Ke Aloha Aina, Volume VIII, Number 8, 22 February 1902 — Page 1

KE ALOHA AINA

UA MAU KE EA O KA AINA I KA PONO

HOOKUMUIA MEI 20, 1895

BUKE VIII    HONOLULU, POAONO, FEBERUARI 22, 1902  HELU 8

 

E HAHAKAKA HOU ANA IA NOHO.

            Ina paha he oiaio e koho ia ana o Keoki Kaaka i kakauolelo ma kahi o H.E. Kupa e like me na mea e lohe wale i anei, alaila, he kue ana ia i ke kanawai kumu o ka aina, oiai, oia e noho ana he hoa no ka Hale Ahaolelo. Ua papa ke kanawai aole e hiki i ke kahi hoa o ka Ahaolelo ke lawe i kekahi oihana aupuni a pau @@na kau e noho ai. Ina paha oia e lawe ana i keia oihana, he mea maopopo e haalele ana oia i kona noho, a e koho hou ia kona pani e pono ai ma ia wahi i hakahaka e like me na poe i make.

 

LA HANAU O KEOKI WAKINEKONA.

            O keia Poaono ka la hanau o Keoki Wakinekona, ke kanaka nana i hookuokoa ae i ka noho ana o Amerika Huipuia he panalaau no Pelekane i ka 1776. He la nui loa keia i ka lahui Amerika e like me kakou e hoomanao mau nei i ka la hanau o Kamehameha I. Nolaila, e pau ana na keena aupuni a me kakahi mau halekuai i ka paa ma keia la.

            He nui na lealea e malama ia ana ma ke kahua o ka hale bia e ku nei mauka o Kalihi mai ke kakahiaka a hiki i ka po ana.E hoea ae ana ka hana aupuni malaila no ka hoolealea ana i na poe makaikai, a o ka panina o na hana he hulahula poo kii. He hookahi dala ka uku komo i ke kahua o na lealea e malama ia ai, a ma ia uku hookahi no e lawe ia aku ai oia no ke kahua lealea a hoi mai maluna o na kaauwila.

 

---

 

            O J. Mesberg Jr. ka mea nana i lawe kolohe ke kaa o Kauka Kopa ma kekahi po o ka pule i hala. He pili aoao kekahi i hele pu me ia i ka holokaa i na po ala a na makai e noke ana i ka huli i ke kaa. A ua hopu ia na kanaka opio nei no ka aihue ma ke degere elua.

 

HE BILA HOOMAHUAHUA UKU

            Kapalakiko, Feb 6. He hoike kai loaa mai la mai Wasinetona mai, no ka la 4 o Feberuari, e olelo ana: I keia la i waiho aku ai o Elele Wilikoki he bila e hoololi ana i ka pauku 92 o ke kanawai o ke aupuni Hawaii, a e kau ana i keia mau uku no na Luna Aupuni o ke Teritori Hawaii, penei: E ukuia ke Kiaaina i $8000, me $3000 no kana kakauolelo pilikino a me $500 no na lilo huikau, Kakauolelo o ke Teritori $5000; Lunakanawai Kiekie o ka Aha Kiekie, $6000; na kokua Lunakanawai $5500 pakahi; na Lunakanawai Aha Kaapuni $4800 pakahi, Lunakanawai Apana $6000; Ilamuku $4500; Loio Amerika $4800.

 

Ke Imi ala i Kahi e Ohohia ia ai

            Wasinetona, Feb. 5. Ua lawe mai la ka Elele Wilikoki o Hawaii he bila e hoomahuahua ana i keia mau uku makahiki penei: Peresidena o Amerika Huipuia, $100,000; Hope Peresidena $25,000; na Hoa o kaAha Kuhina, $10,000.

-

            E ole io ka Elele mai Hawaii aku nei loaa ka mea nana e hoopiipii ka uku o na Poo Aupuni o Amerika. Ina no la hoi paha pela ua Elele la e noi ae ai i mau tausani a haneri tausani i ka Ahaolelo o Amerika, no ka malama ana i na ma`i lepera o Molokai, ina la aohe mea nana e nema aku. Aia no ka hoi ke wikiwiki ae la i ke noi i puu dala no ko Amerika poe i hele a olo ka eke. Oia lo ka hoi ka lahui.

-

            Ma ke Kinau o ka Poalua nei i huli hoi aku ai o W.K. Kino, ko makou hoaloha a hoa kakele o ka makapeni, no kona home i ka Ua Kanilehua, a i kona wa e hoea aku ai i ka home e pili hou ai ai kana milimili Ka Elele Hawaii.

 

E KOHO BALOTA ANA NO

            Mamuli o ke ulolohi loa o ka hoopuka ana ae o Kiaaina Dole i ke kuahana koho balota o ka Apana Eha no ke pani ana i ka hakahaka o Ake Giligilana, i make, na manaoia e waiho pu ana oia i ke kahea ana i na koho balota kuikawa ala. Aka i keia wa ua hoopuka mai la o Dole i kana kuahana koho balota kuikawa a e malama ia ana ma ka la 9 o ka mahina ae nei o Aperila.

 

HAAWI NA MAORI I NA KOKUA ANA.

            Welinetona, Nu Kilani, Feb. 3. He tausani Maori i aa aku la e lawelawe i na hana kiai ma na pa kaua a pau o na Panalaau o Beritania me ka manao e unuhi ia ae hoi he heluna like me ia o na pualikoa Beritania no ka hoouna ana aku i Aferika Hema.

-

            Ua hopuia o J.W. Hall no kekahi hihia ekaeka loa ana i hooko ai maluna o kekahi kaikamahine opio o 15 makahiki a kekahi mau makua kulana kiekie o keia kulanakauhale. Eia kona hihia imua o ka aha kiure niele, a o ka bona i kau ia aku nona he $5,000.

 

KA HUI HAWAIIAN REALITY AME MATURITY KAUPALENAIA.

I kela a me keia mea kuleana

            Ke hoike aku nei ka Hawaiian Realty & Maturity Co. Kaupalena ia, i ka poe a pau he hana ka lakou a i ole i makemake paha i kekahi mea mai ka hui aku, e kakau pololei mai i ka lakou mau leka a pau, a mau palapala oihana o kela a me keia ano i ke Keena o ka Peresidena o keia hui, Rumi helu 3 McIntyre Hale, Honolulu, a aole mea okoa aku i ae ia e kakau i kekahi rikiki ma ka inoa o keia hui ma na ano a pau.

R.U. HAWAIIAN REALTY A ME

MATURITY KAUPALENAIA.

Na L.K. KENEWELA.

Peresidena.

 

HE ALII AIKANAKA KAULANA

            O ke alii aikanaka kaulana loa o Fiji, i make mai nei oia no o Tokombau. Ua olelo ia iloko o kona ola ana ua ai aku oia i na kanaka no lakou ka huina i hiki aku i ka 872 a oi aku. Aole i helu ia ka nui o kana poe i ai ai, aka, ua helu ia ka nui o na kanaka i ai ia e kekahi kauwa ana e na loaa he 872, a ma ka lakou hoike na oi ae ka nui o na kana @@ i pau i keia alii i ka ai mamua o na kanaka i ai ia e keia punahele ana, a nolaila, ke manao ia nei na oe aku mamua o ka huina i hoike ia ae la na kanaka i pau ia Takombau i ka ai.

            Ua hoomaka oia e ai i ka i`o kanaka i ka eono o kona mau makahiki a mai ia manawa mai kona hoomau ana a hiki i wale no i kona haalele ana mai la i keia ola, ua loihi na la o kona ola ana ma ka ili honua e hoonuu ai i ka i`o o na kanaka i loaa aku i kona mau lima aloha ole.

            O kona makuakane, ka Moi Tanau, kekahi o na alii weli nui ia i kona mau la e ola ana. He alii kaulana oia i ka ai kanaka a he nui i pau iaia i ka hoonuu ia. Ua olelo ia mamua aku o ke au o ka Moi Tanau he pepehi mua ia na kanaka e puholo ia ana a make mamua o ko lakou hoomoa ia ana, aka, iaia me ia ola no kau iluna o ke ahi a ilaila aku e make ai. Oia iho la ka moolelo weliweli o kona makuakane a ke olelo ia nei nae e ka poe i ike like ia laua elua, ua oi ae ke ino o keia Tokombau ae mamua o kona makuakane.

            O kekahi o na hana weliweli loa a keia lapuwale i hana ai i kona mau la opio oia ka lawe ana i ke ola o kona makuahine ponoi me kona mau lima koko. He alii mana oia ma na ano a pau, a aohe leo hiki ke pane aku iaia. O kana hana e hana ai, oia ka pono a oia ke kanawai. Ua haalele mai la nae oia i keia ola ana, a e hui aku ana paha oia me ka uhane o ka poe ana i hoonuu ai ma keia ao i kona hiki ana aku ma ma kela ao, a peha la lakou e pane mai ai ai iaia? Pomaikai o Fiji i ka hala ana aku la oia lapuwale, a ina e puka hou ae kona hope he kanaka ono loa i ka i`o kanaka e loaa hou ana no ia mea hana lakou e puholo mai.

-Kaokoa.