Ke Aloha Aina, Volume VII, Number 52, 28 December 1901 — Page 2

KE ALOHA AINA

2          KE ALOHA AINA, POAONO, DEKEMABA 28, 1901.

 

HONOLULU DEC 28, 1901

 

HE MAU WAHINE AIHUE AKAMAI LOA.

            Ma ka Poakahi nei ua haawi ia aku la he mau hoike i na kanaka kalepa a pau e kiai makaala loa i ko lakou mau halekuai i keia mau la, no ka mea, ua ike ia eia i Honolulu nei he elua mau wahine aihue akamai loa o Amerika. Ua loaa mua ka lohe i kekahi poe kalepa kakaikahi ma kela Poaono aku nei a ua haawi lakou i na kiai ana i na poe a pau e komo aku ana i ko lakou mau halekuai i hiki ole ai ke lilo aku kekahi o ko lakou mau waiwai, aka, iloko no nae oia kiai makaala ia ua lilo aku kekahi mau lako gula o ka halekuai gula o Dietz e ku nei ma ke alanui Papu.

 

AIHUE IA KEKAHI EKE LETA O KE KINAU.

            Eia ka oihana makai ke huli nei i ka mea a mau mea paha nana i aihue kekahi o na eke leta o ke Kinau ma ka po Poalima a i ole ma ka wanaao Poaono nei mailuna aku o ka oneki o ka moku. Aia maloko o keia eke leta i aihue ia iho la he nui na puolo liilii makamae a ua koho wale ia o ka waiwai io maloko ona ua hoea aku no ia ma kahi o $10000. Aole i ike koke ia ka nalowale o keia eke leta a hiki i ka wa i hoea aku ai o ke kaa leta ma ka wanaao Poaono no ka lawe ana mai i na eke leta o ke Kinau no ka haleleta, akahi no a ike ia o ke eke leta i hookaawale ia no na puolo makamae a me na leta waiwai nui oia kai nalowale. Ua hoomaka koke ia ka moku e huli no keia eke leta, aka, aole he wahi mea i ike nona.

            Ua hoouna koke ia mai ka lohe i ka halewai no keia eke leta i nalowale, a ua hoomaka koke na makai e huli ma ia kakahiaka. Ma ia auina la Poaono no ua loaa aku la ua eke leta aia e waiho ana mauka ae o ka uwapo o Poka ma, ua lilo na waiwai a pau maloko, a he puka nui hoi ke waiho ana ma kona aoao i hana ia me kekahi pahi. Ma ke kuni e kau ana mawaho mai Honokaa mai keia eke leta i hoouna ia mai ai no Honolulu nei.

            O na koikoi o ka uku ana i na poho o keia eke leta i aihue ia e ili aku ana paha ia maluna o ka hui mokuahi o Waila mamuli o ko lakou hoohemahema i lilo ai. Ua haawi ia ae la e ua hui mokuahi nei he $100 makana i ka mea e hoike pololei aku ana i ka mea nana i lawelawe keia hana aihue. Aole i loaa ka aihue a hiki i keia wa.

 

NA LETA.

            Aole e ili maluna o makou na koikoi o na ahewa ana no keia mau manao i hoopuka ia malalo o keia poo, aka, e ili no ia maluna o na poe na lakou i kakau mai.

 

HANA IO KA HAOLE LA.

Piliaiku na Ma'i Lepera o Molokai i ka Pololi a ka Ai Ole.

            Mai ka la 2 mai a hiki i ka la 15 o Dekemaba, 1901, ua like ia me 14 la o ke kali ana me ka hoomanawanui i ka pololi a ka ai ole. Ma ke ahiahi Sabati, Dekemaba 15, akahi no a komo kahi mamala pa'iai i ka waha o na ma'i lepera. Ua ai i ka laiki, ka palaoa, a ua hele a kunewanewa i ka hapapa.

            E nana mai oukou e ka lahui, he hana auanei keia a ka Papa Ola, he kumakaia maoli no ia makou. E aho makou e lawe koke ae ka Papa Ola i na ola, mamua o ka make i ka pololi a ka ai ole. Hoea mai nei kahi moku kialua lawe pa'iai a ka Papa Ola mai Kahului mai, e eueu ana no na kanaka liilii o Maui (@@@) iloko o ke eke pa'iai, aole nae e hiki ke alo ae. Ua wae ae na ma'i lepera ma na wahi pa'iai maikai iki, a o ke koena aku no ka pomaikai o na puaa o na home.

            He kupanaha na hooponopono ana a keia Papa Ola no ko makou mau pono ma keia aina, he minamina lakou nei i ke dala no ka hoolimalima i ka mokuahi nana e lawe mai ke pa'iai mai Kahului mai, o hikiwawe auanei ka loaa mai o ke pa'iai a ai koke na ma'i me ka maikai, aole hoi e like me keia, ke wehe ae oe e eu ana na kanaka liilii o Maui, ua maloo o waho o ke pa'iai a kohu laau ke oolea. He hewa iho ka la i o mau auanei ka ma-u o ka ai. Ina paha o keia mau tausani dala e noke ai nei e ka Papa Ola i ke kapili i keia hale loihi, a e kuai ia i mokuahi no ka Papa Ola, auwe! he ui mai hoi kau.

            Ina penei, holo wale na wahi ukana a makou, aole e auhau ia mai ka uku moku a loaa koke ka pa'iai ia makou i ka manawa kupono. Aka, makemake lakou nei e hoolimalima i moku kialua ka mea nana e lawe mai i ke pa'iai a na ma'i lepera, i hele kela a 15 la i Kahului hoea mai ua hele a papaa. Aohe o makou pilikia i na hale, he nui ino na hale o ka Papa Ola e ku mai nei aohe i piha i na ma'i lepera. O ka makou e ike nei, ma na hana pilikia ole, malaila ke dala a ka lehulehu e kiola ia nei. Eia keia pilikia, ina makou e kakali i ka moku pa'iai a ka Papa Ola, a hoea ole mai iloko o 4 la, kii makou i ko makou mau haawina pa'iai o ka pule me ka laiki, a i ole palaoa paha, hele aku makou a loaa o Keoki Kanikau, oia ka luna haawi ai; eia mai ka ninau a ka luna haawi ai.

            Heaha mai nei kau?

            Eia ka pane. I kii mai nei au i ko'u haawina pa'iai ma ka laiki a i ole palaoa paha.

            Pane hou ka luna. E hoi oe, a e kali aku i ka moku pa'iai o ka Papa Ola. O ka lua o ka pane. E kii oe i palapala ia Waiamau, alaila, loaa ia oe ka laiki a i ole palaoa paha.

            Auwe ke aloha! ke hoohui ae oe i hoapaapa a ka Papa Ola a me ka hana a na luna maanei, a loaa auanei keia mau huahelu, 045, 12, 9565152, a pela wale iho la no makou e apa ia nei e kauanoe ma.

            Eia hou mai. Eia ma ka hale paahao o Kulina Eleele i keia mau la, ua hoopaa ia o Pilipo Mikela (k) no Kawaihau Kauai, a me Wile Kalani (k) no Kawaihae kai, Hawaii, aneane hookahi mahina ko laua hoopaa ia ana, ke hanai ia nei laua e ka wiliki (kea) hookahi papaa berena paakiki a me hookahi paina wai no ka la hookahi, pela ka olelo a ka wahine (Hanuala (w)) a ka luna paahao.

            O ko laua hewa i hopu ia ai he haalele i ke kahua ma'i lepera no Kaunakakai, aka, eia ka mea apiki, loaa aku no keia mau keiki iloko no o ko laua mau hale Papa Ola. Pehea? pololei no keia hana? Auhea oukou e ka lahui maanei, weliweli ke kaumaha a me ke koikoi o na kanawai o ke teritori o kakou. He hewa ke ala a oi mamua o ka hora 9 o ka po. He huhu mai na makai i ka hoopiha i kou hale i na kanaka a wahine paha, a pela wale aku. E oni ae ana oe he kui ma o a maanei, e pololei wale no imua ka pono me he lio kane kaa la.

            Me na keiki oniu hua metala ko'u welina.

            Mele Karikimaka kakou,

S.P. Mahulili.

Kalawao, Molokai, Dec. 19, 1901

 

UA HIKI KE IKE MALOKO O KE TELEPONA.

            Brussels, Dec. 15. Ua hoike ae ka nupepa Independent Belge, ua hana ia mai nei e Kauka Sylvester, he kanaka Amerika, aka, he kauka kupa Farani nae i keia wa he mekini apo aka e hiki ai i ka mea e kamailio ana maloko o ke telepona ke ike aku i ka helehelena maoli o kona hoa olelo.

            Na minoaka hoohie na hooheno ana a pau e ike ia ana ia maloko o ua mekini nei, me he la, e hui ana no laua he alo a he alo. Nui no ka naauao o ka haole.

 

MALAMA I KA PUAA ILOKO O KA HALE.

            Ladana, Dec. 7. O Miss Emily Hampton o Nazeing ma ka la inehinei ua kauoha ia aku la oia e ke aupuni e hoea mai imua o ka aha no ka malama i kekahi puaa ma ke ano e hoopilikia ia ai ke ola. Wahi a ka luna nana ua loaa aku iaia he hookahi rumi holookoa o ka hale o ka mea i hoopii ia e noho ia ana e ka puaa. E moe ana ua holoholo la maluna o kekahi bela hulu manu i uhi ia me na lihilihi keokeo a e moe ana kona poo maluna o kekahi uluna. Ua hoonani ia ua rumi ala e like me ka rumi hookipa a ma na paia e kau ana na ipukukui. Ua hoike hou mai ka luna nana ua ike aku oia i ka mea i hoopii ia e kukuli ana ma ka aoao o ka moe a honi aku la i ka puaa me ke kapa ana aku iaia he keiki kolohe no ka ai ana i kekahi wahi o kona uluna.

            O ka Miss Hampton pale ua hoonaauao oia i ka puaa e like me ke Karistiano. A ua malama hoi aku oia iaia mai kona wa uuku mai a hiki i kona nui ana. I kona wa opiopio maluna oia o ka noho koki e moe ai. Ua hookuu ia aku oia e hanu i na ea maikai i kona wa e makemake ai. Aole oia peku i na lole mailuna aku o ka moe a he noho malie. He nui na lede a me na keonimana i hele aku e makaikai i ka malama ia ana o keia puaa. Ua haawi aku la ka Lunakanawai i ke kauoha ia Miss Hampton iloko o eono pule e huli ai oia i wahi hou no kana hanaiahuhu e noho ai.

 

MOKU LAWEKOA HANCOCK.

            Ma keia kakahiaka Poakahi i hoea mai ai ka moku lawekoa Hancock mai Kapalakiko mai ma kona alahele no Manila. E lawe ana oia he 610 koa o ka regimana kaualio 15 a me 250 koa no na puali like ole ma Manila. E noho iki ana @@@ oia maanei no ka hooili @@@@@ ana a holo loa aku no Manila. @@@@ @@@ la i loaa hou mai ai @@ @@@@@hou makamaka o na aina @@@@@@ i keia kulanakauhale.

 

            Aloha Mere Karisimaka kakou a pau loa.

            Ina e hiki @@@@@@@@@@@ Mar@@ni ke hoolele i ka @@@@@@@ kahi aoao a ka aoao o ka @@@@@ Atelanika nona ka @@@@@@@@@ mile alaila, e h@@@ @@@@@@@@@ hoolele mai i ka @@@@@@@@@ Kapalakiko a hiki i Haw@@@@@@@@@ ka mea, he 2,100 @@@@@@@@@@@ ka mamao mai na kapa@@@@@@@@ Kapalakiko a hiki i Hawaii nei.