Ke Aloha Aina, Volume VIII, Number 1, 4 January 1902 — Page 7

KE ALOHA AINA

 

POAONO, IANUARI 4, 1902

 

MOOLELO HOONI PUUWAI

NO KE

KAKELA LANAFODA

KA

Ipuka o ke Kuewa

me ka Aea.

KA

Pua Lilia Ahiu o

Sanadela.

 

MOKUNA XI

KA LEO HOOKIPA HANOHANO - KE SARO

NA ELUA O KE AO - KE ALOHA O

KA'U MEA I ALHA AI - KOU

PUA ROSELIA POINA OLE.

 

            O ka leo hookipa hanohano a me na hookipa o ke aloalii oia na haawina ohaoha i panee ia mai imua o na alii opio, alaila, o ka lohe ana i ka mea hou o kela huakai hoopakele a ke Kuewa o Lanafoda iloko o ka ino, oia ka lakou i akenui loa mai ai e hoike ia aku.  Alaila, me ka leo moakaka mai na lehelehe aku o ka mea hoopakele mahope o ka hoomaha iki ana i na maluhiluhi @a hoike aku oia i ka moolelo piha o kana huakai imi aloha, a me kona hoopakele ia ana ma ka maka o ka pahikaua mailoko mai o na lima o ka mea pakaha wale a me ko lakou pau ana i ka make.

            Hoomaikaiia na lani no ka make ana o kela kanaka pakaha, wahi a ka leo lokahi o na mea a pau i lohe i ka moolelo hoopakele wahine a ke Kuewa o Lanafoda, wahi hou a lakou i hoohiki ae ai, e ala like no lakou me ka lokahi a kue aku i na kakoo o kela Duke o Alena i na lakou e lawe mai ana i ka lakou mau koi ahewa ana i ke alakai a Kenela Opio o ko Pelekana mau pualikoa.

            Ma ko ka Moi Kale aoao ua kua @aua koke ae ke alihikaua nui Duke o Loka, ina koa aupuni e ku makau kau mau ma ka aoao o ka lakou mau mea kaua a hoolohe me ka ma kaala no ka leo kahoa o ke kukala kaua.

            Ma ka aoao hoi o na koa kaua lio ua kahea koke ae ko lakou alakai opio e komo koke kela a me keia kanaka iloko o ka puali a lawe i ko lakou kulana o ka makaala a me ka makaukau, a emoole aia ke kuea nui o ka pa alii ua piha me na tausani koa a me ko lakou mau lio no ke ku kiai ana i kela a me keia la a me ka po, a mawaho aku o na palena o ka pa alii a me na kahua hookahakaha e ike mau ia aku ana na koa kiu e maalo ae ana i kela a me keia umi minute, alaila, i ka lawe ana mai a hoohalikelike ae, ua helu ia o Pelekane ma ka hiki mua loa o ka makaala a me ka makau kau malalo o na hookele a me na lawelawe eleu ana a kona mau alakai a kuhikuhi puuone o ka oihana kaua.

            Ma ka aoao hoi o ka lahui i pili paa aku ko lakou mau manao aloha alii, ka aina, a me ka nohoalii, ua hoike mai no ia i ka lili a me ka inaina o ko lakou puuwai no na hana pakaha a kipi a ka enemi, a ina he kukala kaua kekahi i kahea ia ai ka lakou mau kokua ana, alaila, he mea hiki ole ke kanalua ia aia lakou me ka puuwai lokahi iloko o hookahi manao a me hookahi umauma.

            Iloko o keia mau kulana makaukau a me ka liuliu ana ma ka aoao o na Pelekana, alaila, ina kaua e ka makamaka heluhelu e h@liu ae ana a hoolele aku i na lena ike a ko ka ua mau maka no na palena aina waho o Pelekane, alaila, e ike no @nanei kaua aohe aina honua e ae i poni ia me na luhiehu nani a pau a ka maka e hoohihi ai hookahi wale no o kela oawa ahiu o Sanadela, ke Sarona elua o ke ao nei.  Ae, ua hoike mai na aoao a pau o ua Saro na elua nei o ke ao i kona nani hi hiu me na pua o kona mau paia lau nahele lipolipo o na pua like ole.

            Ma ke kae pali o ke Sarona elua e ikeia no aia he umi kumamakahi mau hololio e ku aku ana a mahalo i ka nani me na huaolelo akena ma ko lakou mau lehelehe, o keia mau holo lio oia no ka Haku Maina Se mafila a me kona mau kanaka, ma hope o ka hoohala ana i kekahi mau la iloko o kahi kauhale o Kene ma na niele a me ka huli pono ana i na paha aole i make io o Kauka Lei i ka wa i pau ai kona hale i ke ahi.

            O ka pane hooia i loaa "aole," alaila, aia oia ihea?  aohe no i mao popo oia hou ka pane.  Nolaila, ma keia hoike, ua hoohuli hou ae la ua Haku Maina nei i kona alahele me kona mau hoahele no Sanadela e like me ia a kaua i ike ae nei e ku ana ma ke kae pali o ua Serona elua ala o ke ao a mahalo aku i kona nani.

            Aohe i liuliu aia na poe holo lio ala iho aku la italo o Sanadela, a o ka hale a lakou i kipa mua loa aku ai oia no ka home o ka Pua Lilia Ahiu a haawi i na olelo mua o ka hoolauna ma ka niele ana, a oia mau olelo mua o ka hoolauna ana o ia ka leo hookipa nana i kono mai i ua poe holo lio ala e kipa hale ke aloha malihini.  Alaila, ua haawi ia na kukai olelo ana mawaena o kamaaina hale a me ka malihini kipa, a i ka wa i hoea mai ai o ka lakou mau olelo ana no ka Pua Lilia Ahiu o Sanadela, ua puiwa ae la kela mau makua maikai a hoike ma la i ka olelo o ka laua kaikamahine no ia i hoohui ia ma ka mare me ka Haku Welemonaka o Lanafoda.

            Alaila, o ka olua kaikamahine ponoi no anei ia i hanau ia mai ai?  wahi hou a ka ninau.

            Ae, e ke konim@na malihini hanohano, o ka maua kaikamahine ponoi no ia, aka, aia anei he mau ulia ana nona a maua kona mau makua i ike ole aku nei?

            Aole e na kamaaina maikai, aole he mau ulia pilikia, aka, he haohao nae ko'u no ka mea ua hoike mai ua kaikamahine la aia kona makuahine ke moe nei iwaena o ka ilina i wehiwehi me na pua, a oia wahi ilina lepo uuku la, oia kahi a'u i makemake ai e ike.  Aka, mamua nae o ka loaa ana ia'u o ka hanohano e ike aku iaia ke makemake nei au e maopopo he oiaio paha na olelo a ua kaikamahine ala aole paha.  Ua loaa nae ia'u he hooia ana no ka oiaio o na olelo a ua kaikamahine nei, a ma ia mau hooiaio ana i loaa ai ia'u ke kuleana nui o ka hiki ana mai nei.  He oiaio he wahine ka'u hala aku ma kela ao he mau makahiki loihi i hala ae nei, aka, o kona aloha poina ole nae aole loa ia i haule a hemo mai ia'u aku.  Mai loko mai o ka puheka o ka'u wahine aloha mamua iho o kona make ana ua hoohua mai la oia i ka mea a'u e lei mau nei me ka poina ole - ke aloha o ka'u mea i aloha ai.  Ae - oia ke aloha o ka'u mea, i aloha ai ana i kauoha mai ai e hoomanao au no kamaiki nei a maua, aka, o ka mea ehaeha a kaumaha, ua hoonele ia mai la no au me ua aloha nei o ka mea au i aloha ai e like me ko'u hoonele ia ana mai nona.  Nolaila, e na kamaaina a makamaka maikai o Sanadele nei, o ka moolelo e pili ana ia'u, he moolelo walohia no ia i a wili pu ia me na kipona a ka ehaeha a me ke kaumaha, a'u i kanikau iho ai no laua i keia mau makahiki loihi he iwakaluakumamalua.

            Alaila, owai oe kou hanohano e ke keonimana malihini a maua e @ie nei i ka hanohano o ke kama lio pu ana?

            O ka Haku Maina Semafila au ka mamo a koko hope loa o ka ohana Semafila, a o ka'u wahine o ka lede Roselia Semafila no ia, wahi a ka pane.

            Aha @o ka Haku Maina Semafila.  A l o oe anei ka Haku Maine Semafila?  E kala mai ia'u, ua lohe maua i kela inoa, a akahi no maua a ike me ko maua mau maka i ka oiwi kino o ka mea nona ua inoa ala, E ka Haku Semafila, e hai mai heaha ka maua e hana aku ai?

            Hoike mai me ka oiaio o olua no anei na makua ponoi o ka lede a Kaunawahine Melemoneka, a o ka Pua Lilia Ahiu hoi o Sanadela ma kekahi olelo ia ana.

            Aole e ka Hake Semafila.  Ma ka oiaio o na lani, aole e hiki ia ma ua ke hoopunipuni aku imua ou a me ke Akua.  He oiaio o maua ko na mau makua hookama nana i hanai mai kona mau la omo waiu mai a hiki i ka nui ana a mare wale no i ke kane, a ua hoopunahele maua me he la na maua ponoi no oia.  Ua ike no maua i kau hoolaha he mau makahiki ae nei i hala, aka, o ke aloha a me ka minamina iloko o maua no ua luhi ala a maua i pili alo ai me ke aloha, ua lilo iho la kela makana nui i mea ole loa ia maua e aho e lilo aku ka honua me kona mau mea a pau mamua o ke kuawale ana aku o ka maua mea i aloha ai.

            Alaila, ma o na diabolo ala o ka honua, owai ke kumakaia nana i haawi mai iloko o ka olua malama ana i keia hapuu aloha a ka mea a'u i aloha ai?  Ua waiho aku i ka malama a me kona hoopakele ia ana ma ka lima o Kauka Lei ka mea nona ka hale a maua i kipa aku ai me kuu Roselia poina ole he mau minute pokole wale iho no mahope o kona hanau ia ana mai, a oiai, au malalo o ka misiona hooko kauoha awiwi loa i hui ia me keia kaumaha i haupu mua ole ia e hoolilo ia ai i kanaka hehena, ua haalele iho la au i ua kamaiki ala a'u a me ke kino lepo o kuu wahine aloha na ua Kauka Lei nei e hooponopono, a ia'u e huli hoi mai ai mai ka'u huakai mai alaila, ia wa maua e hooponopono ai i ka nui o ko'u aie iaia.  Aka, ia'u i hoi mai ai a hele mai la e ike i ua hoaloha kauka nei ou, aia hoi, aole iho la kela, a aole pu iho la noi me ua kamaiki bebe nei a'u.  Iloko o ke kaumaha, ka nele a me ka luuluu o keia noho ana mehameha o'u me manaolani ole eia no oia ke ola nei aia hoi, ua hoohalawai pu mai la ke Akua ia maua e ike aku ka makua a me ke keiki.

            A, ma ia ike ana me ka maopopo ole ua hele mai la au e huli i ka oiaio, a ua hoopomaikai nui ia mai keia huakai a'u.

            Nolaila, i panai ma ka aoao o ka Haku Semafila no ko olua luhi a me ko olua malama maikai ana i ka'u, eia au ke makana aku nei i keia me ka hoomanao mau ua hamama na ipuka o ke Kakela Ulaula o ka Haku Semafila.

            Alaila, unuhi ae la ua Haku ala mailoko ae o kona pli he p@e owili nota dala nona ka huina huahelu aole i emi malalo o ka umi tausani a mamua o ka haawi ana aku o ua Haku ala, ua pane a kahamaha e mai la ka lede o ka hale me keia mau olelo:

            Haku Semafila, aole loa ou aie ia maua, au e uku a e panai mai ai.  ua lawa maua me ke aloha o kau kaikamahine, ka mea a maua i hoohiki ai aole loa maua e hoikeike iki i kona moolelo imua o ke ao, aka, e hunakele loa iho maua ia mea a hiki i ko maua hoi ana aku i ka opu o ka honua  He oiaio, ma kela pu i hanau ai kau wahine ma ka hale o Kauka Lei, owau kekahi i lawelawe a i hooponopono pu ia mau pilikia, ua ike au ia oe a me kou haalele awiwi ana iho he mau minute pokole mahope iho o ka make ana o kau wahine, a o kau kauoha i waiho iho ai malalo o ka Kauka Lei mau hooponopono ana, ua hooko no ia me ka pololei, a na ka make i hooki mai i kana mau lawelawe ana, o ka hana mua loa ana i hooko ai i ke hanohano o kau kauoha, oia no ka lawelawe ana i ke kino lepo o kau wahine, a kanu iaia ma Sanadela nei, a o ka lua, oia no kona haawi ana me kona ikaika a pau e palekana a e pakele kela kamaiki makua ole, a mamuli o kona makeana ua lilo wai la oia malalo o ka'u malama ana.