Ke Aloha Aina, Volume VIII, Number 19, 10 May 1902 — Page 2

KE ALOHA AINA

2          KE ALOHA AINA, POAONO, MEI 10, 1902.

 

HE MAU PALAPALA HOALOHALOHA

IA MRS. MARAEA KAULIA

Palapala Hoalohaloha a na Lala i ka Hui Aloha Aina o na Wahine Hawaii.

            O makou o na lala o ka Hui Aloha Aina a na Wahine Hawaii.

            Mamuli o ka lawe ana aku a ke Akua Mana Loa i ke ola makamae o kekahi o ko makou paana iloko o ka hana a makou i manao ai he pono no ka aina, oia hoi, ka mea hanohano James Keauiluna Kaulia.

            Ke komo pu aku nei makou iloko o ke kaumaha me ka wahine i hooneleia i ke kane, a ke nonoi nei makou i na Lani e hoomama mai o kona mau luuluu, a e loaa iaia na hua maikai ku i ke aloha a kana kane i hala aku la, oiai, oia ma keia ao.

            He alakai ikaika o James Keauiluna Kaulia ma ka aoao o kana mea i manao ai he pono no ka aina a no ko makou ike i keia hana ku i ke aloha i kona lahui, nolaila, ke hoike aku nei makou i ko makou aloha palena ole nona, me ke noi ae i na lani, e hoohua ia mai kana hua i kanu ai iloko o kela a me keia Hawaii ponoi, i loaa ai he kia hoomanao nona i na wa a pau.

            No ka ohana i hooneleia i ka makua nana e imi ka pono o keia ola ana, ko makou aloha pumehana, me ka lana o ko makou manao e hoike mai no na Lani i alanui e loaa ai ia lakou na pono o keia noho ana.

            No ka Lahui Hawaii kekahi a makou e minamina ae nei, oiai, ua lawe ia aku kekahi kakoo ikaika o ka lahui, ke alakai wiwo ole o kakou, ua hala, ua nalo, a ua hoonele ia kakou i kekahi o na pouhana, nana i kakoo i ko kakou mau pono i na la i hala ae a me keia mau la e nee nei. Me ka luuluu.

            O makou iho no na lala o ka Hui Aloha Aina Wahine Hawaii, ma o ko makou mau komite 'la.

Kahalewai Cummins,

Lucy K Peabody,

Hattie Hiram,

Jane Clark,

L K Mahelona,

Abbie Hopkins,

Lilia K Aholo,

M K Stillman.

            Honolulu, Apr. 26, 1902.

 

Palapala Hoalohaloha a ka Ahahui Puuwai Lokahi o ka Aoao Home Rula Repubalika o na Wahine o Honolulu, i ka Wahine Kanemake Mrs. Maraea Kaulia.

            O makou o na Lala o ka Ahahui Puuwai Lokahi o ka aoao Home Rula Repubalika o na wahine o Honolulu, Mokupuni o Oahu.

            Mamuli o ka make ana o kekahi alakai kaulana a wiwo ole o ka lahui oia no o James Keauiluna Kaulia, ua hoohakahakaia a hoonele pu ia ka lahui me kekahi alakai makaala a wiwo ole, e a'o mai ana e kupa no ke aloha i ka aina. Ua hoolohe ia ia leo e makou, a me ka makou mau kane, a me na keiki, a mamuli o kona make ana ua ili iho na haawe kaumaha maluna o makou a me ka wahine i hooneleia i ka makua ole; nolaila,

            E hooholoia. Ke komo pu aku nei makou i ke kaumaha a me ka ehaha, luuluu, me ka wahine kane make, Mrs. Kaulia, a me James K. Kaulia Jr.

            Hooholoia. Ke komo pu aku nei makou me ka makuakane i hoonele ia i ke keiki ole me ka u a me ka ehaeha pu.

            Hooholoia. Ke komo pu aku nei makou me ka Peresidena o ka aoao Home Rule Repubalika me kona mau luuluu a ehaeha no kona Hope Peresidena James Keauiluna Kaulia.

            Hooholoia. Ke pule nei makou i ke Akua e hoomama ia ka naau luuluu o kakou a pau. Na ke Akua i haawi mai a na ke Akua i lawe aku, e hoomaikai ia kona inoa.

            O makou,

Mrs R N Boyd, Peresidena.

Mrs D Kalauokalani, Puuku.

Mrs Noah Hiram, Kakauolelo.

 

Olelo Hoalohaloha a ka Ahahui Aloha Aina o Kona Akau ia Mrs. Kaulia a me ka olua lei aloha a me ko olua papa.

            Oiai, ua oluolu i ka makua mana loa ke kahea ana mai i kau kane i aloha ia e hoi aku e hoomaha i kona luhi, oiai oia e hana ana a e hooikaika ana no ka pono o kona aina aloha; ka mea a Solomona i olelo mai ai; Aole mokuhia ke aloha i na waikahe he nui. Ua hala o James Keauiluna Kaulia ka makua o ka lehulehu ka mea nana kela olelo kaulana e poina ole ai i na hanauna ma keia hope aku a e lilo ia mau olelo i kia hoomanao no kana mau hana i hana ai, oia hoi, "E paio ka lolo me ka lolo."

            A ma ka La Sabati, Aperila 20, 1902, ma ko olua home aloha ma ka Palama, ua lalau mai la na lima menemene ole o ka make a kaili aku la i kau mea i aloha ai, a waiho iho la ia oe a me ka olua lei aloha a me ko olua papa e paiauma aku ma keia aoao o ka moanawai akea no ka manawa mau loa me ke aloha nui.

            Ua hala, ua hala, ua hala ke kanaka hale kipa a ke aloha. Pau ka lohe ana i kona leo aloha, pau ka ike ana i kona mau helehelena. Auwe luuluu wale! Ua hala.

O kupono ka la i Hawaii,

E kali ana ia Maui,

I ka lohiau mai a Honolulu i ke kai,

O ka hapanui no ia o ka manao,

O ka iini noia a ka makemake,

O ka hoolilolilo a lilo i ka wai,

Ua ike maka iho nei au,

I ka nani o Kaala,

Pehu ae la ka lima pehu o Waioli,

Maa-u upeupe i ka Lehua Makanoe,

E hana wale no oe aole e ana,

He kanaka luu mau no kai uli,

He luu maomao au no Halape,

A peahi mai oe owau o maua ia.

            Nolaila ua kau iho maluna ou a me ka olua lei aloha a me ko olua papa ke kaumaha, ka luuluu, ka ehaeha, ka mokumokuahua o ka naau no kau mea i aloha ai.

            Hooholoia, o makou o na lala o ka Ahahui Aloha Aina o Kona Akau, mokupuni o Hawaii, ma o ko makou komite ala, ke komo pu aku nei makou e auamo pu i na haawina a pau o ka ehaeha i kau iho maluna ou a me ka olua lei aloha me ke aloha kuio no kau mea aloha i hala aku ma kela ao me kona haku aloha e heahea mai la ma kela aina maikai ma o ae.

            Hooholoia, ke kalokalo ae nei makou, ka makou pule me ke kino o ke aloha karistiano ma ka paepae eehia o ko kakou makua aloha, ka mea nona ke aloha a me ka lokomaikai palena ole, a nana no e hoomama ae i na kaumaha a pau i kau iho maluna ou a me ka olua lei aloha no ka mea he aloha ke Akua.

            O makou iho no me ke aloha oiaio no ko makou hoaloha i nau palanehe aku la e komo ma ka ipuka o Ierusalema Hou.

J K Laioha,

W K Kia,

J K Peahi,

J E A Kaiewe,

A J Kauhaihao,

Isaac K Davis,

I Peahi,

Keoni Kaehu,

Jno Keaweahawaii,

Joseph Akamu.

            Na Komite.

 

Olelo Hooholo Hoalohaloha a ka Papa Hooko o ka Aoao Kuokoa Home Rula Repubalika.

            Oiai, ua oluolu i ke Akua Mana Loa iloko o kona naauao palena ole, ka omuo ana aku mailoko aku o ko kakou noho'na lehulehu ana i ko kakou hoa makaainana hanohano a i aloha niu ia James Keauiluna Kaulia.

            Oiai, iloko o ka noho'na pili paa a me ka launa oluolu ana, i paa ia a i ahonui ia oia a me kona lahui, iloko o na makahiki loihi i kaa hope ae nei, pela no i hooi ia ae nei kona makahehi nui ai, kona hilinai nui ia me ke kupono, a na ia mea i kono mai ia kakou e kakau ia, a e hoopaa ia maloko o ka buke moolelo o keia ahahui ko kakou mau manao kulipolipo o ke aloha a me ka hoomaikai aku no kana mau hana a me ka minamina nui no hoi no kona haalele ana mai ia kakou, nolaila, e

            Hooholoia, e hoopaa a e hoomau aku keia Papa Hooko o ka Aoao Home Rula Repubapalika i kona hoomanao ana no ka malamalama a me ka piha i ka naauao, ka hoomanawanui, a me ka hanohano i loaa iaia mamuli o ka moakaka a me ka mohala o ka ike hookele hana i hookoia iloko o na makahiki loihi i kaa hope aku, e ko kakou hoa makaainana hanohano James Keauiluna Kaulia, ma kona ano he alakai no ka lahui, e hooko ana i ko lakou makemake a me ka pulama ana i ka hanohano o kona lahui ponoi.

            E hooholoia, mamuli o ka haalele ana mai i keia ola ana, o ko kakou hoa makaainana hanohano i aloha nui ia, oiai oia e paa ana i ke kulana ma ke ano Hope Peresidena a he Luna Hoomalu o ka Papa Hooko o ka Aoao Home Rula Repubalika, ua hoohakahaka ia ia makalua me ka hiki ole e hoopihaia me ka maalahi, a ke hoomaopopo nei kona mau hoa luhi i keia mea me na hoohuoi kaumaha no ka hoa i hala i kau iho maluna o lakou, i ka Lahui i aloha nui ia, a

            E hooholoia, ke haawi nei na hoa a pau o keia Papa Hooko i ko lakou aloha kulipolipo o ka paumako i ka ohana i hookaumaha ia me ka manaolana e hoomama ia na luuluu a pau ma ka lokomaikai o ke Akua Mana Loa, e

            Hooholoia, e haawi ia i kope o keia olelo hooholo i ka ohana o ka hoa i hala, a e pae ia ma na nupepa Hawaii o keia kulanakauhale. Me ke aloha paumako,

            O makou no me ka haahaa na Komite.

David M Kupihea,

Lunahoomalu.

Jno Emmeluth,

J W BIbikane.

 

Palapala Hoalolooha no James Keauiluna Kaulia.

            O makou o na lala o ka Ahahui Home Rula Repubalika o Laiewai, mokupuni o Oahu, Teritori o Hawaii. Mamuli o na lono i loaa mai ia makou, ua haalele mai i keia ola ana o James Keauiluna Kaulia, kekahi alakai o ka aoao kalaiaina Home Rula Repubalika. He kanaka koa a kupaa no ke aloha i kona aina hanau, a ua alakai oia i ka hapanui o keia lahui me ka wiwo ole, a ua hoolohe ka hapanui o keia lahui ma kona alakai ana.

            Nolaila, i ka wahine kanemake, Maraea Kaulia a me ka olua keiki. Ke komo pu aku nei makou iloko o ke kanikau luuluu a me kumakena pu me olua.

            Nolaila, e hooholo pu ia ke noi nei makou i na mana lani e hoomama ia mai ko olua mau luuluu a kaumaha, a pela pu hoi me ko makou naau i piha me ka walohia no James Keauiluna Kaulia, ko makou alakai ahonui. E hooholo hou ia e hookomo ia keia mau olelo hooholo ma na nupepa.

            O makou iho no,

Waihoilaie,

Kumulau,

Daniele,

Nehemia Hiapoole,

Mrs. Lahapa Keanu,

" Kaluapalaoa.

            Laie, Apr. 24, 1902.

E nana ma ka aoao 3.