Ke Aloha Aina, Volume VII, Number 39, 28 September 1901 — Page 1

 

KE ALOHA AINA

 

Make o Peresidena Makinile Iloko o Kona Aloha nuiia

 

Kaumaha ka Lahui Amerika me ke Ao Holookoa Nona.

 

 

            Ma ka hoea ana mai la a ka moku lawekoa Warren mai Kapalakiko mai, ma ka auina la Poalua nei, i loaa mai ai keia mau lono kaumaha o ka haalele ana mai o Peresidena Makinile i keia ola ana, ma Buffalo, Nu Ioka, i ka hora 2:15 a. m. o ka la 14 iho nei, a o keia malalo iho ka moolelo a na nupepa i lawe mai ai.

 

KA MAKE ANA O PERESIDENA MAKINILE

            Milburn House, Buffalo, Sept. 14.  Ua make o Peresidena Makinile ma ka hora 2:15 o keia wanaao.  Ua mauloule oia mai ka hora 7:50 p. m. mai.  O kona hora hope o ka noonoo kanaka ua hoohalaia ia mawaena ona a me kana wahine, ka mea hookahi ana i pulama ai iloko o kona mau la o keia ola ana.  Ua make oia me ke kahunapule ole ma kona aoao, aka, o kana mau huaolelo hope e hoike ana oia i kona mau manao paulele no ke Akua ana i hilinai ai.  Aole oia i hoike mai i kona manao pihoihoi ika wa i halawai ai me ka hopena poino a ka powa i hana aku ai, a me ia kulana oia i waiho ai a hiki i ka lawe palanehe ia ana aku la o kona uhane ola.  Ua himeni ae oia i na huaolelo o ke mele "E pili i ou ia au."  O kana mau huaolelo hope i ku i ke aloha i kona wa e pobala ana i kakau ia e Kauka Mann, oiai, oia e ku ana ma ka aoao o ka mea poino:  "Good by, all; Good by.  It is God ʻ s way.  His will be done."  (Aloha, na mea apau; Aloha.  O ko ke Akua ala keia.  O kona makemake ke hanaia.)

            O kona ohana a me na lala o kona aha kuhina, koe o Kuhina Wilson, na hoea mai lakou i Miliburn Hale, a ua hele aku la e ike i ka Peresidena e waiho maule ana a me na waimaka e kiolo ana mai ko lakou mau lihilihi i ike hope aku ai lakou iaia.

            O ke kumu o ka make ana o ka Peresidena aole ia i maopopo i keia wa, a ua kulike ole hoi ka ike a ua kauka, a me he mea la, o kahe ia aku ana oia no ka huli ana i kona kumu pololei i make ai.

            E hoihoi ia aku ana ke kino make o ka Peresidena no Wasinetona, a malaila e malama ia ai ka hoolewa.

 

NA HIOHIONA EHAEHA MAWAENA O KE KANE ME KA WAHINE.

            Buffalo, Sept. 13.  Mahope kokoke iho o ka hora 8 o keia po ua hookomo ia aku la ka laau hooikaika kino iloko o ka Peresidena, a malalo o kona mana ua hoala ia ae la oia.  I kona pohala ana ae ua hawanawana ae la oia ua maopopo iaia ua kokoke mai kona hopena.  Ua noi ae la oia ua makemake oia e kii ia aku kana wahine, a ua hoouna ia aku la o Mrs Mahinile.  Ua komo mai la oia iloko o ka rumi, aole hoi he mau nanaina hopohopo maluna o ka Peresidena.

            Aole o Mrs. Makinile i hoomaopoo o kona hui hope loa ana keia me kana kane, a hoike mai la ka Peresidena me ka moakaka i kona mau manao aloha no ka wahine ana i haawi ai i na kiai ana me ka pulama ana me ke aloha me na minoaka iki ana ae.  Ua @.  Makinile ma kona@ ka lima o kana@iloko o kona ua@wa ka puuwai i piha@.  No kekahi ma@haaloulou ana na@nana aku la ia@me ka leo nahe pane aku la oia: Ua maopopo no ia E hoopakele ana oe iaia.  Aole e hiki ia ʻ u ke hookuu ak iaia e hele.  Aole e hiki i ka aina ke hookaawale aku iaia.

            Ua pahola hou mai la na hiohiona maule maluna o ka Peresidena, a lawe ia aku la o Mrs. Makinile iwaho e na kauka.  Mawaho ua hoike aku o Mr Milburn ia Mrs. Makinile, aia ka Peresidena ke aneane aku la i kona hopena, a aole hoi oia e ola ana a hiki i ke kakahiaka koe wale no ma ke aloha ana mai oka Mea Mana Loa.  Ua hoomaka koke mai la oia e hoomaopopo i ke kulana ehaeha e kau aku ana maluna ona, me ke kulana ana ihope.  Ua haawi koke ia na kokua ana iaia a hoi hou mai la kona ikaika.

            I ka hora 10 ua kahea hou ia mai la o Mrs. Makinile e hoea aku i ke keena okana kane.  Ua pohala hou ae oia a ike mai la i kana wahine me ka oni mahe ana ae no ka puili ana mai i kona lima, ua namunamu ae la oia me ka hoopuka ana ae: "O ko ke Akua makamake, aole o ko kakou ke hana ia."  A maule hou aku la oia, i ka lawe hou ia ana aku o Mrs. Makinile mai ke koena aku ua maopopo iho la iaia ua kokoke  loa mai na hora o kona kaumaha nui.  Ua emi iho la ko Mrs. Makinile ikaika, a waiho maule aku la ma ka hora 11.  A i ka wa a Peresidena Makinile i hookuu ae ai i kona aho hope aia kana wahine a moe ana ma kekahi rumi e pili pu ana me ka maopopo ole ae ua haalele mai la ka mea a kona puuwai i aloha ai iaia e oho hookahi i keia ao.

 

HOIKE IA ANA O KA NUHOU KAUMAHA IA MRS. MAKINILE.

            Buffalo, Sept. 14 I ka wa o ka make i hoea mai ai me ka palanehe i ka Peresidena, ua moe o Mrs. Makinile, a aole no hoi ana mea i lohe a hiki i ka hora 9 o keia kakahiaka.

            I kona wa i puoho ao ai e noho ana o Kauka Rixey ma ka aoao o kona moe no ke kiai aua iaia, a o ka ninau i waiho ia aku ai.

            Ua hiamoe anei ka Peresidena?  Ae, aka, aia oia ke moe la i ka moe aole ona hopena, oia na olelo walohia i panai ia aku o Kauka Rixey.

            Ua hookupouli koke ia o Mrs. Makinile, me na haawina o ke aloha kane oiaio, a akahi no hoi a mopopo iho la iaia he wahine kanemake oia i keia hoa.  Ua haawiia aku ia na manao hoolauna iaia e kona mau hoaloha.

 

HOIHOI IA KE KINO MAKE NO WASINETONA

            Kapalakiko, Set. 16.  I keia la e hoihoi ia aku ai ke kino make o Peresidena Makinile mai Buffalo aku no Wasinetona, e haalele ana ia laila i ka hora 6:30 o keia kakahiaka, a e hoea ana i ke kapitala ma ka hora 9 o keia po.  Ma ka Poalua e lawe ia aku ai kona kino make i ke kapitala, a malaila e waiho ia ai no ka ike hope ana o ka lehulehu a hiki i ke ahiahi.  A malaila aku oia e lawe ia aku ai no ke kaaahi noka hoihoi ia ana aku i Canton, Ohio, ka home o ka Peresidena, malaila e waiho ia aku ai na hoolala hope ana no kona huakai hoolewa iloko o ka lima o na makaainana ame ka Meia.  Aole he mau hana e ae mawaho ae o ke kaoike ana o na hele e hana ia ana e na kulanakauhale a ke kaaahi me ka huakai hoolewa e kipa ai aku ma kona alahele no Canton, Ohio

E nana ma ka aoao@