Ke Aloha Aina, Volume VIII, Number 4, 25 January 1902 — Page 5

KE ALOHA AINA

 

E WAWA IA NO HE HALE KANAKA

 

            Ua lilo i mea walaau na ko Hilo poe a huai loa ia ae la iloko o kahi nupepa olaila, ke komo pu ana o kekahi mau luna aupuni o laila iloko o kekahi hui kuai ?ama kukaa ma Kalepolepo, a haawiia ka laikini i kekahi mau kepani oia e Omori a me kona kokoolua Onome.  Ka i no paha no ke kepani wale no la ia laikini eia ka "he wahi lau mamane" wale no ia e uhi ana i kahi wai o Kapapala.  Aole no hoi paha e lilo loa keia i mea kamailio a ??? loa ia ina paha aole i komo pu kahi poe oihana aupuni iloko o keia hana he Hui Kuai Waiona.  Ina paha e ulu ae ana kahi haunaele iloko o keia oihana haawi waiona, alaila, pehea keia poe paa oihana aupuni e hana ai, e pupuu anei na lima a i ole e uhau aku paha i ka lakou mau kalapu, e ku anei lakou e hoike kue aku ia poe, a i ole e kokua hewa paha?  O kahi no hoi, ina ua paha keia no lakou poe haole wale no, aole no hoi paha e aha ia ae ana e hamahamau wale ia iho ana no.

            No ka ike ia ana ae la paha he poe Hawaii keia i komo pu aku nei iloko o keia hui kalepa imi waiwai, nolaila, lilo no la i mea e nini loa ia ai, a loaa ka hana a ua kiure kiekie e noii nowelo ai.  Ua lilo no kakou ka poe Hawaii i mea lomilomi wale ia no e ka haole, ke hana ae kakou i kau wahi mea o ka upoi wale ia mai la no ia, aia no o lakou wale ae ? ma na mea a pau.  Aka, i i lo loa nae keia i mea kamailio nui ia no ke komo pu ana o kahi mau luna aupuni iloko o kela hana, a oia hoi ka makou i olelo ae la o ka mea no ia e "wawa ia ala he hale kanaka."

 

KA HUI MANAWALEA HAWAII

 

            Ma ka noho ana o ka halawai makahiki o ka Hui Manawalea Hawaii ma kahi o Mrs. Kulamanu Alani ma ke kakahiaka Poaha nei Jan. 23.  Ua hooholo ia e hookomo aku i keia nui me na Hui Kokua Manawalea e ae o ke kulanakauhale nei i hoohui ia, a e hoao ia ana keia Hui Hawaii ma ke alahele like me na hui e ae no ka manawa hookahi makahiki, ina ia he mea e pono ai na poe ilihune Hawaii a me ka emi pu mai paha o na hoolilo o keia hui, alaila, e hoomau ia aku no pela, ina hoi aole, alaila, e auahi ?pu ia mai no keia hui o na Hawaii.  Ua koho hou ia na Luna Nui o ka hui no keia makahiki 1902.

            Peresidena, Mrs. Kulamanu Alani,

            Hope Peresidena Mua, Mrs. Kuaihelani Paka,

            Hope Peresidena Elua, Miss Lucy Peabody,

            Pauku, Mrs. J. F. Bowler,

            Kakauolelo, Mrs. E. S. Cunah,

            Papa Hooko, Mrs. J. O. Carter, Mrs. Irene Holloway, Mrs. Keoni Ina, Mrs. J. Nawahi a me Mrs. Chas Clark.

 

            HAWAII MA BUFFALO

 

            (Hoomauia)

Mai ka aoao 3 mai.

 

hookuikui ia ae e hiki ke opi a humu ae i ka ili e paa pono ai ke kamaa, iloko o elima wale no minute a ka mea makaikai e kali ai, ua paa ke kamaa me ke kupono loa.  Pela no me ka mikini hana hainaka.  Ua hookomo ia ka lopi ailika iloko o na molina no ia hana.  A i ka wa e hoonee ia ai o ka huila me ka uwila, ua hiki i ka mea maikaikai ke ike aku i ka hoonoho ia mai o ka lopi a hiki i na paa ana o ka hainaka i makemake ia iloko o na minute pokole.

            He nui wale aku na mikini waiwai loa i hoikeike ia.  Ma keia wahi au i minamina loa ai i ka hoea ole ana o kekahi, o ia Hawaii akamai loa o kakou nei i keia wa ma keia mau mea pili i na mikini.  He manao paa loa ko'u ina e ike iki ana kekahi o na kanaka akamai o kakou e hoopapau nei ma kai o ka hale hana hao i kekahi o keia mau mikini ano hou loa e hiki ana no ia lakou ke hana i kekahi ano mikini ano hou loa e loaa ai ia lakou ka waiwai nui me ka mahalo ia no ka ike mekanika hoopomaikai nui i ka lehulehu.

           

            HALE HOIKEIKE O NA HUA AI.

 

            Ua kukulu ia keia hale ma ka aoao komohana o ke kahua hoikeike, a he 220 kapuai kuea kona nui ma ka honua.  Ua ano huina walu kona ku ana, a he kiekie no hoi kona mau paia, a ua hiki ke ku ke kumu niu i loloa i na huhui niu momona me ke kuia ole i ke kaupaka.

            Maloko o keia hale i hoike ia ai na hua ai o kela ame keia ano; a pela pu hoi me na pua u'i o na ano lehulehu loa a'u i ike mua ole ai ma na kihapai o na wahi kanu pua o kakou nei.  Maanei no hoi i hoike ia ai na mea i hana ia no loko mai o na hua ai -- ka waina, me na waiona i puhi ia e like me ka "waipuna o Kalihi a o Manoa paha."

            NA HUA AI.  He nui na hua ai a'u i ike ai ma keia wahi a'u i hoomaopopo iho ai, he hiki loa ke hooulu ia me ka hua pono ana e nunui e like me ko na wahi lehulehu o Amerika.

            O ka helu ekahi o na wahi i hoohua nui i kela mau mea hoowaiwai nui, oia no ka mokualua o Kaleponi ae nei.  He nunui a ka launa ole ka piki, ka alani, ka apala, ka waina, a nui wale aku.  Aole nae au e hoola aku ana no ka ono, oiai, aole i haawi ia mai a hoopa aku.  Aka, i ka hoomaopopo wale aku no i ka nepunepu me he la e moni like ana kakou i ka haae e like me a'u ai.

            Ua hoike ia mai ia'u e na komisina o keia hoikeike waiwai loa, he nui ka pomaikai i loaa i ka poe hooulu i na hua ai.  Ua waiwai loa kekahi poe ma kela hana mamuli o ka hoomanawanui me ka hana maoli no.

            E hoomaopopo kakou maanei e na makamaka, he mau tausani ka nui o na kanaka e noho ana maloko o na kulanakauhale; a he nuku loa na wahi kaawale maloko o ia mau kulanakauhale i kupono no ka hooulu ana i na mea kanu kupono no ka papa aina.  Aka, ma na kuaaina, he nui ka aina waiho wale, a pela i hiki ai i ka mahiai ke loaa he pomaikai, mai loko mai o kana mau ea e hooulu ai.  He hana keia i hiki loa ia kakou ke lawelawe ma Hawaii nei.  Ke ike mai nei no au i kekahi mau oiwi o kakou e ai ana i keia pomaikai.

            O na wahi hiki ole ke hoonua ae i na hua ai maoli, au hoike ae ia mau wahi i na hua i hana ia me ka (wax) sila meli.  A ke nana iho i keia ano hua hoopilipili wale iho no, e kuhihewa maoli ana no ka mea makaikai.  Me keia ko Mekiko mau mea ai i hoike ia ai.  O ke kapiki, ke akaakai, ka nioi, a pela aku; pela hoi ke ko, ka maia, a me na hua e ae; au hana wale ia no me ka aila, a ke nana iho iloko o ka pahu aniani, ua ono maoli no i ka mamaka ae.  Maanei au i ike ai o ka laau opiuma o kakou nei, no Mekiko mai, a o kona inoa maoli he guage; a ua hiki keia laau ianei ma  o na kahunapule Kako?ka i ka makahiki 1837, no ka mea, mai Mekiko mai lakou i holo mai ai no Hawaii nei ia makahiki me na mea kanu lehulehu.

            O kekahi mau pua i hoike nui ia mlaila, oia no ka pua pake nunui o kakou nei.  Ua oi aku nae ko laila o ka nunui--ua kohu pua nana la maoli no.  Pela no me ke koniaka.  Ma keia wahi i kulu iho ai ka waimaka i ke aloha i kuu home ohu mau i na pua a'u e luhi ai me a'u mau lei.  HOomanao ae no hoi au i ka poe kau lei o kuu wahi, a i okoa aku au i kau haole, "o ka oukou kala he alolohi, ina maanei ka poe kau lei o kuu aina, mokaki ke kala ia lakou ke hana mai me kela mau pua nani."

            Ma keia wahi noh oi au i ike ai i kekahi puhala i hooulu ia maloko o kekahi ipu lepo, me ka kakala ole.  Ua olelo mai ka haole, he elua wale no kumu o ia ano puhala ma Buffalo.  Aole nae i hai mai i ka i i loaa ai laia.

            Maloko o keia wahi no hoi au i ike ai i kekahi mau i'a kai nunui i hoomaloo ia, a ua hoike ia ae i mea e maopopo ai na waiwai o ke kai me ka wai e loaa ana i ka mea ahonui ma ka lawala ana.  No Kaleponi no ua mau i'a nei, He mau poo papa me na pauku laau i hoohinuhinu ia kekahi i hoike ia i ike ia ai kekahi kumu waiwai no ka mea ike i ka hana i na pono hale.  No Kaleponi no kela.  Ua like loa no ka io o kekahi mau laau me ke koa o kakou nei.  O ka laau nui loa a'u i ike ai maanei, no Oregon mai.  He hookahi no ia kumu 8x10 kapuai a ua oki ia o loko ohaka, a ua haha ia a kohu keena--hiki ke noho iloko.  He "Oregon Pine" (paina) ua laau nei.

            He 4 mau kumu niu i lolou i na huihui niu i kukulu ia maloko o kei hale iloko no o na poho nunui.  He mau palai kekahi i hoike ia, aole nae i nui na ano e like me ko kakou nei.

 

MAKE O FRANK BROWN.

 

            Ma ka hora 9:15 o ke kakahiaka Poakahi nei i hookuu mai ai i keia ola ana o Mr. Frank Brown (Palanike) kekahi o na haole kamaaina kahiko loa o keia kulanakauhale, mahope o ka hoomailo ana a ka ma'i maluna o kona kino no kekahi mau mahina, aka, ua ikaika loa nae mai ka La Hape Nuia mai, a mai ia wa mai a hiki i kona pauaho ana mai la aole oia i ala hou mai kona wahi moe mai.

            Ua hanau ia o Frnak Brown ma Shough, Enelani, he 61 makahiki i hala ae nei, a i kona mau a opio i hoea mai ai oia me kona mau makua i Hawaii nei.  Ua haalele iho oia he wahine a me na hoahanau oia o Cecil (Kikila), Godfrey (Kope) a me Malcom a me hookahi kakuahine Mrs. Alexander Makintosh.

            He ekolu ana mau kau i noho ai he hoa no ka Ahaolelo i ke au o ke aupuni moi e ku ana, a he moho holo balota hoi oia na ka aoao Demokrata i ke kau koho balota o ka 1900.  He ona hale kuai kukaa waiona o Frank Baraunu a o kana oihana no hoi ia e lawelawe ana aku la.  Ma ka auina la Poalua nei i nalo aku a oia ma ka ilina o Maemae.  Aloha no ia kamaaina i moe aku la.

 

           

            E alawa ae no i ka makou mau hoolaha e puka aku nei i keia la.

            E lawe nui i KE ALOHA AINA i ike mau i na mea hou o keia mau la e nee nei.

            E keaka hou ana ka hui keaka paele o Hogana maloko o ka hale keaka Ofama i keia po.