Ke Aloha Aina, Volume VII, Number 28, 13 July 1901 — Page 3

KE ALOHA AINA

 

HOPENA O KEIA AHAOLELO KUIKAWA

 

            I ka Poaono nei , Iulai 6, i hoea aku ai na la hana o ka Ahaolelo i ke kanalima, a he umi wale no hoi la i koe a o ka piha no ia o na la hana he kanaono, na la a ke kanawai i kaupalena ai no ke kau Ahaolelo Kuikawa.  I loko o keia mau la loihi o ka noho ana o ka Ahaolelo, he elima bila haawina i lawe ia mai e noonoo, aka, o ka mea i ike ia he elua wale no bila oloko o keia mau bila i hooholo ia.  O keia mau bila i hooholo ia oia no ka bila haawina mua a ka Ahaolelo i apono ai he $30,000 no ka uku ana i kona mau hoolilo o keia Kau Kuikawa a me ka bila haawina hope a na Ahaolelo nei i noi hou iho nei, a i apono ia ma ka Poaono nei he $17,000 no ka uku ana i kona mau hoolilo o keia mau la hope e nee nei.

            O na bila haawina e ae i koe e noonoo ia nei, oia ka haawina o na luna aupuni no keia mau makahiki elua e nee aku nei a me ka haawina no na alanui me na uwapo, a me na lilo e ae.  Mamuli o ka lokahi ole o na hale kau kanawai elua, ua manao ia he hana naauao ka waiho ana aku na kekahi komite hui e noonoo, a o ka lakou mau haawina e hooholo ai oia ka ka Ahaolelo e apono ai.

            Ma ka nana ana ae i na hana a me na hoolilo a keia mau Kau Ahaolelo elua o ke Teritori i noho ai, e ikeia no he uuku loa na mea i hana ia, aka, he nui nae na dala i lu ia.  I ka hookuu ana o kela Kau Ahaolelo elua o ke Teritori i noho ai, e ikeia no he uuku loa na mea i hana ia, aka, he nui nae na dala i lu ia.  I ka hookuu ana o kela Kau Ahaolelo aku nei, o ka nui o na bila kanawai i laweia mai e noonoo he hookahi haneri, mailoko ae oia he 29 i lawe ia aku imua o ke Kiaaina, a he 20 wale no nae oia huina i kakauinoa ia e ke Kiaaina, 7 i maopopo ole ko ke Kiaaina manao, oiai, ua pau e ka Ahaolelo, a he elua ana bila i vito mai, a o ka nui o na hoolilo oia kau he $45,000.

            O keia Kau Kuikawa hoi he elima bila e noonoo ia nei, aka, o na bila haawina elua wale no o ka Ahaolelo no kona mau hoolilo kai hooholo ia, koe ka haawina o na luna aupuni, na alanui, uwapo a pela aku, o ka nui nae o na hoolilo i ike ia he $47,000.  Ke hoohui ia na hoolilo o keia mau kau elua e ikeia no keia puu hua helu nui hewahewa o $92,000, a he $8,000 wale aku no koe o ka hiki no ia i ka $100,000 ka nui o na lilo o keia mau Kau elua, aka, o na pomaikai nae i hana ia mai e ka Ahaolelo no keia mau dala kuahewahewa a lakou i uhauha wale aku la, he ole ia.

 

            Eia ke malauia nei o Painapa ma he kaa hoemi o na Makalima a me na hanaka.

 

LA POKIULAI NUI MA HILO

            Ma na mokuahi Clandine a me Kinau i huli hoi mai la me ka laua piha ohua i lawe aku nei no ka makaikai ana i na lealea Pokiulai o Hilo Ua Kanilehua, ma ke ahiahi La Pule nei, i loaa mai ai na luna hoohauoli i keia kulanakauhale no ka lawe haaheo ana ae o ka hapanui o na lio heihei o keia kulanakauhale ke kaili ana ae o ka hui kinipopo makiki i ka lanakila o ka la hookuku kinipopo nui maloko o Hoolulu Paka, a pela me na lealea heihei wawae.

            No ka hoike ana mai i keia kulanakauhale i ko lakou pulumi pau ana mai la i na hanohano me lakou ua hoihoi pu lalkou he mau pulumi hale.  Ua haawiia aku na lea hauoli e ka poe o uka nei o ka aina no na poe aukai i hooikaika iloko o na la heihei ekolu e loaa ka inoa hanohano i keia kulanakauhale.

            Ma na hoike i loaa ia makou mai ka Ua Kanilehua mai, aohe piha kanaka nui i ike ia ma Hilo e like me keia Pokiulai.  He eha mau moku holo pili aina i lehau me na poe makaikai i kapalulu loa aku i Hilo, oia ke Kinau, Claudine, Maui a me Iwalani, Ua lilo ka hoea ana aku o ka bana i mea hooi loa aku i na manao ohohia o na kupa o ua kulanakauhale nei a me na malihini i hiki aku.

            Aole i hoike mai ua aina nei i kona mau kahiko nani ma ia mau la a ka lealea e hoalii ana i ua kina kaulana la ma o ka paa ia ana o na keiki kolohe o Kulanihakoi, aka, he mau wahi kulu pakaua ike malihini kai haule iho no kekahi manawa pokole a pau koke no.

            Aole he mau leo hoohalahala i ikeia iwaena o na ohua no na hookipa ana a ko hilo mau kamaaina, aka, he mahalo wale no i ka nani o Hilo me ka manaolana e hoea hou aku ana no lakou i keia Pokiulai hou aku.

 

APONO KE KIAAINA KUIKAWA I KA HAAWINA $17,000.

            Ma ka Poakahi nei, Iulai 8, i kakauinoa mai ai o Kiaaina Kuikawa Kupa i ka haawina hou a ka Ahaolelo i hooholo iho nei o $17,000 no ka uku ana i kona mau hoolilo a pau o keia mau la hana hope ona e nee nei.  O keia mau dala e unuhi ia mai ana mai ka waihona mai o ka lehulehu a uku ae i kona mau hoolilo a o ka piha ana iho la keia o ke $92,000 a ka Ahaolelo i hooholo ai no ka uku ana i kona mau hoolilo o keia mau kau elua.

 

            Ua hoopau wale ia mai ka hihia hoike wahahee o Lunahooponopono Kawika o ka Avalstaisa.

 

NA LONO KAUA O AFERIKA

            Ladana, Iune 29.  Ma ka hoike a haku Kitchener i hoouna mai la i keia la mai Pretoria, e olelo ana ia:

            Ua lele kaua aku na Boa maluna o kekahi mau hale ma ke alanui kaaahi o Brugspruit Bight ma ka la 26 o Iune nei.  Aka, ua hoea aku nae he kaaahi kina, a hoauhee liilii aku la ia lakou he eha Boa i make a he lehulehu wale i hoeha ia, a ua lawe pu aku lakou i na poe i hoeha ia.  Ua haawi pio mai la o Alakai de Priesz me kona mau kanaka he kanaha kumamaha ma Pietisburg Nu Ioka, Iune 27.  He telegarapa kai loaa mai nei i ka nupepa La mai Cape town mai e hoike mai ana.

            O na Boa he 3,000 malalo o ke alakai ana a Malao, ua lele kana lakou i aRichmond ma ke kakahiaka nui Poaha nei.  E malama ia ana ke taona e kekahi hapa o ka pualikoa lahui North Staffordshire malalo o Kapena Hawkshaw a me ka puali kiai kulanakauhale.

            He ekolu mau auwaha mawaho o ke taona i lilo pio koke ae i na Boa.  O na kanaka o ka pa kaua ua mahelehele kokeia a e lakou, a o ka hapanui ma ka papu hale paahao me Flagstaff Hill, ma ka lilo ana o keia mau auwaha ua hoahuwale ia o Flagstaff Hill i na poka hahana a ka enemi.

            He ekolu manawa a Kenerala Malan i hoouna aku ai i ka elele me ke koi ana aku e haawi pio mai ke kulanakauhale, aka, ua hoole ia mai.  Iloko o ka wa a ke kaua e hoomaha ai e hooponopono mau ana na Boa i ko lakou kulana hakaka, ma ke kipa hope ana aku o ka elele ua komo pu aku he mau boa a lawe ae la i ka auwaha e kokoke loa ana i ke kuea makeke, aole mau poka i ki ia aku maluna o lakou, oiai, ka hae keokeo e paa ia ana e ka elele.

            I keia wa o ke kaawale o na Boa mai ka papu halepaahao aku he 200 ia wale no, ua haawi aku lakou he elua hora o ke kipu hoomaha ole ana, a i ko lakou ike ana aole he hiki ia lakou ke wawahi aku i ke kulana o na Beretania malaila, a me flagstaff hill ua hoohuli ae la lakou i ka lakou lele kaua ana maluna o kekahi auwaha e paa ia ana e ewaul koa Beritania.  No umikumakahi hora o ka paio ana o keia mau kanaka ewalu, a ma ka hora 5 o ke ahiahi ua haawi pio aku la lakou.

            Aia ka po ana iho ua hoomakaukau hou ae la na Beritania i ko lakou kulana kaua me ka manao no ka lele kaua hou ia ana mai i ke kakahiaka ae, aka, ma @@@@@ aku la he lono i na Boa, eia he puali kokua ke nee nani nei no ka hoopakele aha i ke kulanakauhale, nolaila, ua haalele koke iho lakou mahope o ka @@ ana i na hale hoahu a me elima lio.  He elima Boa a he lehulehu wale i hoehala ma kekahi hakaka ana.  O ka nui o na poino o na Beritania aole i loheia mai.

            Hamilton, Bremuda, Iune 29.  O ka moku lawekoa Beritania Armenian i hoea mai la ma kela mau wai ina ka la inehinei, e lawe ana oia he 930 pio Boa i lawe ia mai no ka hoopaa ia ana maluna o na mokupani Darzel ame Tucker.  He umikumamakahi la holo o ka Armenian mai ka mokupuni St Vincent mai.  E kiai ia ana ka moku e na mokukaua Media ame Medway.  O na Boa opio loa o 17 makahiki a hiki i na kanaka aoo o 70 makahiki, oia na helehelena i ikeia aku maluna o ka moku lawekoa Armenian.

 

LOHEIA KA HALULU O KA WAILELE O NIAGARA MA KAHI MAMAO

            Ua kukulu ia mai nei he pahu telepono me kekahi mikini walaau i hoopaa ia i ke telepono maloko o ke Ana makani ma ka Wailele o niagar, no ka lawe ana aku i ka leo halulu o ua wai kaulana la ma ka uwea o ka laina telepono Bele no Nu Ioka, ka hoikeike o Buffalo a me na wahi e ae.  Na keia mekini walaau e ume mai ana i ka leo halulu o ka wailele iloko o ka pahu telepono a mailaila aku no kahi hoohui o ka laina telepona Bele ma ka Wailele o Niagara, a mailaila aku e hoouna loa ia aku ai keia mau leo halulu no Nu Ioka, a i ole ma ke keena hoikeike o ka laina telepona Bele ma Buffalo.  He kupaianaha no ka hoolohe ana i ka leo halulu o ka Wailele o Niagara ma loko o ke telepona.  Ua hiki i ka mea hoolohe ke lohe moakaka aku i ka leo halulu o ka wai i kona wa e pa aku ai ilalo, kona owe ana me ka ikaika i ka wa e pa aku ai iluna o na puu pohaku, na paki wai ana, a pela aku, a o keia mau halulu ana apau ua lawe ia mai ia e ke telepona e lile loa no me ka leo halulu maoli e lohe ia ana ma ke alo o ke Ana Makani.

            Ua wehe ae nei o Kauka hana maka A.N. Sanford he keena hana nona ma ka BostonBuilding, a malaila e haawi mai ai oia i na lapaau ana i na poe i hoopilikia ia na maka e hoea aku ana imua ona.

A.N. SANFORD KAUKA MAKA

            Rumi 206 me 207 Boston Building Alanui papu, mawaena o Hotele & Moi Honolulu.