Ke Aloha Aina, Volume VII, Number 35, 31 ʻAukake 1901 — Page 1

KE ALOHA AINA

 

HOOKUMUIA I MEI 20, 1895

 

BUKE VII.                 HONOLULU, POAONO, AUGATE 31, 1901.                   HELU 35

 

KE KEIKIALII KALANI.

ANAOLE NO NU KILANI

_______

 

            Maka hoea ana mai nei a ka mokuahi Ventura mai na Panalaau mai o ka Hema ma ka Poalua nei, na lawe mai la oia he hoike no ke kau aua mai o ke Keikialii Kalanianaole me kana lede mai Sidane, Auseturalia mai a lele aku la ma Aukelana, Nu Kilani.  O ka manao o ke Keikialii e huli hoi mai ana laua maluna o ka mokuahi Sierra a i ole ma ke Sonoma, aka, ina aole laua e kau mai ana ma kahi oia mau moku, alaila, ua hala aku la laua no Tahiti, a malaila ae no Kapalakiko a huli hoi loa mai no ka aina hanau nei, mahope hoi o ka puni pono ana o keia poepoe honua i ka hele ia e ua pua alii nei o Hawaii.

            Ua hoeau pu mai la maluna o ka mokua@i Ventura he elima mau paha I piha i na holoholona me na manu like ole mai ua alii mai la ma ke ano he mau mea hoonani no ko laua home me kona hanau mua ke Keikialii Kawananakoa.  Eia keia mau holoholona iloko o na pulama ana a kona hanau mua, a he manaolana ko ke Keikialii Kawananakoa aole wale no keia o na pahu holoholona a kona pokii e hoihoi mai ana mai ka aina malihini mai, aka, eia hou aku no a hoea mai.

            Ma keia mau hoike oiaio i loaa mai la maluna o ka Ventura i hookaawale aku i na manao kuhihewa o kekahi poe o ke kulanakauhale nei, aia no o Kalanianaole ma Aferika Hema kahi i e@i daiman@ ai.

_______

 

NA KE ALOHA O KE KEIKI I KONO

MAI E NAUE I KA AINA MALIHINI

_______

 

            He mau tausani mile i alo ia mai e kekahi wahine nona ka inoa o Mrs. Marr no ka huli ana i kana mea aloha, he keiki, i lawe aihueia mai e kana kane, a ma ka Poaha nei akahi no a kaawale aku na haawe kaumaha mai iaia aku, no ka mea, ua loaa iho la ka mea a kona puuwai e huli pauaho ole nei no eha mahina ma ke@a kulanakauhale.  A penei ka moolelo e pili ana i keia aihue keiki:

            He ekolu makahiki i hala aku la e noho ana o Walter Marr me kana wahine iloko o kahi taona o Falls River, Masekuseta me ka hauoli, a mai ko laua puhaka ua oili mai la he keikikane.  He maikai ko laua noho ana a hiki i ka wa i ulu wai ai o kekahi mokuahana iwaena o laua, ua hooholo iho la laua e kookaawale i ko lana noho hou ana aku he kane a wahine, nolaila, ua hele aku la o Marr no Nu Ioka, ma ka haalele ana iho i kana wahine ame ka laua keiki e noho i ka home.  Aole he mea i lohe ia no Walter Marr a hiki i ka wa i loaa mai ai he leta i kana wahine he eha ae nei mahina e noi mai ana iaia e ae ia aku oia e kipa mai e ike i ka laua keiki.  Ua pane aku kana wahine ma ka leta e ae aku ana i kona kipa hou ana mai e ike ia laua ma kahi hoolulu kaaahi.  Ua hoea mai la ka la i hooholo like ia a ua hoea mai la o Mr. Marr, a ua malama ia he aoaiua ike maikai mawaena o lakou, a hoi aku la lakou no ka home ana i haalele iho ai.  Ma ia auina la no ua noi aku la kana kane iaia e ae ia mai oia @ @ keiki no kahi o na @upuna e ike ai a ua ae aku la kana wahine.

            A ma ia la i ka@ wa@ @ i ai ke keiki mai kona alo mai, @ @kah@ no oia a halawai hou @ i@ i keia aina malihini.  He elua @uahina ae nei i hala ka hoea ana mai o Walter Marr me ke keiki i Honolulu nei, a aia hoi oia ma ka halekuai bipi o Wala ma e hana nei.  A i kona wa e hele ai i ka hana e waiho ana oia i ke keiki malalo o ka malama ana a na kumu o ka Home Kakela, e pili pu nei me Kawaiahao, a i ka wa e pau ai kana hana i ke ahiahi e kii aku ana no oia a hoihoi aku i ko lana home ma Langton House.

            Mahope o eha mahina o ka huli hoomaha ole ana o Mrs. Marr, ua loaa iho la he meheu e hoike ana ua hala mai la laua no Honolulu nei ma ka mahina aku nei o Iune.  I kona wa i lohe ai ua haalele koke aku la oia a me kona makuakane J. E. Estes, he ona no kekahi hale hana o Falls River, i ko laua home, a hoea mai i Kapalakiko a kau mai la maluna o ka mokuahi Sonoma a hiki loa mai la ianei ma ka Poakolu nei, a noho ma ka Hotele Hawaii.

            Aole i maopopo iki ia Marreia kana wahine ame kona makuahonowai i Honolulu nei, ua hoomaka koke aku no na malihini i ka huli ana i na moali o kahi o ke keiki e noho nei, a ma ke kakahiaka Poaha nei i ka wa i hala mai ai o Marr i ka hana ua hoea aku la ka wahine i Kakela Home a huipu aku la me kana lei aloha.  Ua hoohikilele ia o Marr i ka lohe ana aia ma ka poli o kana wahine ke keiki i keia wa.  E hoolohe ia ana ka mea kuleana o laua i ke keiki imua o ka Aha Hookolokolo maanei.

_______

 

            O ka Elele Wilikoki kekahi e hooikaika loa nei e loaa he mau @ualikoa kumau iwaena o na Hawaii, a ina e makemake e hoouna i pualikoa i Manila aole e luhi o Amerika e hoouna mai i pualikoa mailaila mai.  O ke hua ke@a a ka hoohuiaina ke hookokoke mai la.

 

_______

 

I NA MAKAAINANA ALOHA ALII OIAIO.  E ALA.  E EU.

_______

 

E hoike i ko  kakou aloha oiaio no ko kakou Makuahine Alii ma ka hele ana aku e ike Iaia ma Kona la hanau e malamaia ana ma keia Poakahi ae Sepatemaba 2, mai ka hora 12 a ka hora 1 p.m.  Hookahi hora wale no ka wa e komo ai e ike a lulu lima pu Meia.  He ike alii nui keia e haawi ia ana no ka lehulehu mai na kamaaina a na malihini mai ka poe kiekie a ka poe haahaa, mai ka poe waiwai a k@ poe ilihune, no na haole a me kakou na Hawaii ponoi.  O ka iini nui o ko kakou Moiwahine aloha o Kona ike mai ia kakou Kona poe makaainana ponoi e hele aku ana e ike Iaia.

O ka mua loa paha keia a me ka hope o ka wehe akea ia ana o kekahi “Ike Alii Hanohano” imua o ka lehulehu e like me keia.  Nolaila, ke kono akea ia nei oukou e hele, aohe mea e hilahila ai, mai kuemi hope, mai pipika hele wale ae no mawaho o ke ala nui me ka olelo iho, he makemake aku la no hoi keia e hele e ike alii, o ka hilahila aku la hoi i ka pihia mai e nana ia mai ai e ka haole.

Auwe! e kapae loa aku ia mau noonoo o na wa i hala, aka, e ku ae oe e ka Hawaii ponoi a maloeloe komo pololei aku no ma ka puka pa o Wa@inekona, mai hopohopo, aohe au mea e kaukaulua iho ai, nou ia Haku, @au ia alii, a nou ia Moiwahine i aloha nui ia o Liliuokalani.

 

O Kamakaeha ia o Liliu o Loloku.

O walania i ke kii onohi,

O ka onohi o Kalani Nui,

O Kekahiwauli o ka onohi lani,

O ka onohi e kokoni aku ai o ka eha,

E loku ai o ka maka i ka puukai,

O ka maka i ka onohi kau i ka lani,

O ka alawa i ka haku onohi o Lono.

Haku iki onohi paa o Namahana i ka lani,

O ka maka ia i hea ia ai i kapa ia ai,

                        He inoa--e--

            O-I-A HAELE-A-KAKOU E IKE IA KALANI.