Ke Aloha Aina, Volume VII, Number 40, 5 ʻOkakopa 1901 — Page 5

KE ALOHA AINA

 

MOOLELO O KA AHAHUI EUANELIO O KA MOKUPUNI O HAWAII.

       Halawai ka Ahahui Euanelio o Hawaii ma ka luakini o Kulahikiola, ma Iole, Kohala Akau, 1 Sept. 12, A. D., 1901, hora 10 a. m.

       Rev W. M. Kalaiwaa ma ka noho hoomaka ia na hana ma ke mele ana i ka hīmeni H A N aoao 12, me ka pule a Rev W N Lono a me Rev S W Kekuewa.

       No ka hiki ole ana mai o ke kakauolelo, ua noi mai o Rev S W Kekuaewa e koho ia o John Keala i kakau olelo kuikawa, apono ia.

       Hoomaopopo ia na lala o ka Aha Ekalesia, Kanu, Elele, Haili,

Onomea a me Laupahoehoe,

Hamakua Hikina Anakalea,

Hamakua Hui  ia, Rev C M Kealoha, S L Kawelo.

Waimea, Rev Kekuewa

Kohala Akau Rev Kekuewa Kuapapahoa

Kohala Hema Rev Kekuewa Nakanaela

Kekaha, Rev W Lono, Kapa

Kailua, Rev W Kalaiwaa.

Helani Rev W Kalaiwaa

Konawaena & Kealakekua Rev W Kalaiwaa S. Mailolo

Pukaana, John Keala

Kaohe & Milolii, Waiohinu a me Kapaliuka, Kalapana a me Opihikao Kaleopaa Puula, Olaa,

       Lala mau, Rev O P Emesona, Haiolelo John S Selina.

       Na Rev S W Kekuewa, e koho ia o Rev W M Kalaiwaa i Lunahoomalu, a ia John Keala i Kakauolelo, aponoia.

       Koho ka Lunahoomalu i na Komite Imi Hana.  Na Rev O P Emesona, S W Kekuewa a me W N Lono.

       Na C K Kapa, e lilo na hoa o ka Ahahui Kula Sabati a me na hoahanu i mau hoakuka no keia Aha, aponoia.

       Hoike a ke Komite Imi Hana.

       1. Hapalua hora haipule,

       2. Hoike Kihapai,

       3. Na Palapala Hoopii,

       4. Koho ana i na Komite i ka Aha Paeaina,

       5. Oihana Kuloko, (a) Ola Kahu, (e) Na Luakini, hale kahu, hale halawai, (i) Na keiki a ka Aha, (o) Na kula hanai, (u) Na Ekalesia kahu ole, (h) Na hana Hoeueu, hoike a ke Komite Hoeueu, (k) Na haiolelo.

       6. Oihana Kuwaho,

       7. Na Ekalesia o na lahui like ole, ko lakou hoolauna ia ana mai me keia aha.

       8. Na mea hoolako i na Kula Sabati.

       9. Kahi a me ka manawa e ku ai ka Aha. Aponoia ka hoike a ke Komite.

       Na Rev O P Emesona, e kohoia i Komite Halawai, koho ia o Rev S W Kekuewa, W M Kalaiwaa a me John Keala.

       Na ka Lunahoomalu, e lilo ke kahunapule kaahele i lala no keia aha, apono ia.

       Kumuhana 2. Na hoike kihapai na ke Kakauolelo i heluhelu i ka hoike o Haili, Laupahoehoe a me Hamakua Hikina.  na rev C M Kealoha i ko Hamakua Hui, na Rev S W Kekuewa i ko Waimea a me Kohala Hema, waiho ia kahi hapa o keia hoike a hapai ia mai ke kumuhana 3.

       Na Rev. W. N. Lono i ko Kekaha, na Rev. W. M. Kalaiwa i ko Kailua a me Holani, Kona waena a me Kealakekua, na ke Kakauolelo i ko Kaohe a me Milolii.

       Na ke komite halawai, no na hana e hana ia ai, aponoia.

       Kumuhana 4. Koho ana i na komite i ka Aha Paeaina: Koho ia o Rev. Kalaiwaa i komite no na kihapai ekalesia, a ia Rev. Kekuewa no na hana o ka Aha.

       Na Rev. Emesona, e hoomaha ka Aha a hui hou i ka hora 2 p.m. Pule o C. K. Kapa.  Hui hou ka Aha I ka manwa i hoopanee ia ai me ka pule a John Samoa, Kumuhana 3. Na Palapala Hoopii.

       No ka Luakini o Kohala Hema, no ke komo an ao na komite iloko o na ekalesia o keia mokupuni no na dala 300, a no ka hale halawai o Kawaihao uka i $100.  Hooholoia.

       Koho ia o Rev Kekuewa a me John Selina i komite hana palapala noe dala.

       Mahele (h). Na hana hoeueu. Noi mai o Rev Kekuewa, a hapa ia mai ke kumuhana 2.  Aponoia.

       Heluhelu oia i kana hoike kihapai, no ka mea, aia iloko o keia hoike kekahi hana i hana ia e ke komite hoeueu, a na Rev. E. S. Timoteo i hoakaka mai i na hana i hana ia eia mawaena o na kahu a me na hoahanau i noho koe o ka hua i loaa mai i ke komite hoeueu ma kana hana: Ua pau ka noho kue ana. Ua hoouna mai lakou i ka lakou pane i keia aha ma o ko lakou la, a hooholo ka aha e hoolaha i keia pane ma ka nupepa.  Eia ua pane ala:

       Hoike a ka Ekalesia Hoole Pope Aloha Aina o Kohala Akau, imua o ka Ahanui Euanalio o ka Mokupuni o Hawaii, e noho ana ma ka Kalahikiola, me Iole, ma o ko makou komite i koho pono ia.

       I ka Lunahoomalu a me na hoa o ka Aha:

       Me ka mahalo:

       O makou o na Luna, na Hoahanau a me ko makou Makuahine iloko o ka Hoomana Hoole Pope Aloka Aina o Kohala Akau nei, ua noho kue ake makou i ka ekalesia makua i na makahiki elima a oi, a me ka makua Rev Kekuewa. Ano, mamuli o ko ke Akua hooponopono ana mai ia makou i keia mau la, nolaila, ke hana makou me ko makou ikaika a pau me ka manao maikai, pono a oiaio imua o ke Akua, a hoike aku imua o ka Ahahui Euanelio o Hawaii, ke hana a ke hoopau loa nei makou i ke kukulu ana i ka Hoomana Hoole Pope Aloha Aina ma na ano a pau.  I hoike no ka oiaio o keia, ma ke Poalima, la 6 o keia mahina ua hoohui ia makou me ka Kahu Rev. Kekuewa, a imua o laua na makua a me Rev Emesona, Kakau Leta o Ka Papa Hawaii , a me ke kahunapule kaahele o ka Paeaina nei, Rev. Timoteo, a imua o lakou  i hoike ai makou i ko makou ae e hoopau loa i keia hoomana, a e hoi aku i ka Ekelesia Makua, a no ka oiaio o keia, na koho pono aku makou ia Elia Kikalaeka i komite no makou imua o ka Aha.

       O makou iho no ma o ko makou komite ia, Elia Kikalaeka

       Aponoia keia hoike a ke komite. Aole i pau.

 

E KUOKOA ANA O CUBA.

       Wasinetona, Sept. 20. Ma ka noonoo ia ana o na ninau pili lahui ma ka noho ana o ka halawai a ka Aha Kuhina i keia la, ua ninau aku o Peresidena Roosevelt ia Kuhina Root e pili ana i ke kulana ma Cuba. I ka wa a ka Peresidena i waiho aku ai i na ninau ana ia Root no ka makemake ana e kamaaina pono me ke kulana ma Cuba, aia pu ma ia wa e noho ana ma kekahi keena o ka Hale Keokeo, o Kenerala Wood, ke kiaaina kenerala o Cuba, a nana i hoike mai i na mea a pau, a na haawiia na hoolohe aka hele no ke kulana ma Cuba.  O na olelo i kamailio ia aku e Peresidena Roosevelt e hoike mai ana ia, aia ka manao hookuokoa ia Cuba iloko o kona puuwai e like me na mea i noonoo ia e Makinile.

       O Kauka Tamayo, ke Kuhina Nui o Cuba, a me Perfecto La Costa, ke Kuhina Mahiai, ua haalele iho laua ianei no Havana ma keia auina la me na hooiaio ma i ka Peresidena aku no ka hooko ana aku i ko lakou makemake e loaa ia lakou ka noho kuokoa ana.

 

       Eia ka halekuai o Whitney & Marsh ke kuai hoemi nei i na lole koena.

 

3,000 MILE E LAINA IA ME NA KOA.

       Vanekoua, B. C., Sept. 20. Eia ke Aupuni Panalaau o Canada ke haawi nei i na kiai makaala no na ho@@ powa a pau e lawelawe aku ana maluna o ke ola o ka hooilina moi o Beritania, Duke o Cornwall me Ioka, a me kaua Duke Wahine, ma ko laua ala hele i na kapakai o ka Pakipika nei.  O na hoolala ana a pau no keia huakai a na alii a me ko laua mau ukali na haawi ia aku la i ka hui kaaahi Canada, O ke ola o na alii na haawi pu ia iloko o ka malama ana a keia hui.

       He elua mau kaaahi nana e lawe ana i ka huakai alii mai Montreal mai no keia aoao o ka aina, a e pailata ia ana laua pakahi e elua kaaahi e holo ana mamua.  He 10,000 tausani kanaka e ku kiai ana ma kae o ke alahao nona ka loihi mai Montreal a hiki i Vanekona nei he 3,000 mile.  O ka manao o kahi kiai mai kahi kiai aku ua hoonohoia ma kahi e hiki ai oia ke ike i ke kanaka mamua ona a me ke kanaka ma hope ona, mai na puu a na kahawai, na mauna a na awawa, na noho wale ia no e na kiai no keia mau tausani mile.  He mau haneri luna i ohi ia no ka nana ana keia mau kanaka i haalele ole ai lakou i ko lakou mau wahi kiai.  O na uwapo alahao a pau e kiai ia ana ia he mau la mamua ae o ka holo ana mai o ke kaaahi, a o na wahi hoohui kaa e makia ia ana lakou i ke kui i wahi no na alahao e nee ole ai a hoopoino ia ke ola o ka hooilina alii Beritania.  O na waliki kahiko, na paoahi a me na ohi dala i hilinai nui ia o lakou na poe hana o ke kaaahi alii ma keia huakai puahiohio mai ka Hikina a ke Komohana.

        O na kaaahi a pau e nana ia ana lakou mamua o ka haalele ana aku, a o na poe mikanika o kela a me keia mahele aina ua haawi ia ke kauoha ia lakou e nana i ke kulana o na kaaahi i ka wa e hoea aku ai i ko lakou mau mahele. He puali o na makaikiu Amerika a me na makaikiu mai na kulanakauhale like ole mai kai ohi ia e ka hui kaaahi a me ke aupuni no ke kiai ana i ke alanao holookoa, a he nui na poe i hoohuoi ia i hopuia i keia wa e lakou.

       Ottawa, Sept. 20. Ua hoea mai la ke Duke a me ke Duke Wahine i ke Kapitala o Canada i keia la, a ua haawi ia na hookipa hanohano no laua me ke ohohia nui ia.  Ua haalele laua ia Monteal ma ke kakahiaka nei iloko me ka makahehi nuiia. Ma kahi hoolulu kaaahi ma alanui Windsor i kau mai ai na alii maluna o ke kaahi. He hapalua hora mamua o ka hoea ana mai o na alii ua laina ae la na makai a me na koa a me kahana nui lakou i paa aku ai i ke anaina makaikai i hope. E hoopuni ia ana ke kaa alii e kekahi pualikoa Husa, a ua haawi ia he mau leo huro e na makaainana i na alii nana ihoopaiakuli ae i ka lewa.

       Ua hoopiha ia ke alahele o ke kaaahi mawaho aku o Montreal ma na wahi hoolulu a me na hookui na me na poe e ake ana e ike i ka helehelena o na alii.

 

       Ma ke Kinau o ka Poaono nei i huli hoi mai ai o Naholowaa no ke kapitala nahope o kona hoohala ana he ekolu pule ma ka makaikai ana i kona aina hanau o Puna paia ala ika hala a me Hilo Ua Kanilehua.  No 25 makahiki o ke kaawale ana mai ka home mai akahi no a ike hou.

 

NOHO KA AHA KUK MUA A PERESIDENA ROOSEVELT.

       Wasinetone, Sept 20. Mahope o ka hoomaha ana no ekolu la no ka hoike ana aku i na manao kaumaha no ka Peresidena i make, ua wehe hou ia na hana o ke aupuni ma Wasinetona i ka hora 9 o keia kakahiaka.  Ma hora ka 11 ua akoakoa mai la na lala a pau oka Aha Kuhina a noho iho la ma ke pakaukau a lakou i kamaaina mau.  Ua lawe ae o Peresidena Roosevelt i ka noho ma ke poo kahi a kona mua i hala aku la i ka make e noho mau ai. O ka hapanui o na hoa i akoakoa mai he manaoio ko lakou no ka noho ana i ko Roosevelt kau, aka me he mea la nae, e haalele ana ko Kuhina Long maloko o keia mau mahina pokole aku.  He manao kona e noi aku i ka Peresidena e hookuu mai iaia e lawelawe i kana mau hana ponoi.

       He hookahi hora me ka hapa ka noho ana o ka Aha Kuhina, a oia manawa a pau ua hoohala ia maluna o na ninau koikoi a ka Peresidena hou e haawi koke aku ai i na noonoo ana.

 

HALA ME KE ALOHA NUI IA.

       Me ka luuluu a me ka mokumokuahua o ka naau i loaa mai ai ia makou he mauhoike no ke kikoo ana mai la o na lima menemene ole o ka make a lawe palanehe aku la i ke ola makamae mai ka hale kino aku o Mrs Aukai Vessel ma ka La Pule, Sept. 8, 1901.

       He kupa a he kamaaina oia no ka Ua Kanilehua, ahemakuahine i aloha nui ia. Ua haalel iho oia he mau keiki a me na moopuna e paiauma aku ana nona, a o ka nui o kona mau makahiki mawaena no ia oko 70 a me 80.  He wahine aloha aina oiaio oia a hiki i kona hoomaha ana aku la. Me ka ohana i hoonele ia i ka makua ko makou m@u@u pu ana.

 

NUI KA POINO O NA PELEKANE.

              Ladana, Sept. 19. He lono kuikawa kai loaa mai la mai a Haku Kitchener mai Pretoria mai no ka la 18 o Sepatemaba, e hoike mai ana:  Ma ka la 17 o Sepatemaba ua lele kaua malu mai na Boa maluan o ekolu puali helewawae o na Beritania e lawe ana he ekolu pukuniahi malalo o Mekia Gough, ma kahi kokoke i Scheeper Nek. Mahope o kekahi hakaka ana ua hoonawaliwali ia na Beritania me ka lilo ana aku o na pukuniahi ekolu. He 2 alii a me 24 kanaka i make, 5 alii a me 25 kanaka i hoeha ia, 5 alii me 150 kanaka i hopu pio ia. O Mekia Gough i pakele mahunehune mai i ka po, ua hoike mai oia o ka nui o na Boa ma kahi no ia he 1000, a e alakai ia ana e Kenerala Botha.

 

MAKE O KAPENA MAKAI HIKIKOKI

       Ua loaa mai ia he mau hoike ke kulanakauhale nei no ka make ana o Kapena Makai E. N. Hikikoki o Hilo ma ka hora 3 o ka wanaao La Pule nei, mahope o kona kaa maʻi ana no hookahi pule wale no.  Naka mokuahi Kaiulani i hoea mai la ma ka Poakolu nei ilawe mai i keia hoike i kona kaikuaana H. R. Hikikoki a me kona mau hoaaloha he lehulehu wale e noho nei ma keia kulanakauhale.

 

       Ma ke Kinau o ke kakahiaka Poalua nei i haalele iho ai na Komisin Poho Ahi F. J. Testa a me A. N. Kepoikai no Kahului, Maui, no ka hoolohe ana i na koi a ko laila poe.