Ke Aloha Aina, Volume VIII, Number 10, 8 Malaki 1902 — KUU MAU KEIKI UA HALA. [ARTICLE]

KUU MAU KEIKI UA HALA.

Ma ka la 13 o Dec. 1901 make o Miss Kahuakaimalie. Ua hanau ia ma Kalihi, ma ka la 31 July, 1881 20 makahiki 4 malama 13 la o kona hanu ana i na ea o keia ao. Ma ka la 5 o Feb 1902 make o Simeon Paaluhi. Ua hanau ia oia ma ka la 19. Oct. 1882 ma Kalihi 19 makahiki 3 malama 17 la o kona hanu ana i na ea o keia ao. Ua hoonaauao ia o Simeona Paaluhi, ma ke kula o Kamehameha eono makahiki, a ma ke kula o Kalihi elua makahiki. A ua hemo mai oia me ke kula a ua hele oia i na hana lima me M. R. Colburn, no ka imi ana me ka hoomanawanui i na pono o keia noho ana. He keiki akahai me ka hoopono, aole inu i na waiona, a he keiki ake i na mea kani, he keiki aloha makua a me kona mau hoahanau, a pela no me kona mau hoaloha. Ua hoomailo mai ka ma'i i ke kino o ka'u mau keiki. A ua imi ia ko lana ola, ma na lapaau naauao ana, a ua hiki ole ke hoopakele ia. He oiaio no. "O ke kanaka i hanau ia e ka wahine he hapa kona mau la a ua piha hoi i ka popilikia." Aole ko kakou mau kulanakauhale e mau ana maanei. Na ka Haku no i haawi mai, a nana no i lawe aku, a e hoonani ia ko na inoa. HE INOA NO SIMEON PAA-LUHI. Haina ka inoa o ko makuakane, Ea Mauna Loa ke poo o Kaana, He ae kai ia na ka Naulu, Ke ua i Mapua, Hoi a ka la noho i Kalaihi, Ka inoa ia o ka makuakane, Na ua nei keiki-ke-o-la, O oe ka ia. Nani Hilo noe, I ka Ua Kanilehua, Noeo ula ka maka, O ka ohia o Kaliu, Puapuaula i kanahele o Malama, Ke okooko lehua a ka wahine i ka lua, Okooko ka lae ohia o Keaau, Pau no ka nani ka maikai, Ke onaona a noho i Hilo, Noho i Hilo ka Puulena me ka moani, Aole wahi hoohalahala a ka maka, Ke ike, ke alawa iho oe, Ma ka uka o Puna, Nani hinu maikai ka ili o ka laau, I miina ia e ka Puulena makani, Aala ka lua, paoa, puia, Aala kanahele o Panaewa, Aala i ka nae o ka hala me ka lehua. I ka mapu hanu ala a Kaulumano, Mahea la ka hikina mai a ke aloha, Ma ka pumanawa o ka Hinalo, Malaila ka uihina mai a ke aloha, A hiki mai io'u nei, Hiki mai ke aloha, Eha, opa loko o ke kanaka, Huikau ka loko popoi,

Me he awa kaikoo'a ka mimina, Me he au koiele ia ka manao, I-o-ia nei, Ka iini no ia oe, O oe no ke kuko, Ka lia, ka hiaai a ka manao au-moe, Moe a ka po, haui kololea, Kani leo lea ka leo o ka wai, Ke-e i na pali, Oeoe lea i ka pali, O Kuenelua-i-o-hai-la, I kaukini, He kinikini luna, He lehulehu he hoonui olelo, Eia iho no ke kupu ino, Ke noho iho la, Noho aku au, mihi uu i ko aloha Aloha kuu hoa o ka la nui, Haoa wela hahana mai la, Ua wahi'la a kaua e noho ai, E hooholo ai, I ka ua nui, i ka ua loku, I ka ua kulu paka kaikahi, Kaikahi ana i ka muo o ka Hanalo, Nana i hoani, hiolo newa, Ahu iho la ka pua, Ma ke alanui ma uka, O Awakapo-e, Ua naau po au, Ua hoopo au, welawela i ka moe a kaua, Ua imi kahu hou ae nei au na moe I moe a hoolana, lana i ka wai. I mea huikala a honana i ke aloha E ahi la hoi O kuu puni o ke aloha no e. S. PAALUHI Kapalama, Feb 24, 1902 Ma ka Poalua ae nei i manao ia ai e haalele iho ana ka moku lawekoa Warren ia Honolulu mai Manila mahope o ka pau ana o kona mau wahi poino i ka hooponoponoia.