Ke Aloha Aina, Volume VII, Number 34, 24 August 1901 — Page 5

KE ALOHA AINA

 

PAU KA HALEKAA STOCKYARD I KE AHI

 

            Ma ka hora 1:45 o keia wanao na oili ae la he pauahi weliweli ma ka hale kaa a me lio i kapaia ke Stockyard e ku nei ma ke kihi o na alanui Hema a me Moi, a iloko o na minute pokole wale no aia hoi ua lilo iho la ua hale la i mea ole.

            O kahi a ke ahi i hoomaka mai ai e a mahope mai no ia o ka hale, a i ka wa i loaa mai ai o kahi e hoahu ia ai o ka mauu ai a na holoholona oia koke no ka wa i holapu ae ai ke ahi me ka ikaika. O na lio i lawe ia mai no ka hookomo ana aku iloko o na kaa lawe palaoa o lakou wale no kai puka pono mai me ka poino ole.

            Aole he nui o na kanaka maloko o ka halekaa i keia wa, a ua hoomaka koke ia ka hoopakele ana i na kaa, aka, he kakaikahi i hemo mai mamua o ka hoea ana mai o na alelo o ke ahi no mua o ka hale. Ua holo koke mai he makai no ka hale kinaiahi a iloko o ka wa pokole ua hoea aku aku la ua kaa kinaiahi malaila, aka, ua hala nae ka wa kupono no ka hoopakele ana i ka hale.

            Ua mauaoia ma kahi he 200 lio maloko o ka hale lio i ka wa a pau iho la i ke ahi, aka, he kakaikahi nae o lakou i pakele mai. O na lio ma ka hale mahope o kekahi hapa o lakou kai pakele, aka, o na lio iloko ponoi mai o ka hale aohe ahailono no lakou, a he mau kino mainoino hoi ko lakou e waiho ana ma ke kakahiaka ana ae. O na poe e noho kokoke ana ma keia hale kaa ua hoohikilele ia ae lakou mai ko lakou mau wahi moe a hoohiki hiki aku la i ko lakou mau ukana no waho o ke alanui me na pahu lole a me na pahu lole, a maluna o ko lakou mau helehelena e hoike mai ana ia i na nanaina o ke pihoihoi. O ka poe mauka pono o ke Stockyard he hookahi mea mai iwaena o lakou i lawe ia aku i ka halekule o Kawaiahao e waiho ai i ka wa a ke ahi e a ana. He kookahi wahine i hoea aku i ka makaikai panahi i maule.

            Ua loihi ka a ana a ke ahi a ua hoea aku kona malamalama i na paialewa mamua o ke kani ana mai o ke oeoe pauahi e hoike ana aia he ahi ma ke kihi o na alanui Hema a me Moi, a iloko o na minute pokole aia hoi he kaoo o na kanaka e holomoku ana ia mau minute poniponi o ka wanaao no kahi o ke ahi ma na alanui like ole o ke kulanakauhale. O kekahi poe kane iloko o ko lakou mau pale ili a o kekahi poe wahine hoi me na muumuu no, o na haole, kanaka, Ipana, Pake, a me na lahui e ae, a pihau aku la ke kahua pauahi i na poe makaikai i na hana weliweli a ke ahi e lalama ana iluna o na pou telepona a me ka halekaa.

            O ka nui o na poho o keia hui halekaa a me na lio ua manao ia ua hoea aku no ia ma kahi o $100,000 a he uuku loa ka mea i inisua ia. O ka hale hou e kukulu ia nei mauka iho o ka Stockyard ma ke alanui Moi ua pau ka aoao e pili pu ana me ka aoao o ka halekaa a koe lihi aku la kekahi aoao.

            O ka halekuai ma Ewa aku nei o ke Stockyard ua papaa piliahi ka aoao e haliu pono aku ana i ke alanui Hema, a no kekahi manawa ua manaoia aole oia e palekana ana, aka, malalo o ka hooikaika ana a ka oihana kinaiahi ua pakele mai la oia. O ka elua keia o na pauahi nui i ike ia iloko o keia mahina.

            Ha ku i ka menemene na kino make o na lio e ahu mokaki mai ana iloko o na puu opala. O keia mau lio a pau aole wale no ia no keia hui Stockyard, aka, he mau lio kekahi i waiho ia aku malaila no ka malama ia ena, a pela pu hoi me na kaa. He pee kalaiwa kaapio no lakou ponoi no ko lakou mau lio a me ke kaa kekahi i hoopoino ia, a o kekahi nae o lakou ua pakele mai ka lio a poino aku la ke kaa, a o kahi ua pakele mai ke kaa a make aku ka lio, a o kahi poe hoi na poino pu ka lio me ke kaa.

            Ua ike ia na helehelena kaumaha maluna o keia mau kalaiwa kaapio Hawaii a me Iapana no ka mea, o ka hana wale iho la no ia e ola ai o ka @, na kuai aku lakou i mau kaa ponoi no lakou mahope o ka hoiliili ana i ka lakou mau wahi loaa nuku no kekahi wa loihi, a aole i hoi mai ka lilo a halawai koke iho la me keia @ poino.

            He mau lio a me na kaa kekahi o malama ia ana e ua halekaa la no na halekuai o ke kaona nei i komo pu aku hoi iloko o keia poino. Iwaena o kekahi mau lio i pakele mahunehune mai mai keia pauahi mai na kipu ia aku lakou, no ka mea, na ikeia aole lakou e ola ana, a o na wela ahi e kau ana maluna o lakou ua lawa ia mau hiohiona mainoino e lawe koke ia aku ai ko lakou mau ola e ka mana o ka pu panapana. He nui na lio i kipu ia, a o na lio i malani iki mai ko lakou mau palapu ua haawi ia aku ia iloko o ka lapaau ana a na kauka lio o ke kulanakauhale nei.

            O ke kumu o keia ahi i hoea mai ai he mea pohihihi no ke huli ia aku, aka, ma ke koho ana a kekahi poe, me he mea la, he mau hana keia na ke kolohe, ma ka po Poalima o ka pule aku nei i hala ua ike ia he ahi e a ana ma ka hale e pili pu ana me ka Stockyard, i ka holo ia ana aku e hoopio na ike ia iho la mai kekahi lole wawae i hoomaka mai ai keia ahi, a ua pio koke no hoi oia mamua o ka palahalaha loa ana aku. Aka, ma keia hoao hou ana a ka opu lokoino ua hooko ia iho la kona iinii. Aole nae he mea i hopu ia a hiki i keia wa.

 

            Ua hapa ae ka hae o na keena kanikeia a pau ma ka Poaono nei no ka make ana mai la o ka Emepera Wahine Frederick o Geremania.

            Ua makemake ia na lala a pau o ka Hui Pena a me Hoohiwahiwa o Hawaii nei e akoakoa ae ma ko lakou hale halawai i keia Poakahi ae, Aug. 26, no ka hooponopono pu ana no na mea e pili ana i ka Hui, no ka la nui o na limahana.

            Ua kahea ia ae he aha kiure no ka noii ana i ke kumu i pau ai o ka halekaa Stock Yard i ke ahi, e ka Makai Nui elike me ka mana i loaa iaia ma ke kanawai, no ka mea, ua hoohuoi ia he ahi keia i hana ia malalo o kekahi manao kolohe, aole hoi he ulia maoli.

            He 100 Iapana lawe ko o ka mahiko o Ewa i haalele i ka hana ma ka Poakolu nei, aka, ua hoi hou no nae e hana mahope mai ka hapanui o lakou. O ke kumu o keia olohani mamuli no ia o ka loihi loa o kahi e halihali ai i ke ko i kahi o ke kaaahi.

            Ua haawi makana aku la ka hui o Lui a me Kuke he puu dala o $250 no ka mahelehele ana iwaena o na keiki kinai ahi no ka hoike ana aku i ko lakou manao hoomaikai no na keiki kinai ahi no ko lakou hoopakele ana i ka halekuai o ia hui ma kela pauahi o kahi o E. O. Holo ma.

            Eia na komite like ole o ka La Kulaia nui o na Limahana ke liuliu mai nei i na hana hoohauoli no ia la e nee mai nei, Sept. 2. O na hoolala i maopopo loa i keia wa, oia hoi, ma ke kakahiaka hora 9 a.m. he paikau nui o na limahana ma kekahi mau alanui o ke kulanakauhale me na kii hoomakeaka o keia a me keia ano.

            E hoakoakoa ana ka huakai ma ke kahua paikau o Haimoeipo, alaila hele ma ke alanui Rikeke, mailaila aku no ke alanui Moi, mailaila aku no ke alanui Papu, no ke alanui Beritania, no ke ala nui Kapiolani, no ke alanui Moi, a hoea hou i ke Kapitala, a ma laila e hookuu ai ke kai huakai. Ma ka hora 11 e malamaia ana he haiolelo ma ke kapitala e pili ana no keia la.

            Ma ka hora 2 o ka auina la e malamaia ana na lealea heihei like ole ma ke kahua heihei lio o Kapiolani Paka. He puu dala o $500 ke mahelehele ia aku ana iloko o na makana like ole no na lealea heihei e malama ia ana mawalio olaila.

            O keia malalo iho nei ka papa kuhikuhi ona lealea oia auina la:

            Heihei kaa heikikala hapalua mile no na keiki malalo 15 makahiki, makana mua $7.50, elua 5$

            Holo lele, makana mua $7.50, elua $5.

            Heihei hoio 120 i a, no na keiki malalo o 15 makahiki, makana mua $7.50, elua $5.

            Heihei eke, makana mua $7.50, elua $5,

            Holo lele kupahu, makana mua $7.50, elua $5.

            Heihei kaa baikikala hookahi mi le no na poe nunui, makana mua $7.50, elua $5.

            Heihei holo 120 i a, no na kanaka momona maluna aku o ka 200 paona, makana mua $7.50, elua $5.

            Heihei holo 75 i a no na kaika mahine opio, makana mua $7.50, elua $5.

            Paani kinipopo, makana $50

            Kiola poka, makana mua $7.50, elua $5.

            Heihei uala, makana mua $7.50, elua $5.

            Kiola harame, makana mua $7.50 elua $5.

            Heihei kaa baikikala hookahi mile no na kanaka momona maluna aku o 200 paoua, makana mua $7.50, elua $5.

            Heihei kui no na wahine opio malalo o 18 makahiki, makana mua $7.50, elua $5.

            Pa @ i hamo ia i ka aila, makana $10.

            Heihei lele pa haahaa nona kana ka momona, makana mua $7.50 elua $5.

            Heihei holo ekolu wawae, makana mua $7.50, elua 5.

            Hukihuki kaula, makana $10.

            A o ka @ hope o na lealea he aha huluhulu nui e malama ia ana maloko o ka hale pailau. Eia na komite kai huakai ke hoao nei e komo pu mai na koa pukaa ma keia kai huakai o kakahiaka. Ua manaoia e hooko ia no keia noi ina he alahele kekahi e hiki ai ke lawe ia mai keia mau koa maluna o na kaa kapaumi me ka uku ole

            O ka nui o na dala i lulu ia i keia wa no keia la nui o na Limahana na hoea aku i ka $1,750, aka, aole nae i pau mai ka lulu ana.

            O na lala o na hui mikanika like ole eia lakou ko liuliu mai nei i ko lakou mau @ makalike no ia la, a lie okoa hoi na kahiko o kela a me keia hui.

 

AOHE MOKU HOLO E LIKE ME DEUTCHLAND.

 

            Wahi a ka hoike a ka nupena La o Nu Ioka o Iulai 29 iho nei. Ma ka la inehinei ua holo ia e ka mokuahi Deutchland, mai Bremen, Southhampton a me Cherbourgh mai, he 601 nota iloko o 24 hora. O kona awerika holo iloko oia mau hora he 24.19 nota, aka, ma kekahi manawa no nae ua hoea aku i ka 25 nota i ka hora. Ua olelo ae o Kapena Alberts, aole i hoea aku ka moku i ka palena o kona holo, a i ka wa e loaa ai he la malie a me ke kai e hoao ia no kona holo. O ke alualu ana i keia mau nota he 601, ua pao ia i na kapuahi he hookahi tona nanahu i kela a me keia nota. Ina e loaa keia holo i na mokuahi Kaleponi e kipa mau mai nei i anei ua hiki ia lakou ke holo mai anei aku a hiki i Kapalakiko iloko o ekolu la me ha hora keu. Nui no ka holo o keia moku.

 

HUI HAWAIIAN REALTY A ME MATURITY KAUPALENAIA.

 

HUINA KUMU, $50,000.00

500 Mahele, $10 Pakahi Uku Pihaia

 

            Na Lunanui: - L. K. Knenwela - Peresidena, W. J. Robinson - Hope Peresidena L. Ahlo - Puuku, P. H. Burnette - Kakauolelo.

            Ke haawi aku nei ka Hawaiian Realty a me Maturity kaupaienaia i ka lehulehu i kekahi hana maikai loa no ka malama ana a hoouluulu ana hoi i na wahi kenikeni i kela a me keia mahina. E kukulu no makou i hale nou a hoopuka i $200 ma kou inoa, a haawi aku makou ia oukou i 75 mahina e uku mai ai i keia mau dala me ka loaa pu aku o kekahi mau palapala no lakou ka waiwai pakahi he $50, ua like ia me 19 mahina e uku ia ai o ka pepa hookahi, ala ila, kaa kelamau dala. He elua wale no au dala e uku ai i kela a me keia mahina a i ka pau ana o 75 mahina ua ukuia e oe he $150, oiai @ nae, he $200 i loaa aku ia oe.

            He 45 apana aiua i kupono no ke kukulu hale a makou i keia manawa.

            No na mea aku i koe e hele ae i ko makou keena.

 

HUI HAWAIIAN REALTY A ME MATURIY KAUPALENAIA.

Maluna ae o Kakela a me Kuke.

Alanui Moi.

            Aia kekahi keena o makou ma Hilo. O M. E. Silva ko makou Agena

 

HOOLAHA.

 

            KE PAPA LOA IA AKU NEI na kanaka a pau aole e kumo wale maiuna o na Aina Hanai Holoholona o Puuhue a me Kahua no ka huli ana i na holoholona me ka loaa mua ole mai o ka palapala ae mai na Luna Nui mai o keia mau Hui Hanai Holoholona, a o na poe e hoolohe ole ana i keia e hoopii ia no ma ke kanawai.

Ma ka kauoha,

P. WOODS,

S. F. WOODS.