Ke Aloha Aina, Volume VIII, Number 4, 25 January 1902 — Page 3

KE ALOHA AINA

KE ALOHA AINA, POAONO, IANUARI 25, 1902.         3

 

HAWAII MA BUFFALO

(Kakauia e William J. Coelho.)

(Hoomauia.)

KA HALE UWILA.

            Ua kukulu ia keia hale ma ke komohana iho o ka Puoa Uwila, a he 500 kapuai kona loa, a he 150 ka laula; a ua like no kona kiekie me ka paia 50 paha kapuai. Hale nani kela o kona kulana, a me ke ano o kona hana ia ana. Ua kinounou ia kona kaupaku me na pena waihooluu like ole; a mawaho koke iho o kona kahua ua hooulu ia na laau me na pua e ku ai i ka mahalo a ka ikemaka. Maloko o keia hale i hoikeike ia ai na ano mekini hoohana uwila o kela a me keia ano, a pela pu hoi me na mea a pau i hoohana la me ka uwila - na telepona, na pahu hoolele leo, na mikini pai nupepa, a nui a lehulehu wale, i hiki ole ke hoopaanaau ia, he mau mea waiwai loa no hoi no ke kanaka opio a me na elemakule pu i ake nui i ka ike, i kupono loa no lakou e ike ai.

            Maloko o keia hale au i ike ai i kekahi papa hoolaha i hana ia me na kukui uwila wale no. I ka wa e a like ai o na kukui, e ike aku ana ka mea makaikai i na hua hoolaha o kekahi ano waiwai no ke kuai, a he mau sekona mahope iho ua kaa ae la keia mau kukui a ike hou ia aku la he hoolaha o kekahi ano waiwai e ae. Pela iho la e loli ai a hiki i ka pau ana o na hoolaha i hoonohonoho ia ma ia mikini. Ua nui no hoi ka naauao o ka mea nana i hana.

KA HALE OIHANA MAHIAI.

            Aia no keia hale ma ka aoao hikina o ka Puoa Uwila, a ua kau like kona kulana me ka hale uwila. He 500 kapuai kona loa, a he 150 kapuai laula. Ua like loa na hiohiona o na mea i kukulu ia me ko kela ae la maluna, a i ano e iki ae hoi mamuli o na mea i hoohiwahiwa ia ai o kona kaupaku me na kia.

            Maloko o keia hale i hoikeike ia ai na waiwai a pau a ke kanaka mahiai i hooulu ai me kona aho nui. Mai ka uala maoli a i ka lau nahele ai a na manu. He nui hewahewa na mea kanu a'u i ike ai maloko o keia wahi, a ua minamina loa i ka loaa ole ana o kekahi mua hua uala me ke kalo nunui o kakou nei, aole loa au i ike hookahi kalo malaila. Ua ike au he mau ko no Louisiana a me Mexico. O ke ko nui hookahi i hoike ia malaila, no Louisiana mai. He 8 kapuai kona loa, a he 1 iniha wale no kona manoanoa. A ua hoopuka aku au i ke komisina oia hoikeike: "Aole loa i helu ia keia ko i ke ko o kuu aina." Ua manao maoli no au, ina i hoouna ia he mau eke uala, kalo, a me ona mau pua ko o Kona, i keia hoikeike nui o Buffalo me kahi o kela mau apana waiu waiwai ole o ka Papa Hoonaauao, ina ua oi loa aku ka pomaikai i loaa ia Hawaii nei.

            Ua nui na poe i loaa ia'u maloko o keia hale i ninau mai no ke ano o ka oihana mahiai o kakou nei. Ua hiki ole ke hoike aku ma ke ano e manaoio ia mai ai, oiai, aole kekahi mea malaila e hiki ai ia lakou ke ikemaka iho. Ke olelo aku, he nunui na mea a pau ke malama pono ia, e kanalua ana lakou. Nolaila au i minamina loa ai i ka hooikaika ole ana o ko kakou mau ala@@@@ kalaiaina e hooikaika i ka lahui ma na hana lima hooulu i ko ka honua e like me ke au kahiko i hala aku la me kona mau pono.

KA HALE O NA WAIWAI I HANAIA.

            He hale nui loa keia i kukulu ia ma ka aoao hema o ka Hale Oihana Mahiai, nona hoi ka loa o ke kahua he 500 kapuai a me 350 kapuai laula. He nani no @@@ materia i kukulu ia ai o keia hale, a pela no me kona waihooluu.

            Maloko o keia hale i hoikeike ia ai na mea a pau i hana ia e ka ike o ke kanaka ma ke ano he mau waiwai kalepa, na lole o na ano like ole, na kamaa a me na waiwai lehulehu e ae. Maloko o keia hale no hoi i hoike ia ai na pohaku makamae loa a kela hui kaulana o Nu Ioka, Tiffany & Co. - na daimana, na waiwai gula a pela aku. He mau miliona ka waiwaiio o na mea a keia hui i hoikeike ai ma keia wahi.

            Maloko no hoi o keia hale au i ike ai i ko kekahi mau kaa holo mamuli o ka uwila a me ka ea gasoline. Maanei pu no hoi au i ike ai i ka hana ia o ka mauu hoolei wale a kakou a lilo i mau waiwai hoonani kupono loa no na lumi hookipa o na hale maikai loa.

HALE O NA MEKINI ME NA PAAHANA HOONEE.

            He hale keia i like no me keia ae ka nui - 500x350. Maloko o keia hale i hoikeike ia mai ai na mekini o kela a me keia ano, na ano kahiko a me na mea hou loa. Mai na paahana uku haalele loa a i na mikini nunui i kupono e hookomo ia oia hookahi wale no maloko o ka hale leta o kakou nei.

            Ma kela wahi au i ike ai i kekahi mau mikini hana kamaa a hana hainaka silika. O ka mikini hana kamaa, ua like no me na mikini e ae, a koe wale iho no hoi, ma kahi o na paahana liilii i

E nana ma ka aoao 5.

 

PHOTOGRAPHER

Alanui Papu.

He emi loa ke paikii ana ma akhi o Wiliama, e loaa no na KI NANI mai ke 4.00 aku o ke kakini.

 

HOOLAHA KUAI A ME HOOPAA A KA MEA MORAKI.

            Ke hoolahaia aku nei ma keia no ka hooko ana aku i ka mana o ka hoolilo ana i kekahi moraki i hana ia ma ka la 30 o Okatoba, 1899, e Cecilia N. Arnold o Honolulu, mokupuni o Oahu, Teritori o Hawaii, mea moraki ia C. Boese o Honolulu i oello ia, aka, e noho nei i keia wa ma Kapalakiko, mokuaina o Kaleponi, mea paa moraki, a i hoopaa ia ma Ke Keena Kope ma Honolulu, ma ka Buke Aupuni 196 ma na aoao 263 a ka 264, he manao ko ka mea paa moraki e paa i ua moraki la no ka hahaki ia ana o ka ae like, oia hoi, ka uku ole ia o ka uku panee o ka huina o Iwakaluakumamalima Haneri ($2500) ke kumupaa i loaa i ka mea moraki, i ko na manawa i oleloia.

            Ke hoolaha pu ia aku nei o ka waiwai i paa maloko o ua moraki la i olelo ia, e hoolilo ia aku no ia ma ke kuai kudala ia ana ma ke keena kudala o James F. Morgan ma alanui Moiwahine, Honolulu, ma ka Poaono, Ianuari 18, 1901, ma ka hora 12 awakea.

            O ka waiwai i hoakaka ia maloko o ua moraki la oia kela apana aina a pau e waiho la ma ka aoao ma Waikiki o e alanui Makiki e kokoke ana i ke alanui Wilder, ma Honolulu i olelo ia, a e hoakakaia ana: Oia no kela apana aina a pau nona ka ili aina he kanaha-kumamalua he hapa haneri (42,100) eka, e waiho la ma Makiki, Honolulu i olelo ia, a he apana aina i hoakaka ia ma ka Palapala Sila Nui 3690 Kuleana 11018 no Wahine.

            Pela me na waiwai a pau maluna o kela mau wahi i hoakakaia.

            Kuike ma ke Dala Gula Amerika. Na Hoolilo Palapala Kuai ma ka aoao no ia o ka mea kuai. No na mea i koe e ninau ia Stanley a me Holmes, na loio o ka mea paa moraki.

            Hanaia ma Honolulu, Dekemaba 23, 1901.

C. BOSSE, Mea Paa Moraki, Ma o kona Loio ala D. M. DOWSETT.

            Ua hoopaneeia keia kuai a hiki i ka Poaono, Ianuari 25, hora 12 awakea, ma ka halekuai kudala o J. F. Morgan.

 

Alfred Williams a me J J Williams

He Mau Mea Hana Kii Pihi.

E hana ia no na Kii Pihi a pau e waiho ia aku ana na kauoha me ka eleu nui a me ka emi o ka auhau.          jan 7

 

HOOLAHA.

E ike auanei na mea a pau ua hookohu pono ia ka mea nona ka inoa malalo iho i Agena Haawi Palapala Mare no ka Apana o Hamakua, Mokupuni o Hawaii. Nolaila, o ka poe a pau e makemake ana e hauhoa ia i ke Kaula Kaakolu o Pilikoolua. E loaa no au ma ko'u home malookai kokoke i ka luakini Katolika ma Waipio, Hamakua, Hawaii.

THOMAS N. NALEILEHUA.

Agena Haawi Palapala Mare, Apana o Hamakua, Mokupuni o Hawaii, Jan. 13, 1902.

 

OLELO HOOLAHA.

Ke papa a ke hookapu loa ia aku nei na kanaka o na ano a pau, aole lakou e hele maluna o kuu aina e waiho ala ma Kalihi Uka no lakou na inoa i kapaia oia o Kapo, Namahele, Kuaiula. O ka poe a pau e loaa aku ana ia'u a me ko'u mau hope e hele ana maluna o ua mau aina ala mahope o ka puka ana aku o keia hoolaha ma ka Nupepa KE ALOHA AINA; e hoopii ia no lakou a pau e a'u ke loaa aku lakou e hele ana maluna o keia mau aina i oleloia. Ke papa pu ia aku nei na holoholona o na ano like ole aole e hele maluna o keia mau aina i olelo ia, ke ole he palapala mai ia'u aku. O ka mea e kue ana i keia e hoopii no au ma ke kanawai. Ua kapu na aina a pau loa ma Kalihi Uka, Honolulu, mokupuni o Oahu. E hoolohe i keia o pilikia auanei.

GEORGE H. HOLT.

Kapalama, Honolulu, Ianuari 3, 1902             3m

 

DAVID MALO.

E na makamaka a me na hoaloha, e o'u mau hoa o ka io hookahi, he mea hauoli no'u ka hoike ana aku ia oukou, ua wehe ae nei au he Hale Hoomaemae Kaa Baikikala, a o na mea a pau he kaa baikikala poino ko lakou e lawe mai i'ou nei a na'u no e hoomaemae me ka noeau nui ma ka auhau haahaa loa. O ka iini iloko o'u e kokua kekahi i kekahi, a o ka Hawaii e pii ae ana ma kekahi kulana ike ia e kakoo aku kakou iaia. Nolaila, e ike mua ia kakou Hawaii a mahope ae na Haole me na Pake. Keena Hana: Alanui @@@@@@ makai iho o ke Alanui Moiwahine.    nov 7

 

MEU HOON.

Miu Huna

HALE INU KOPE A ME TI

A Kuai Mea Ai o na Ano a Pau.

Ua wehe ae nei au he haleaina ma ke alanui Moi mawaena o Niuhalewai a me Waipilopilo, a ke kono aloha aku nei i o'u mau makamaka Hawaii mai poina i ke kipa mai i ko'u hale inu kope kahi e loaa ai na ono a pau. Ua noho mua au ma ke alanui Muliwai.

 

Wm. RINGER

Eia au imua o oukou e o'u mau hoa lahui Hawaii, ua wehe ae nei au he halekuai kike, kikiliki, pakanau o na ano a pau, kini mea ai o na ano like ole, wai momona, paka Hawaii o Kailua Kona paka ona, a pela me na Opelu maloo. Ua hiki ia'u ke hoolawa i na makemake o'u mau hoa hanau o na mokupuni. E loaa no au ma alanui Muliwai, kokoke i alanui Kukui.   P. O. Box 483.

 

OLELO HOOLAHA.

O na aie a pau e hana ia ana ma keia mau inoa o Mrs. S. C. Bertelmann a i ole Mrs. I. H. Kahilina, aole loa e ili maluna o'u ke koikoi o ka uku ana aku ia mau aie.

MRS. I. H. KAHILINA.

Honolulu, Ian. 13, 1902.