ka mea huna iloko o kona puuwai.

 

            O Welakahao a me ka Pakipika na hui e huki ana i keia po no ka inoa moho a me $200 makana.

 

ILINA KUPAPAU O PUEA.

            Ke kauoha ia aku nei na poe a pau loa i loaa ko lakou mau ilina kupapau ma ka Ilina Kupapau o Puea, Honolulu, Oahu, e akoakoa ae lakou a pau loa ma ka hora 1 p. m. o ka La Sabati, Mei 18, 1902, ma ka Papaakea, no kekahi hana ano nui i manao ia. E hoolohe i keia kauoha, mai hoopalaleha i hookahi manao me ka lokahi.

A. B. L. HAO. Luna Nui o ka Pa Ilina Kupapau o Puea.

            Kapaakea, Honolulu, Mei 13, 1902.