Ke Aloha Aina, Volume VII, Number 36, 7 September 1901 — Page 7

KE ALOHA AINA

 

KE ALOHA AINA    POAONO, SEPATEMABA 7, 1901.            7

 

MOOLELO HOONI PUUWAI

-:NO KE:-

KAKELA LANAFODA

-:KA:-

Ipuka o ke Kuewa me ka Aea.

-:KA:-

Pua Lilia Ahiu o Sanadela.

 

MOKUNA II.

KA @ MARE O KE KULUAUMOE-

IMUA O KA INAINA O KA HAKU-

KE KUEWA MA LANAFODA KAKELA.

 

            Aole io no he mea nana e kue i kau mau kauoha, aka, o kou hoao ana e kipaku i kuu wahine imua ponoi o ko'u mau maka me na olelo nuku e ka hoino, oia ka hao kupee nana e punuku ia oe malalo o ka'u kauoha hoopokele o ke kue, a ke hoolohe ole oe, alaila, ua makaukau ko'u mau lima e hooko i ka hana menem@ne ole. Ano, e pane mai i ka'u mau ninau a na ko lakou haina e hoopuka i ka olelo hooholo, wahi a ka Haku Opio.

            Alaila, heaha ia mau ninau hookiekie @ o kahi keiki hehena? i pane hookano mai ai ka Haku aoo.

            Aole anei ke kanawai o Beritania nei e hoike a e olelo ana a hiki aku i ka iwakalua kumamakahi o na makahiki ua loaa iho la i na hooilina a me na keiki ke kuokoa e lawelawe a e hooko i ko lakou mau waiwai me ke keakea ole ia?

            He kanawai no e ku a e paa nei oia ano, alaila i ke aha la, heaha ke kuleana oia kanawai i ka'u mea e kauoha nei?

            Alaila, ina he kanawai kekahi oia ano, alaila, aole anei i keia hora ane, ua loaa ia'u kela pono kaokoa keakea ole ia?

            Pono kaokoa keakea ole ia! Heaha ia pono au e lawelawe aku ai ke ole mai ia'u aku e loaa ai kau. O he keiki hehena a pupule ia oe. Mamuli o keia mau hana hookiekie au, ua nele oe i ka pono.

            Wela, ina ua loaa ia'u kela pono kaokoa, alaila, i nehinei iho la i piha ai ko'u mau makahiki, a o ka'u i hooko ai i ka hanohano o ua pono ala i loaa ia'u, oia no ko'u mare ana i ka wahine. Ua maopopo ia'u he piha hookano oe a me ka haakei, a he hoowahawaha hoi me ka haaheo, a ma ia ano haawi i loaa ia oe, ua ike mua au e kue io mai ana oe. Nolaila, i keia hora he kanaka lanakila au mai ko'u noho paahao ana no na makahiki loihi i hala, alaila, ina ua loaa ia'u ka lanakila i keia la, alaila, no ke aha hoi e loaa ole ai ia'u ka hauoli ana. Ma ko'u ano he hooilina no Lanafoda Kakela nei ke koi nei au ua kuleana ole kau mau koi huhu o ka nuku.

            Alaila, e makemake ana oe i waiwai ea? Aole loa e loaa ia mea ia oe. I keia hora ano, ua holoi a hoopau ia kou inoa hooilina no ke Kakela Lanafoda a me kona mau waiwai a pau, a e noho oe ma ke ano Haku Welemoneka wale iho iloko o ka hune a me ka nele, a e kuewa a e aea ana hoi maluna o ka ilihonua. O kou nele a pau ana me ka inoa hooilina no Lanafoda, pela no hoi e pau ai kou noho ana malalo o kona malumalu. Ano, i keia wa haalele mai ia Lanafoda nei a mai hoike hou mai i kou mau helehelena imua o ko'u alo. Aohe pilikia, aohe nele e loaa na kokua ana mai ia'u aku. O ka pono kaokoa i loaa i@ oe, oia kela wahi kaikamahine @a@ holoholona aia iaia kou paulele a me kou hilinai ana, wahi a ka Haku aoo me ka haakei.

            No ke aha e lawe pu ole aku ai oe me ka inoa Haku Welemoneka, ua lawa au me ka inoa aea a me ke kuewa, a na ka ilihune e hoopomaikai mai ia'u, a e hoomanao, mai kapa hou mai i ka inoa maemae o ka'u wahine he kaikamahine hanai holoholona, no ka mea, e hooko aku ana ke kuewa a me ka aea o Lanafoda i kana hoohiki no ka hoopai ana aku ia oe ke ole oe e punuku i kou mau lehelehe, alaila, huli ae la ua Haku Opio nei me ka huhu a komo no kona keena no ka hoomakaukau ana ia laua malalo o kela kauoha kipaku.

            O ka hui hou ana ae o ke kane a me ka wahine a hoike i na mea e pili ana ia laua iho, ua hoike mai na helehelena o ka Pua Lilia Ahiu i ka haikea a me ke keokeo pu, a o na huaolelo a ua Pua Lilia ala i puili ae ai i ka ai o kana kane a kamailio.-Owau ka ipuka nana i wehe ae o Lanafoda nei e kipaku ia ai oe iloko o ke kuewa a me ka aea.

            Aole loa pela e kuu aloha, owau ponoi no ka ipuka o Lanafoda nei nana i kipaku a hookuke mai ia'u iloko o ke kuewa a me ka aea a e hoomanao e kuu aloha, ma kahi a'u e kuewa a e aea ai o oe pu auanei kekahi a na ka lepo honua e haawi mai ia kakua i na pomaikai.

            He mau minute pokole mahope iho aia ua mau Haku opio ala ua makaukau no ka hooko ana aku i kela kauoha kipaku a ka Haku Lanafoda. He aahu naita ko ka Haku Opio e komo ana, a o ka Pua Lilia Ahiu o Sanadela he lole hololio kona. E lewalewa ana ka pahikaua a ka Haku Opio ma kona aoao hema, ma kona mau kamaa buti e paa ana na sepa dala, a ma kona lima akau e kuikui ana ia i ka haku wahine opio o Lanafoda o na hora pokole wale no.

            Me keia kulana o ua mau paa mare opio nei o ke kuluaumoe, haalele iho la laua i ka rumi o ka Haku Opio a puka aku la no waho o ka rumi hookipa, kahi a ka Haku Lanafoda e ku hookano mai ana me kona mau lima e pea kua ana, a maluna o ka noho paipai e pili kokoke aku ana i ka puka e hemo aku ai iwaho o ka lanai, e noho ana ka Haku wahine aoo a uwe me ka ehaeha nui no kana keiki e haalele mai ana, a hoolilo iaia iho i kuewa a i aea no keia ilihonua akea.

            Kuu keiki! Kuu keiki! Ka hua hookahi wale iho no o kuu mau la opio, e haalele mai ana ka oe ia'u.

            O keia ka leo uwe kapalili o ua Haku wahine aoo ala o Lanafoda @ hea ae ai iloko o kona ehaeha nui, a o ka pane aloha a kana keiki i haawi iho ai me ka leo kaumaha o ka luuluu: Ae-e kuu makuahine aloha. E haalele ana au ia oe no ka wa mau loa, a i mea e hoonani ia ai o ka inoa o Lanafoda e ae mai ia'u e kuu mama e hoike aku, owau no ke ola hou ana o Lanafoda ka ipuka hoi o ke ola a me ka oiaio iloko ona a ia'u hoi e hele nei iloko o ke ao akea, ke lawe pu nei au i ua ola ala iloko ona. E pouli ana ka la o Lanafoda a o ka malamalama o kona mau paia, e pio no ia iloko o ka poeleele. Ano, e adiu anei e kuu makuahine.

            Alaila, me ke aloha makua oiaio, kulou iho la ia ilalo a honi maluna o kona makuahine, oiai, ua haku wahine aoo ala ua puili ae i @ @ o kana keiki a hookuu hou mai la i kona mau waimaka ehaeha me ka leo ka ua e aua ana i kana keiki aole e haalele aku iaia, a o ka pane hope o ke oolea a ua keiki nei i haawi aku ai oia no keia:

            Aole loa e kuu makuahine aloha. O ka hoopai weliweli o ke kipaku i sila ia maluna o'u, ua lawa ia @a'u e ku hou ole iho ai maluna o Lanafoda nei a hoolohe i hookahi @kona ua akea ka honua no'u e hakoko ai me kona mau popilikia a pau, a ke hoopaa nei au i ka'u hoohiki, maluna o ko'u he hoomanao e hakoko ai au no ka hanohano o kuu inoa a'u e kiola a e haalele nei mahope.

            Alaila, me ka oiwi kino pololei a haaheo, huli ae la ua Haku Opio nei me kana wahine e kuikui ana a puka aku la iwaho. Ua poha kapalili hou ae ka leo uwe o ka Haku wahine aoo a alualu mai la mahope o kana keiki me na huaolelo kaukau e helu ana, aka, heaha ia mau leo uwe helu o ke aloha i ka Haku Opio ua paakiki kona naau, a o kona puuwai ua puanuanu, a aole loa hoi i hoolohe ia aku kela mau leo uwe aloha.

            A ike kela haku wahine aoo, ua maliu ole ia kana mau uwalo ana, ua kahea hope mai la ia i kana keiki. E kuu Haku Welemoneka ina aole oe i maliu mai i ka'u mau uwalo ana aku, alaila, i hookahi noi ana a kou makuahine ehaeha i koe, a e ae mai e lawe aku ia mea, no ka mea, o ka puuwai ia a me ka hooilina hope o ke aloha o kou makuahine au e haalele iho ana me ka lokoino e noho iloko o ke kanikau a me ka luuluu ana hou. Ano e kuu haku, kuu keiki e maliu mai ana anei oe i keia leo noi hope?

            Ua huli hope mai ua Haku Opio nei o Lanafoda a nana mai la maluna o kona makuahine me na maka aloha e hoike ana ua piha kona puuwai a me kona kino holookoa me ke aloha nona, aka, ua hiki ole nae i ua aloha ala ona ke uhaki a ke kue aku i ka mana o kela kauoha kipaku a kona makuakane piha hookano a me ka haakei.

            I ua Haku Opio nei i huli mai ai a nana maluna o kona makuahine, ia wa ua haku wahine aoo nei i unuhi ae ai mailoko ae o kona poli he puolo a haawi mai la i kana keiki me ka pane pu ana mai. O ke aloha hope keia o kou makuahine a hui hou aku kaua i kela ao lani. Ano e lawe aku e kuu keiki a na ke Akua e hoopomaikai ia oe. Adiu, adiu.

            Ua lalau aku ka Haku Opio i kela puolo a hookomo iloko o kona poli, me ka hopu hou ana aku i ka lima o kona makuahine, hapai ae la ia iluna o kona mau lehelehe a honi iho la me ka leha ana ae iluna a namunamu ae la i keia mau olelo: Haawi mai ia'u i ka ikaika e kuu Akua no ka hakoko ana no ka hanohano o kuu makuahine aloha, a i ka wiwo ole hoi i kuu naau no ka paulele a hilinai ana i ka mea a'u i aloha ai iwaena o na wahine.

            Ua hookuu aku oia i ka lima o kona makuahine me ka leo hope o ke aloha: Adiu my mother darling adiu.

            Mai keia mau olelo ae a ua Haku Opio ala i hoopuka a kamailio ae ai kahea ae la oia i kekahi o na kauwa no ka hele ana aku e hai i ke kahu lio ua makemake oia ia Prince a me Duke kona mau lio punahele e hana ia mai me ka awiwi a e kau ia hoi ka noho o kona makuahine maluna o Duke.

            O keia leo kauoha a ua Haku Opio nei, ua lohe ia mai la ia e kona makuakane ka Haku aoo o Lanafoda, a oia ka ua haku huhu nei i kahea mai ai me ka leo nui okalakala o ka hoohilahila. Owai ka mea nana i kauoha ia oe e kela keiki lapuwale e haawi aku i kekahi leo kauoha maluna o na kauwa o ke Kakela Lanafoda nei? Aole anei oe he kanaka opio hehena i kipaku a hoonele ia aku me na pono a pau haalele mai ia Lanafoda nei me ka awiwi, a i makemake oe i kou mau lio, hele no kou mau lima e hana, a ike kou mau maka me ka hoohewahewa ole aole loa o Lanafoda nei he wahi e hana a e hooko ana i ka makemake o na kanaka elike me kou ke ano. O kou kue ana mai ia'u i kou makuakane, pela no o Lanafoda e hoopoina a e hoohewahewa ai ia oe, a o kau mau kauoha a pau aole loa he mea nana e hooko.

-

            Ma ka Poaono nei i hoea mai ai ka mokuahi Colon me na limahana Porto Rico @ no na mahiko.