Ke Aloha Aina, Volume VIII, Number 11, 15 Malaki 1902 — Page 1

KE ALOHA AINA

EIA HOU NO KEIA BILA A KA ELELE

            Wasinetona, Feb. 28.  Ua wa iho hou aku la o Elele Wilikoki iloko o ka Ahaolelo no ka pomaimaikai o na Senatoa o Hawaii, ponoi:

            E hooholo ia i kanawai e ka Hale o na Senate a me na Luna makaainana o Amerika Huipuia i akoakoa mai.  O na Senatoa he umikumamalima ma ke kau koho balota mua i malama ia ma ke Teritori Hawaii, ma ka la 6 o Novemaba, 1900, e ae ia lakou e paa i ko lakou mau kulana no eha makahiki mai ka la i koho ia ai. 

            Pauku 2.  Ma ke kau koho balota o Nevemaba, 1904, e koho ia i umikumamalima mau Senatoa, a o na inoa ewale e loaa ana na huina balota kiekie e paa lakou i ko lakou mau kulana no eha makahiki mai ko lakou wa i koho ia ai, a o na poe e paa ana i na huina balota haahaa e paa lakou i ko lakou mau kulana no elua makahiki mai ka la i koho ia ai. 

            Pauku 3.  Ma ke kau kaho balota o Novemaba, 1904, o na Senatoa a pau i loaa na koho haahaa ia ana ponoi: Elua mai ka Apana Koho Ekahi mai, hookahi mai ka Apana Elua, ekolu mai ka Apana Ekolu a he hookahi mai ka Apana Eha, e paa lakou i na kulana Senatoa no elua makahiki wale no mai ka la i malama ia ai ke koho balota nui. 

            Ma keia e ike ia ai ke makamake nei ka Elele Wilikoki e hookomo hou ia no na Senatoa a pau o ke kau panaka i hala iho la ma keia Ahaolelo e noho mai ana i keia makahiki a e paa lakou ia kulana a hiki i ka 1904.  Kupanaha keia hana aluna mana a ke Elele Wilikoki.  He manaoio ko makou aole no e hoolohe mai ana ka Ahaolelo i keika bila kanawai hou a ka Elele. 

KAUOHA O PERESDIENA RUSAWELA IA KIAAINA DOLE E HIKI KINO AKU

            Wasinetona, Mar. 6.  O ka hopena o na kukai kamailio ana o elua manawa me Keoki R. Kaaka o Hawaii i keia la, ua telegarapa aku la ka Peresidena i Kapalakiko i loaa aku ai ka mokuahi Alameda e holo aku ana no Honolulu,  E kauoha aku ana ka Peresidena ia Kiaaina Sanford B. Dole, e hiki koke mai oia i Wasinetona nei no ke kuku ana i na mea pili ia Hawaii.  Ua manaoia mamua aku nei e hoea mai ana o Kiaaina Dole ianei malalo o kona manao ponoi iho, aka, na ikeia na hoololi hoo oia i kona manao.  O ke kulana ma Hawaii he huikau loa a pela i makamake ai ka Peresidena e loaa aku iaia he mau hoomalamalama ia ana maluna o keia kumuhana.  Ua manao wale ia aole no ka peresidena e hoopau ana i na poo aupuni o Hawaii.  E noho ana o Kaaka maanei a hike i ka hoea ana mai o Kiaaina Dole i Wasinetona nei. 

            Ua hoobikilele ia o Dole i ka a i lawe ia aku, o keia lono telegarapa iaia e kekahi mea kakau o ka nupepa Hoku, a wahi ana, aole oia i maopopo i ke kumu o keia kauoha pupuahulu i hooana ia mai iaia, aka, e hooko aku ana no nae oia i keia leo kanoha.  Ua manao ia e kau aku ana o Dole maluna o ka mokuahi Alameda e huli hou aku ana no Kapalakiko ma keia Poakolu ma kona alahele no Wasinetona.  Ua lilo keia kauoha i loaa mai la i mea nune nui ia e na poai like ole o keia kulana kauhale.  Ua hoomaopopo ia he kauoha ano nui keia i loaa mai la ia Dole ma ka mokuahi Alameda onehinei.  E kali malie aku no kakou no ka hopena o na hana a ka Peresidena. 

AHEWAIA KA LUNAHOOPONOPONO SMITH O KA NUPEPA AVALATAISA

            Ma kekahi mau kolamu o ka nupepa namu Avalataisa o ka Poakolu nei ua hoopua ia ae kekahi kii pahenehene ano hoohaahaa i ka aha hookolokolo a Gia, a o ke ano o na kii ala he haole e nahu ana i ka pepeiao o kekahi wahine, a maluna o ka awai e ku mai ana he haole i ano like na helehelena me ko Lunakanawai Gia me kona mau lima e kau mai ana iwaho me he la e haawi mai ana oia i na apono ana no ka huna a keia haole nabu pepeiao. 

            I ka ike ana o Biting i keia kii ka lolo o Makete ka haole i hoopii ia no ke nahu ana i ka pepeiao o kana wahine a e hoolohe ia nei kona hihia e ka Aha Kaapuni.  Ua koi koke aku la oia i ka aha e kii koke ia ka Lunahooponopono o ka Avalataisa e hele mai imua oia aha a hoike mai i ke kumu e hoopai oia ia ai oia no ka hoowahawaha, ma ka hoopuka ana i keia kii, a he mea hoi ia e hoololi ia aku ai na manao o na kiure o keia hihia a haawi aku i ka lakou mau kue ana no ka mea i hoopii ia. 

            Ua hoomaha ka aha a ua hoomaka koke ia ka huli ana ia Walter G. Kamika, ka Lunahooponopono o ka Avalataisa, aka, aole oia i loaa a hiki i ke ahiahi ana.  Nolaila, ua hoopanee ia kona hibia no kekahi la ae.  Ma ka Poaha nei ua hoolohe ia kona oihia e na Lunakanawai ekolu o ka Aha Kaapuni Homepera.  Gia a me Robikana, a o ka lakou olelo hooholo e hoopaahao ia o Kamika no kapakolu la ma Kawa.  Ua haawi ia aku o Kamika iloko o ka malama ana a makai Hapakini ma ka hora 3 o ka auina la Poaha, a mahlope o ka noho ana o Kamika malaila no hapalua hora ua hookuu i amai la oia malalo o kekahi palapala hookuu kino.  Aole na Kamika i hana maoli i keia kii pahenehene, aka, ma kona ae ana e hookomo ia maloko a ka nupepa ana e noho Lunahooponopono ana pela oia i hana ai. 

ULUAOA MALOKO O KA AHAOLELO

            Vitoria, B.C. Feb. 24.  Ua ike ia kahi mau hiohiona uluaoa ma ka Ahaolelo i keia auina la i ka wa a McBride ke alakai o na poe ne i hoao ai e lawe ae i ka noho o Joseph Martin, e ike ia nei kekahi kakoo ikaika loa o ke aupuni.  Mamua o ka noho ana o ka Hale no ka lawelawe ana i na hana aole o Martin malaila a oia ka wa a na hoa kne i hookaawale aku ai i ke pakaukau o Martin ma kekahi wahi okoa aku a hoopili ae la i na noho o McBride, McPhillips a me Smith i kahi hookahi.  I wa a Martin i huli hoi mai ai a ike i keia mau hoololi ua piha loa oia me ka inaina.  Ua kapa aku oia ia McBride he aihue a me kekahi inoa hoohaahaa e ae, a ma ia manawa ua komo pu aku ia kekahi mau hoa e ae iloko o keia mau hoopaapaa ana. 

            Ua komo mai o Rev. Canon Beanlands a haawi ae la i na leo pule.  Iloko oia wa i hookuena pono ae ai na hoa no ko lakou mau noho, a o Martin hoi ua komo aku la ia mawaena o McBride a me ka noho e aumeume ia nei.  He nui na aumeume na kulakulai ana iloko o keia wa pule, a i ka hookuu ana ae o ka pule na hoomaka ae ia na uluaoa like ole.  Ua hoao aku la o Martin e noho maluna o ka noho o McBride, aka, ua hopu ia mai kona ai e Cartis, ua holo mai la na hoa a hookaawale ae la ia laua.  Ua nui na huro a me na uwa i haawi ia mai e na poe makaikai iloko o keia manawa, a i ka pau ana ae o ka haunaele ua ike ia aku la e noho ana o Martin iluna o ka noho e hoopaapaa ia nei, a o McBride hoi iluna o ke pakaukau ma ke alo o Martin. 

            Ua hoomaka ka noonoo ana o ka hale i Lunahoomalu a ua koho ia o C.E. Poolry. 

            Ua ulu hou he hoopaapaa i ka wa i lawe ia mai ai he olelo hooholo e lawe kela a me keia hoa i kona noho e like me ko ka ahaolelo i pau, a ua puka ae na olelo kupono ole e hoopuka ia maloko o ka hale kau kanawai, o ka hopena o ia olelo hooholo, ua haule.  A i ka ike ia ana ua hiki ole ke hoonee hou ia aku na hana imua ua hoopanee koke ka Hale.  Ua olelo ae McBride me kona mau hoaloha aole lakou e kakoo ana i keia olelo hooholo ke lawe hou ia mai i ka la apopo.