Ke Aloha Aina, Volume VIII, Number 12, 22 Malaki 1902 — Page 5

KE ALOHA AINA

 

POAONO, MARAKI 22, 1902.

 

HE WAIKAHE KUPAIANAHA

 

            Ua hoohikilele ia ae ke kulanakauhale nei no kekahi wahi waikahe kupaianaha i ike ia ma ke kahawai o Nuuanu ma ke awakea Poalua nei.  mauka wale no o Nuuanu ka hoopoluluhi ana mai a ka ua, aka, o ka wai @@@ kai hoea mai i kai nei me ka lawe ana mai i na opala o kela a me keia ano a ahu mokaki iho la iloko o ke awe o Kou.

            He waikahe nui keia a keia kulanakauhala i ike ole ai no kekahi mau makahiki loihi.  Ua @hi pu ia na lanai o kekahi mau hale e ku nei ma ke kihi o na alanui Pauoa a me Nuuanu a hala loa mai i kai me ka uhi pu ia o ke alanui Nuuanu e ka wai, a ua kau ka weli o kekahi poe e noho kokoke ana ma ke kae o keia kahawai i ka hana a ka wai.

            Ma ha hoike a na poe e noho ana ma ke awaawa o Nuuanu, ma ka hora 11 o ke kakahiaka ka hoomaka ana a kekahi kuaua ikaika loa, a i kona mao ana ae he aneane hookahi hora mahope iho aia hoi, he wai wale no na wahi a pau.  Iloko o keia wa a ka ua e ilikipau ana aia ua alelo manamana o ka uwila ke holapu ala @ne ke ikaika i ukali ia mai e ka leo papaaina o ka hekili, a o ke kulanakauhala nei kekahi i ike a i lohe ia mau hana hookalakupua a ua paia lani.  Ua kahe mai ka wai me ka hikiwawe nui a ma ia kumu ua hiki ole i kekahi poe ke hoopakele i ko lakou mau waiwai.

            O kekahi halekuai Pake e ku nei ma ke kihi o alanui Nuuanu  a me Pauoa ua hoolana ia  e ka wai nona, ke kiekie he elua kapuai, o na pa hale o Keo Kaaka, Walekahauki a hiki loa mai i ka pa o Afong ua halana pu ia e ka wai, a o na poe e hele ana ma ke alanui Nuuanu mawaena o ke alanui Kula a me ka uwapo o Waipiula ua komo aku lakou iloko o ka wai me ka hiki ole ke alo ae.

            Ua ike ia he lio e lawe ia mai ana e ka waikahe mauka aku o ka uwapo o alanui Waina, a ua haawi koke ia na kokua ana iaia, aka, aole naa oia i hiki ke hoopakele ia a hiki i kona komo ana malalo o elua uwapo a pakele aku la ma kai o ka uwapo Haaliliamanu.  He mau palapu ke kau ana maluna o ka lio, a o ka mea nona na lio ala oia no o Hopo Makai Nui Chillingworth.

            He waapa Iapana ma ka i iho o ka uwapo o Haaliliamanu kai lawe ia aku e ka wai mai kona wahi i hoopaa ia ai a opa pu ia aku la i ka uwapo o Hakafila a nohaha.  He mau moa kekahi i ike ia aku e lawe ia ana e ka wai, aka, ua hiki ole lakou ke hoopakeleia.  He wahi wai kupaianaha no keia aole he haule ua i ikela ma ke kulanakauhale nei ia la, aka, ua ike ia nae keia waikane nui.  Ua lilo ke kahawai o Nuuanu ia mau hora 1 mea makaikai nui ia.

            No hookahi hora o ke kahe ikaika ana o ka wai na akak@u iho la a ma ka hora 4 o ka auina la ua emi loa, a me he la, aole he waikahe i ikeia malaila i na hora iho mamua.

           

HE POWA MAKAU OLE.

 

            Ua hoea aku ma ka halewai ma ke aumoe o ka Poaono nei he Pukiki kalaiwa kaa nona ka inoa o Dias, mahope o ka lilo ana aku o kana mau dala i kekahi haole powa.  Wahi a Dias i hoike aku ai i ka halewai, oiai oia e hoi ana no kona home mahope o ka waiho ana i kona kua ma ke alanui Moiwahine kokoke i ke alanui Papu, ua ike aku la oia he kino kanaka e kulou ana maluna o kekahi kanaka ona e moe ana ma @@@@@@@@, me he la e huli ana i na p@@eke o keia kanaka.

            I ka wa i maalo ae ai o Dias ma ka aoao o ke kanaka powa ua noi mai la oia i hapalua.  Ua hoole aku o Dias aohe ana dala, a ia wa i paa koke mai ai kona pu ai, a i ka hookuu ana ae o ka powa mahope o ke umi ana ua ike iho la o Dias ua lilo aku he hapalua gula a me kekahi mau dala keokeo.  Ua holo aku ka powa no kai o na uwapo.  Mahope o ka loaa ana aku o keia hoike i ka hale wai ua hoouna ia he ma kai me Dias no kahi one i powa ia ai no ka huli ana i ke kolohe, aka, aole nae ola i loaa aku.

 

KA MANA OIKELAKELA I

LOAA I KA MEA PONO KO-

HO BALOTA OLE O KE

ALOHA AINA.

 

            He mea oiaio e Kalana eep@: o ka Lunahooponopono o KE ALOHA AINA a me ka Luna Hoopuka he mau mea koho balota laua; o kona Luna Hoohana he opiopio loa aohe mana koho; o kona Ona puuku a mea kakau ia nao e like me ia e pane aku nei ia oe, he wahine oia aohe ona mana koho, aka, he mana ka okoa no kai loaa iaia, a oia keia; e hoomanao iho oe, ua olelo ia he oi aku ka "mana o ka makakila mamua o ka pahikaua."  A o ua mana ala oia ka mana oikelakela i loaa i ka Haku Wahine o KE ALOHA AINA au e ike mai la, he mana hiki ole ia oe, ke hoole iho ke paio pu nei oia me oe he kana oe a he wahine ia, oiai oia ponoi ka mea hana no KE ALOHA AINA a me kona Lunahooponopono aole na hai i lohe oe.  No kuhi wa aku.

 

KUE KE AUPUNI O KINA.

 

            Pekina, Mar. 11.  Ua waiho aku la ke aupuni o Kina i ke Kuhina Conger o Amerika Huipuia he memoriala e kue ana i ka hana hou ia ana o ke kanawai kipaku i ua Pake a Amerika Huipuia.  Ua kue loa ke aupuni maanei i ke kipakuia o na Pake mai Pilipine a me Hawaii mai, no ka mea, na palahalaha ka oihana kalepa o na Pake malaila a na pili loa aku lakou me ia mokupuni malalo o ka mare ana.  Nolaila, o ke kinai ana i keia launa ana he hana paakiki loa.

 

MALAMA IA KE ANAINA HOO-

LEWA O EDE MAKA-

POLENA.

 

            Maluna o ka mokuahi Alameda i ka mai ma kela Poalima aku nei i hoea mai ai ke ki@o make o E. O. Makapolena i ukali la e kana wahine opio a me kona hoahanau F. W. Makapolena me kana wahine.  Ua hoihoi loa ia aku ke kino make o Makapoleno no kona home mawaho o Waikiki, a malaila i waiho ia ai iloko o na pulama hope ana a ka ohana a hiki i ka hora 2 o ka auina La Pule nei, ka wa hoi i malama ia kona huakai hoolewa no ka ilina o Nuuanu.

            He nui a lehulehu ka ohana a me na hoaloha i ukali pu aku ma kana huakai hope no kona home loa.  Ua lawe mua la aku kona kino make no ka luakini Katolika a mahope o ka malama ia ana o kekahi auaina haipule hoalohaloha maluna ona na manele loa ia aku la oia no ka ilina o Nuuanu a hookuu ia aku la e moe hookahi i ka moe kau a hooilo.  Ua ukali aku kekahi mau lala o ka puali makai ma ka hoolewa o E. C. Makapolena, a mauka o ka lua i haawi mai ai ka puali puhi ohe i na leo mele kanikau nona.  Aloha no ia kamaaina i haule aku la.

 

HE HOIKEIKE MALUNA O

KE KIEKIENA PAKI-

PIKA.

 

            Eia kekahi mau Iapana ke liuliu nei no kekahi hoike ahi nui maluna o ke Kiekiena Pakipika ma ka hora 8 o keia ahiahi Poaono.  E hoikeike ia ana kekahi mau ahi kao hookalakupua malaila, a e hiki pu ae ana he puali himeni no ka hoolealea ana i na makaikai.  He 25 keneka wale no ka auhau mai ka holo ana maluna o na kaa uwila a hiki i ke kahua hoikeike ahi kao.  E hele nui ae e na puni poe lealea.

 

UA MAKEMAKE IA.

 

            Ke kahea ia aku nei na lala hou a pau i waiho mai i ka lakou palapala noi i ka hui aloha o Hawaii i hele ole mai e kakau inoa ma ke kumukanawai o kela hui no ka mea ua hooholo ka hui e lilo lakou i mau lala no keia hui e like me ka lakou i hoi mai ai pela me na makua mea keiki i waiho mai i ka lakou noi ua makemake ka puuku o ka Hui Aloha hawaii e hui pu me lakou ma kona halekuai ma alanui Muliwai.

                                                                                                                                                W. RINGER.

            Puuku o ka Hui Aloha o Hawaii.

 

            Ma keia po Poaono e paani hou ia ai o Laieikawai.

 

HALE IA MAKAMAKA OLU-

OLU A HOALOHA OIAIO

I ALOHA NUI IA MRS.

ELIKAPEKA HAWE.

 

            Ma ko laua home ohana ma Kalihi ma ka hora 7 ponoi o ke kakahiaka Poaha nei Maraki 20, 1902, i kikoo mai ia na lima menemene ole o ka make akaili aku la i ke ola makamae o ko makou hoaloha maikai Mrs. Elikapeka Hawe, a niau palanehe aku la ka hele ana a ka uhane ma kela kapa wai lana malie o ka muliwai eleele o ka make, a waiho iho la he mau mea aloha mahope eu eku ana nona.

            Ua haalele iho la i ka nui me ka lehulehu, na mawehe ae la i ka ka pili aloha ana me kana kane aloha ka hoa i pili ia mai na la opio mai a haalele pu iho la i ka laua kamalei aloha he kaikamahine ka hua hookahi i koe e ola nei mai waena mai o na keiki lehulehu i hoohua ia mai ko lana mau puhaka mai i pau aku i ka hala mao he punahele a he mea i hoomailani nui ia, he pula kaumaka na kona mau manaolana i upu ai e hoohauoli ia kona mau ia kanikoo o ka noho'na aku o keia mua eia nae; ua haule wale ia mau lia ana a kona puuwai no kana leialoha he keiki.  He kupa oia no Honolulu nei, a ua kamaaina hoi i na mea a pau mai kona mau la opio mai a hiki wale i kona hala ana aku la i ke 45 o kona mau makahiki.  No aneane elima mahina kona kaa ma'i ana a hala wale aku la.  He wahine aloha kane oiaio, he makuahine maikai no ka home, he makamaka puuwai hamama, a he hoaloha oiaio no na mea a pau i kamaaina iaia, he halekipa maikai no na malihini a me na mea a pau i kipa aku ma ko laua home.  Ma ka hora 10 o ke kakahiaka Poalima nei i manele ia mai ai kona kino wailua no ka luakini Katolika Roma na Maliekamalu a lawe loa ia aku no ka ilina kupapau o Koula iloko o na kulu paka na e hiolo ana a iwaena o na makamaka a me ka lehulehu o na hoaloha e ukali ma kana huakai hope.  Ke komo pu aku nei makou i ke kaumaha me ka ohana i hooluuluu ia no ka mea aloha i hala, a na ka Haku e hoomama i na kaumaha a me na luuluu o ko ke ao nei.

 

HOOMAKAUKAU O RUSIA

NO KE KA@A.

 

            Ladana, Mar. 10.  Ma kekahi hoike i loaa mai Sanahal mai, ua hoike mai ka mea kakau o ka nupepa Standard, o na Pake kalepa e hoea mai nei mai Pota Ata mai, ua hoike ae lakou ua kauoha ia lakou no ka hookaawale ana aku i ko lakou mau ohana mai Pota Ata aku, no ka mea, aia o Rusia ke liuliu ala i kekahi kana me Iapana.