Ke Aloha Aina, Volume VIII, Number 10, 8 Malaki 1902 — Page 2

KE ALOHA AINA

2          KE ALOHA AINA, POAONO, MARAKI 8 1902

LETA MAI NA AINA E MAI.

 

Jacksonville. Fords, FEB 16, 1902

William J. C@no

 

Aloha nui loa oe: -

            Ua loihi keia mau la akahi no au a kakau leta aku ia oe. Ua haalele aku makou ia Charleston a ua kaahele mai no ka hema nei. Aohe no he holopono o na hana o kahi hoi keike ma Charleston malia i na mahina hope oia o Maraki, Aperila a me Mei, oia ka wa o e piha mai ai o kahi hoikeike elike me ka maa mau ma ka Pan America Exposition. Aole no he ano like o na hale me ko hoikeike o Buffalo he ano okoa no keia. Ua haalele aku makou ia Charleston ma ka la mua o Feberu ai no Savannah a me Brunswick, Georgia.

            Mai ke kulanakauhale hope mai ua loaa he kono mai ka luna nui mai o Jeykle Island no ka hele ana aku e paani ma ke Millionaireʻs Club. O keia mokupuni he 12 mile ke kaawale mai Brunswick aku. Ua hoouna ia mai he waapa mokuahi kuikawa no ka halihali ana aku ia makou, ka Hui Himeni Hawaii. Ua haawi ia he ahamele malaila, a ua hoaumoe makou malaila me ka loaa o na makana. Ua loaa mai he kono mai ka luna nui mai no ka hoi hou ana aku i ka pule elua o Maraki. O ka wa ia e hoea mai ai o Ona Mili ona Andrew Carnegie o Pittsburg, ka ona o keia mokupuni, a me na Oaa Miliona W. K. Vanderbilt a me George Gould o Nu Ioka.

            Eia makou i Jacksonville nei kahi i haawi ahamele ai a hala loa aku i St. Augustine, Palm Beach a me Tamoa a me Key West. He nui na hotele nani o keia wahi, he ano like ke ea me ko Honolulu, he ulu ka maia ma keia wahi a he mau hua ai no kekahi e like me ko kaua ano. E hiki hoi ana makou i ka pule hope o Maraki, ma ia hope e holo ana makou no ka hikina ma ke ala o Wasinetona. Ua manao makou e halawai ana makou me ka Moiwahine a pela me R. W. Wili koki. He maikai no ke ola o ka hoa a pau.

            Ke ike nei makou i ka nani o ka hema nei a me ka ike pu i ka nohona o ka lahui Paele a me ko lakou mau moolelo o ka wa kauwa kuapaa. Ua oi ka holomua o ka hoonaauao ana ma ko kaua aina mamua o ka hema. Ua makemake no na haole e hoonele i ka hoonaauao i na paele aka, he nui no na paele naauao i heia manawa a ke hoali nei lakou he mau hula kuokoa no ka hoona auao ana i ka lakou lahui ponoi mawaho ae ona kula aupuni. Ua hele makou ma kekahi mau hale kula paele e makaikai ai. He poe Karistiano ka poe paele ma koʻu nana ana. ua piha a ua lehulehu na halepule ma na kulanakauhale a pau, he maluhia ka La Sabati ma ka hema nei, a he nui na hoomana like ole ma ka hema nei.

            Ua lohe au ua hoi aku nei o John Wilson me kona poe aia i Kapalakiko. Ua loaa ia makou ka hana loa keia kau hahina ae ma na mokuaina Nu Enelani, oia ke kulanakauhale o Bosetona a me kekahi mau kulanakauhale e ae oia wahi. Ua lawa keia mau manao no kekahi wa e kakau hou aku ai ia oe. Ke haawi aku nei na hoa a pau i ke aloha a me aʻu ma ia haawina hookahi.

 

Me ke aloha,

JOSEPH PUNI

 

Kapalakiko, Feb. 15, 1902

WM. Coelho,

Me ke aloha: -

            Eia makou i Kapalakiko nei, ke makou hoea ana mai nei no ia i ke ahiahi o nehinei, mai Kansas City mai no ekolu po a me eha ao, ko makou kaahele ana ma ke kaahi ao nei kapakai o ka Pakipika. Ma ka hui kaahi Santa Fe, ko makou alahele i holo mai ai no anei. ua ike i ka nani o ka mokuaina o Colorado kahi o ke kula i olelo ia ai a me Arizona oneanea, he mea ole no nae ia i na poe ilikioi e holo ae ana maluna o na lio a me na kaa ma na pali kualono e hoihoi ole ai ka maka a ku a maka hiamoe maoli no. A no ka hope no hoi Kaleponi o ka helu ekahi neia, he ui na aina mahiai o na hua ai like ole. O kahi mea ano e loa nana i hoopina aku i keia mau oiahina ai, oia koʻu ike ana iho he wahi mala akaakai lau e like me ko kakou, na ia mea i ahai koke aku i koʻu mau hoomanao ana no ka aina hanau. Aloha no paha. Na ka pooli ana nalowale ae la neia mau uluku ana eia ka makou i ka lua e holo nei, puka ma kaho aoao he mau mala hua ai no. Ekolu no hoi o makou komo ana malalo o ka honua hoea i Richmont Point, kau ma ka ferry boat no ke kulanakauhale o Kapalakiko nei. I ka ai na la o ka la apopo makou e lawelawe ai i ka makou apana hana aloha a ka Hawaii (himeni) maloko o ka halekeaka Orpheom, a mahope aku no Las Angeles no elua pule no. Me neia mau wahi mea hou uuku i awili ia me ke aloha au e hoopau ae nei a oili hou aku.

Kou Hoaloha,

J. RULOLIA

 

Kapalakiko, Feb. 19, 1902.

Wm. Coelho,

Aloha nui kaua: -

            Ua launa mai kou hoa nei me kau i piha me ka aloha hauoli kahi manao ke heluhelu iho, eia makou ke paani nei i ka Halekeaka Ofiuma o Kapalakiko nei no elua pu e a holo aku no Las Angeles. He nui ko makou ohohia ia i Kapalakiko nei a he nui no hoi na makamaka Hawaii i kipa mai e ike ia makou. I keia la iho la no i loaa mai ai he Teleka lapa mai Ladana, Enelani mai e noi mai ana makou e hele aku ilaila a ua pane aku nei o J. H. Wilson i ke ano a me ka hoolilo, e kali aku ana a loaa mai ak pane i keia mau la iho. E hoike hou aku no ia oe ke maopopo. E kuu hoa, ina au e hiki ana i Pelehane e hooikaika no au e hoike piha aku i na mea a pau e pili ana ia aina kaulana. Eia no au ke kupaa nei i ka mea a kaua i hooholo ai i Buffalo, aole no paha au e milimili hou ana iaia kela wainahela hooluhi kino aʻu hoi i wanao ole ai e hemo aku ana ola mai aʻu aku, aka, ua waiho aku ai na ka mea maluna nana no e alakai i kana kauwa nei me ka pololei.

            Ke aloha aku nei na aliiwahine a me na hoaluhi o kaua ia oe.

            Owau iho no me ke aloha oiaio,

            MEKIA

 

HAWAII MA BUFFALO

 

(Kakauia e William J Coelho.)

(Hoomauia.)

AIKUPIKO

            He wahi keia i hoomakaukau ia no na hana hoikeike o Aikupiko. H@ nui na hana hoolealea i hoakoakoa la ma keia wahi. Ua kukulu ia na hale o keia wahi e like me na hale o Aikupiko a mea na wahi a ae o na aina pili i ke Kai Waena, Algeria, Morrocco a me Peresia.

            He mau alanui liilii maloko o keia wahi i hoomoe ia e like no me na alanui o Aikupiko, a ma na aoao i kukulu ia ai he mau hale kuai, kamana, hana piula, hana kula a pela aku. He mau wahi kilokilo kekahi i hoomakaukau ia.

            He ekolu mau hale keaka o keia wahi hookahi no na holahola Aikupiko, a o kekahi, no na hola, Inia a me Peresi , a o ke kolu, no na mea kahiko o Aikupiko. He nui ka piha ia o keia mau wahi i na wa a pau. E komo mau ana kekahi poe e kau i na kamelo me ka elepani, o kakahi poe hoi, e komo ana lakou e ike i na kilokilo no ka hoike ana mai i na ouli o ko lakou no-hoʻna a pela aku; a o ka hapanui e komo ana lakou e ike i na wahine hula Aikupiko. No ka ui maoli no, a ke kuupau mai i ka ai, he wali maoli no. He oi aku keia hula mamua o ka kakou. o kahi keia o ke komisina o ka Papa Hoonaauao o Hawaii nei, e hele mau ai e makaikai me kekahi mau opio o Buffalo.

            He pelapela loa ke ano o ka hula Aikupiko, a he kupono ole i ka poe maikai ke hele e nana.

            O ka hula Inia, ua kapaia, ka hula hoomainoino (torture dance) kekahi o na hula ku i ka ehaeha ke ike aku. Aole he ano hoolealea o keia hula, aka, ua mahalo ia, mamuli wale no o ka eleu o ka poe hula i ka aloalo i na pahi oi e pahu ia mai ana e na hoa hula.

            O ke ano nui no nae o keia hoikeike Aikupiko, he maikai, a he nui no na mea e ike ole ia ao e ke kanaka ilihune. He nui no na mea hoonaauao i ke kanaka.

           

DIRNBERGER.

            He hale hana kulina keia, ola hoi, he pulehu ia ke kulina me ke kopaa. Nui ka ono o keia mea. o keia ka mea ai nui ia o ka poe makaikai, a e makou pu no, ke loaa kahi hapanui.

           

MUTSCOPE

            He wahi keia no na pahu mea kani, a me na kii pokakaa. No ka uwila ka hoonee ana i keia mau mea. He 1 keneta ka uku o ka nana ana. E piha mau ana no hoi keia wahi.

(Aole i pau.)

 

            He kuai hoopau nui ka L. H. Kerr ma e malama nei i keia mau la o na wai wai no a pau o ko kakou halekuai. Ke kono ia aku nei na mea a pau mai poina i ke kipa ae.