Ke Aloha Aina, Volume VII, Number 50, 14 December 1901 — Page 7

KE ALOHA AINA

 

POAONO, DEKEMABA 14, 1901.

 

-----

MOOLELO HOONI PUUWAI

NO KE

KAKELA LANAFODA

KA

Ipuka o ke Kuewa me ka Aea.

KA

Pua Lilia Ahiu o Sanadela.

 

MOKUNA IX.

 

KA PO WELIWELI A KA INO - KA MEHEU

POHIHIHI O KE ALOHA - KA HOOPAKELE MA KA MAKA PAHI KAUA.

 

            Me keia mau olelo ma na lehelehe o ua Kuewa ala o Lanafoda, puili mai la ia i kana wahine iloko o kona mau lima wikani, a haawi i ua honi muki ana o ke aloha oiaio a me ka makee me na olelo kaukau aloha a ua Haku Kuena ala e lua iho ana maluna o kana wahine e waiho lahalaha ae ana iloko o na hoopolulu ai ana a ka moe maule.

 

            A no kekahi manawa loihi o ka ua Kuewa nei kaukau ana maluna o kana Pua Lilia Ahia, aia hoi kaakaa malie ae ia kona maka a me ka leo nawaliwali o ka mea i loohia me na haawina kapilikii o ka ehaeha a me ke kaumaha kamailio ae la ia "O ka leo, o ka'u mea i aloha ai, aka o na lima nae o na lima no ia o ke kanaka powa a me ke kini. O! E na lani, eia anei kuo aloha maanei, a e kuu aloha o ka ihu o ka lio ahea oe hoea mai a hoopakele ae ia'u?"

 

            My wife! Eia oe iloko o na puili a me na hoopakele ana a kau kane. E haawi i kau nana pono ana mai, a e ike no oe me ka hoohewahewa ole owau no keia o kau kane aloha.

 

            Me ka leo uwe kapalili o ka hauoli aia ua Pua Lilia Ahiu ala ua puili ae la i ka a-i o kana aloha, a hookuu iho la i na kulu wai a ka lihilihi me keia mau huaolelo, "kuu aloha poina ole, nani ka lokomaikai o na lani i ka hoouna awiwi ana mai ia oe e hoopakele ae ia'u mai na lima mai o kela powa, a e kuu haku aloha pehea oe i pololei mai ai mahope o ka meheu o kela kanaka pakaha hohewale? A owai kou alakai ma keia alahele pohihihi?

 

            Aole loa he alakai ma ko'u ala hele pohihihi o ka imi aloha e kuu Pua Lilia Ahiu hookahi wale no o na lani kiekie iluna lilo, i kokua ia hoi e na hookauwa ahonui ana a kuu Prince haaheo nei.

 

            Iloko o ka ino nui weliweli e holapu ana, ka ua me kona mau kola mu eloelo, ka uwala me kona mau olelo ahi e holopapa ana, a o ka hekili hoi ame ka makani e hanare a e wawahi ana me ko laua mau lea hookikina o ka inaina, aole loa kuu Prince ahonui i paupauaho, a hoao e kuemi hope, a o ia hopena oia hoomana wa@i ana ua uku ia mai ia me na haawina pomaikai o ko kaua hui hou ana.

 

            Alaila, me kela mau olelo a ua Kuewa nei, ua hoike aku oia i ka moolelo mai ke mua a hiki i ka hope, a oia like no hoi mai ka Pua Lilia Ahiu mai, alaila, ma ka hoopokole ana ae i ka olelo, aia ua Pua Lilia Ahiu nei e kau ana maluna o Prince, a o ka Haku Kuewa hoi o Lanaford maluna o ka lio o ka Duke Kalauseta o Alena i make ino ia, a hoohuli ae la i ko laua alahele hoi hope no Weseminita A@e.

 

            O na haawina kukahalelo a ka ino nui o ka po i hala iho la aia ia ke waiho moakaka mai la imua o na maka o kamahele, e hoike ana hoi i ka weliweli a me ka nui o ka inaina a ka ino i hana ai.

 

            Aka, o na paia lani uliuli nae ma keia kakahiaka ua hoike mai la kona mau ponaha poepoe ua hala aku ia ka ino a me kaua mau hana, a o ka malie keia a me ka nani o ka ia alohi e hekau iho la, e hoolale mai ana i ua mau kamahele ala aohe he akeakea ana i koe a ka ino ma koalahele huli hoi.

 

            He mau mile mamao i hala hope aku o ke ala i ka Haku Kuewa o Lanafoda a me kana Pua Lilia Ahiu aia hoi hoea mai la laua no kahi a kekahi hale kakela alaula e ku ana maiaio o ka malu o na laau elema loina, a nona hoi na paia pohaku e hoike mai ana he mau makahiki loihi kona o ke ku kilikila ana me ka haaheo malalo o ka noho hooponopono ana a kona mau mamo hooilina.

 

            Ea, he kakela ulaula nani hoi kela a'u e ike nei, aka, ke hoike mai la nae kona kulana i ke kahiko a me ka loihi o kona mau la o ke ku ana, a me he mau hanauna alii kahiko loa ka poe no lakou keia kakela kamahao. Aka, owai la ko na haku hou i ke a wa, wahi a ke Kuewa o Lanafoda.

 

            Ua ae a hooia pu ae me ka Pua Lilia Ahiu no na olelo a kana kane, aka, o ka ninau nui pohihihi wale no owai la ka haku a lii o ua kakeia ulaula nei.

 

            E hoopuni ia ana ua kakela nei e na alanui nani a akea, a ma keia a me keia aoao o ua mau alanui ala e ulu a e pohai iho ana na laau me ka lakou o au pua nani mai ka lo ke keokeo a ke aloha a hiki loa aku, i na pua lilia ulaula o ke kuikahi, a ma ka hema aku o ua kakela kama hao ala, e waiho kahela mai ana kekahi paka nani me kona mau ululaau haahaa nani, a i piha hoi me na holoholona maikai wale no a koe aku na holoholona ino a ahiu hae o ka nahele.

 

            Ma ke komohana aku o na puka ala, aia he mau eka aina momona i piha me na mahina ai like ole e mahalo ai na maka o kamahele i ka nani a pau ole, a oiai no na kamahele i ka nani a pau ole, a oiai no na kamahele o mahalo ana i ka nani o ke kakela ulaula a me kona mau aina mahina ai, aia hoi, me ko laua ike mua ole, ua oili mai la ma loko mai o ka ululaau he hololio.

 

            E kau ana oia maluna o kekahi lio keokeo nani, a ma ka aoao hoi o kona lio e holo ana kana mau ilio hahai holoholona elua, he hiehie a me ka haaheo ke kulana kau lio o ua kanaka ala, a he kulana kona o ke kanaka uhai holoholona. Ua haawi mai oia i ke aloha i na kamahele, ua panai ia aku no hoi e laua, alaila, ua lilo e ka hanohano o ka hoolauna ana ia lakou ma ke kamailio ana a ka Haku Kuewa o Lanafoda ma ka ninau ana i ka mea hoi nona keia kakela ulaula a laua i pahaohao ai i na minute aku i hala.

 

            Alaila, he mau malihini olua ma keia mau kaiaulu e na opio? wahi a ka hololio keokeo.

 

            Ae, e ke keonimana, mai Ladana mamao mai nei maua, a e huli hoi hou aku no maua ilaila, wahi hou a ke Kuewa o Lanafoda.

 

            Aha ! mai Ladana mai nei olua alaila, he keu ke kakahiaka nui o keia huakai hele a olua. Aole loa o'u manao io mai Ladana mai nei olua i kuia kakahiaka, a aole loa no hoi olua e hoea mai ma keia wahi i keia manawa oiai, kela ino nui o ka po nei e noke ana i kona inaina maluna nei o ka aina.

 

            Aka, aole ia o ka'u haina kupono no kau ninau e ke kanaka opio, nolaila, e kala mai ia'u. O ka mea nona keia kakela ulaula owau no ia ka Haku Ela Maina o Semafila. Ano e kuu keonimana opio ua maopopo aku la ia oe ka mea nona ke la kakela, alaila, o ka'u noi wale no e ae mai ia'u e na opio e lilo olua i mau malihini kiekie na'u maluna o ka papaaina kakahiaka o ke kakela ulaula, a e lohe pu hoi olua i ka moolelo walohia e pili ana i na kakela ala a me kona haku, wahi a ka hololio keokeo.

 

-----

MOKUNA X.

 

KE KAKELA ULAULA - KA MEA HUNA UA IKEA - KE KAKELA O LANAFODA.

 

            Ano e ka mea heluhelu ke ike nei kaua i ka inoa o ka haku nona keia kakela ulaula a o ka moolelo e pili ana iaia a me kona kakela kamahao oia ka kaua e ukali pu aku ai me na kamahele opio a hoea aku iloko o na paia nani a kamahao o ua kakeia ala.

 

            Nolaila ma ka aoao o na alii opio aohe hoole ana no ka lokomaikai o ka mea hale i kono mai la, a oiai ua pololi a aneane maoli no ka houpo o ua mau kamahele, alaila, he hana hupo a hehena ia laua ka houle ana aku i ka leo lokomakai o ke ola i pohala ia mai la.

 

            Ua hoeu aku lakou no ke kakela ulaula a hookipa loa ia aku la maloko o kona keena hookipa nani kahi a maikai nani a me na mea o ke au kahiko o ka hale o ka ohana Semafile, mai na paia hihiu o ua keena a hiki aku i ka papahele me na moea pahee e Peresia, he nani wale no na mea a pau, a e ku ana hoi ka noho pulu nani me ko lakou mau kahiko i milo ia e ka poe hana akamai a aohe nahi e aku e hooulu iho ai.

 

            Ua lilo aku na lio o ua mau opio aia malalo o ka malama ana a ke kahu lio o ka Haku o ke kekela ulaula, a o ua mau opio aia hoi aia ia malalo o ka Haku Semafila mau mailani ana, ka hookina ana hoi a ua mau opio ala e poina ole ai i ka waipaha a me ka oluolu o ka Haku nona ke kakela a laua e hoohihi a e makahehi nei i ka nani. Emoole aia ka leo o ka hele aina kakahiaka ke kahea mai la ua ma, kaukau ha mea a pau, a oia ka ua Haku Maina nei o ke kakela ulaula i kono aku ai i kana mau malihini no ka hele ana aku no ka papaaina.

 

            Maluna o ua papaaina ala a ka Haku o ke kakela ulaula aia ke ala moani o na io oia a me na io puaa momona ke hoomonimoni ala i ka haae o na kamahele opio a o na io palaoa pulehu a me ko lakou mau ea aala, ke pauma awiwi ala ia i ka hanu o ua mau malihini nei, a mahope o na olelo kahoahoa a me ke kanaenae ana i ka lokomaikai o na lani no ke kau ana mai i kana mau hoopomaikai ana mai maluna @ ia papaaina a ua Haku Maina Semafila nei, aia kela a me kaia e holo nui ana ma ka uhio ana i ko waho iloko, a o ka iwi wale no ka mea hoolei ae, a o ka wai ula ohelohelo o na waina kaulana o na aina haahaa o Sekotia, ua inu ia ae ia no ke ola o na malihini a me ka Haku o ke kakele ulaula.

 

            Alaila, mahope iho o ka paina kakahiaka, aia na malihini a me ke kaamaaina o ka hale e luana hou ana iloko o ka rumi hookipa, a hoolohe i na olelo e kamailio a e hoike ia mai ana e ka mea hale e pili ana iaia iho.

 

            Wahi a ua Haku Maina Semafila nei: E na opio o ka mnoolelo e pili ana ia'u, he moolelo waiohia no ia a me ke kauma@a, a ia'u e la a e noho nei i keia mau la, he ola ana no ia iloko o ka mehameha a me ka luuluu e hoehaeha mau ana i kuu puuwai, no ka mea, o ka'u mau mea aloha o ka wahine a me ke keiki ua kaili a ua lawe ia aku ia mai ia'u aku.

           

            (Aole i pau.)

 

-----

            E alawa ae i ka makou mau hoolaha halekuai.

 

-----

G. W. K. KAUIMAKAOLE

 

            He Loio ma ke Kanawai a he Notari no ka Lehulehu no ka Mokupuni o Maui, a Le Mea Haawi Palapala Mare no ka Apana o Hana oia mnokupuni no. E hooko ia no ka makemake o na mea a pau e hiki mai ana imua o ko'u alo a he oluolu ma ke kukai olelo ana. E loaa no au ma ko'u ma Makaalae, Hana, Maui.