Ke Aloha Aina, Volume VIII, Number 8, 22 February 1902 — Page 3

KE ALOHA AINA

 

POAONO, FEBERUARI 22, 1902.

 

Nui na Hawaii e Hoopo-

maikai ia Nei.

 

            O na hui nui makai o na uwapo na lakou e hoopomaikai nei he mau haneri o na poe Hawaii hana Poola oia keia: Hui o Hakafila no loko oia hui o Paulo Iaenabaka opio he Demokarata, Hui moku holo pili aina o Pokama, he Demokarata kekahi o na Wilikoki o Kauai no lakou lahui; Hui o Waila ma, he Demokarata ka ohana Waila; Hui Papa o Samu Alani, he Demokarata ia poe.

            Nui na kanaka Hawaii e hoopomaikai ia nei e keia poe; ina ee puka ka aoao Demokarata i keia kau ae, pau loa ka hana i ka haawi la e na Demokarata i na kanaka Hawaii wale no ma na wahi a pau.  Aole e like me ka Repubalika ka nanakee, i ka poe Kepani ka hana e haawi ai.  Ola io no.

 

NA LETA.

 

            Aole e ili maluna o makou na koikoi o na ahewa ana no keia mau manao i hoopuka ia malalo o kela poo aka e ili no ia maluna o na poe na lakou i kakau mai L. H.

 

HE PANE IA WAHAMANA.

 

            Pane ia Wahamana hilikau no ko'u ike ana i kau pane o ka la 11 o Ianuari o keia makahiki e pehi ana i na maka o na moopuna a Kinoiki e ola nei, no la hana au, ua hapala wale ia na maka a na moopuna e ae e noho malie ana oia na moopuna a Ikekeleiaiku, ua pane kikoola wale ae nei no oe me kou kuleana ole, oiai, aole i pane ia aku ma kou pili io hoi i kuleana ai kau hoole ana i na koko pili ia Kaumualii a me Kamakahelei, nolaila, pane ia oe e na iwi kuamoo ponoi o na'lii au e hoole nei aohe koko o Kaumualii iloko o lakou.

            Nolaila, owau pu kekahi i lili no kau hana kikoho wale mai no me kou kuleana ole i ko makou koko, oiai he mau keiki na moopuna a Ikekeleiaiku na'u.  Nolaila, aole o'u makemake e pane wale mai i ko makou mau pili, na makou no e ike no makou iho, aole nau, o ka'u mau pane i hoopuka ai ua pili wale no no ko'u io ponoi.  Aole nou kahi o kau pane wale mai no ia'u.  E mihi oe no kou kuleana ole iloko o kau mau pane.

            Owau no me ka oiaio,

PALEKALUHI KAIKIOEWA

KAMEHAMEHANUI.

 

Nupepa KE ALOHA AINA,

                                                                        Aloha kaua:

            E oluolu e hookomo iho i keia mau wahi hunahuna materia ma kou mau eheu, a nau hoi la e lele hele aku a loaa aku ka makamaka, ka nupepa Ka Lahui Hawaii, a waiho aku i ka ninau, ola hoi keia:

            Pehea la i hoopuka pau pono ole ia ai na moolelo oia nupepa no ka mea, o makou o ka poe hookaa pololei i ke ola o ka pepa, he makemake e hoopuka ia mai na moolelo a hololea, aole hoi e hele mai a hapa, hoopuka mai ana ua moolelo hou.

            Auhea la o Adelaida ka wahine i aloha ole la, aia no paha ke noho ala iloko o ka ehaeha, a no ia pohihihi la, oia ka ka mea kakau e noi aku nei i ka oluolu o na ona e hoopuka mai ia moolelo a pau pono.

            E hoohalike ae me ka Nunu Maka Onaona, KE ALOHA AINA, ka hoopuka a pau pono mai ke poo a ke hiu.  He nanea mai hoi kau.

            Owau no me ke aloha,

                                                Na Ulu o Lele.

            Lahaina, Feb. 11, 1902.

 

Ka Lunahooponopono o KE ALOHA AINA,

                                                                                                            Aloha oe: -

            Ua ike au i kekahi wahi olelo iloko o kekahi nupepa haole o ka Poaono nei la 15 o Feberuari 1902, o "Gossip" kona inoa, a na unuhi ia ae nei e a'u ma ka olelo Hawaii oia keia:

            Aole i hookipa ia ka poe hana keaka nika maloko o ka hale alii o Wilikoki i keia holo ana mai nei.  Ua manao ia he mea kupono ole ia i keia wa.  Nolaila, aole i loaa na komo daimana i kekahi poe, a o ka Hui Keaka Ofiuma ua nele i na makana uwaki gula.

            Owau no me ka hu ae o ka aka,

                        LAAKEA.

Honolul, Feb. 17, 1902.

 

UA HOEA MAI LA I KAPALA-

KIKO.

 

            Ma ko lakou alahele huli hoi no Hawaii nei ke Keikiali Kawananakoa me kana lede, a pela hoi me Sam. Paka a me Mrs. Paka.  Aia lakou ma ka Hotele Occidental kahi i noho ai, a me he la, ma ka mokuahi Alameda o keia Poaono e hoea loa mai ai lakou i Honolulu nei.  Ua hoole ae o Sam Paka aole oia i manao e lawe i ke kulana kiaaina, a aole no hoi he oiaio o na lono i hauwawa ia ae no kona hookohu ia mai i kiaaina.

            He oiaio, he nui na manawa a'u i kipa aku ai e ike i ka Peresidena, aka, no ka mea pili wale no ia i ko'u kulana Komite Kuwaena no ka aoao Repubalika mai Hawaii aku.

 

            Ma ka hoike a na poe i kipa aku i ka lua o Kilauea aia he mau hiohiona no ka hu hou ae o ka pele maloko oia lua.  He nui ka wela i ike ia o ka lua.

 

HOOLAHA HOOKO MORAKI

 

HOOLAHA KUAI A ME HOO

PAA A KA MEA MORAKI.

 

            Ke hoolahala aku nei ma keia no ka hooko ana aku i ka @ana o ka hoolilo ana i kekahi moraki i hana ia e F. I. Cutter o Honolulu, Mokupuni o Oahu, Teritori o Hawaii, i ka Pioneer Building and Loan ASsociation of Hawaii, ma ka la 16 o Okatoba, 1897, a i hoopaa ia ma ke Keena Aupui, Oahu, buke 171, aoao 392 a me 394, ke hoolaha ia aku nei ma keia, ua manao ka mea paa moraki e paa i ua moraki la i oleloia no ka hahaki ia o ka aelike, oia, ka uku ole la o ke kumupaa, ukupanee, auhau a me ka puka i ko lakou wa uku, a o ua moraki la i oleloia, e hoolilo ia aku ana ma ke kuai kudala ia ana ma ke keena kudala o James F. Morgan, ma alanui Moiwahine, Honolulu, ma ka Poakahi, Maraki 10, 1902, ma ke hora 12 awakea.  O na waiwai i hoakakaia maloko o ua moraki la, oia kela pa hale e waiho la, ma Puunui, Honolulu, penei:  E hoomaka ana ma ke kihi Hema o alanui Puunui a me alanui Park e holo ana.

1.  Hema 52@ Komohana 310 kapuai ma ke alanui Puunui,

2.  Hema 38@ Hikina 200 kapuai ma ke alanui.

3.  Akau 52@ Hikina 310 kapuai me ke alanui.

4.  Akau 38@ Komohana 200 ma ke alanui park a hiki i kahi i hoomaka ai.  He mahele keia no ka aina i hoakaka ia ma ka Palapala Sila Nui 2593.  Apana 2.

THE PIONEER BUILDING AND LOAN ASSOCIATION OF HAWAII.

            Ma o kona Loio ala:

                        A. G. M. ROBERTSON

Hanaia ma Honolulu, Feb. 14,

1902.                                      feb. 15, 22, mar 1, 8

 

HOOLAHA KUAI A ME HOO

PAA A KA MEA MORAKI.

 

            Ke hoolahaia aku nei ma keia no ka hooko ana aku i ka mana o ka hoolilo ana i kekahi moraki i hana ia e A. T. bannister o Honolulu, Mokupuni o Oahu, Teritori o Hawali, i ka Pioneer Building and Loan Association of Hawaii, ma ka la 21 o Novemaba, 1898, a i hoopaa ia ma ke Keena Kope Aupuni, buke 196, aoao 186 a me 187, ke hoolaha ia aku nei ma keia ua manao ka mea paa moraki e paa i ua moraki la i oleloia no ka hahaki i ka aelike, oia hoi ka uku oleia o ke kumupaa, ukupanee, auhau, a me ka puka i ka wa uku, a o ua moraki i olelo ia e hoolilo ia aku no ma ke kuai kudala ia ana ma ke keena kudala o James F. Morgan, ma alanui Moiwahine, Honolulu, ma ka Poakahi, Maraki 10, 1902, ma ka hora 12 awakea.  O na waiwai i hoakakaia maloko o ua moraki la, oia kela pa hale e waiho la ma Kalihi, Honolulu, Mokupuni o Oahu, penei E hoomaka ana ma ka Hema Komohana kihi o na alanui Leilani a me Fernandez a holo.

1.  Hema 50@ Hikina 100 kapuai.

2.  Akau 35@ Hikina 100 kapuai.

3.  Akau 50@ Komohana 100 kapuai.

4.  Hema 35@ Komohana 100 kapuai no kahi i hoomaka ai.  O keia pa hale ua lilo mai ia i ka mea moraki ma kekahi palapala kuai i hana ia e A. Fernandez, ma ka la 29 o Maraki, 1898.

THE PIONEER BUILDING AND LOAN ASSOCIATION OF HAWAII.

            Ma o kona Loio ala,

                        A. G. M. ROBERTSON,

Hanaia ma Honolulu, Feb 14,

 1902.                          feb. 15, 22, mar 1, 8.

 

HOOLAHA KUAI A ME HOO

PAA A KA MEA MORAKI

 

            Ke hoolahaia aku nei ma keia no ka hooko ana aku i ka mana o ka hoolilo ana i kekahi moraki i hana ia e James H. Hunt o honolulu, Mokupuni o Oahu, i ka Pioneer Building and Loan Association of Hawaii, ma ka la 24 o Sepatemaba, 1896, a i hoopaa ia ma ke Keena @@@@ Aupuni, Oahu, buke 163, aoao 400 a me 402, a e kulike me kekahi @@ana @@ ano maloko o ka moraki elua i hana ia e James H. Hunt i olelo ia i ka pioneer Building and Loan Association of Hawaii i oleloia ma ka la 23 o Augate, 1897, a i hoopua ia iloko o ke keena i olelo ia ma ka buke 171 aoao 184 a me 185, ke hoolahala ia aku nei ua manao ka mea paa moraki e paa i ua mau moraki i olelo ia no ka hahaki i ka @elike, oia hoi, ka uku ole ia o ke kumupaa, ukupanee, auhau a me ka puka i ko lakou wa uku, a o ka waiwai @ paa maloko o ua moraki la i olelo ia, e hoolilo ia aku no ia ma ke kuai kudala ia ana ma ke keena kudala o James F. Morgan ma alanui Moiwahine, Honolulu, ma ka Poahaku, Maraki 10, 1902, ma ka hora 12 awakea.  O na waiwai i hoakakaia maloko o ua mau moraki la, oia kela mau pa hale e waiho la ma Punahou, Honolulu, Mokupuni o Oahu, penei: E hoomaka ana ma ke kihi Komohana o keia mau apana ma kekahi wahi ma ka Hikina o alanui College ma kahi Akau 45@ 00!  Hikina a me 300 kapuai mai ka huina Hikina mai o na alanui Dominis a me College, alaila, holo i ka Hema 41@ 50! Hikini 125 kapuai; alaila, Akau 45@ 00! Hikini 150 kapuai; alaila Akau 42@ 00' Komohana 125 kapuai; alaila hema 45@ 00! Komohana 149 kapuai, e holo ana ma alanui College no kahi i hoomaka ai, a nona ka ili aina o 18687 kapuai kuea me na pono a pau maluna oia wahi.

THE PIONEER BUILDING AND LOAN ASSOCIATION OF HAWAII.

            Ma o kona Loio ala

                        A. G. M. ROBERTSON

Hanaia Honolulu, Feb. 13, 1901.

            Feb. 15, 22, Mar. 1, 8.

 

OLELO HOOLAHA

 

            Ma keia ke hoolahaia aku nei no na kooko ana aku i ka mana o kekahi moraki i kaawi ia mai ia'u ka mea nona ka inoa malalo iho, Leu Seu, e Chin Akina, ma ka la 1 o Mei 1901, ma kekahi nota nona ka huina $300, a oiai o keia nota ua hala ka manawa uku a aole no hoi i ukuia mai, a no ka uku ole i ka wa i koi ia aku ai, owau o Liu Seu mahope o keia hoolaha ana no ekolu pule e paa aku ai au i ua moraki la i olelo ia e like me ke kauoha a ke kanawai a me ka mana i loaa ia'u.

            [Kakauinoa]    LEU SEU.

            feb. 15, 22, mar 1.

 

OLELO HOOLAHA.

 

            Ke papa a ke hookapu loa ia aku nei na kanaka o na ano a pau, aole lakou e hele maluna o kuu aina e waiho ala ma Kalihi Uka no lakou na inoa i kapaia oia o Kapo, Namahele, Kuaiula.  O ka poe a pau e loaa aku ana ia'u a me ko'u mau hope e hele ana maluna o ua mau aina ala mahope o ka puka ana aku o keia hoolaha ma ka Nupepa KE ALOHA AINA; e hoopii ia no lakou a pau e a'u ke loaa aku lakou e hele ana maluna o keia mau aina i oleloia.  Ke papa pu ia aku nei na holoholona o na ano like ole aole e hele maluna o keia mau aina i olelo ia, ke ole he palapala mai ia'u aku.  O ka mea e kue ana i keia e hoopii no au ma ke kanawai.  Ua kapu na aina a pau loa ma Kalihi Uka, Honolulu, mokupuni o Oahu.  E hoolohe i keia o pilikia auanei.

                                                GEORGE H. HOLT.

            Kapalama, Honolulu, Ianuari 8,

1902                                        3m.

 

KAI BAIKIKALA LOAA.

 

            Ua loaa i ka mea nona ka inoa malalo iho nei he kaa baikikala mahope aku o ka Halekula Kamehameha iloko o ka ulukolu.  O ka mea nona keia kaa e kii koke mai ma ke Keena o KE ALOHA AINA me ka uku pu mai i na lilo o ko'u malama a me ka hoolaha ana.  A ko kii ole mai ka mea nona keia kaa iloko o na la he 15 e lilo loa no keia kaa @'u.

                                                                                                KEAWE NAWAHI

            Alanui Kula, Helu 165, Feb. 12,

1902