Ke Aloha Aina, Volume VIII, Number 7, 15 Pepeluali 1902 — Page 8

KE ALOHA AINA

 

                                                                        KE   ALOHA  AINA,  POAONO,  FEBERUARI  15,  1902.

 

MOOLELO  HOONI  PUUWI

 

---: NO  KE :---

 

KAKELA   LANAFODA

 

---:  KA  :---

 

Ipuka  o  ke  Kuewa

 

me  ka  Aea.

 

---: KA :---

 

Pua  Lilia  Ahiu  o

 

Sanadela.

 

---

MOKUNA  XIII.

 

            Ka Haku Aoo o Lanafoda ---Ka Halealii Weseminiseta Abbey --- Na Olelo Mihi Maluna o na Kuli---Ka Lima Akau o ka Huikala.

---

            Hea mai ka leo aloha o kuu makuahine i kela wa a kou kua koko huhu o ka inaina e haakohi ana---My Lord---Blessed and shelter our children---aka, o kau huaolelo kakana loa i kukala aku ai.  Silence ye there you idiot and nonsence wife !  Owau ka Haku a me ke pookele o kei kakela a aole loa he kuleana o kahi mea maluna ae o'u  Alaila, e Haku Lanafoda he mau hana aloha anei ia au, a i ole he mau hana keonimana anei ia na kekai o nakanaka koko alii koikoi o ka aina nei e lawelawe ai,  Aole loa !  O kekahi ia o kau mau hana haahaa loa a e like me kou hoopuka ana aku i kau mau olelo lokoino maluna o ko'u makuahine aloha, pela no i hoike mai ai na ouli o kau mau hana hewa he kanaka naau haakei io no oe me ka piha hookano o ka hoowahawaha.

            Nolaila, o ka'u mau olelo a me na noi hope loa ana no paha no ka pono o ka mea a'u i aloha ai, ua hailuku mai la oe me na huaolelo kakana o na hoina like ole a pau, alaila, kahea mai la oe i ua aloha nei a'u i hoohiki ai ( aole maua e kaawale a hiki i ka make ana )  he kaikamahine na ke kanaka hanai holoholona, a he lopa haahaa loa o ke koko kauwa.  Na kela mau olelo hoowahawaha loa au o ke kumakaia i hoowela mai ia'u me ka inaina nui, a ina aole oe o ko'u makuakane ina la penei aole au e lilo i Kuewa no Lanafoda.  He kanaka make oe ia'u ia sekona o ko'u huhu a me ka ukiuki, aka, o kou leo i hea ae ai a me kela aloha o ka makua na ia mea i kaohi mai i ko'u mau lima mai ka lilo ana i Kuewa limakoko no Lanafoda.

            O ke alahele e hoolilo ana ia'u i kanaka Kuewa a me Aea mai na opuka mai o Lanafoda oia ka'u i lawe koke ai me ka hakalia ole a haalele aku ia oe e pupule hehena iloko o kou huhu a me ka inaina.  O ka hoohiki a'u i hoopaa aku ai imua o Monisua Kaulada oia ke alanui hele mua loa o ka loaa ana i ke Kuewa o Lanafoda ka hanohano nui iloko o ka lanakika, a o ke kahua kaua aina hoopakele noho alii a me kona poo kalaunu oia ke anuu pii olua o ka lanakila nana i hapai ae i ke Kuewa o Lanafoda mai ka haahaa olalo a iluna o ke kiekiena o ka hanohano, a ina he la e kono a e alako hou ia aku ai oia e komo iloko o na hana hookahe koko maluna o ke kahua kaua, alaila, iloko o ka enaena o ka uwahi pauda a me na poka wela e ike hou ia ai oia e paio ana no ka ono o kona aina hanau, a me kona noho alii malalo o na kahakaha waihooluu o ka hae liona.  Ina oe i aloha mai ia'u ina la me nei aia ka hanohano a ke Kuewa o Lanafoda, i hakoko ai ke o ala ma kou inoa, aka, aole nae hoi pela.  E like me kuu lilo ana he kanaka kuewa mai kou alo ponoi mai, pela no auanei e nele pu ai

kou inoa me ka hanohano a'u i hana ai.

            Nolaila, ua lohe oe i ka'u mau olelo a aole loa hoi he mau huaolelo hoohewahewa na kaua e kamailio hou ai ma ke ano hoopaapaa, ua sila a ua kuni  mai oe ia'u me ka hao wela o ka hoino, a o ke alina o kau mau hana hoowahawaha oia no keia he kuewa a me ka aea.  Alaila, e hoomanao iho ina he kuewa au i kipakuia mai, a he aea hoi i hookuke ia, alaila, no ke aha, ka liona ahiu o Lanafoda Kakela i makemake ai i ka mea ana i enemi a i hoowahawaha ai ?  Maluna o kou mau kuli e loaa ai na huikala ana ia. "

            " Kuu keiki !  Kuu hooilina !  Kuu Haku Welemoneka e aloha mai iau, ua hooehaeha mai kau mau olelo iau i kou makua palupalu, alaila e make anei au he hapauea i loaa me ka mai puuwai, a e hoonele mai hoi i ka hale o Lanafoda me ka hooilina ole.  I nonoi aku la au ia oe e aloha mai i ko'u makua nei, a o ka inaina a me ka huhu o ka la i hala e pale ae ia mai ko'u naau ae, "  wahi a ka Haku aoo Lanafoda.

            Ina ma o'u nei wale no kau hoino ana i na la ua kahea aku au ia oe o ko'u makuakane a hoopoina iho hoi au i ka inaina au i hoohiki ai.  Aka o kuu aloha a me puuwai oia kau i hoino ai me ka hoowahawaha loa, alaila o kou kahea a kapa ana i ua aloha nei ou he aloha na ka mea hanai holoholona, alaila, heaha iho ka olelo kupono na'u e haawi ai i ka'u olelo hooholo.  E hoole mau loa aku au a hiki i ka make ana aole loa au e pono e kapa ia mai he keiki a he hooilina no Lanafoda a aole loa hoi kona Haku huhu a me ka lokoino he iwi a he koko no'u, ua paa ka'u hoohiki a me ka'u mau olelo, a o na lani kiekie i luna loa ka hoike no ia mea.

            Na keia pane uahoa ma ka aoao o ke kanaka opio Kuewa i haawi aku i puupuu oolea i ka Haku aoo o Lanafoda, a ina paha ua Haku aoo ala a he kanaka oia i nele mena aa ko ko o ke kanaka Pelekane oiaio ina la ua haule pahu oia he kino hapauea na ka make.  Nolaila me kahi manaolana hope loa i koe iloko ona kahea ae la oia me ka leo nui, " Kuu Akua e haalele mai ana anei oe iau. "  a e kuu keiki auhea kau wahine ?  E ike aku au iaia mamua o kou iho ana aku iloko o ka loa, a e leaa mai noi na kala ana no kuu uhane ma mua o kuu make ana, alaila, uwe iho la ua Haku aoo nei.

            Mena waimaka e kiheahea ana ma na papalina o ua Haku aoo nei o Lanafoda, aia hoi me he anela aia i iho mai ka lani mai, aia e ku ana imua o kona alo kela oiwi kino hemolele o ka maemae a me ka nani Ka Pua Lilia Ahiu o Sanadela, a o ka Roselia Elua hoi o ka Hale o Semafila.

            E kuikui ana oia iloko o na lima o kana kane a mahope aku o laua e ku ana ka Haku Maina Semafila me kona lima akau o ka hoomaikai e kau ana maluna o ke poo o ke Kuewa o Lanafoda.

---

NA  LETA.

---

            Aole e ili maluna o makou na koi koi o na ahewa ana no keia poo aka, e ili no ia maluna o na poe na lakou i kakau mai   L. H.

---

MANAO  HOAKAKA   IO'U  MAU  HOA  O  KE  ONE  HOOKAHI.

---

            Ua ike iho au i ka pane a Laakea ia Wahamana ua pololei na mea a pau no na pili hanau a Kaimualii.  O ka'u hoahewa wale no no ka Wahamana hana hoouluulu, e like me na mea i ike ia i na nupepa i hala aku nei.  E pane ana o Wahamana ia Palekaluhi, aole i pane aku ke 'lii Palekaluhi me ka manao e hoino aku i kekahi.  Ua olelo no ia ike ana iho i ka pane e hooili ana i ka inoa e kona makuahine Lilia me kona kupunawahine Kiliwehi a hooili ia aku nei no ka ohana a Nika ka poe aole i ikeia mai kinohi mai.  Aole hoi ma o ka makuahine pu na Papaeku ka mea nana keia kaikamahine o Kaumana e kohu ai ke hea keia mau inoa alii.

            Aole au e hoino ana ia Kaumana he wahine noho malie, na ka poe imi kala o keia mau la e hooili aku nei i ka inoa o na alii no ka Kaumana ohana, oia ke kumu o ko Palekaluhi pane ana.  Aia mai nei keia hana palahalaha aku nei.  Ua pono no hoi ka Wahamana ane ana ina no hoi o kona kupuna.  Ko hai kupuna kana e paipa nei.  O na moopuna a Kamakahelei me kana kane Kini ; aole ia he mea i waia ia, no ko ke aliiwahine Kamakahelei noho ia Kini loaa ka laua mau keiki o Ikekeleiaiku ( k ) a me Namakaokahai ( w )   Ina no ka hapa o keia mau alii ma o ko makuakane Kini, alaila, ua nui na hapa alii o Hawaii nei mai ka eleele a keokeo, hapa ma o ke kane ala ma o kana wahine he alii nui.  Ua alii no ka laua mau kau keiki.  No Ikekeleiaiku imua oia o na Kamehameha e noho like ana.  Aole i ikeia kekahi mau ano e, pela iho nei no na keiki a Ikekeleiaiku ma i ke au ia Kalakaua.  Ua lawe o Kalakaua a hoolilo ia Hoapili Peka i kiaaina no Maui, no ka ike no o ke alii ua kupono ia kanaka ma ia wahi.

            Eia ka olelo ma ka puke nui.  O ka mea hoino i kona moi, hoino oia i ke Akua, no ka mea, nana no i koho mai i moi no Hawaii nei.  Pela hoi mekana moiwahine Kapiolani moopuna a Kaumualii me Ikekekeleiaiku.  Aole no e hoole oia, ohana o Kapiolani ua ike no lakou ia mea.  Na Kamakahelei no o Kaumualii, Ikekekeleiaiku a me Namakaokahai.  Aole a lakou hoopaapaa ana, i keia au hoi ka pii no ia a ka poe i ike ole ia a kau i ka winiwini.  I ke au hoi ua nono ka aina i na alii aole puka ae o na kuauhau liilii pau aku nei kou kakaikahi mai na pua alii o ka a pii ae keia o na makaainana.

            Ia oe e Laakea e alawa iho oe i ka nupepa haole o kela pule aku nei e ike no oe i ka helu papa @Alaaa o Kapiolani hoahanau ekahi no Kaumana, e like me Ema Kaleleonalani me Kunuiakea pela iho ia me ia ka pili ia Kaumana a, Kapiolani.  Na ka mua na ka hope hope, pela mai ka nupepa a Ema PIli ahu no hoi ka epa ka ua mea o ka piikoi eia no o Koleta ke ola nei hoahanau ekahi o Kaumana, aole no ia i lawe i ko lakou haku i hoahanau.  He alii o Kaumana i kekala alii ke kino paia e ke kala oia ka'u ike.

            O oe e Wahamana e hoopau loa oe i kau pane ana malalo o kau hana i aia mai ai keia mau olelo mawaena o kakou.  Kehoopau nei me ke aloha i o'u mau hoa kakele ma ke aiai o ke kanana me ka wai o ka inika.

            Owau iho no me ka oiaio.

            Kawaiokahakulolahuiwahinepupukaohonopuwaiakuaihonokalani  Papaikaniau  Iaukea.   Kalihiwaena, Honolulu.

---

Mai  ka  Aoao  6  mai.

---

            Auhea ke alanui a oukou i manao ai e loaa mai ka pono kaulike i ka lehulehu ?  Ua pane ia aku lehulehu.  I alanui oki hou e hou e hoomaka ana mai ka halekuai aku o I.  Akaka a hiki aku i ka hale leta o Kukuihaele, he mamao o 1 1/2 mile aole hoi e like me kela alanui 4 mile ka mamao.  Eia ka pane a ua Luna Nui ala o na Hana Hou.  Aole au e ae aku ana i ka oukou noi, aole no hoi au e hoole aku ana, aka, e hoi ana au a hiki i Honolulu hoouna mai au i ke ana alanui.  A ina e loaa ana ka iliwai e like me ke kanawai, alaila, e hooko ia no ko oukou makemake.  Ua hooko io ia mai no keia mau olelo mamuli o ka hoouna ia ana mai o ke ana aina iloko o ka mahina o Oct.,  a ua ana ia ke alanui a hiki i Kukuihaele ma ka 7 pa keneta.  E hoomanao e ka lehulehu ua ku keia ana ana i ke kanawai, no ka mea, he 8 pa keneta ka ke kanawai i haawi mai ai, aole e oi aku.

            Ma kekahi la iloko mai o ka mahina o Dekemaba ua hiki mai la ka papa alanui pauaka o Hamakua ae a mahope iho o ko lakou nana ana ae i ua alanui ala me ko lakou mau, onohi maka alohilohi, a no ka pakela makona maoli no paha, maoli o ko lakou mau puuwai i ke kanaka Hawaii, ua hoole nui iho la aole e aponoia i ua alakui ala.  E ka lehulehu ke waiho aku nei ke a peni na oukou e kaupaona @mai.                        Aole  i  pau.