Ke Aloha Aina, Volume VII, Number 38, 21 September 1901 — Page 4

KE ALOHA AINA

 

4                      KE ALOHA AINA, POAONO, SEPATEMABA 21, 1901.                      

 

Ke Aloha Aina

Hookumuia no ka

Pomaikai o ka Lehulehu, o ke Nu-

pepa na ka Lahui Hawaii.

 

EDWARD L. LIKE

Lunahooponopono.

HOGAN E. KALUNA

Luna Hoopuka

ALEX NAWAHI

Luna Hoohana.

EMMA A. NAWAHI

Puuku o KE ALOHA AINA.

 

PUKA PULE.

E hoopuka ia ana ma na kakahiaka 
 Poaono a pau.

 

No ka Makahiki.................$2.00

No ka Eono Mahina...........$1.00

No ke Kope Hookahi............. 05

 

 

KEENA HANA.

            Ma alanui Moi, Leleo, Helu 370, Kokoke ma ka Hale Hoolulu Kaaahi Panu Leta 513.

 

HONOLULU.................SEPT. 21, 1901

 

KE KULANA O NA AOAO KALAIAINA

 

            Wahi a Kuokoa o Sept. 13, i hala e ninau ana: "Ma ka aoao hea ana kakou e ku ai i keia kau koho balota ae?" Aohe a makou ahewa i ke hoa ma ia mea, oiai, ua ike no kakou i kona aoao kalaiaina he Repubalika, a malia paha no ko lakou poe no kana e ninau hoomaoe ae la; ua hiki no o kona kuleana no ia. Aka no kakou iho e ka lahui aloha aina; he aoao kalaiaina okoa no ko kakou, a he mea pono no ia kakou e ku iho no iluna o ko kakou kahua kalaiaina ponoi. Aka, mamuli o ka huli ana ae nei o na hoa kakele nei o makou o ka makakila a kipehi ae la i ka Aoao Demokalaka hala ole, i ike ole ia kona hewa a me kona mau kee ma Hawaii nei, eia nae ua pa aku la iaia he elua manu i ka wa hookahi i kana wahi pohaku i nou ai, a pakele ae la no o Kaehula-pi i ua keiki mama nei a Hina. O ka aoao Demokalaka ka Kuokoa i onou mua ae nei imua o ke kahua hakoko o kana mau kalai manao e olelo ana penei.

            O keia aoao ka hoa paio o na Repubalika ma ka aina makua, (oiaio pololei oe, malia paha o ka aoao hookahi ia i koe a na Repubalika e kau mei nei ka weli no keia mua aku) e olelo hou ana penei.

            "Ke huli aku kakou a nana e ike ana kakou i ka nawaliwali maoli o keia aoao" (kuhihewa.) He pepe omaka hoi paha ia a pa iho auanei i ka paakai la, e ua-nii ana kela;anoai paha auanei o like kela me kahi pohuli i kanu ia iloko aku nei o kela mau wahia nahulu helu wale no a ke hele iho la e kokolo ke aa weli ka honua, he maia hoi paha ke kanaka a ka la e hua ai wahi a ka olelo, e olelo hou ana no o ua o Kuokoa penei:

            "Aka, ua ike na kanaka i ka poino o ka uhai ana ia lakou a pela wale aku." Ia wai la kau e olelo nei ia Demokalaka paha? I nahea hoi ka Demokalaka alakai ana i na kanaka a poino? Aole oia i komo iho nei iloko o ku Ahaolelo e alakai hewa ai; aole nana i hoopauaka a hoopuhili na hana o keia Kau Ahaolelo a kakou i ike iho nei ke kau i manao nui ia e loaa ana ka pono me ka pomaikai i ka lahui, ka aina, a me ke aupuni. Aka, o ka poe Repubalika pu no iloko o laila me na Home Rula Repubalika @ i @nae ai a pono ka manaoiana o ka la@ui.

            O laua a elua na aoao kalaiaina i komo i ike ma keia Kau Ahaolelo mua loa o ke teritori mua o Hawaii nei, aole hiki ia Repubalika ke alo ae, ua komo pu laua iloko o ka uwahi o ke kapuahi kuni o ke kau i ike ia ka nui hewahewa o na hoolilo i hana like ia e ia mau aoao no a elua, nona ka huina i hiki aku i ke $95,000 a oi maloko o elima mahina wale no, a ke paa ala ia maloko o ka buke moolelo o ke kau o ka M. H. 1901. O keia kahi pohaku a Kuokoa i hou ae nei ia Demokalaka, aka, pa hewa aku nei nae elua manu, o Home Rula a me Repubalika. Na Demokalaka anei i hookahuli i ke aupuni Moi o Hawaii nei ka mea a ka lahui e mau nei ke aloha iloko o ko lakou mau puuwai? Na ke Demokalaka anei i hoonele i ka lahui i ka pono koho balota ole maloko kekahi mau makahiki loihi i hala ae nei, ma o na kanawai kakauha i kau pale ia me ke ana waiwai kiekie, aia a he mau haneri loaa makahiki a pela aku? Na Demokalaka anei kakou i onou mau aku ia Amerika e lawe aku ia kakou e hoohui me ia, a hui io ana? Na ke Demokalaka anei i puhipuhi iho nei ke Taona Pake i ke ahi kahi o na tausani poe Hawaii e noho ana a hoopilikia ia ko lakou mau wahi poono kino a lilo i poe ilihune hoopili wale i keia la? I nele iho la anei ke aupuni i ke dala ole ia Demokalaka nana i ao aku i na Home Rula i ka po o ka la 29 o Aperila e pau lakou i ka holo iwaho o ka Hale Ahaolelo i holo ole ka bila aie miliona e loaa ai ke dala o ke aupuni? Na Demokolaka anei i hana iho la a ku ke ahua hana ka haawe o na pilikia a ka lahui e auamo aku ai ma keia hope. Nawai ia mau hana hoopoiho a pau i ka lahui ma Hawaii nei? Aole na ke Demokalaka, aka, na Repubalika ma no. Mai lawe wale mai kakou i na kee o na Demokalaka o Amerika a kakou i ike maka ole ai a hoohalike ae pela ma Hawaii nei. Ina he poe Demokalaka ka poe hana ino Negero ma Amerika, alaila owai hoi ka poe nana kakou i hana lokoino ma Hawaii nei, a hookahuli i ke aupuni o ka poe Hawaii, a kiloi i ko lakou Moiwahine mai luna aku o kona noho kalaunu, a kaili i ka aina o ka poe Hawaii. Na ka poe Repubalika no i hana maoli ia mau hana me Kuhina Stevens ma. Aole hiki ia Kuokoa ke hoole iho. Aka, aohe hoi paha oia, ua hala ia; aohe no nae he apono i ke ano oia mau hana i hana ia mai ai maluna o kakou. He mau miliona ka nui o ka lahui Amerika, ua lohe aku nei n ei kakou ua pau loa ae la lakou i ka huliamahi i hookahi wale no o lakou aoao kulalaina ke Repubalika, aole. Ina kakou e hoomaopopo aku, aia iloko o ka Ahaolelo Nui o Amerika Huipuia i keia wa, he ekilu haneri poe Lunamakaainana a oi, aole no nae i lilo ka elua hapakolu oia Hale na Repubalika aka, he mau wahi heluna uuku wale no ko lakou oi aku imua o na Demokalaka.

            Ma a Hale hoi o na Senatoa he kanaiwa paha ku lakou nui, aole no i piha ko lakou elua hapakolu. Nolaila, aole o ko lakou emi ana malalo o ka heluna o na Repubalika, a i ole o o lakou nele ana aohe i komo ka Peresidena o ko lakou aoao Demokalaka iloko o keia kau; he mea ia na ia aoao kalaiaina lahui e paupauaho ai a haawi pio wale. No kekahi mau makahiki loihi ka lanakila ole ana o ka aoao Demokalaka ma Amerika, aka, ua hoomanawanui no nae lakou me ka hooikaika mau ana, aole i hoopio i ko lakou manaolana a hiki wale i ka piha ana o na makahiki he iwakaloa a oi, akahi no a lanakila hou ma o ka puka ana ae o Kalivalana i Peresidena, pela no kakou ma Hawaii nei. No kekahi mau makahiki loihi i aneane umi ko kakou noho pio ana a hoomanawanui ana me ke kupaa, aole hoi i haawi pio wale ia kakou malalo o na poe Repubalika o kakou a he aha ka mea i ike ia.

            Ua komo lanakila iho la ka aoao lahui iloko o ka Hale kaukanawai ma keia kau o 1901. A nowai ka hewa i holopono ole ai na hana ma keia kau, no kakou no a me ka poe a kakou i koho aku ai. Aole o ka holopono ole ana o na hana i hana ia iho nei e lakou a me ko lakou ike he Kiaaina Repubalika ko kakou e noho hoomalu mai nei, alaila, he mea ia nno kakou ka lahui e haawi pio wale ai, a hoolilo i poe Repubalika wale no kakou a haalele ko kakou aoao kalalaina ko ka lahui. E hoohalike anei kakou ia kakou iho me he poe puaa ala e nana wale aku ana i ka a mai o ka imu, me ka maopopo ole no lakou no ia imua e kalua ia aku ai. E noho hamau wale no anei kakou e nana i na mea e hana ia mai ana maluna o kakou me ka puai leo ole ae.

            O ka makou wale no e ao mau aku nei ia kakou, e hoomau i ke kupaa a me ka lokahi, e lanakila hou no auanei ka aoao lahui ma keia Kau ae. Aka, e hoaokanaka nae e na hoa a mai "ohi hapuku hou i ka i'a o Kapaau." E ku ana KE ALOHA AINA me ka makaukau e kuhikuhi ia oukou i ka aoao kalaiaina kupono no kakou ka lahui, me kona iini nui i hana maoli ia ka pono no kakou a me ka kakou mau keiki aku ma keia Kau e hiki hou mai ana i nana ia hoi ka pono o na poe ilihune. Ua ike maka kakou i na mea i hana ia iho nei e kahi poe o kakou. Aohe pomaikai i loaa i ka lahui, a mai hoolohe i na ao a ke Kuokoa, he aoao okoa no kona, waiho malie iaia pela.

 

            He nui na hoao aihue e lawelawe ia nei ma ke alanui Young a he nui hoi na olepelepe puka aniani i pau i ka weheia e ke kolohe.

            O Makinile ka ekolu o na Peresidena o Amerika Huipuia i kipu ia. O ka mua o Abarahama Linekona i ka 1865, G@fila i ka 1881, a o Makini@e iho ia.

            Ma ka Ventura i huli hoi mai ai o Anthony Ahlo, kekahi opio Hawaii i holo aku i Pelekane e hoomahuahua i kona naauao, ua mare oia malaila i kekahi ui o ua aina kaulana a hoihoi pu mai la i ka home nei ma kona huli hoi ana mai la.

 

HE LETA MAI KA AINA MAMAO MAI.

 

            Ke unuhi aku nei makou i ka leta malalo iho nei i loaa mai nei mai a "Wahiikaahuula" mai, ka ui hiapo a ka Ona Miliona e hele ia i ke kaapuni honua.

            Hotel Victoria,

                        Lucerne, Switzerland,

                                                Augate 28, 1901.

Dear Aunty Aima,

                                                                                    Aloha oe:--

            Eia au ke kakau aku nei ia oe ma kahi he mau tausani mile ka mamao ma ia oe mai a me ko'u mau hoaloha a pau, me ka iini nui no nae o ko'u puuwai e hoi aku no i Hawaii. Ke ike nai makou i na mea like ole he nui ma keia kaahele ana maloko o neia mau mahina eha i hala iho la. Ua hiki makou i Pelekane, Farani, Switzerland, Italia, Auseturia, Geremania, a ua hoi hou mai la makou i Lokowai Lucerne ma Switzerland nei. Ua nui ko'u hauoli i ka ike ana i kekahi  mau wahi nani like ole a me na lahui like ole, aka, aole no nae e hiki ke hoohalike ae me Hawaii. Ke manao nei au no ka nui maoli no paha o ko'u aloha ia laila oia paha keia mea i hoole ai a lilo na mea nani o keia mau wahi a pau i ko'u manao i mea ole.

            He maikai makou a pau a koe o mama, oia ko makou mea omaimai. E kaahele makaikai iki ana makou i keia wahi, alaila, mai anei aku no Geremania e ike ia Aunty Helen a me o'u mau hoahanau malaila. E haalele iho ana makou ia Bremen ma ka 15 o Okatoba ma ka mokuahi "German Loyd Kronprinz Wilhelm," kekahi o na mokuahi nani loa.

            Ma ko makou ala e huli hoi aku ai i ka home, e kipa ae ana makou e makaikai i kahi hoikeike ma Buffalo a hiki loa aku i ka home i ka wa o ke Karikimaka.

            Ma na wahi a pau a makou i kaahele ai, manao au, o ka'u wahi nani i mahalo ai oia no o Roma a me Venice ma Italia. O Roma, he wahi kaulana loa ia i piha me na moolelo like ole. He wahi nani o Venice ma na manawa ahiahi i ka wa e napoo aku ai o ka la. E hoomaopopo oe aohe o lakou mau alanui aupuni e hele ai, aka, o ko lakou alanui maloko wale no o ka wai na mea a pau e hana ia ai. A o ke ano waapa i hana ia o ko lakou alanui ia he nani a he oluolu maoli no ka noho ana iho, a hoe ia aku iwaho ma ke alawai i na wa ahiahi e hoolohe ai i ka leo hone o na mea kani. Maanei, hu mai la ko'u aloha no ka home, i ka lohe aku i keia mau mea kani a me ka leo mele o na poe himeni, a hoomanao ae la i ka aina hanau aohe no e loaa aku ka hoene ame ka hoalohaloha o ka leo o na keiki Hawaii o kakou.

            E Aunty, e kakau mai a e hahai mai i na mea hou o ka aina; a i kakau mai oe e hoouna mai i ka'u leta penei:

            Miss A. W. Campbell,

                        Hotel Netherland,

                                                New York,

                                                            U. S. A.

No ka mea, e hiki ana makou ilaila i ka wa. o kau leta e loaa mai ai. Ke haawi aku nei o mama a me makou a pau i ke aloha nui ia oe a me Aunty Aoe, a me na hoaloha no a pau, me oe iho ka nui oia haawina.

            Kau no me ke aloha,

Abbie Wahiikaahuula Campbell.

 

            Ke manao nei na makai, me he mea la, na Bila Kamaa Ole no keia mau aihue makau ole, e lawelawe nei.