Ke Aloha Aina, Volume VII, Number 51, 21 December 1901 — Page 3

KE ALOHA AINA

 

KE ALOHA AINA, POAONO, DEKEMABA 21, 1901. 3

 

NA LETA.

            Aole e ili maluna o makou na koikoi o na ahewa ana no keia mau manao i hoopuka ia malalo o keia poo aka, e ili no ia maluna o na poe na lakou i kakau mai.

 

NA ANOAI KOHO BALOTA MA KUKUIHAELE.

Mr. Lunahooponopono,

            Aloha oe:-

            O James Lewis ka moho i puka ma kahi o Hon. J. Ewaliko, a o J.M. Kauwila a me D.K. Ewaliko na moho o ka aoao Home Rula pauaka. Ma ka laua haiolelo ua hoike mai laua he mau aloha aina laua. I ka wa nae i ninau ia aku ai i ke kumu o ko laua holo balota like ana, oiai, hookahi no o laua aoao kalaiaina, na pane mai laua me ke kapili ana no kekahi ka hewa a pela aku. Lapuwale o na lapuwale, a i manao hou olua e holo balota hou mai hele hou mai olua i Hamakua nei e pauaka ai, aohe lumi kaawale i koe no na kanaka pauaka e like me olua.

 

LOKOMAIKAI.

            Ua haawi manawalea ae ka Hon. R.H. Makekau i kekahi mau keonimana ma ka la koho balota nei he 3 mau omole waina, a i ka makaukau ana o keia poe keonimana e inu ae i ka makana maikai i loaa mai ia lakou ma ka lokomaikai o ka mea hanohano, ua kiki like ae ia lakou i ko lakou mau omole a inu ae la no ke ola o James Lewis, aole no ka mea hanohano, ka mea nana i haawi mai ia lakou. Kupanaha ma oli no. Ke haawi aku nei keia makapeni i ka mahalo i ka nui o ka lokomaikai o ka mea hanohano. Ke kau mana mai nei keia olelo a kahiko penei:

            I ka lani no ka na wehe e ke pulu. I kahi e no ka malie hiolo e ke aho a ka lawaia. I kai no i ʻ a mali e ka makau. Io kilo loa no ke koho balota huli e ka balota.

 

NA LUNAHOOIKAIKA.

            Ua liki ae na lunahooikaika i ka puka o ka lakou mau moho. Wahi a kau wahi kanaka pokole, ua maopopo loa ia'u o kuu Lunamakaainana D.K. Ewaliko ka moho e ahai ana i ka hanohano o keia la. He oi keia a kahi kanaka liki paupaka, me ka ike iho no he elua keia mau moho e holo nei no ka aoao hookahi, pehea iho la ia e manao ai e puka. Ua olelo hou ae no na wahi kanaka pokole nei, e hooikaika ana ia ia Ewaliko, a i puka ole, alaila, e holo balota ana ia i keia kau ae.

 

KAA I KA PALI.

            Ua kakaa i ka pali kekahi poe kanaka i ko lakou huli hoi ana mai mai ke koho balota mai. O Chas. Kaluahine ka mea i kakaa a haki pu ka pou o ka ihu, hoopili pu ia i ke kumu la? a ku pololei ka wawae iluna, a i ka ike ana aku nei o Lui i keia poino o kona kokoolua, ua lele aku oia o kokua e kokua, pau pu laua i ke kaa. E ole ka nui o ka poe kokua pakele ai, aole nae he nui o ka poino. O ka pou iho wale no kahi mea i poino, e laa ko holo ihu ole, i ke kula wale o Halemano. He kahiohio wale mai no keia mau hana.

            He mea pono no ke akahele e o'u mau hoaloha.

            MAKAIKIUOKAPAHUBALOTA.

 

HE ELUA TAUSANI EKA E WEHE IA ANA.

            Ma ka hoi ana mai la a Komisina Boe ma ke Kinau o ka Poaono nei, ua hoike mai oia he elua tausani eka aina e wehe ia aku ana i mau home hookuonoono no na poe nele aina e noho mai nei ma Hawaii, a o keia mau eka aina aia no ia ma Kona a me Honuaula. Wahi ana he mau aina maikai loa keia i kupono no na hana mahiai, a he nui hoi ka poe i waiho aku i ka lakou mau noi iaia no kekahi mau eka o keia mau wahi ae la i hoike ia. Ua kipa pu ae oia ma Maui a nana i ko laila mau aina aupuni, aka, aole nae he mau eka aina ana i wae ma ia mokupuni no na Home hookuonoono.

 

HE HANA KOLOHE I KE KAA UWILA.

            Malalo o na manao kolohe o kekahi mau keiki haole ua lawelawe iho la lakou i kekahi hana e hoohikilele ia ai ke kalaiwa a me ke kanaka ohi dala o kekahi o na kaa uwila e holo nei iwaho o Punahou, oia hoi ko lakou hana ana he kii kanaka mai ke kahi mau aahu kahiko mai, a waiho iho la iaia iluna pono o ke alahao me he kanaka ona la.

            He mea oiaio, iloko o ka nanea nui o ke kalaiwa o kekahi o na kaa uwila e hooholo ana i kona kaa ua pii aku la na huila maluna o keia kino kanaka hooka'akupua o ka po. Ua hoohikilele loa ia ke @aiwa a me ka mea ohi dala no keia ulia poino a ko laua kaa i hana ai; me ka hookaulua ole iho ua hoouna koke mai la laua i ka lohe i ke keena kaa uwila a me ka halewai no keia kanaka i make i ko laua kaa.

            Iloko o ka pupuahulu nui ua haalele iho la ke kau makai a me Luna Nui Ballentyne no waho o Punahou, i ukaliia e kekahi mau kauka a me kekahi poe kakau nupepa. I ko lakou hoea ana aku aia he poe malaila e aka pohenehene mai ana, no ka mea, ua ikeia aole ia he kino kanaka me oli, aka, he kai wale no ia. Ua hoopiha ia o Hope Makai Nui Charlie Chillingworth a me Luna Nui Ballentyne me ka inaina no keia hana kolohe a hooholo iho la e noii ia ka poe na lakou keia mau hana kolohe, ma ka huli ia ana aku ua loaa aku la he eha mau keiki o ke Kula Punahou ka poe nana keia mau hana kolohe i hooko ma ka po Poaono nei.

            Ma ka Poakahi nei ua lawe ia mai lakou imua o Luna Nui Ballentyne o ka Hui Kaa Uwila e ka lakou poo kumu, a mihi aku la no ka hewa a lakou i lawelawe ai. Ua hookuu ia mai lakou me ke ao ikaika pu ia mai aole loa na poe keiki nei e hooko hou i kekahi hana kolohe o keia ano ma keia mua aku.

 

KE KAUA ALA O PILIPINE.

            Manila, Dec. 10. He mau tausani o na kanaka e haalele ala i ka apana o Batangas no kahi e pakele ai ko lakou mau ola. Ua hoike mai la o Kenerala Bell no kekahi hakaka i malamaia ma ka apana o Carmines mawaena o kekahi puali Pilipine a me kekahi pualikoa Amerika o ke regimana Iwakalua. O ko na Amerika poino he ekolu i make, aole he maopopo o ko na enemi poino, aka, na koho wale ia he koikoi loa ia.

            He puali nui o na Pilipine kailele kaua mai i ke taona o Lipa, apana o Batangas, he hookahi koa Amerika a me kahi mau kupa Amerika i make, he umi Pilipine i make mamua o ko lakou emihope ana aku me ke oki a lawe pu ana he mau haneri i-a o na awea telegarapa.

 

HOOLAHA HOOKAPU

            Ke papa a hookapu loa ia aku nei na mea a pau, aole e hookuu wale i ko lakou mau holo holona o kela a me keia ano maluna o ka aina o Makanihalulu e waiho aia ma Kalapana, Puna, Hawaii. Aole hoi e kii wale ia na hua ai a me na mea ulu a pau oluna o ua aina la. Aole hoi e wawahi wale ia kapa pohaku e hoopuni ana i ua aina holookoa la. Ke hoike pu ia aku nei no hoi ma keia, ua hookohu ia aku o E.N.P. Keaua i Luna a me T.H. Kaaihili i Hope nona, a na laua e malama i ka maluhia o ua aina la. O ka mea a mau mea paha e kue ana i keia e hoopii ia no ma ke kanawai.

            OWAU IHO NO,

            EMMA AIMA NAWAHI

Kahu olua keiki no ole, Albert a me Alexander Nawahi.

Honolulu, Oct. 22, 1901.

 

HE KUAI HOEMI NUI O NA WAIWAI LIKE OLE

Ma Kahi o

K. ISOSHIMA

Helu 10 Alanui Moi.

Ma Keia Poaono, Dec. 7, 1901.

PAPALE ME NA LOLE AAHU

EKOLU PULE WALE NO

 

            Ma ke Kinau o ka Poaono nei i hoea mai ai ka Hon. S.H. Haaheo i ke kapitala nei. He mahiehie ke ola o ka mea hanohano.

 

Wm. RINGER

            Eia au imua o oukou e o'u mau hoa lahui Hawaii, ua wehe ae aeiou he halekuai kika, kikiliki, pakana@ o na ano a pau, kini mea ai o na ano like ole, wai momona, paka Hawaii o Kailua, Kona paka ona, a pela no na Opelu maloo. Ua hiki o'u ke hoolawa i na makemake o'u mau hoa hanau o ua mokupuni. E loaa no @ me @ nui Muliwai, kokoke ia alanui Kukui. P.O. Box 483.

 

DAVID MALO

            E na makamaka a me na hoaloha, e o'u mau hoa o ka io hookahi he mea hauoli no'u ke hoike ana aku ia oukou, ua wehe ae nei au he Hale Hoomaemae Kaa Baikikala, a o na mea a pau he kaa baikikala poino ko lakou e lawe mai hou nei a na'u no e hoomaemae me ka noeau nui ma ka auhau haahaa loa. O ka iini iloko o'u e kokua kekahi i kekahi, a o ka Hawaii e pii ae ana ma kekahi kulana ike ia a kakoo aku kakou iaia. Nolaila, e ike mua ia kakou Hawaii a mahope ae na Haole me na Pake. Keena Hana: Alanui Rikeke makai iho o ke AlanuiMoiwahine. nov. 7.

 

HOAHU E MALAMA I KE DALA

HEAHA NA KUMU?

            1. Aole makou e koi aku ana la oe e uhai i kau dala.

            2. E haawi ana makou i kekahi alahele palekana e hiki ai ke hoopukapuka a loaa ke dala mamuli o ka hoohui i na huina liilii i kela a me keia mahina, a mamuli o ia mea, e koe ana he huina dala mai ka hooliloia ma kekahi ano e ae, a e loaa ole ana ia oe kekahi wahi pomaikai mai loko mai oia mea.

            3. Aia iloko o keia Hui na mahele hoopomaikai o na ano apau o na Hui Hoanu Panihakahaka me na Banako Hoahu Dala, a e kaupale ana i na mahele kupono ole o kekahi o ia mau hui.

            4. O ka nui o na makahiki a me ka oihana a hana a ka mea hoahu, aole loa ia he kumu hoanoe a hoololi, no ka mea, ua hiki i na kane, na wahine a me na keiki ke lilo i poe hoahu.

            5. No ka mea, e haawi ana i ka mea ilihune a me ka mea waiwai i manawa kupono e hookaawale ai i mau wahi dala me ka loaa o ka huina na keneta ukupanee oi o ka mahuahua.

            6. No ka mea, ke hoahu oe me keia Hui, ke kuai nei oe a loaa ia oe ka waiwai malalo o ke kahua hoahu liilii.

            7. No ka mea, aole oihana hoopukapuka i ikeia i oi aku ka pomaikai mamua o keia. E kakau mai i na hou kaka piha. E hauoli mau ana ka Hui e hoike a e hoakaka piha aku i na mea apau a me na lawelawe ana ke makemake ia ke kakau ia mai ma ka leta a ke ninau kino ia mai.

            E makaala i na Lahui E e hana like nei i keia hana like. E malama i kau dala ma kou home a hookomo mai iloko o ka

HUI HAWAIIAN REALTY A ME MATURITY KAUPALENAIA.

            McIntyre Hale kihi o na Alanui Papu a me Moi. Rumi 3 a me 4. Pahu Leta 262.