Ke Aloha Aina, Volume VII, Number 30, 27 July 1901 — Page 3

KE ALOHA AINA

KE ALOHA AINA, POAONO, IULAI 27, 1901.   3

 

KO BUFALO MAU ANOAI.

(Mai Ka Elele Hawaii mai.)

            Bufalo, Iune 26. Malie keia la o ke kahua hoikeike nei me ke owelawela pu no nae. Kanawalu degere malalo o ka malu, eia aku paha a waena ae nei o Iulai e ike pono ai makou i ka wela, pela ka olelo ia. Piha no ke kahua hoikeike nei.

            I ke ahiahi Poakahi nei i komo mai ai ka moho Peresidena i haule o Amerika Huipuia, W. Jennings Bryan, e makaikai i na hana o kahi kauhale Hawaii nei o ka ui a me ka ole, aohe i maopopo me he mea la no nae he "Maikai Kauai hemolele i ka malie." Ua hoowehiwehi ia aku oia me ka lei pepa o ke ano like me ka malo e kekahi o ko Hilo kaikamahine, Lilia. Iloko pu nei o Kenerala Miles me kona poe ukali.

            O ke anaina halawai a makou i malama mau iho nei i na auina la Sabati, ua hoololi ia a i ke kakahiaka o ia la hookahi, aole au i hoike aku i keia mea hou ia oe mamua.

            He ewalu la i koe a hoea mai ka La Kuokoa o Amerika nei, a ua manao ia he oi aku ana ia o ka la hauoli o ke kahua hoikeike nei. Ke liuliu nei ko Bufalo no ia la.

            Aole keia i ike i ka Wailele o Niagara, alua nei mahina a oi, aka, ke mea ia mai nei e ike aku ana ka i keia Sabati ae, oiai o ko makou la kaawale ia, aohe a makou hana o ka La Pule. He mokuaina Karistiano keia. La Pula paa na hale oihana a pela na hale inu rama a me na hale oihana like ole. O ka hapanui o na kanaka o keia wahi he poe hele-pule wale no, piha na luakini a ku-ku kanaka iluna.

            Piko-pau iole ia keia i ka po Poakahi nei, hiolani me Niolopua maopopo ole owai la, aka, ke mea ia mai nei eia iho no. Omaimai keia i neia mau la a ua ano mama hoi i keia kakau ana.

            "Ke Alahele Hoku Ulaula" ame "Ka Uluwehi o ke Kikowaena" ko makou moto.

 

Bufalo, Iulai 1. Inehinei iho la i ike maka ai i ka Wailele o Niagara. He ike kii wale no akahi no a pau kuhihewa. Hora 11 a oi o ke kakahiaka haalele i ke kahua hoikeike ma ke kaa uwila. He 22 mile o kahi e holo ai, a o ka manawa i holo ia he hookahi hora a keu. Hiki i ke taona o Niagara kau iho la ma na kaapio no Kao Ailana, he wahi mokupuni maluna iki mai o ka wailele, ke hiki pono ilaila a nana iho ilalo, he ku maoli no i ka weli. E kahe ana na manowai like ole a haule pono iloko o Niagara. Hookahi hora a oi o ka nana ana ua lawa ia, pau pono kuhihewa a pau ka lohe pepeiao ana.

            Haalele ia Kao Ailana no ke taona. Ma keia taona (Niagara) he hemo no na halekuai o na ano like ole i ke Sabati, pela me na hale inu rama. O na poe Karistiano hele no lakou i ka pule, a o na poe pegana no hoi hele no lakou i ka lakou pule, ua huikau pu iho la makou me keia poe hope ae la. Haalele ia Niagara hora 3:30 auina la a hoea i ke kahua hoikeike he hookahi hora mahope iho. Ma keia huakai huli hoi akahi no au a ike i ka holo o ke kaa uwila, hu ka makani a haalele wale.

            He lulu dala ka makou no ka Waihona o na Keiki Makua Ole a na Ma'i Lepera o ka aina oiwi, a he $27 i loaa e waiho nei ma ka banako. Ke pau ko makou manawa hana ma keia kahua hoikeike me he mea la e aneane ana paha e haneri dala no ia kokua waihona. Aole paha puali himeni Hawaii i hiki ma Amerika nei a i ole, ma keia mua aku no paha e like me keia e nana ia nei. O ka'u ia e mahalo ae nei a pela no paha me oukou.

KAWAIHAU.

 

HE OHANA MAHOE.

            Fresno, Iune 1. He mau kamahele kai maalo iho ma keia taona i keia la mai Russian River, Sonoma County, mai, no Glorietta, N. M. He ekolu mau kaa e lawe ana ia lakou, a o keia poe oia no o Manuel Armento me kona ohana. O ka mea kupaianaha i ike ia no keia ohana he 18 ko lakou nui, a ua hanau mahoe ia lakou a pau, he kaikamahine a me ke keikikane ko kela a me keia hanau ana mai a kana wahine. Ua mare o Armento i kana wahine i kona wa he 18 makahiki, a i keia wa ua hoea aku kona mau makahiki i ke 55, a o kana wahine he hookahi makahiki kona oi i kana kane. Ua olelo ae o Armento aole he hookahi o kona ohana i ike ia mea he ma'i.

 

NA POINO O KE KAUA MA PILIPINE.

            O na hoike hope i hoopuka ia ae la e ke Keena Kaua no na lilo o ke kaua ma Pilipine, he $200,000,000 i umi ia aku mai ka waihona aku o ke aupuni Amerika, o na ola i make iloko o na hoouka kaua ana me na Pilipine ma kahi no ia o 4,000, a o na poe i hiki ole ke loaa hou ke ola kino maikai he 2,000. Ua olelo pu ia ae o ka nui o na Pilipina i make i ke kaua he 40,000.

 

HOOPAAHAOIA O J. M. POEPOE.

            Ma ke kakahiaka Poaono nei, malalo o ke kauoha a Lunakanawai Gia, ua hoopaahaoia iho la o J. M. Poepoe no ka hewa hoowahawaha aha, a ua noho oia ma ka hale wai mai ia kakahiaka a hiki i ka hora 10 oia po. O ka hihia nana i hookomo aku ia J. M. Poepoe iloko o keia pilikia oia no kona hoolilo ana ma ke kuai i kekahi apana aina i kuleana ia e Malama, he kaikamahine oo ole, ia Hope Makai Nui Frank Pahia, oiai, o Poepoe e noho kahu waiwai ana no ka wahine opio oo ole. Ua olelo ia o ka waiwai io o keia apana aina aia no ia maluna o aku o ka $1000, aka, ua haawi ia aku nae ia Pahia no ka $480.

            O keia hoolilo ana aole ia i apono ia e ka wahine opio, a aole hoi i loaa pu aku keia huina dala iaia. Ma ka hoolohe ana o Lunakanawai Gia o ka Aha Kaapuni i keia hihia, ua ike iho la oia, ua oiaio na hoike e haawi ana i ka pono no Malama, ua kuai ia aku keia aina ma ke ano kolohe. Nolaila, ua haawi mai la oia i kana olelo hooholo e kauoha ana ia J. M. Poepoe e hoea aku imua ona ma ka hora 9:30 o ke kakahiaka Poaono nei, me ka puu dala o $480 no ka hoihoi ana aku ia Pahia i kana mau dala i lilo ai i ke kuai ana i keia apana aina.

            Aole o Poepoe i hoea aku ma ka hora 9:30 e like me ka ka Aha i kauoha mai ai iaia, aka, ma ka hora 11 ae nae i hoea aku oia me ka huina dala, a i ka ike ana o Lunakanawai Gia ua hooko ole o Poepoe e like me ke kauoha i haawi ia aku ai e hoea mai oia i ka hora 9:30 o ia kakahiaka ua haawi aku la o Gia he hoopai e hoopaahao ia o Poepoe he umikumamalua hora no ka hewa hoowahawaha aha. Mahope o ke kau ana mai o ka hoopai a ka Lunakanawai Kaapuni Gia, ua lawe ia mai la oia e hoopaa ma ka halewai a hiki i ka hora 10 oia po Poaono i hookuu ia mai ai oia.

            Aole wale no o Poepoe kai komo iloko o keia pilikia, aka, o Pahia kekahi, ua kue o Pahia i ka hoihoi hou ana i keia apana aina ia Malama (w), me ka hoakaka pu aku i ka Aha ua nui na dala ana i hoolilo ai no ka pomaikai o keia aina, aka, o keia mau uwalo ana a Pahia no kona pono, aole i hoolohe mai ka Aha, a ua haawi ia mai la ke kauoha iaia e hoopau i kela palapala kuai i lawelawe ia ai malalo o ke ano kolohe. Aka, i ka hoole ana aku o Pahia i keia noi, ua haawi mai la o Lunakanawai Gia he hoopai e hoopaahaoia o Pahia maloko o ka rumi paahao o Kawa a hiki i kona ae ana e hoopau ia keia palapala kuai.

            E like no me ka ae ole o Pahia i kinohi pela no oia i hoole loa aku ai i ka hoopau ana i keia palapala kuai. Nolaila, ua hooko aku la ke kanawai i kona mana, a lawe ia aku la ua Hope Makai Nui la e hoopaa ma Kawa ma ia Poaono no, a hiki i ka po La Pule nei, aia no oia ma kai o laila kahi i hoopaahao ia ai, me ka loli ole ae o kona manao e ae aku i ka manao o ka Aha Kaapuni e hoihoi hou aku i ka aina no ka wahine opio.

            Ma ka Poakahi nei i hookuuia mai ai o Pahia malalo o kekahi palapala hookuu kino me ka bona o $50.

 

KU I KA POKA PU RAIFELA.

            Ma ke kakahiaka La Pule nei, mawaho o Kapahulu, Waikiki, ua ku iho la i ka poka pu raifela ma ka wawae he wahine Hawaii nona ka inoa o Sarah. Maloko o kekahi hale e noho ia ana e kekahi kanaka Hawaii, ua akoakoa mai he mau Hawaii, a oiai lakou e nanea ana ua hoikeike mai ka mea nona ka hale he pu raifela, a i ka wa a na mea a pau e nana ana me kekahi ulia i ike ole ia ua kani ae la ua pu nei a kapoo aku la ka poka iloko o ka wawae o Sarah. Ua hina koke aku ka wahine opio no luna o ka papahele, a ua kii koke ia aku ke kauka o ka pa koa, i kona hoea ana mai ua ike ia iho la aole he mau hopohopo ana no ka poino o ke ola o ka wahine. Aole he mea i hopu ia, no ka mea, aole he mau uluaoa o ka haunaele i hana ia i ka wa i ku ai ka wahine i ka pu.

 

            O ka moku lawekoa Thomas ke hoea mai ana i keia pule aku mai Kapalakiko mai.

            Ma ke ahiahi o ka la 2 o Augate e hoau ia ai ka ogana hou o ka luakini o Kawaiahao.

            He 5 mau limahana hou i hoea mai la no ka oihana leta o Honolulu nei maluna mai nei o ke Grant.

 

HOOLAHA.

KE PAPA LOA IA AKU NEI na kanaka a pau aole e komo wale maluna o na Aina Hana Holoholona o Puuhue a me Kahua no ka huli ana i na holoholona me ka loaa mua ole mai o ka palapala ae mai na Luna Nui mai o keia mau Hui Hanai Holoholona, a o na poe e hoolohe ole ana i keia e hoopii ia no ma ke kanawai.

Ma ke kauoha, P. WOODS, S. F. WOODS.

 

OLELO HOOLAHA.

Oiai, ua haalele kumu ole mai ka'u wahine mare ia'u nona ka inoa o Mamala, mai ko maua wahi noho aku ma Waianae no kekahi mau makahiki, nolaila, ke papa loa nei au i ka ohana o ka'u wahine mare aole e malama mai iaia, a pela hoi me ka ohana o ke kane ana e noho pu nei, a ina o ka mea e hoolohe ole ana i keia e hoopii no au ma ke kanawai. Ke papa pu aku nei i na halekuai a pau, aole e mai i ka'u wahine e aie ma kuu inoa, a o ka poe e hoolohe ole ana i keia hoolaha maluna no o lakou na poho a pau. A ke hoole loa nei hoi au aole ona kuleana i ko'u mau waiwai lewa a me waiwai paa a pau.

Owau no me ka oiaio, KAUAHI.

Waianae, Iulai 15, 1901.