Ke Aloha Aina, Volume VIII, Number 7, 15 February 1902 — Page 6
This text was transcribed by: | Tiana Kamiko |
This work is dedicated to: | Other dance teachers and choreographers from Hawai'i. :) |
KE ALOHA AINA
POAONO, FEBERUARI 15, 1902.
Hoike Poino Mai
ka Hohonu Mai
Vitori, B. C. Jan. 18. Ua loaa mai la he mau hoike no ka loaa ana aku o kekahi waapa ma Ahousett, i ike ia ua ano like loa no ia me kekahi o na waapa o ka mokukaua nalowale Condor. ma na aoao ka ihu o keia waapa e kau ana ka hua palapala C me kakahi pua pana ma kona hope me ia pu e kau ana keia mau hua palapala XVI, a malalo iho e kau ana keia mau hua palapala SHB me ka Sh., '98, e hoike ana oia kona wahi i kapili ia ai ma Sheerness i ka 1898.
Ua loaa aku keia waapa i na Ilikini ma Ahousett i ka la 6 o Ianuari. ma Cape Beal ua pae mai he uwati gula me ke kaula a me kekahi uwati hooholo moku, a ua loaa i ke kanaka malama hale ipukukui. O keia uwati hooholo moku ua hana ia ma Enelani.
AOLE KA LEPERA HE MA'I
LELE.
St. Peteroboro, Ian. 28. Ua hoole loa ae o Porofesa Polotentnoff maope o kona huli hoihi ana, aole ka ma'i lepera he ma'i lele. Eia kekahi poe kauka kaulana ke hoala nei ke komite no ka hoao ana e imi pono aku i ka oiaio o ka hopena o na olelo a keia porofesa.
LUNAHOOPONOPONO O KA
ELELE HAWAII.
Ua kipa mai i ko makou keena nei o Mr. W. K. Kino, ka Lunahooponopono o ka nupepe Elele Hawaii o Hilo. He kupa a he kamaaina oia no ka ua Kukalahale nei, aka, he eono makahiki nae kona kaawale ana mai anei aka nei akahi no a ike hou i ka uluwehiwehi o ke Kapitala. O Hilo Ua Kanilehua kona home hookuonoono i keia mau la, kahi ana e noho kapena nei no ia wahaolelo e o nei o Ka Elele Hawaii.
He makamaka a he hoaloha oia no makou a he hoa kakela hoi no ka makapeni. He nui kana mau mea hou e ike nei i keia mau la, ana hoi i ike ole ai mamua. E noho ana iki oia he elua pule maanei a huli hoi hou aku no kona home i ka aina ua kaulana. I aloha ko kaua. A ike aku hou i na hoa aloha aku a nui.
Eia ka halekuai o L. B. Kerr & Co. ke kuai hoemi nei i na Lole Liliua, o keia ka wa kupono no oukou e na lede e hele ae ai malaila a wae i ko oukou makemake. Mai poina i keia kuai hoemi nui.
Makemake o Ho
gana e Hakaka
Ua hoopuka ae o Hogana, ka paele keaka, ma ka Poalua nei, aole oia e haalele iho ana ia Honolulu nei, a hiki i ka wa e loaa ai iaia he hakaka ana me ke Keikialii Kalanianaole, oiai, wahi ana na hoohaahaa ia aku oia e ke Keikialii a he mea pono no laua e hakaka lua no ka mea o laua e eha ana, alaila, oia auanei ka wa e na ai o kona inaina no ke Keikialii.
Ua ulu mai keia mau kue ana i ka wa a Hogana e hooponopono ana i kekahi mau dala aie o ka hui keaka Opiuma iaia me Morris Keohokalole ka puuku. A i kono wa i hoole ai i ka lawe ana i na dala i haawi ia aku iaia ua ulu koke ae la he mau paio olelo hahana, a ua ano lawelawe lima maoli no hoi laua i ka wa o ka makai i komo mai ai e uwao.
Ua kipaku aku ke Keikialii Kalanianaole i ka paele keaka e hele i waho, aka, aole nae i hoolohe ia mai, a oia no ka wa i ulu hou ae ai he hoopaapaa mawaena o laua, a ua kokoke loa hoi laua e hoolei puupuu, aka, ua komo koke mai la ka makai a keakea ae la ia laua me ke kipaku ana aku ia hogana iwaho. ua hoi aku o Hogana no kona keena a malalo o kana kauoha i kekahi o kona mau hoaloha na kakau ia he leta no ka mihi ana aku o ke Keikialii Kalanianaole no kana mau hana hoohaahaa i na paele ala a i ole pela e hakaka laua e pono ai, a malaila wale no e na ai kona huhu. O ka mea apiki nae aole laua i halawai hakaka a huli hoi aku la ua paele nei no Amerika maluna o ka mokuahi Sonoma.
EIA KE HULI MAI NEI.
Vitoria, B. C. Jan. 27. ma ka auina la o nehinei i haalele iho ai ka mokukaua Beritania Phaeton no ka huli ana i ka moku nalowale Condor, a e holo huli aku ana oia a hiki i honolulu, a me he mea la e hoea loa aku ana i Tahiti kana huli ana. E lawe ana oia i kekahi lako nui o ka nanahu a me ai, a i hookaulua wale ia no oia i ke kali i na mokuahi Kina a ma Sierra. Ua hoea aku kona mau aliimoku no ka ninau ana ina he mau lono kekahi e pili ana no ke Condor mai Honolulu mai, a i ka nele ana ua huli koke aku la ka ihu o ka Pheaton no waho o ka moana.
Ma muli o ka nui o na ohua makaikai i ka Luapele, e @ookaulua iki ana ke Kinau ma Hilo a hiki i ke kakahiaka Poaono, a e hoea mai ana i Honolulu nei ma ke kakahiaka La Pule.
Olahani na Sela
o ka Home Rula
Mai ka Poaono mai a hiki i ke awakea Poalua nei akahi no a pai la a pau ka nupepa Kuokoa Home Rula. O ke kumu o keia hakalia o kona pai ia aha a pau, mamuli no ia o ka hoonele ana o na luna nui o na nupepa la i ka uku ana i kona mau keiki hana ma ka Poaono nei. A pela me na keiki hoonoho hua kepau ua hoole lana i ka hoi hou ana aku e hana aia wale no a uku pau ia mai ko laua uku pule. O ka make aku koe o keia wahaolelo o ka lahui ke hana kolohe mai nei i na limahana.
HE PAA MARE PAKALAKI
Spokane, Jan. 27. O na la maka mua o ko Mr. me Mrs. Dillon o Kaleponi me ka hauoli, a mamua o ka hoea ana aku o ka laua huakai none muna i Lewiston, Idaho, eia laua ke hoohala nei maloko o ka hale ma'i mt. Whitman County.
Oiai laua maluna o ke kaaahi na loaa iho la o Mr. Dillon i ka ma'i samola poki. Ua lawe ia aku oia mailuna aku o ke kaaahi ma oaksdale no ka hale ma'i. Ua hoole ka wahine opio @@ka haalele ana i kaua kane, a nolaila, ua wale pu ia laua ia po holookoa maluna o kekahi kaa lawe ma'i. He mau la mahope mai ua nalowale aku na helehelena ma'i mai a Mr. Dillon aku, aka, ua hoomalu ia no nae laua.
A i ka wa i hoea mai ai ko laua hora no ka hookuu ia ua ike ia aku la he puupuu samola poki maluna o ka helehelena o ka wahine opio, nolaila, ua hoomalu hou ia laua, a o ko laua wa e hookuuia ai aole he mea i maopopo.
E HULI HOI KOKE MAI ANA.
Ua kakau mai nei ka Moiwahine Liliuokalani i kekahi o kona mau hoaloha maanei e huli hoi mai ana oia no Honolulu nei ma keia mahina aku. Aole oia i hoike mai i ke kumu o kona huli hoi koke mai, a aole no hoi i maopopo no kona mau pono a i ole no kona ola paha, a i ole no ke komo pu ana iloko o na hana pili kalaiaina. Ua hoomaopopo ia e noho iki ana oia ma kapalakiko mamua o kona huli hoi loa ana mai no Honolulu nei. - P.C.A.
Mamuli o kekahi mau pilikia i hiki ole ke alo ia, e ka mea kakau o "Na Hawaii ma Buffalo," nolaila, ua nele ka lehulehu me kaua mau hoike piha momona i keia pule, aka, e oili pulelo hou aku ana ma keia pule aku. Nolaila, e ahonui mai.
Na ka Papa Ala-
nui Anei e Rula
Mr. Lunahooponopono,
Aloha oe: -
Oluolu mai kou ahonui i kowa kaawale o kou mau kolamu no ke kakele ana aku i kela poo manao e kau ae la maluna no ka pono o ka lehulehu. Ma ka mahina o Sepatemaba i aui aku la, ua hiki kino mai ka Luna Nui o na hana Hou o ke Aupuni ma Waipio nei. A mahope iho o kona makaikai ana i ko makou mau alanui, ua kahea ae la oia i halawai makaainana, a ma ka la 27 ua noho iho la ka halawai no ke kuka pu ana i ka pono kaulike o ka lehulehu. Ma ia halawai ua ninau maoli mai no oia i ka manao o ka lehulehu no ka mea e pili ana i kekahi alanui i oki ia mai ka hale wili o Kukuihaele ma ka pali kahakai a hoea i Waipio nei. A keia ua ninau ala:
Pehea ko oukou manao i ke alanui hou. Ua pane aku ka lehulehu aole keia he alanui e palekana ai ke ola o ka lehulehu, a he alanui no hoi i hanaia no ka pomaikai wale no o ka hale wili o Kukuihaele, aole no ka pono kaulike o na mea a pau.
I kumu hooia aku ma ka aoao o ka lehulehu no keia alanui, ua ailolo mua keia alanui me ekolu ola makamae o na limahana i ka wa e hana ia ana keia alanui a ua pakele mahunehune mai o kahi poe. Ma kekahi la o ka pule hope o ka makahiki i aui aku la, ua hoi mai kekahi poe kanaka mai ka lawaia mai ma keia alanui, a oia hoi, he mau mau minute wale no ke kaawale mahope o ko lakou maalo ana ae ma keia wahi ua hiolo iho la ka pali a pakele ke ola o keia poe. Aole oia wale no, ma ka la 4 o Ianuari nei, ua lilo ke ola makamae o kekahi oiwi ponoi o ka aina i ike ia ma ka inoa o Fish Kaia, mamuli o ke kaa ana mai o kekahi pohaku a hookui mai la i kona kino, hakihaki liilii kona mau lala a make aku la oia me ka mainoino nui.
E hoomanaoia o kahi hiolo o keia alanui i olelo ia ae nei maluna eia ia ke waiho nei me ka hoohana oleia, a keia peni a kanalua nei ke olelo ae. Aole e emi mai mala o o $1000 na hoolilo no ka hooponopono hou ana, a o ke kanaka mua loa e aa ana e maalo aku ma keia wahi ua hainama ka lua kupapau nona e kanu ola ia ai, oiai, na pohaku e haule mau iho ana.
Mahope iho o ka waiho ana aku o ka lehulehu i ka lakou mau kakou mau kumu kue e like me na mea i hoakaka ia ae nei maluna, ua ninau hou mai la ka Luna Nui o na Hana hou no ka lua o ka manawa.
E nana ma ka aoao 8.