Ke Aloha Aina, Volume VIII, Number 14, 5 April 1902 — Page 4

KE ALOHA AINA

POAONO, APERIL5, 1912

 

Ke Aloha Aina

Hookumuia no ka

P@maikai o ka Lehulehu, a he Nu

Pepa na ka Lahui Hawaii

 

EDWARD L. LIKE.

Lunahoononopono.

JOSEPH K. LIKE.

Luna Hoopuka

ALEX. NAWAHI.

Luna Hoohana.

EMMA A. NAWAHI

Puuku o KE ALOHA AINA.

 

PUKA PULE

 

E hoopuka ia ana ma na Kakahiaka Poaono a pau.

No ka Makahiki……….$2.00

No ka Eono Mahina…….1.00

No ke Kope Hookahi……..05

 

KEENA HANA.

            Ma alanui Moi, Leleo, Helu 370, Kokoke ma ka Hale Hoolulu Kaaahi.  Pahu Leta 513.

 

HONOLULU ……….APR. 5, 1902

 

            AOHE wahi lilo o Hilo ua-welo ia Honolulu nei i keia mau la; hele a ku a uluhua na kohu ua no Hilo, ka hana nawale i ke pili.

 

            MA keia Poakoiu ae, Aperila 9 e koho balota kuikawa ai o Honolulu nei, i pani no ka Lunamakaainana i make aku nei i Amerika.  O ka apiki ke hakaka e mai nei no na moho.

           

            O @ELA leta i hoolahaia e ke Kuokoa namu o kela pule aku nei i hala, no kekahi hana hoomainoino a ka Luna Nui o ka Panalaau o Molokai i hana ai i kekahi kanaka ma’i lepera.  Ma ka holo ana aku nei a na poe nieniele o ka Papa Ola.  Ma ko makou lohe mai ua oiaio kela mea i hoolahaia.

 

            MA ka halawai a na Repubalika i malamaia ma ka Poakolu nei ma Waikiki, mauka ae o ka Hotele Moana.  Aohe he nui o na poe i hiki ae he kakaikahi loa, me he ala na piha paha na wahi kauna eha a oi iki.  He ma’u no ia i ka la luu loli o na haku.

 

            HE MAHALO makou i ka apo like ana aku nei a na aoao lahui elua a kakoo ia A. Daraea o Kauai i moho ma ka aoao o ka lahui.  Ua hoohui like na Home Rula me na Demokalaka o ka lakou moho ia.  O ka apiki hoi ke hoopaapaa mai ne no ka paa ole o kona inoa ma ia Apana.

 

AOLE HE OIAIO.

            Maloko o ka nupepa Kuokoa Home Rula o kela mau pule aku nei ua hoopukaia ae he manao ua noi aku ka o Kiaaina Dole ia Kimo Boe ka Luna o na Hana Hou e waiho mai oia ia kulana ana e paa nei.  Ua lilo keia i mea kamailio nui ia a ua hoea loa aku na niuau imua o Kimo Boe no ka oiaio o keia mau mea e wawa nei a me ka ole, a o kaua pane i hoike mai ai aole he oiaio aka, he mau hoonuinui olelo wale no ia na ia nupepa,  Aole loa he Manawa ona i noiia aku ai e Kiaaina Dole e wai@o mai i kona kulana.  Pau ole no paha ka epa o kakou. 

 

C.W. AKEPOKA UA HOI MAI LA.

            Maluna o ka mohuahi Alameda i hoea mai la inehinei mai Kapalakiko mai, i huli hoi mai ai o C.W. Akepoka no Honolulu nei, mahope o kona hoohala ana he mau makahiki ma Kapalikiko.  O Akepoka kekahi o na haole aloha aina i kupakuia aku e ke Aupuni mai Hawaii aku nei mahope o kela kaua kaulana o Kaimana Hila akahi no a hehi hou na kapuai i ka aina ona i hoomaewaewa ia ai.  Aloha a nui e ka makamaka.

 

HOPUIA O J.L. KAULUKOU NO KA HOOWAHAWAHA AHA, MA KE KAUOHA A LUNAKANAWAI GIA.

 

            Ma ka la mua o Aperila eepa, na hoouna aku la ka Lunakanawai Gia i ke makai, e hele a hoike aku ia J.L. Kaulukou e hiki aku imua o ka Aha i kahi la ae, ma kea no he hoike no ka hihia waiwai o Jos. Lazarus Ua hole aku o Kauilukou i ua makai ‘la me ka i aku, aole oia e ae e hele i hoike no ia hihia ma ke kahoha a ua Lunakanawai aia, aia a uku ia mai oia no kona hele ana aku i hoike.  Hiki ae la i ka wa i kauoha mai ai, aole no oia i hoea aku.  Ia wa i hoounala mai ai ka makai me ka palapala hopu no ka “hoowahawaha aha” a laweia aku la o Kaulukou imua o ua Lunakanawai ala me ka i ia mai; mamuli o kou hooko ole ana i ke kauoha e hiki mai, nolaila, ua hopuia oe no ka hewa “hoowahawaha aha.”  Ua hole aku la oia aole i pili ka hewa hoowahawaha aha iaia; a ninau ia mai la oia i ke kumu ana i hooko ole ai ia kauoha; ua pane ia aku, o ke kumu; aole ona makemake e hele mai i hoike, oiai, he hihia waiwai ia, a he mea pono e ukuia kona Manawa o ka hele ana mai e hoike no ka pono oia hihia.  Ua ninau hou ia mai la oia, ina paha ua ike oia he kanawai no kekahi e pili ana o ia mea; ua ae aku la o Kaulukou a noi aku la e haawiia mai i Manawa nona e hoi ai e huli i na kanawai ala, a hookuuia mai la oia no ka hoea hou ana aku ma kekahi la ae e pane no kona hihia.

            Hoonahoa no paha ka poe ike kanawai, ina ia he poe ike kanawai ole ua pipika wale iho la no ke ike ka i ka makai ua kau e ka weli i ka leo no o ka Lunakanawai ua haalulu e.  Aka, i na poe ike kanawai nae, ia hoopuhili aku no ka ike o kahi i kahi.

            Owai ana la o laua nei ke lanakila ana.

 

KUMUMANAO.

E Noho Hemolele Ana Anei me ke Kina Ole na Haipule I ka wa Milenio?

            O ka milenio, he wa hoomaha o ka honua, main a inea mai o ka hewa, he wa maluhia, he manawa loihi hoi, he tsusani na makahiki ka manawa maopopo e hoopaa la ai o Satana i ke kaulahao ka makua o ka ino, ke alakai e haumia ai na kanaka a pao, ke kahua e hoea mai ai na poino o ke kino a me ka uhane, ke delagona nui ulaula, ka moo hoowalewale.  He wa e noho hauoli ai na haipule me ka manao lokahi, e hoonani ana i ke keiki hipa a ke Akua.

            Maluna o keia Manawa, ke ku kuluia nei keia ninau.  E noho hemolele ana anei me ke kina ole na haipule i ka wa milenio?  He mea ano pohihihi no ka pane koke ana aku i keia ninau, aka, he hiki no paha ke hoakaka aku i kekahi mau mea pohihihi.

            1.         Ihea e hiki mai ai ka Milenio?  I ka Lani anei?  I ka lewa paha?  Aole i ka honua nei no.  E loli ana anei na kanawai o ka honua?  E hoopau ana anei ka hoino weliweli a ke Akua maluna o ka honua i ka wa i haule ai ko kakou mau kupuna mua loa i ka hewa?  Aole paha pela, aka, o ka mea maopopo oia keia:  Na ke Akua no ka hoino i ka honua, a nana no e hoopuka mai ana i keia Manawa maluhia no ko ka honua apau, nolaila ina manao ke Akua pela, alaila, ua hiki no, no ka mea, oia no ka mana maluna o na mea a pau.

            2.         Kea no o ka noho hemolele ana o na haipule i ka Manawa milenio.  O ka hemolele anei a ka Haku i kauoha aku ai i ka poe haumana ana he 12, i ka i ana aku, “E hemolele oukou e like me ka hemolele o ko’u makua iloko o ka lani.”  A i ole o ka hemolele i loaa i ka haipule mamuli o kona mihi ana i kona mau hewa, a manaoio aku i ke Haku Iesu?  Ae.

            Ano, e na makamaka, ina o na hoakaka keia e pau ai ka pohihihi o keia mea, alaila, ua makaukau no e pane ia ka haina o keia nanehai, a oia keia Ae.  He mau kumu no o keia ae ana.

            I.          E hoopaa ia ana o diabolo i ke kaulahao.  O diabolo, o Satana no ia o ka enemi o ka pono a o Alopeka e ino ai ka mala waina, e haumia a ino ai ka poe haipule.  E hoopaa ia ana me ke kaulahao nui, a hoolei ia iloko o ka lua hohonu, hookahi tausani makahiki ka lihi a oia hoi ka wa o ka milenio, ka Manawa hoi e ninau ia nei; a ina e paa o Satana i ke kaulahao, alaila, aole mea e ae e hoohaumia i ka haipule, aka, e noho no oia me ka hemolele iloko oia Manawa.

            II.        E noho maluhia ana ka honua iloko oia Manawa.  E pau ana na kue, na mokuanana, na kaua aku kaua mai, a e noho kui kahi na aupuni a pau o ka honua.  E pau ana ka akiaki, ka holoholo olelo, ka imihala, a me na mea ino a pau, na mea hoi e kina ai ka haipule.  Oia hoi ka ke kaula ka Isaia i olelo mai ai ma ka mouna 11:6-9.  Alaila, e noho pu no ka ilo hae me ke keiki hipa, a e moe pu no ka leobati me ke keiki kao, o ke keiki hipi a ma ka liona hou, a me ka hipi i pulanuia e kuikahi no lakou, a na ke keiki uuku lakou e alakai.  E ai pu no ka hipi wahine me ka hea, e moe pu ka lakou mau keiki, a e ai no hoi ka liona i ka mauu maloo me he hipi la.  E paani no ke keiki ai waiu ma ka lua o ka moo make, a e kau no ke keiki i ukuhiia i kona lima ma ka lua o ka moo pepeiao hao.  Aoha mea hana hewa, aole mea luku ma Ko’u mau kuahiwi hoano a pau, no ka mea, e piha ka honua i ka ike ia Iehova, e like me ka maona i uhiia i ke kai.

            A ina pela ka noho ana o ka honua iloko o ka milenio, alaila, aohe wahi e hoea mai ai ke kina e hoohaumia i ka poe haipule aka, e mau ko lakou noho ana me ke kina ole.  A mai ka noho hemolele ina ole o na haipule iloko oia Manawa, oia paha ke kumu nui e hookuu hou ia mai ai o Satana mahope iho o ka milenio, e hoao hou i ke kupaa o na haipule, a o ka poe kupaa, e kau mai ana ka lei o ke ola ma ko lakou poo.

            J. Kalihiuka.

            Honolulu, Mar. 12, 1902.

 

E KUOKOA ANA O CUBA.

            Wasinetona, Mar. 25.  Ua hoopuka ia ae ia ke kauoha pili aupuni i keia la e hoike aku ana ia Kiaaina Wood, ma ka la 20 o Mei e haalele aku ai oia ia Cuba me ka hoihoi aku i ka mana hoomalu o na paemoku malalo o ke aupuni Cuba.  E lilo ana ka la 20 o Mei i la poina ole ma ka moolelo o Cuba, aole wale ma ka loaa ana o ke kuokoa, aka, no ka loaa pu ana iaia o ke kulana Peresidena.

            Ma ia wa e pau ai ko Amerika noho hoomalu ana maluna o Cuba, a e hookaawale aku ai hoi eia i kona mana hooponopono aupuni me ka nuuhi pu aku i kona mau koa a pau e hoomalu ana i na pakaua o Cuba, a o kahi wale no o na koa Amerika e ikeia ai ma na pa kaua pili kahakai no ia, a e hoomalu ia ana lakou e Konela Williams L. Hawkins, ma ka la 10 o Mei e wehe ia ai ka ahaolelo Cuba mua loa no ka hana ana i mau kanawai kupono no ia mau mokupuni mamua o ka hoea ana mai o ko lakou La Kuokoa.

           

            Eia ka halekuai o Whitney a me Marsh ke malama nei he huai hoemi nui o na wai a pau.  Aole keia he mau haanui olelo, aka he oiaio.