Ke Aloha Aina, Volume VIII, Number 6, 8 Pepeluali 1902 — Page 1

KE ALOHA AINA

HOOKUMUIA I MEI 20, 1895

BUKE VIII    HONOLULU, POAONO, FEBERUARI 8, 1902.   HELU 6

 

E HOLO ANA NO WASINETONA

            Maluna o ka mokuahi Hongkong Maru i loaa mai ai he leta ia Keoki Kaaka mai a Peresidena Rusewela ponoi mai e noi mai ana i kona oluolu e hoike aku i na mea oiaio a pau ana i makemake ai e pili ana no Hawaii nei.

            Ua hoohikilele ia au no keia mau hana, wahi a Keoki Kaaka ma ka Poaha nei. Aole au i launa mua me Peresidena Rusewela. Aole no i halawai me ia. A aole no hoi au i ike he wahi hoaloha ko`u ma Wasinetona i launa pili kokoke aku me ka Peresidena, a nolaila, o kona koho ana mai la ia`u e hoakaka i na mea pili kalaiaina ma Hawaii nui na hoopiha loa mai ia ia`u me ke pahaohao. Ua ike au aole a`u hana kupono e lawelawe ai no ka pono o na kanaka, aka, o ko`u hiki kino wale aku no imua ona ma Wasinetona, i hiki ai ia`u ke hoakaka pono i na mea e pili ana maanei. A oia mau mea aole la e pau pono ia`u ke hoakaka aku maloko o ka leta, a pela au e manao nei he hana pono no`u ka hoea kino ana aku imua ona.

            E like me ka`u i hoike mua ai aiole au i noi aku i kekahi kulana luna aupuni mamua pela no ma keia hope aku, aka, ina e haawi ia mai ana ia`u no ka pono o ke teritori, alaila, he mea hiki ole ia`u ke kue aku.

            Ma keia e hoomaopopo ia ai e hoea mai ana ka manawa e noii ia ai na hana hewa a Dole ma i hoopii ia aku nei i Amerika Huipuia, a ke ku io ka hewa, alaila, e lele ana lakou mai ke kulana a lakou e paa nei. He mea oiaio ua hoopa mai na paha ka Peresidena i keia kulana i ka mea hanohano Sam Paka. Aka, e nana malie aku no nae kakou i na ne ana o ke au o ka manawa o keia mua aku.

 

HE MAU LONO ANO NUI I HOEA MAI LA I O KAKOU NEI

-

Upuia ke Kulana Kiaaina no Samuela Paka o ke Kulana Kakauolelo Nui no Keoki Kaaaka.

-

            O keia na lono a ka mokuahi Hongkong Maru i lawe mai la ma ka po Poakolu nei, Feb. 5. Ma ka hoomaopopo ana iho i na mea a pau. Ua akaka ala ke aka pahaohao o ke keiki o ka Uhiwai o Mana ke kau mai la iluna o na puoa o Iolani Hale. O na mea i hoolala ia, a e noonoo ia mai la ma na rumi kapu o ka Hale Keokeo, oia kei: O Samuela Paka no ke kulana kiaaina ma kahi o Dole, a o Keoki Kaaka no ke kulana Kakauolelo Nui o ke Teritori Hawaii ma kahi o Kupa. O ka wa e ko ai oia ka kakou e nana aku i keia mau la. Ua hoouna maoli ia mai nei he leta ia Keoki Kaaka e Peresidena Rusevela e kauoha ia mai ana e hoouna aku oia i kana mau hoike piha no na ninau i waiho ia mai la nana e pane aku no na mea e pili ana ia Hawaii nei, a mamuli oia kumu e kau aku, ana oia ma ka mokuahi Sonoma o ka Poalua ae nei Feb. 11 no Wasinetona. O keia na lono ano nui i loaa mai la e wa hele nei a puni ke kaona. Ali-a la ha-e o.

 

He Mau Hoike i ka Nupepa Buletina

            Wasinetona, Jan. 28. Aole i noi ia aku o Dole e haalele mai. He olelo hoopa ola ano kai hoounaia aku. He nui na hoololi e hana ia aku ana no Hawaii. E hoolilo ia aku ana o Paka i Kiaaina ina e ae ana o Kaaka e lawe i ke kulana Kakauolelo.

            Ua hoike ae o Paka e lilo ana oia i kiaaina a na ia mea i hoeha iki mai iaia mai ka Hale Keokeo mai.

            I keia la ua hoike ae ka Peresidena e palumi pau aku ana oia i na poe hoouku pilikia ma Hawaii maloko o eono mahina.

            LITTLE.

 

----

           

Mare mai la o Ede Makapolena i ka wahine i Kaleponi, a mare ae nei no hoi o R Puuki i kana wahine i Hawaii nei, alua laua nei mau keonimana mare ole i noho a elua lauoho, a ua ani iki no hoi ma o iho o ka aina awakea, akahi no a noonoo ae e lalau i mau pili aoao, no laua.

Mahalo.

 

Ka Halawai a ka Aoao Repubalika

            E malama ia ana he Halawai Makaainana e ka aoao Repubalika ma keia ahiahi Poaono ma ka hale paikau o Haimoeipo. O ka manao nui o keia halawai no ka lawe ana mai no ia e noonoo i kekahi olelo hooholo kue i ka bila kanawai ma`i lepera a ka Elele Wilikoki i waiho aku la iloko o ka Ahaolelo o Amerika Huipuia, no ka mea, na ike ia ala he mau mea e hoopoino ana i ko Hawaii nei kulana holomua iloko o keia bila. A o ka elua o na kumuhana no ke kue ana aku no ia i ka haawi ia ana o ka pono wai a Sam. Paka e koi nei imua o ka Ahaolelo.

 

---

 

Eia ka halekuai o L.B. Kerr & Co. ke kuai hoemi nei i na Lole Lalina, o keia ka wa kupono no oukou e na lede e hele ae ai malaila a wae i ko oukou makemake. Mai poina i keia kuai hoemi nui.

 

NUI NA WAIWAI MAKAMAE I LOAA

            Brekeley, Jan. 21. He nui na waiwai makamae i lawe ia mai na ilina kupapau kahiko mai a Aigupita e na poe huli o ke Kula Nui o Kaleponi e hana a e huli ala ma ka aina o Parao. O Kauka George A. Reisner, ko lakou poo nui ua hoike mai oia ua lawe ia mai la he lei gula, he pohaku makamae a me kekahi mau pupu lei aniani nani loa, mai ka pahu kupapau mai o kekahi wahine i make i ke au kahiko loa o Aigupita.

            Maloko o kekahi he kupapau i oli hou ia aku ua loaa hou aku la he lei gula, a maloko o kekahi he okoa aku ua loaa aku he eono mau mea hoonani gula i hana ia he hookahi e like me ke kii o ka liona, elua manu, maka a me elua nalo meli. He nui na mea e ae i loaa pu aku ma keia huli ia ana, he pahu kupapau i pena ia, he poo ihe, he ipu alabata, mau mea kinohinohi poo, a me kekahi noho, aole i popopo. Mawaena o na mea ano nui i loaa aku i na poe huli he ewalu mau kia pohaku mai kekahi mau lua pao mai e hoike ana no ka ohana alii eono a hiki i ka umikumamawalu, he mau tausani makahiki hoi ko lakou o Karisto o kekahi o na kia ua kakau ia keia mau huaolelo: Ka punahele a kona makuakane, ka hanau mua a kona makuahine, a o ka mea i aloha nui ia e kona mau hoahanau a me na kaikuahine.

            O kekahi o keia mau kia ua kaha ia, a o kekahi ua pena ia, a o ka makamaka hou o ke pena he oia mau me he la, no ka pule no i kela iho la.

            O keia mau waiwai i loaa iho ia ua manao ia no ka ohana alii umi-kumamalua no ia, na hanauna alii i ka wa o na Isariela i komo aku ai iloko o Aigupita he 1950 makahiki mamua aku o Karisto.