Ke Aloha Aina, Volume VII, Number 30, 27 July 1901 — Page 2

KE ALOHA AINA

 

2          KE ALOHA AINA  POAONO, IULAI 27, 1901.

--

HONOLULU             IULAI 27 1901

--

            O KA olelo nui o keia mau la e wa nei, oia ka pau ae o keia Kau hou me ka nui hewahwea o na lilo aohe waiwai i loaa i ka lahui, o ka poe Rome Rula Repubalika ka mea i ike ia i ka hele a ku ke anua hana ka haawe.  I ke kau o ke Aupuni Moi a me na aupuni kui mahope mai on a o ke kiekie loa o na lilo i noho ia e kahi kau ke ole hoi makou e koho hewa, mawaena ia o ke kanakolu a kanaha tausani dala, no eono, ehiku, a ewalu mahina ka loihi i noho ia e kahi kau; he nana wale ae no, a o ka oi keia he $92,000; a ke noho hou mai na Kau Kuikawa hou, e haneri tausani ana a oi wale aku; kupaianaha ka lapuwale o ka hana a ka poe a ka lahui i hilinai kuhihewa ai he poe la hoi keia e ola ai na iwi, eia ka aole.

--

PUHILI NA HOME RULA I NA

REPUBALIKA.

--

            Ua ike maoli ia ka puhili o na Home Rula i na Repubalika i keia mau la hope a ka Ahaolelo e noho nei.  O ke kumu nui no paha oia no ka hoi ana aku nei o kekahi mau Home Rula no ko lakou mau home, a haalele iho la i ko lakou mau noho me ka pau pono ole o ka hana.

            O ka manao nui iloko o na Home Rula a pau oia no ka hookuu loa ana i keia kau me ka lawe hou ole mai i kekahi hana e noonoo, aka, in a he makemake koke Kiaaina, alaila, e kahea hou i kau kuikawa.  O ko na Repubalika makemake hoi, aohe waiwai o ke kahea hou ana aku i kau kuikawa, no ka mea, o na hana e manaoia nei e lawelawe ia aku he hiki no ke pau iloko o na la pokole, a o kekahi aia iloko o kekahi o ia mau bila ka hanu o ke aupuni, oia hoi, ka bila aie miliona.

            Ma ka hoomaopopo aku eia na aoao a elua ke huki nei i ko laua mana, ke hoole nei na Repubalika i ka hookuu ana i keia kau a ke kue nei hoi na Home Rula i ka hoolohe ana i ka na Repubalika mau a'o ana.  o ka hopena na lohe mai makou e hoouna aku aka na Home Rula i ke kauoha i ko lakou mau Senatoa e akoakoa hou mai, a hookuu ae i ka Ahaolelo me ka nana ole aku pehea ka nui o na pauaka e lawelawe hou ia mai ana e na Repubalika.

            Ina e oiaio ana keia manao kauoha o na Home Rula i ko lakou mau hoa a pau e akoakoa mai he mea maopopo e weluwelu ana na manao hoapaapa o na Repubalika.  O ka Ahaolelo, aole ia e hiki ke hookuu ia me ka ae ole e ka hapanui o na hale elua, a @ua o ka Senate wale no a i ole o ka Hale o na Lunamakaainana paha kai makemake, aole no e hookau ia ka Ahaolelo a hiki i ka lokahi ana o na hale elua ma ia manao.

--

UKU O NA POE KAU KANA-

WAI O NA AUPUNI NUI

--

            O ka Ahaolelo nui loa o na hoolilo ma na aupuni o Europa oia ko Farani, a ua hiki aku kona hoolilo i ka $1,500,000 i ka makahiki.  O ka nui o kona mau Senatoa he 300, a o kona mau Lunamakaainana he 584, a no lakou ka heluna maluna maku o 800.  He $1800 ko lakou mau uku pakahi o ka makahiki.

            Ma Amerika Huipuia he 90 Senatoa a me 360 Lunamakaainana, a na uku ia lakou he $2,500,000.

            O na hoa o ka Ahaolelo o Beritania ke hana nei lakou me ka uku ole, aka, o ko lakou mau hoolilo nae no ka makahiki i pau aku la he $200,000.  He elua mau hale o ka Ahaolelo o Geremania, a o na hoolilo no ka makahiki hookahi he $100,000.

            Aole he Ahaolelo o Rusia elike me ko Farani a i ole me Amerika a nolaila, aole he mau hoolilo i ike ia no keia itamu eia aupuni.  O na hoa o ka Ahaolelo o Italia aole o lakou uku, aka, ua ae ia lakou e holo wale maluna o na kaaahi.  O ka lilo o Italia no kona kau Ahaolelo o kela makahiki aku nei he $420,000.

            Ma Ladana, o ka nui o na hoa o ka hale oluna he 150, o ka hale olale he 250.  Na hoa o ka hale oluna aoole o lakou uku, a o ka hale olalo e loaa ana i kela a me keia pakahi he $300 no ka makahiki.  A in a e oi aku ana mamua o eha mahina o ka noho ana o ke kau e loaa ana ia lakou he uku pakai o $2.60 o ka la.  O ka nui o na hoa o na hale elua o ka Ahaolelo o Holani he 150.  O na hoa o ka hale oluna ua loaa ia lakou ka uku o $4.00 pakahi o ka la, a o ka lua o ka hale he $800 o ka makahiki me ka uku mile.  Na hoolilo o ka Ahaolelo o Holani no ka makahiki he $300,000.

            He elua mau Ahaolelo o Auseturia, he hookahi e noho ana ma Viena a he hookahi ma Budapest.  O ka lilo o na Ahaolelo elua he $800,000 o ka makahiki, a o ka uku a ke kanawai o Auseturia i haawia ku ai ia mau hoa hanohano he $2 o ka la.

            Ahaolelo o Hawaii Ukulii, 15 Senatoa a me 30 Lunamakaainana $400 uku o na hoa pakahi o na hale elua, no 60 la hana.  Lilo o ka Ahaolelo no 120 la hana $92,000.

 

WEWE KA PILI A KE ALOHA

--

            Ma ka Poakahi nei i waiho aku ai o Mrs. Lena Kumalao he hoopii oki mare i kana kane, Jonah Kumalae, maluna o ke kahua he nui o na kana lokoino a ua kane nei i lawelawe aku ai maluna ona.

            O keia paa mare aole i piha he elua mahina o ko laua noho ana iloko o ke apo gula maemae o ka mare, a hoea mai la hoi ka la e hookaawale ia ai laua uo ka wa mau loa.  I ka po o ka la 28 o Mei i hipuu ia ai laua maloko o ka luakini o Kawaiahao, a imua hoi o ke kuahu laahia a me ke kauwa a ke Akua i hoohiki aku ai laua e malama ke kane i ka wahine, a o ka wahine i ke kane, aka, he hookahi wale no nae pule mahope iiho o ko laua hoolilo ia ana i hookahi io a me hookahi iwi, ua hoopoina iho la o Kumalae i kana olelo hoopaa imua o ke Akua Kiekie Loa, a lawe mai la oia i kona lima kakauha a hookau aku la maluna o kana wahine.

            O Jonah Kumalae, he kanaka opio oia i ike nui ia e ko keia kulanakauhale, a he hoahanohano hoi no ka Hale o na Lunamakaainana e noho nei mai nei.  He kanaka hoopono, a he lala no ka papa himeni o Kawaiahao, he ku i ka walohia na olelo o ka palapala hoopii a ka wahien i waiho aku ai imua o ka Aha Kaapuni, na kumu i makemake ai oia e hookaawale loa ia ko laua noho pu hou ana aku ma ke ano kane a wahine, penei:

            Ma ke ahiahi o ka la 4 o Iune, 1901, he hookahi wale no pule mahope iho o ko laua mare ia ana, ma ko laua home ma ke alanui Moi, ua lohi loa ka hoi ana aku o ke kane, mahope hoi o ka pau ana o ka paina ana o ka wahine me ka ohana i ko lakou paina ahiahi, ua hoopiha loa ia ke kane i ka inaina no keia ai e ana a haalele iho la oia i ka hale me ka ai ole, mahope hoi o kona haawi ana mai i kekahi mau olelo hailiili.

            Ma ka la 11 o Iune ua hoopiha hou ia no ke kane me ka inaina me ka maopopo ole iaia o ke kumu, a na hoole hou no hoi oia i ka paina ana ia ahiahi me ka wahine a me ka ohana.  Mahope o ka pau ana o ka paina na kahea mai la oia i ka wahine e komo aku iloko o ka rumi moe, ua laka ae la oia i ka puka, a hoike pu mai la hoi i kona mau manao inaina, a me ka maopopo ole o ke kumu ua hoeha aku la oia i kana wahine, ma ka lima, wawae a me ke kua, ua ike ia ka uli maluna o kona kino.  Ma ia wa pu hoi na olelo ia ua uhau aku oia i kana wahine me kekahi pauku laau nana i hookau aku i kekahi alina, a ma ia hoeha ia ana me na pauku laau la a hiki i keia wa eia no oia ke ike nei i ka eha.

            Ma ka la 12 o Iune, ua hoopiha hou ia ao kana kane me ka inaina, a i ko laua wa i hoi ai e moe, ua hoike aku la kana kane iaia, ua makemake oia e lawe i ko laua mau ola, a ia wa i ala ae ai ke kane mai kahi moe ae a mahope o kekahi mau minute pokole o kona kaawale ana aku ua komo mai la oia me kekahi pahi, a hoike aku la e lawe aku ana oia i kona ola, aka, aole nae oia i hooko aku a waiho iho la oia i ka pahi malalo o ka uluna, a no hookahi hora o ka waiho ana ua lalau aku la oia a hoao aku la e hili i ka wahine, ua olelo aku ka wahine e kahea no oia i mau kokua, a ua hooki iho la oia.  Ua olelo ae ka wahine ua ala oia ia po holookoa me kanui o ka ehaeha.

            Ma ka la 20 o Iune, na olelo ae ka wahine, ua kipaku aku kana kane iaia mai ko laua wahi moe aku, a ua noho oia a hiki i kona loaa ana i ike anu i na ea huihui oia po.  Ma ka hora 3 a. m. oia po hookahi no ua pepehi hou aku la kana kane iaia me ke kumu ole, me ka huki pu ana i kona lauoho.

            He nui no na manawa e ae a Kumalae i hoeha ai i kana wahine me ka hoopuka pu ana ae i na olelo ino, a ma keia mau hana lokoino a kana kane ua hiki ole ia laua ke noho pu hou aku.  A oiai, o kana kane he kanaka kuonoono nona ka loaa mahina ma kahi he $250 mai kona mau waiwai mai, nolaila, ua noi aku la ka wahine e haawi ia on a uku hoomau nona o $15 o ka pule, ua kauoha mai o Lunakanawai Gia ia Kumalae e hoea aku imua ona a waiho aku i na kue in a he mau kumu kupono kekahi.

            Ua hoea aku o Lunamakaainana Kumalae me kona Loio W. C. Aki imua o Lunakanawai Gia, a pela pu hoi me Mrs. Kumalae, a me De Bolt kona loio.  Mahope o ke kuka ana o na loio o na aoao elua ua au iho la e haawi la ka uku hoomau o $10 o ka pule ia Mrs. Kumalae.  A ia wa i haawi mai ai o Lunakanawai Gia ia Kumalae i ke kauoha e uku mau oia he $10 i kana wahine i na Poalua a pau a hiki i ka wa e kauoha ia aku ai o ka aha, a e uku koke hoi oia i kana wahine he $50 no kona lilo loio.

--

            Ua haule a nalowale me kela pule aku nei ma ke alanui Nuuanu he puolo hainaka me kekahi mau dala o $200 ka waiwailo, a ke kaumaha nei ka mea nona ia waiwai, no ka mea, he kanaka ilihune oia.