Ke Aloha Aina, Volume VII, Number 42, 19 ʻOkakopa 1901 — Page 7

KE ALOHA AINA

POAONO, OKATOBA 19, 1901.

 

MOOLELO HOONI PUUWAI

NO KE

KAKELA LANAFODA

KA

Ipuka o ke Kuewa me ka Aea.

KA

Pua Lilia Ahiu o Sanadela.

 

Mokuna IV.

KA LEDE HOLO LIO KAMAHAO-KA PUA LILIA AHIU O SANADELA-KE ALOHA I KA IHU O KA LIO

          O na mahalo ana o na mahalo a me na hoomaikai ana he nui, oia wale iho no ka huaolelo hiki ia Kalauda ke haawi mai maluna o ka Pua Lilia Ahiu, a ua kaha maha ia nae ia mau k@@a olelo ana o ka mahalo ia lakou i hoea aku ai no ka hotele hookipa o na naita, a malaila ua lilo aku la na ka mea malama hale na mahalo ana mai i ka naita Kuewa o Lanafoda no ka lanakila hiwahiwa i loaa iaia ma ke kahua mokomoko o ia la.

          Wahi a ua mea malama hale nei, ua lilo ia oe na mahalo a me hoomaikai ana a ko Ladana nei e ka naita opio, a ua hauoli loa ia au i ka loaa ana ia Ladana he kanaka opio i piha me ka ikaika a me ke akamai ma ka oniu ana i na mea kaua, aka, e ka naita opio lanakila, heaha ka'u e hana aku ai nou?

          Haawi hou mai i mau rumi no makou, a e hoomakaukau ia hoi i mau wahi mea ai mama, a o ko makou mau lio e haawi ia na mea ai no ko lakou lawa kupono a hiki i ke kakahiaka, no ka mea, ma ke kakahiaka o ka la apopo e haalele iho ai makou ia Ladana nei no ko makou home kuaaina ma Sanadela, wahi a ka opio Kuewa o Lanafoda.

          He huaolelo ololaita @a me ka me ka mahalo me ke kunou poo saluta ka ua mea malama hale nei i haawi mai ai, alaila, haalele iho la ia i kana mau malihini, a no umi minute komo hou mai la ia a hoike ua makaukau na mea a pau, a alakai aku la ia i kana mau malihini no ke keena paina no ka hoopiha ana i na houpo lewalewa o na kamahele, a i ka pau ana, ua hoi aku la lakou no ko lakou mau rumi, a haawi i mau minute no ke kane a me ka wahine e hauoli ai i loko o keia hui hou ana mahope o ko laua kaawale ana no kekahi mau la i hala ae nei.

          Ua lu mai ka wahine i na mapuana olelo i piha me na kuluwai momona o ke aloha, a o ke kane hoi ua haawi ae ia i kana mau kanaenae ana me na olelo hoalohaloha o ka oiaio a me ka paulele, e hoike ana, aole loa e hiki ana ia ka loa a me ka laula o ka manoanoa oia mea he aloha oiaio, a ina he tausani @@@ue ka mamao aole loa e hiki ua aloha oiaio ala o ka paulele a me ka hilinai ke mokalakala iloko o ka hiolo.

          Ua hoomau ia keia hui ana o ke kane a me ka wahine iloko o ka hauoli ulumahiehie o ko laua mau aloha o kahi no kekahi, a na ka bele o ka paina ahiahi i mawehe ae ia laua iho no ka hoea aku iluna o ka papaaina, a mahope o ka paina, ua hui hou ae la laua a hoohala me ka hauoli.

          Wahi a ke Kuewa o Lanafoda, apopo e kuu aloha e huli hoi aku ai kaua no Sanadela, a hooohala i ko kaua mau hauoli iwena o na ea moani aala o na pua.

          Ae, e kuu Haku, e huli hoi aku ana kaua i Sanadela kahi au i haalele ae ai ia'u e noho mehameha me kou aloha e ke kane, alaila, e hoihoi hou ana anei oe ia'u ilaila e haalele hou ai? Ua lawa au me kela noho mehameha ana, a mai ae ia'u e lilo i wahine puuwai nohaha, wahi a ka Pua Lilia Ahiu i uwalo ae ai i kana kane.

          Aole, aole loa au e haalele hou ia oe, ia'u ma keia huakai iloko nei o Ladana, o kuu kino wale no kai hele mai, aka, o ka hooilina o kuu aloha, aia no ia ihope i Sanadela, aka, i keia la au i hoea mai nei, ua hoea pu mai no oe me ua hooilina ala a'u i waiho aku ai a halawai pu ae la ke aloha me ke aloha ma ka ihu o ka lio, i pane hou aku ai ke Kuewa o Lanafoda.

          Pela no hoi me a'u, ia oe i kaawale mai ai, ua kaawale pu mai me kuu mau mea a pau, a ia'u i ike iho ai aole e hiki hou ia'u ke hooomanawanui i kou aloha e ke kane e hoomaeele ana i kuu puuwai, ua haalele aku la au ia Sanadela me ke ake e ike lihi mai ia oe a maha ae kuu puuwai i hoehaeha ia, aka, he mea oiaio, elike me kau i olelo ae nei ma ka ihu lio i halawai hou ai ke kane me ka wahine a e kuu aloha o na oawa ahiu o Sanadela, akahi no a maha kuu puuwai, no ka mea, o ke aloha a'u i aloha loa me kuu puuwai a pau eia ia imua o kuu mau maka kahi i ku mai ai me ka hoohie ana o ka makahehi.

 

MOKUNA V.

NA OAWA AHIU O SANADELA.-NA LA I LOKO O KE ALOHA.-KE KUEWA O LANAFODA.

          O na hora poniponoi o ke kakahiaka nui, oia ka manawa a ke Kuewa o Lanafoda a me kana alii wahine i haalele iho ai ia Ladana a huli hoi aku la no Sanadela, i ukali ia e kana kumuao kapakahi. Aia ua mau kamahele ala o ke kakahiaka nui e kau ana maluna o ko lakou mau lio a @@@@moe aku la ko lakou alahele no na oawa ahiu o Sanadela ka pahu hopu.

          He haaheo a me ka hiehie ke kulana hololio o ua mau kamahele ala o keia kakahiaka nui, ia lakou e maalo ae ana ma na alanui oolowi o Ladana kahiko, a mamua o ka wena ana mai o ka malamalama o ka la o kela kakahiaka, ala ua mau kamahele ala ua hoea aku la no ka palena waho o ke kulanakauhale, alaila, ma keia wahi i hoike mai ai na nanaina o ka lio eleele Bone Bele i ka piha hoihoi a me ka eleu e kani ana kona mau puka ihu me ka ikaika, a o kona mau wawae mua ke kokope iho la ia i ka lepo me ka ikaika, a oia ka Haku Lanafoda opio i kamailio ae ai i kana wahine, ua piha hauoli loa ia o Bone Bele i keia minute a ke ake nui loa nei oia o ka hiki koke aku no Sanadela. Aole anei pela e kuu Pua Lilia?

          Ae e kuu Haku, ua hauoli loa oia e hoea koke aku no Sanadela, a ina he mea pono i ka manao ana o kuu Haku ka huikala ana mai ia'u no ka hoi e ana aku mamua hoomakaukau i ko kaua home, alaila, e holo e aku au a mahope ae nei no hoi olua. E kuu Haku, aole loa he home i nele me ka pumehana o ke aloha, ina aia no maloko o kona mau paia ka lede a haku wahine o ua home ala.

          Aka, o na home i nele me ia haawina, he home ia aole loa ka pumehana o ke aloha e nohoalii ma kona mau paia, aka, o ka la napoo o k@ puanuanu a me ka mehameha pu o laua wale no na mea nana e heahea a e hookipa aku i kamahele no ka hoomaha ana iho i na luhi maopaopa o ka huakai hele.

          O keia mau olelo a ka Pua Lilia Ahiu o Snadela, ua hiki ole i ke Kuewa o Lanafoda ke paa a ke aua iho i na mahalo ana no kana wahine alaila, me ka puuwai hamama o ka makee a me ka umauma lahalaha o ka minamina, hookuu mai la ia i kana Pua Lilia Ahiu me keia mau olelo: O ka mea a kuu Pua Lilia Ahiu i hauoli ai, ua loaa like ia'u ia hauoli, a ke hoomaikai aku nei au me ka mahalo no keia hanohano au i hoomanao mai la maluna o'u nei kau kane aloha. Ano e kuu aloha fea iu wela a hui hou kaua i loko o ka nani ahiu o Sanadela.

          Fea wela and adieu my Lord a hui hou ma Sanadela, wahi a ka Pua Lilia Ahiu me ka hoomalo pono ana mai i na kaula kaohi o kona lio, a iloko o ke aloha welelau lima a ua Pua Lilia nei i ani peahi ae ai a@a hoi, ua oili aku la ka lio eleele Bone Bele me ka mama nui, a aia ke holo ala elike me ka puahiohio e nee awiwi ana imua.

          Ua alualu ka Haku Opio a me kana kumu ma hope o ka meheu o ka lio eleele a ahai puahiohio ala i kona mea hooholo, a hiki i ka nalo ana aku malalo o ka malu o na laau, aole loa laua i lihi launa aku, a i ua Haku Opio ala a me kana kumu i hoea aku ai ma waho o na pouli o ka ululaau, ike aku la laua i ua lio eleele nei a me kona mea hooholo e aneane aku ana e hoea i ke kiekiena e nana aku ai ia lalo o Sanadela.

          Aia kuu lede e Monaaiua Kalauda ke aneane aku @@ e hoea i na @@@ pali nihoniho o Sanadela. O e hoomaikai ia na lani he lede hololio maopopo oia.

          Ae e kuu Haku, o kau lede ka wahine hololio kamahao loa a'u i ike ai, he hiehie a me ka haaheo kona kulana kaulio, a o kana mau kakele a hoohana ana i na kaula kaohi, he eleu a me ka makaala, a elike me ka makaala o ka mea hooholo iloko o kona piha eleu pela no me kela lio eleele. Ea, e kuu Haku aole loa kekahi lio a'u i ike ai ma waho ae o kou lio e kuu Haku, elike me kela lio eleele, a ua kupono maoli no kau lede e kuu Haku e kapa ia o ka moiwahine kaulio o na oawa ahiu o Sanadela.

          Ua hoopiha ia ka puuwai o ka Haku Kuewa o Lanafoda me ka hauoli nui no keia mau olelo mahalo e pili ana i kana wahine, a no ka nui loa o kona hauoli a me ka haaheo no kana wahine, ua kaohi iho @i ia i ka holo o kona lio a hookuu aku la iaia e hele malie, a e like me ke kaohi ana mai o ua Haku Opio ala i kona lio, pela no hoi kana kumu, alaila, ma ko laua alahele e hookokoke aku nei no Sanadala, aia he mau kukai olelo ana i hoohala ia mawaena o laua, a i ka wa o ka ula wena o ka liula e kau ana ma nā paia lani, aia hoi, e ku ana ka haumana ame kana kumu iluna o ke kiekiena a nana aku i lalo o Sanadela, oiai, ua oawa ahiu ala a ka nani o na pua e hoike mai ana:

          Ua maemae lipo i na pua,

          Kilakila Sanadela i ka nani,

          Iwaena o na luhiehu malapua,

          Aia he hiwa, he nani na ka manao.

          O ka leo ohaoha a heahea o ka hookipa a ka Pua Lilia Ahiu, o ia kamaaina halekipa a ke aloha nana i hoolauna aku i na kamahele, eia ka home a ke aloha ua pumehana, a ma ka eleu a miki o ka haku wahine o ka hale, aia ua mau kamahele nei he mau malihini kipa e hoomaha ana i na luhi iloko o ka nani o ka paredaiso o na pua.

          Maluna o kekahi papaaina i luluu i na ono, ua noho iho ka Haku Kuewa me kana lede a me na makua hookama o ka wahine a me kahi Farani kumuao kapakahi, a hoopiha i ko lakou mau houpo hakahaka me ka hauoli nui. Ua inu ia ae na kiaha waina no ke ola o ka moho a naita lanakila o ka la lealea o Sena Keoki a me Sena Mikaela, a ua hoomau ia aku ka inu ia ana o ke ola o ua naita lanakila nei a hiki wale i na hora liilii o ke aumoe.

          I ke ko hope loa ana a ka bele o ka uwati i ka hora umikumamalua, ia wa i apo aku ai ka Haku Opio Kuewa i kana wahine a hoopili mai la iaia, alaila, me ka leo hawanawana malie hoomanao iho la me keia mau olelo: Ka minute i hoolilo ia ai kaua i hookahi io iloko o ke kuewa a me ka aea, a o ke kumuhana hoi @ na ipuka o Lanafoda i kukala mai ai, aole loa kau kane nei he io a he koko nona. A e kuu Pua Lilia Ahiu, kuu aloha hoi i berita ai, ina he tausani a miliona waiwai a me na hale kakela Lanafoda, aole loa ia he mea nana e hookikina mai ia'u e haalele iho i ka mea a kuu puuwai i aloha ai.       Aole i pau.