Ke Aloha Aina, Volume VII, Number 44, 2 November 1901 — Page 7
| This text was transcribed by: | Cyndi Defenbaugh |
| This work is dedicated to: | Kaelene Puanani Ahu-Rey |
KE ALOHA AINA
KE ALOHA AINA, POAONO, NOVEMABA 2, 1901 7
MOOLELO HOONI PUUWAI
--:NO KE:--
KAKELA LANAODA
Ipuka o ke Kuewa
me ka Aea.
--:KA:--
Pua Lilia Ahiu o
Sanadela.
MOKUNA VI.
KA HOOPAKELE NOHOALII—KE AHI LALAPA
O KA WIWO OLE –NA LA
OLINO O KA HAUOLI.
O ka lono hoolele hauli o ke pihoihoi nana i hoopu wa ae na hauoli ana o ka papaaina ahiahi a na haku alii opio, oia no ka waiho ana aku o Monisua Kalauda i ka palapala komisina hookohu oihana o ke Kuewa o Lanafoda me keia mau olelo: E kuu Haku Opio, e ae mai ia’u e hoolauna aku imua ou i keia palapala komisina mai ka moi mai a ke hauoli nei au e loaa ana me kau mau apono ana ma manao o keia palapala.
Ua lalau mai ka Haku Kuewa o Lanafoda i ua palapala ala, a uhue ae la i ke sila i uwepa ia, alaila, me na maka hiaai e hoonuu ana i na mea i kakau ia, aia hoi, i ka minute hookahi ua uhola iho la ka ula ma kona mau helehelena, a huli mai la ia maluna o Monisinua Kalauda a haawi i kana mau haka pololei ana me na maka oolea me ka hoopuka pu ana mai i ka olelo: Ma ou ala anei i aie ai ke Kuewa o Lanafoda i keia hanohano e kuu Kalauda maikai?
Aole e kuu Haku alii opio, ua loaa keia hanohano ma o ke kuahaua ala a ka moi e kahea ana i na koa makee i ka ihiihi o ka nohoalii a me kona poo kalaunu, a oiai, o oe hookahi wale iho no ka punahele a’u i paulele ai me ka hilinai, nolaila, ua waiho aku la au ma ka hoolauna ana imua o ka moi i kou inoa me na hoomaikeike ana e pili ana ia oe, a iloko o ka maua mau kukai olelo uana, ua kakau iho la ia i keia komisina a haawi mai la ia’u ma ke ano he elele imu o kou hanohano e kuu alii opio, wahi a Monasiua Kalauda.
Alaila, ke lawe mai nei au i ka makee ana i ka hanohano o keia komisina, a ae aku me kuu puuwai a pau e lilo i hoopakele no ka nohoalii e kuu moi i makemake ia e pakaha e na hana hao wale a ka enemi, nolaila, e kuu makua ma ka oihana, e lawe aku i ka’u mau hooia ana imua o ka moi e hiki kino aku ana au imua ona a waiho ia’u iho e hookauwa ia no ka aina a’u i aloha ai, ka home kulaiwi hoi o kuu mau kuewa, wahi a ka Haku Opio i pane aku ai.
Ua hoohala la na minute maluna o kela papaaina iloko o kahauoli a me ka pumehana on alauna olelo ana, a na ka lokomaikai palena ole ana o ka na lani kiai ana mai ia lakou ia po a hiki i ke kakahiaka i malama ia lakou me ka maluhia. Alaila, m aka papaaina kakahiaka, ua halwai hou aae lakou me na mea ai i hoomakaukau ia me na leo kalokokalo e kau mai ka na lani mau hoopomaikai ana maluna o ka hokua a me ka oiwi kino o ka mea i aa e molia, a e mohai iaia iho e lilo i alana e hoopakele ia ai ka noholaii o kona aina makuahine.
Mahope o ka paina kakahiaka a me na kukai aloha hope ana ua haalele aku la ka elele alii ia Sanadela a huli hoi mai la no Ladana a waiho i kana hoike imua o ka moi Kale no ka loaa o na apono ana ia o kana (moi) komisina e ka naita opio Kuewa o Lanafoda, a ua hoohauoli hui aku la mau hoike a ua elele nei i ka manao pilihua a kaumaha o ka moi.
Alaila, he elua la i hala ae mahope iho o ka huli hoi ana mai o Monasiua Kalauda mai Sanadela mai, u ahoea aku la no Ladana ke Kuewa o Lanafoda me kana Pua Lilia Ahiu a ma kekahi o na hotele helu ekahi malaila laua i noho ai, a hooupa aku la ua Kuewa nei o Lanafoda i kana palapala hoolauna imua o ka moi e hoike aku ana no kona hoea ana mai iloko o Ladana.
O ka panai a ka moi ma kona aoao no kela leta a ke Kuewa o Lanafoda, oia no kona poloai kona ana mai i na Kuewa nei e hoea aku no ka halealii, a lohe i na olelo a’o o ka hoomanao e hoopuka ia mai ana e ua moi nei.
Ua waiho a haalele iho u aHaku ala i kana wahine i ka hotele a holo awiwi aku no ka hale alii no ka hooko ana aku i keia kauoha poloai a ka moi, a imua o ke alo o ua moi ala i hoike aku ai oia i na manao wiwo ole a pau o ke aa e hooko elike me ke kuahaua alii ina he mea ia nona (Kuewa) e haule make ai malalo o ka hanohano o ua kuahaua alii ala.
O keia hoike o ka manao wiwo ole o ke koa a ka Haku Opio i waho aku ai, ua apo ia mai la ia e ka moi me ke ohohia nui e poloai ana i ua Haku Opio nei no ka loaa iaia o ka noho ana ma kona aloalii a hoolawa iaia iho me na mea a pau e oluolu a e maha ai ke kino a me ka uhane.
Ua haawi aku ke Kuewa o Lanafoda i na mahalo ana no keia lokomaikai a ka moi i manawalea mai la, aka, ua hoike pu aku no nae ia no ka hiki ole iaia ke lawe aku ia mea, oiai, o ka mea ana i koho a i hoopaa ai me ka hoohiki iki ole ke wawahi a hamabaga ia eia pu ia me ia iloko o Ladana.
Aole loa ia he mea nana e wawahi a e kue ka’u kono ia oe e ka naita opio. O ke aloalii o ka Moi Kale I o Pelekane, ua hamama kona mau ipuka ia oe a me kau Iede. Alaila, o ke Kuewa o Lanafoda, ua aa anei oe e kue hou mai i ka’u kono? wahi a ka moi.
Ua hoao hou aku la ke Kuewa o Lanafoda e hoole loa i keia kono a ka moi, aka, elike me kona paakiki ana ma ka hoole, pela no hoi ka moi i paakiki ai ma kana mau olelo kono, a i ka hope loa, ua ae aku la ua Kuewa nei o Lanafoda, alaila, ua nonoi aku la oia i ka oluolu o ka moi no ka hookuu ana mai iaia e kii i kana Pua Lilia Ahiu a iloko o na hora he elua mahope iho aia ua Haku Opio Kuewa nei o Lanafoda a me kana Pua Lilia e noho ana ma ke aloalii o Pelekane me he mau ohana alii kiekie loa ala no ka aloa, o na mea a pau ua loaa ia la ia me ke keakea ole ia, alaila, he lani iluna a he honua ilalo ka olelo ana: Aka, no ka la nae a ka manao o ke kuahaua alii i kukala a i kauoha ai, aia ia ke nee mai la i kona minute hope loa e poha ae ai o ke ahi lalapa o ka wiwo ole.
A elike me ka ino nui e ulupa ana maluna o ka honua a me ka holo mama ana ae a na ao hakumakuma kaalelewa o ka lani e huna aku i na paia lani uliuli, pela ka emoole o kela la kamahao o ke kaulana i hoea awiwi mai ai, a aia ma kela wahi a me keia wahi o ke kulanakauhale kahiko o Ladana a me na ululaau e hoopuni ana, ua paiakuli me na leo o le e poha alapine ana e hoike ana hoi i na mea hanu ola uhane a pau e noho ana ma ko lakou mau palena, eia ke kupueu weliweli a ka ino, ka hao wale a me ka pakaha, ua makaukau me ka pahikaua luku o ka make e kaili i ka nohoalii a e kipaku hoi i kona poo kalaunu mailuna lilo mai o ka hanohano keikie, a ilalo lilo loa aku o ka pouli o k alua kupapau.
Alaila, i ka wa o kela mau leo o-le e hoopaiakuli ana me ka alapine, aia ka moi Kale e naka haalulu ana maloko o kona hale alii, a hoomanao ae o k ala keia e kukala ia ai kona hopena noho moi iloko o ka lanakila a i ole auhee o ka haule pio.
O kona mau koa aupuni, aia lakou ke ku laina ala iloko o ko lakou puali, a o na koa kuikawa hoi i wae a i kahea ia e ka mana o kana kua haua alii, aia lakou ke ku laina a a iloko o ko lakou kolamu, a kali no ka leo kauoha e haawi ia aku ana.
O ka huaolelo hookai a na koa i hooho ae ai me ko lakou mau leo. E olka ka moi i ke Akua. Aka, auhea ua moi ala? U ahala ae he hapah hora aole oia i hoea mai, hala hou he hapaha hora, aole no oia i hoea aku, a i ka piha ana o ka hora hookahi, akahi no a ike ia aku oia i ka puka ana aku me kona mau ukalu e hoopuni ana, a o na huaolelo mua loa a ua moi nei i noi aku ai imua o kon amau koa, owai l aiwaena o lakou ka mea i aa me kona mau manao wiwo a pau o na diabolo e ku i moho nana o hoopakele i ka noho alii a me kona poo kalaunu.
O keia leo noi a ka moi imua o na koa, aole loa he hookahi mea i aa ae e ku a hoike iaia iho a palua a pakolu na manawa a ka moi i kamailio aku ai me keia noi imua o kona mau koa, alaila, ikeia aku la he naita i ka oili ana mai a ku he mau kapuai mai kona mau hoa koa mai, a me ka leo moakaka oia i kamilio mai: E ola ka moi i ke Akua.
O ke Kuewa o Lanafoda ka mea i aa me na manao wiwo a pau o na diabolo, e lilo ola i moho hoopakele no ka nohoalii a me kona poo kalaunu, a na na lani e hoopakele mai ia kakou i keia la mai na lima mai o ka haowale a me ka pakaha.
Aha! O oe wale no anei e ke Kuewa o Lanafoda ka moho hookahi ma ka aoao hoopakele i ka nohoalii, alaila, auhea la ka nui o kela mau haneria moho i hoopaa ia lakou e lilo i poe koa hoopakele no ka nohoalii. Ma o na lani ala e pono lakou e kapa ia he poe hohe wale, a o ko lakou mau lae e kuni ia me ka huaolelo moakaka o ke kipi moi, a me ke kumakaia nohoalii. ano, e na koa makaukau e maki aku, a e ke koa Kuewa a moho hoopakele o ka nohoalii, ma kuu aoao oe e hele ai a hiki i ke kahua hakoko o ka weliweli, wahi a ka moi.
Elike me ka leo kauoha alii, ua haawi ae kela a me keia alakai i kana mau leo kahea maluna o kon apuali, a iloko o na pii kuea a me na laina kolamu ana, aia ka puali holookoa e maki ana iloko o na kuea huina ha elima. O na alakai a me na hooponopono ana o ka puali kaua holookoa, aia no ia malao o ke Duke o Ioka, ke kaikaina ponoi o ka moi, a o kekahi hoi o na iliohae weliweli o ke kahua kaua. O ke kahua kaua aina ma ke alo o ka hale ahaolelo o na lii a me ka poe i koho ia oia kahi a ka pua i kaua kuea o ka moi Kale i hoolulu iho ai a hoouna i kana elele a moho hoopakele nohoalii e pii aku iluna a halawai he alo a he alo me na hoa hanohano o kela mau hale, a kukala aku ma ka inoa o ka moi ua hoopau ia ko lakou noho hou ana iho a lawelawe i na hana o ke aupuni.
Ma ka aoao o na hale ahaolelo elua,ala ka lahui ke ku mai la a kakoo mahope o ko lakou kua, a na ia mau kokua ana a ka lahui i hoopaakiki aku ai i ko lakou mau mano aole loa e haawi pio malalo o ka moi me ka hoolahe ole ia o ke koko, a i ole, kipaku aku iaia mai ka nohoalii aku me kekaili pu ia aku o ua nohoalii ala mai iaia aku.
O ka waha o na pu, ko lakou mau elau winiwini, na maka i@e oi a me ka wini o ka maka pahikaua, aia ia ke ku mai la me ka makaukau nui akau no na hana a ka moi, oiai, na hoa hanohano o ka ahaolelo e lawelawe ana i ka lakou hana me ka awiwi. Alaila, imua o keia mau mea make a kaua e ike nei e ka mea heluhelu i aa aku ai ka naita Kuewa e pii aku a halawai pu he alo a he alo. Aole i pau.