Ke Aloha Aina, Volume VII, Number 47, 23 November 1901 — Page 8
| This text was transcribed by: | Kiara Puakenamu Leong |
| This work is dedicated to: | Mildred Silva Vieira |
KE ALOHA AINA, POAONO, NOVEMABA 23, 1901.
MOOLELO HOONI PUUWAI
NO
Kuu Aloha i na Pua, Kuu Ipo o na Launahele!
Ka Makaikiu Kupaianaha!
MOKUNA XXIII
O KE KUMAKAIA KA KO’U MAKUAKANE – O KA HUNE A ME KA POLOLI KO’U HOALOHA – A! E NA LANI! AOLE LOA.
Ma o na lani ala e hoole a e kue mau aku ana au i keia Haku Danekota a hiki i ka hope o ko’u ola ana
Alaila, me keia mau olelo a ka Ela Opio o Kalivi Hale, aia oia a me kona mau makua hookama ua kau ae la maluna o ke kaa a holo aku la no ka hale aha hookolokolo kiekie, a ia lakou i komo aku ai o Haku Danekota ke ku ana a hoike i na mea a pau e pili ana i kana kumu hoopii, a oiai no ua Haku la e kamailio ana ua ike ia aku la he keonimana opio e kulou iho ana ma ka aoao o ku lede Silevia a hawanawana i kekahi mau olelo, a ia Haku Danekota i noho iho ai ilalo, lohe ia aku la ka leo o ua keonimana opio nei i ke kamaino ana ae me ka leo nui me na huaolelo moakaka. O ke kipi a me ke kumakaia anei ko’u makuakane? Aole loa! O ka ne’e a me ka hune o laua ko’u mau hoaloha.
Silence there! Wahi a ka leo okalakala o ka Haku Manafeda owai ka mea nona kela leo hoohaahaa i ka hanohano o keia aha?
Owau e kou hanohano e ka aha, wahi a ka Ela Opio o Kalivi Hale me ka haliu pono ana ae imua o ka aha a haka pono aku la me na helehelena kuoo me ka hoomau hou ana aku i ke kamailio.
Ma ka hapa o ka mea i hoopii ia ke ku nei au a kue i kela kanaka ina paha he haku a he alii ia, no ka mea, aole loa he kipi a me ke kumakaia ko’u makuakane. Ina o keia Haku kipi kumakaia ko’u makuakane, alaila, no ke aha oia i haalele lokoino iho ai ia’u a me kuu makuahine e make i ka pololi a me ke anu.
O ka’u mea e hoomanao nei o ka hune a me ka nele o laua ko’u mau hoaloha pilpaa me kuu makuahine a keia Haku lapuwale i manao kuhihewa ai aia maua he mau kino make i popopo. Aka, aole pela ka manao o na lani ua hoopakele mai oia ia maua iloko o kona lokomai mailoko mai o ke awawa malu o ka make, a ua alakai aku hoi ia maua ma na kapa wai lana malie o ka maha, a hoomoe hoi ma na ipuka hale o ke aloha.
Ea, e kou hanohano e ka aha, ina o Haku Danekota kumak@ia ke kane mare a Silevia L@dona, alaila, o Haku Danekota hea ka Kaunawahine Kela@@ia kane mare? He lede hanohano kela i piha me ke aloha a me ka maemae, aka, o ke kane nae ana i mare ai me kona manao aloha o ka paulele, he hapawale oia o na lapuwale, a e kupono ai oia e kipoka koke ia. Nolaila, e lohe oe ano e ka aha i na pane a me na hoike a ka mea i hoopii ia.
Me keia mau olelo a ua Ela Opio ala, huli ae la oia a kunou i kona makuahine no ke ku ana ae a hele no kahi o ka noho hoike, a hoike i na mea a pau.
Alaila, ku ae la ua luaui makuahine Silevia ala, a hele aku la, a mahoi e iho o ka pau ana o kona hoohiki ia ana, ua hoike oia i na mea a pau e hoole loa ana, aole o Haku Danekota o kana kane mare, a i mea e ikeia ai e huli ia maloko o ka buke hoopaa o na mare, a e ike ia no me ka hoohewahewa ole ka oiaio o na mea a ka aoao i hoopii ia e hoole loa nei aole ka Haku Danekota he kane mare nana.
Wela, e hoole loa mai ana anei oe e Silevia aole au o kau kane mare i hoohui ia iloko o ka berita paa loa o ka materemonio ma Sekotia? Wahi a Haku Danekota me ka piena.
Ae e Haku Danekota ke hoole loa nei ia oe imua o na lani, a imua o ka hanohano o keia aha, aole loa oe o ka’u kane mare wahi a Silevia.
Alaila, e kou hanohano e ka aha wahi a Haku Danekota me ka huli ae imua o ka aha. Ina aole o keia Silevia ka’u wahine mare, alaila, no keaha la kou hanohano i hookau mai ai i ka hoopai e ahewa ana kou mea hoopii nei malalo o na hoopii ana a ka mea i hoopii ia. Ua hoopaa ia ka moolelo o kela hihia a ke manao kuhihewa ole nei kou mea hoopii aole loa i poina kou hanohano no ua olelo hooholo ala i haawi mai ai.
Ke hoomanao nei no au ia olelo hooholo me ka poina ole, aka, he like ole nae na kumu hoopii oia hihia me keia, ma ia hihia ua loaa na hooiaio ana e haawiia ai ka pono no ka mea hoopii, aka, ma keia hihia he paewa loa me ka nukee kapakahi, a keia aha hanohano e haawi ai i ka olelo hooholo e hookuu i ka mea i hoopii ia. Nao, ma ka inoa o ka aha kiekie ua makaukau oia e hoopuka i kana olelo hooholo, wahi a ke kahu o ka aha.
Alaila, e kou hanohano e ka aha.
Silence, Haku Danekota ua makaukau ka aha me kana olelo hooholo, a o kau mau kamailio hoowahawaha aha me kou ike maopopo no i ke kekee a me ke kapakahi o kau mau kumu hoopii, alaila, e hoopai ia no oe no ka hoowahawaha i keia aha. Nao, o ka olelo hooholo a ka aha, ua hookuuia ka mea i hoopii ia, wahi a Haku Manafeda.
Alaila, ke hoohalahala nei au i ka olelo hooholo a ka ah@@a o ko’u mau loio ala, wahi a Haku Danekota me ka noho ana iho ilalo, a kali no ka hopena o na hana a kona mau loio e hoohalahala imua o ka aha niele a me ninaninau, a o ka pane a ia aha, ua apono lakou i ka olelo hooholo a ka aha kiekie a o na kumu hoopii a Haku Danekota, ua kiola a hoolei ia aku la iloko o ke ie opala no ke puhi ia aku i ke alii i ke kakahiaka o kahi la ae.
Ua nui na hooikaika ana a ua Haku Danekota nei e loaa ka pono no kana kumu hoopii, aka, ua kapae loa ia mai la ia iloko o ka luu meki o ka manaolana poho, a o ka mea nana i pepehi iho a make loa na manaolana ana o ua Haku nei a me kona mau loio, oia no kela olelo ua hoa okalakala a Haku Manafada i kukala mai ai e hoopana no o Haku Danekota me kona mau loio ma ke dala a me ka hoopaahao ana maloko o Nugeta, ina e hoea hou aku ana kekahi o na ano hoopii o keia a na Haku nei.
Na keia pani akeakea ia ana o na Haku Danekota ala, na ia mea i hoonawaliwali mai iaia iloko o ke kaumaha a mihi iho oia me ka eha eha nui a noonoo ma ke kumu hea la i hoole loa ia ai kana hoopii, oiai oia maoli no ke kane mare a Silevia ana i manao ai he mau he mau epa wale no ia, aka, i ka wa nae i lawe ia mai ai na hoike a me na hooiaio aia ka aole ia he epa he oiaio maoli no, a eia nae hoi iaia i lawe mai ai i ua oiaio ala a koi aku imua o ke kanawai ua pekuia mai la kona kua a kipaku ia mai la me na olelo hoohilahila pu.
Ua nui na hoikaika ana a u i Haku ala e ike pehea la oia i hoohoka ino loa ia ai, aka, a hiki i ka pouli hou ana o kona noonoo aole loa he loaa iki. O na olelo paanaau ma na lehelehe o ua Haku ala. Owau no kana kane mare. Owau no ka Haku Danekota o Danekota Kakela ka mea hoi he mana a he kuleana oiaio kona maluna o kela Silevia, oiai, o ka’u wahine no ia i mare ai, a ina aole pela, alaila, e lawe mai ana au i ka’u hoopii oki a hookaawale i kela berita mare nan i hoopaa ia maua i hookahi imua o na aha kanawai o Beritania nei, a ina he mea ia na ko Beritania nei mau aha kanawai hookaawale berita e noii mai ai e loaa keia Silevia puuwai puanuanu o ka Haku Danekota wahine mare ia, alaila, e hauoli no auanei kuu uhane e auamo like i na ehaeha o keia ola ana e like me kana i hoolilo mai ai ia’u i mea hoohilahila ia imua o keia ao a me na kanaka:
MOKUNA XXIV.
HAKU DANEKOTA – KA ELA OPIO O KALIVI HALE – KA AHAOLELO ALII O BERITANIA.
Mamuli o ka haule a walawala pahu ana o kela kumu hoopii koi wahine mare a Haku Danekota, ua @[line unreadable] a weliweli @e ka makau no ka Ela Opio o Kalivi ke kanaka opio hui ana i kapa aku ai o kana keiki ia a na keiki ala hoi i peku aku ai iaia me na huaolelo o ke kipoka e kana aku ana iaia (Danekota) he kipi a me ke kumakaia, ke ole e loaa iaia ka lanakila a me ke k@okoa ma kana hoopii e hookaawale iaia a me Silevia mai ka berita laahia aku o ka mare, no ka loaa hou ana iaia he noho kuokoa ana me ka hoopili kua ole ia aku o kona waiwai e like me ia i hooholo a ahewa ia e ke kanawai.
Nolaila, o ka hopohopo a me ka makau honua e wale no o ua Haku ala no kana keiki ka Ela Opio o Kalivi Hale, na ia mea i kauoha hookikina i na Haku ala e lawe koke mai oia i kana hoopii oki mare e hookaawale ana ia laua me Silevia.
Aole i pau.
Eia o Painapa ma ke kuai hoemi nei i na Keokeo, Kalakoa Amerika Kinemu, a me kekahi mau waiwai e ae i kaia pule.
Ma ke Kinau o ka Poalua nei i huli hoi aku ai o Mrs. Emelia Nakapuahi no ka poli aloha o ka aina ua lani pili o Hilo.
G. P. KUAIMAKAOLE
He Lolo me ke Kanawai, a e loaa no wau i ka Uakea o Hana ma Makaalae, he oluolu ma ke kuka ana.
Makaalae, Hamoa, Maui.
HOOLAHA HOOKO MORAKI A ME KE KUAI.
Mamuli o kekahi mana kuai i hoikela maloko o kekahi Palapala Moraki i hanaia mawaena o J. Pedro Mello o ka aoao mua, a me F. F. Madeira o ka aoao elua, ma ka la o Sepatemaba, 1900, i kakau kope ia ma ka Buke 213, aoao 264, 265 a me 266, a mamuli o ka uhaiia ana o na kumu aelike o kela moraki, oia hoi, no ka uku ole ia o ke kumupaa, nolaila, ke hoolahaia aku nei e ka mea nona ka aoao elua o ua moraki nei, e hooko ana oia ia mana kuai.
A ke hoolaha hou ia aku nei, aia mahope aku o na pule ekolu mai keia la aku, alaila, e kuaiia aku na aina i hoikeia ma ia moraki no ke kudala ana, nia ke keena kudala o James F. Morgan, ma Honolulu, ma ka la 23 o Novemaba, 1901, hora 12 awakea o ia la.
No na mea i koe ninau ia A. G. Corres, Loio ma ke Kanawai.
Hanaia i keia la 28 o Oct. 1901.
F.F. MADEIRA,
Mea Moraki Mei.
Penei na aina i morakiia:
1. O kela Palapala Hooiimalima mai ia Nettie L. Scott i ka mea haawi moraki i oleloia, i hanaia Aperila 23, M. H. 1895, a i kaku kope ia ma ka Buke 175, aoao 448, e hoolilo ana i kekahi aina e waiho ana ma Holualoa 1, nona ka ili o 20 Eka, oia hoi, kahi mauka a e pili ana me ke Alanui Aupuni maluna ma ka aoao akau o Holualoa 1, no kekahi kau e pau ana i Sepatemaba 1, 1907, o kahi i @lo malalo o ia hoolimalima a me na hale a mau hana hou a pau maluna iho.
2. Elua nota aie dala, no Hookahi Haneri a me Iwakaluakumamalima Dala, ($125.00) pakahi i haawiia e Antonio Fernandes i ka mea paa moraki i oleloia (J. P. Mello) i hana pakahi ia i Aperila 15, 1898 a e uku pakahi ia hoi iloko o eiwa malama a me hookahi makahiki mahope iho o ko laua mau la pa@a @[line unreadable]