Ke Aloha Aina, Volume VIII, Number 8, 22 February 1902 — Page 5

KE ALOHA AINA POAONO, FEBERUARI 22, 1902

 

ike pololei ae i na hoopilipili ana oia mau mea ina e makemake ia ma keia mua aku (ina paha no ka opiopio o kona Lunahooponopono i maopopo ole ai, alaila e aho hoi pa kona mau hoa opio o KE ALOHA AINA e wehewehe aku ia mea).  E Joe Kalana mai olelo aku oe ia poe, ia Kini ma, ia mea ma ia mea ma, oiai, ua like no ia Poe me oe, holo mai la ia poe a koho iho la i Demokalaka ko lakou aoao, o ke kupono no nae o ka noho aku no oia poe ma ko lakou aoao i ku ai i kinohi, malia paha ua noho iho la no hoi ia poe a pau ke aho, aohe wahi pomaikai i loaa mai ko lakou aoao mai, nolaila lele mai la ianei; a pela no hoi oe malia paha na ike iho nei oe i kou wahi pomaikai ole mai ka aoao au i ku ai i kinohi oia “Ke Aloha Aina” nolaila, lele aku nei oe i’o; o ke kupono maoli nae nou e ke kanaka aloha aina, e ku iho no oe ma ka aoao o ka lahui aole o ka hoolilo aku no ka aoao Repubalika (aupuni) a owai na aoao lahui ala i keia wa i Amerika ae nei?  “O Demokalaka no ia.”

            Ke olelo mai nei oe, o “ke aloha aina” i ka 1893, ua koho huliamahi ae nei lakou a pau i Home Rula i ka 1900 i hala iho la, o na poe no ia a keia leo aloha poina ole o Hon. J. Nawahi i kalahea mai ai.  E hai aku i kuu aloha i ka lahui, a e hoike pu aku ia la(kou oia no keia Joe Kalana iloko oia mau la e lulumi like ana i ke aloha o ka aina,) ua komo pu oe ma keia olelo ana a Nawahi au e palolo mai la ko waha (aole oe i malele aku mawaho olaila, oiai, aole oe i ike ia he Repubalika ia wa).  Ua pili ia a’o ana a Nawahi no ka manao i hoomau ai no ka lahui i ka lakou koi kumu ia Amerika e hoihoi ia mai ke Aupuni Moi, a i mau ai ke kue ana o ka lahui i ka hoohuiaina.

            He oiaio, ua hooko ka lahui ia leo a hiki wale i ke ko ana o na manao aihue a ko aoao kalaiaina e kakoo nei.  Ua ike hoi oe he aoao mana ole ka aoao Home Rule ma Amerika.  Nolaila, lele oe i Repubalika, a pela no hoi KE ALOHA AINA i lele ai he Demokalaka ma ka aoao lahui i ike ia ma Amerika.  Ua ike oukou a pela no hoi makou, he noho ko ka Elele; he kuleana no kona e heluhelu i kana mau bila iloko o ka Ahaolelo ina paha he haneri bila.  Aka, o ka poe nana e kokua mai, o keia mau aoao wale no elua; aole he Home Rula.

            Ke i hou mai nei oe: Ke nana aku me he la na nui loa ka Demokalaka i hana ai i ka 1900 aku nei, a oia paha keia e kupa ka hou mai nei.  Pehea ka hoi oe?  Malia no hoi ua nui loa pa ha kau mea i loaa no kau hoopilimeaai ana, mamua o ka KE ALOHA AINA i loaa no kona waiwai ponoi iho i kii ia mai ai e kuai, a memuli o ka hooko ole ia oia aelike, nolaila, pili hou no ko makou kuleana me makou a hiki i keia la.

            Aole a makou olelo nou e Joe Kalana “ua olo raika,” wahi a ka haole, ua uku maikai ia kou luhi o 1900, na loaa kau wahi hana aupuni.  O kahi poe Repubalika nele hana kau e noinoi wahi hana aku, i ola hoi paha ka ohana, oia ka hana kupono ia oe e hana ai.  Aole o kau noke mai a ku ke a o na hale o Kaupo.  Heaha kou pomaikai nui ilaila, noho malie iho, ai pono ana i kahi mea uuku i loaa.  E noke wale mai no oe a piha opala ke Kuokoa, aohe ia he mea ano nui i KE ALOHA AINA e huli aku ai i kau aoao kalaiaina e p@@ mai nei.

 

O KA PANE HEA KA’U E HOOPAU?

 

            Aole e ili maluna o makou na koi koi o na ahewa ana no kela mau manao i hoopuka ia malalo o keia poo aka, e ili no ia maluna o na poe na lakou i kakau mai  L. H.

 

            I kuu hoa hoopaapaa.  O keia ninau kuauhau alii, ua ike iho au i kou manao o ka la 15 o Feberuari, e i mai ana oe ia’u e hoopau ae ka au i ko’u manao pane.  Ke ninau aku nei au ia oe, o ka pane hea la ka’u e hoopau ae ai, o ka pane anei a’u e hoole loa nei aole o Kinoiki na Kaimualii me Kapuaamahu, a’u hoi e olelo nei ua puka pololei aku o Kinoiki mai ka puhaka aku o Kapuaamahu a me ke alii, Kaimualii?  Ina oia kau pane e manao nei e hoopau ae au i ko’u manao pane, ke i aku nei au ia oe e hoolaha ae oe i ke akea aole io no o Kinoiki na Kaimualii makuakane o Kapiolani, i maopopo ai i ka lahui Hawaii, alaila hoopau ae au i ke kakele ana a ka’u makapeni maluna o ke aiai o ke kanana, maluna hoi o ka mea a kaua e paio nei me ka hahana pauole.

            WAHAMANAIKAPUAILIMA.

Honolulu, Feb. 20, 1902.

 

MOKU LAWEKOA GRANT.

 

            Ma ke kakahi Poalua nei i pili mai ai ka moku lawekoa Grant i ka uwapo mai Kapalakiko mai ma kona alahele no Manila.  Ua haalele aku oia ia awa ma ka la 8 o Feberuari, aka, na ka ino nui i pahola ae ma kela pule aku nei i hoohakalia i kona hiki koke ana mai ianei.  E lawe ana oia he 300 koa hou no Manila a me 20 kumu kula a me kekahi mau ohua e ae.  Aia pu maluna ona he elua mau kaa makai e lawe ia ana no Manila.

 

HAWAII MA BUFFALO

(Kakauia e William J. Coelho.)

KA MIDWAY.

KE KAHUA HOOMAKEAKA.

 

            O kahi keia o na hana lealea o kela a me keia ano.  He hookahi mile ka loa, a he haneri me kanalima kapuai ke akea, a ua hoonohoia na iliili pohaku liilii, a na uhiia o luna iho me ka asphalt he ano lehu e like me ke one eleele a i ka maloo ana ua like loa me ka puna i haliia ma na alanui o kakou nei.  He nani maoli no keia alanui, a i na paha he nui ke dala o Hawaii nei, aohe nani i kana mai o na alanui o kakou nei.

            Ma na aoao o kela alanui i kukuluia ai na hale keaka like ole.  Maloko no hoi o kela mau hale e ikeia ai na hana hoomakeaka o kela a me keia ano.  He maikai a ku i ka mahalo ia kekahi, a he ino haalele loa no hoi kekahi.  He hookahi no nae mea nui i na haole – O ke dala a pau aku iloko o ko lakou ala mau waihona me ka hoomaopopo ole mai ia hai.

            He lehulehu loa keia poe hale a i mea e hoomaopopo ia ai ko lakou kulana me ka lakou mau hana pakahi e o’u hoa hoohala manawa ma keia kukai olelo ana:

NA ILIKINI.

            He kahua noi ko keia lahui i kukulu ia ma ke poo hema o ka Midway, a maloko o laila i hoikeike ai kela lahui oiwi o Amerika Huipuia i ka lakou paahana o ke au kahiko ka lakou oihana, na lako kaua me na hana hoolaulea o na la hoohie.

            He 700 Ilikini ma keia wahi, a iwaena o lakou he nui a lehulehu wale na hanauna kaulana.  Ua hoakoakoaia keia poe mai na wahi like ole mai o Amerika.

            O ka mea kupanaha, aole hiki i kahi lahui Ilikini ke hoomaopopo i ka olelo a kekahi lahui.  He okoa loa no ke kahiko ana i ke kino.

            Ma ko lakou hiohiona no nae, na like loa lakou a pau ma ke ano hihiu, a he kau maoli no ka weli ike aku,

            Ma ka lakou mau hana maiau, ua ku no i ka nani me ka eleu ka hana ana.  Na na wahine wale no nae keia mau mea.  Na kamaa lei pupu, na poho ie, na moena i oi aku ka nani i ko kakou nei.

            Aole no a lakou mau hana hoikeike e like me na lahui e, ka himeni a pela aku, koe wale no, ka puali puhi ohe o ke kula Ilikini o Carlyle.  Ho hookahi no mea nui loa a keia poe i ohohia ia ai, oia no ka lakou hula o ka wa kaua.  O ke ano maoli o keia hula, he pule i na akua kaua e launa pu mai me na koa no ka luku ana i ka enemi.  He ano ole loa keia hula ia kakou ke ike aku, a me keia ka lakou lawe lawe ana.

            Ua kahikoia na mea a pau no ka makaukau kaua, kau na hulu manu ma na poo, hapalaia na maka me na waihooluu like ole, o kekahi poe, he holo olohe wale iho no me kahi malo i hume la ma ka puhaka.  I ka wa e kani ai o ka ipu (ua like no me ko kakou pahu niu), o ka wa no ia e hoomaka lokahi ai i ka hula, e lelele ana iluna me ka hehihehi ana i ka honua me he la e hehihehi ana i ka lepo a pipili iho.  O ka leo hula nae, ua like loa me ka ke Kepani oli ana, aole u@e hoi he pili o ka leo iluna a haule iho ilalo.  Ua like loa me ka uwe kumakena ana.  O ka noho ana o keia poe he pelapela maoli no.  He kakaikahi loa ka poe hoomaemae.

            Ua kipa au ma kahi o kekahi mau alii Ilikini Chief American Horse, Black Bear, a lehulehu wale aku.  Ua like wale no ko lakou ano nohona.  Aia i waenakonu o ka hale pea ke kapuahi, a ma hai a puni kahi e moe ai ma ka lepo ua halii ia iho i ka opala a maluna ae o ke kapuahi kahi e kau ia ai o na mea ai – ka bipi, manu o kela a me keia ano, a pela aku.  O ka manu e kau ia ana a helelei ka hulu alaila hoomo-a.  O ke kumu oia hana ana, i mea e palupalu ai.

            O ka lakou i’o bipi aole no he hoomo-a ia i ka wa hou, e kau ia ana no a melumelu alaila hoomo-a ia i ka wa hou, e kau ia ana no a melumelu alaila hoomo-a me ke kapi ole i ka paakai.  Aka nae, o ka poe no i hoonaauaoia, he hoohalike no ko lakou ana noho me ka haole, ma ka aahu ka ai ana a me ka noho ana.

            He nui no ka poe ui iwaena o na Ilikini – o na kane no nae.  O ka wahine he umene loa, no ka hoohana ino loa ia ma na hana oolea.

BOSTOCK

NA HOLOHOLONA.

            He hala hoikeike keia no na holoholona like ole i hoolakalakaia, a ua like no ka lakou mau hana me na holoholona e ae i ike ia maloko o na keaka i hoea mai i Hawaii nei ma na wa like ole.

CHIQUITA.

            He wahi wahine uuku keia nona ke kiekie he 26 iniha.  Ua oleloia, oia ka wahine uuku loa o ka honua nei.  Ua hookaawale ia he hale hoikeike okoa nona.  Nui no ka poe makaikai i kipa aku ma keia wahi, a pela no hoi i loaa nui ai kana dala.

ZANZIG

            He wahi kela no na hana kilokilo ouli.  He 8 a 10 paha poe maloko o keia hale, a o ka lakou hana wale no ia o ka nana i ka ouli o ka poe e kipa aku ana ilaila.

THE SCENIC RAILWAY.

KAA HOLUA.

            He wahi holokaa holua keia.  He nui ka piha o keia wahi i na wa a pau no ka lealea maoli no i ka holo o na kaa uwila.  He noi a lehulehu wale ka poe i ike ia e hooholua mai ana me ka lakou mau lede hulumanu.  Aohe keia i holo, no ka lihi launa ole aku no.  O kahi mau keiki eleu no o makou ka i hoi wahi kaa holua.  Wela ka hao!

            (Aole i pau.)