Ke Aloha Aina, Volume VII, Number 27, 6 Iulai 1901 — Page 7

KE ALOHA AINA

POAONO, IULAI 6, 1901.

 

HAUNAELE MA PUOWAINA.

 

            Ua ulu ae he haunaele ma ka hora 10 o ka po La Pule nei ma Puowaina i ka wa a Makai Pukiki Silva e hoao ana e hopu i kekahi poe Pukiki pili waiwai.  O ka hopena i ikeia ua haki ka ihu o ka makai, a iloko o ka hahana i paa ia kekahi o keia poe piliwaiwai.  Ua hoea ae o Hope Makai Nui Chillingwirth ma kahi a ka haunaele e malamaia ana, aka, he mea ole nae oia i ka poe piliwaiwai e hoao ana e loaa ia lakou he lanakila maluna o ka makai.  Malalo o ke kokua ikaika ana a Chillingworth ua pakele mai la o Silva mai ka hoopoino hou ia ana e kona mau enemi, a hoihoi aku la o Chillingworth iaia me kona ihu haki no kona home ma alanui Ema.

            I ka noho ana aku o Silva ua huli hou ae la oia a hoi aku la no kahi o ka hakaka i malamaia ai, a ma ke alanui Mila ua loaa aku la kahi poe haihai kanawai.  Ua lele aku ka Hope Makai Nui maluna o kekahi Pukiki nona ka inoa o Freitas, aka, ua huli koke mai la oia a haawi mai la i kekahi puupuu mahanahana ma ka papalina o ka Hope Makai Nui, ua malama koke ia na aumeume mawaena ona a me kana lawehala a holo mai la na hoaloha o Freitas me ka manao e hoopakele ae iaia aka, ua hiki ole nae ia ke pakele mai na lima wikani aku o ka Hope Ilamuku, a o ka hopena i ike ia o na kolohe ua pau aku la lakou i ka naholo a lawe aku la lakou i ka naholo a lawe aku ia Chillingwirth i kana lawehala no ka lahewai e hoopaa ai.

 

HE MAU HOOLOLI ILOKO I KEKAHI MAU KEENA AUPUNI.

 

            Ua lawe ae la o Mekia J. W. Pratt o ke Keena Wai i ke kulana Luna Auhau ma kahi o Jonathan Shaw i waiho mai.  O E. Vivian Rikikini kai lawe ae la i ke kulana kakauolelo no ke Keena Wai ma kahi o Pratt i haalele mai, me Dan Woodward kona kokua ekahi, a o Sam. Chillingworth kona kokua elua.  O keia mau inoa i lawe ae la i na kulana kiekie maloko o ke Keena Wai o ke aupuni he poe opio wale no lakou a pau, aka, ua loaa nae ia lakou na hoonaauao maikai ia ana.

-----------------------

            Ua loaa mai nei na hoike i ke kulanakauhale nei no ka hoohui ia ana mai la ma ka berita laahia o ka mare o Mrs. Irene Kahalelaukoa Ii Brown me Carl Halloway e ka Rev. S. L. Desha, ma Waimea, Hawaii ma ka Poakolu o kela pule aku nei, ma ka home o Mr. a me Mrs. Fred Knight, mahope iho o ko laua polena ia ana, ua noho iho la na mea a pau maluna o kekahi papaaina i luluu i na mea ai.

 

MAI HOOHUOI.

 

            Ke hoikeia aku nei ka lohe i ka`u poe lawe nupepa o KE ALOHA AINA Ka Lahui Hawaii, Home Rula a me ka buke moolelo Ka La o Hawaii he mau ale ko lakou ia`u, mai hoohuoi oukou ke nele i ka nupepa a me ka hoke ma keia mua aku, a olelo iho, pehea la i loaa ole mai nei ka`u nupepa a me ka`u buke.  Aole na ka Luna nupepa a buke ho@ i hoonele ia oukou, na oukou no oukou i hoonele, mamuli o ko oukou hookaa ole mai i ke ola o ka nupepa a me ka buke, elike me ko lakou rula.  Aole au e hoonele ana i na poe hookaa pololei, e hoomau aku ana au i ka hoomanawanui e hooko i ko lakou makemake.  Me keia mau hoakaka, e kala mai ia`u ma ia mea.

                        Ka oukou Luna,

                                    B. Moanaliha.

                        Luna o KE ALOHA AINA, Ka Lahui Hawaii, Home Rula a me Ka La o Hawaii.

                                    Hilo, Hawaii, Iune 28, 1901.

 

HOIKE HUI O NA KULA SABATI O KAUAI KOMOHANA.

 

            E hoike hui ana na Kula Sabati a pau o Kauai Komohana, ke hiki aku i ke Sabati, la 25 o Augate, 1901. ma ka luakini o Lihue, hora 10 a.m.  A penei ka hoonohonoho ana:

            Kula Sabati o Koloa, haawina o Aperila, 1901.  Kula Sabati o Hanapepe, haawina o Mei 5-12.  Kula Sabati o Waimea, haawina o Mei 26 a me Iune.  Kula Sabati o Lihue, haawina o Ianuari, Geberuari a me Maraki.

            E na haumana a pau loa o na Kula Sabati i hoike ia ae nei, na Kahu Kula Sabati Apana a pau loa a me ko lakou mau hope, na Kumu Kula Sabati a pau loa, a pela hoi i na Makua Kahu Ekalesia, ke paipai aku nei ko oukou hoa paahana iloko o Karisto, e hooikaika kakou, o na Kula Sabati a pau loa e hiki mai ma kahi i hoolaha ia.

                        Owau iho no,

                                                W. Ellis.

                                    Kahu Kula Sabati Nui no Kauai Komohana,

                                    Nawiliwili, Kauai, Iune 29, 1901.

 

HE 17,000 BOA MALUNA O KE KAHUA KAUA.

 

            Ladana, Iune 14.  Maloko o ka Hale o na Makaainana, o Mr. Balfour no ka pane ana aku ia Sir H. Campbell-Bannerman, ua olelo ae oia, o ka nui o na Boa i hookau liilii ia malalo o na panalaau Muliwai Alani a me Transvaal a me kekahi mau wahi o Cape Colony, ua hiki aku no ia i ka 17,000, a ua mahelehele ia lakou iloko o na puali liilii o 100 a me 200 kanaka, a o ka huina nui loa i hoike ia mai o ka puali he 600 kanaka.  O na lono no ka mea e pili ana i ke kuikahi maluhia aole he oiaio.

 

NUHOU KUWAHO.

 

HOOILINA MOI OPIO O BERITANIA NUI.

 

            Ladana, Iune 22.  Akahi no a haliu aku ka nana ana a ka lahui Beritania maluna o ko lakou hoilina moi opio, ke Keikialii Edewada, nona na makahiki e hoea aku ana i ka ehiku ma ka la apopo, ma ke ano o ko lakou moi ia o keia mua aku.  O kona lilo ana i mea nui iloko o ke aupuni ma o ke kaawale ana aku no ia o kona makuakane ke Duke o York me Cornwall ma kana huakai kaapuni honua.  E like me na hoonaauao e hoolala ia nei no ke Keikialii Edewada, e hoolilo ia aku ana oia i luina no kekahi mau makahiki pokole maluna o ka moku a`o kaua moana Beritania e like me na opio Pelekana e ae.  O kona hoonaauaoia ana i keia mau la malalo no ia o Mademoisille Brika, ka hoanoho o ka Duke wahine o Teck i make, no kekahi mau makahiki.  Ua oleloia ae he kue loa ka moi i ka haawi ana aku i ka hoilina opio i na hoonaauao kiekie ana.

            He wahi moolelo kai hauwawa ia ae no ka naauao o ka hooilina moi opio Edewada.  Ma kekahi ahaaina i haawi ia ae no na opio, imua o ke alo o kona makuakane ke Duke o Cornwall, ua haawi ia aku la he elua mau apana laau iaia e kona mau hoa paani opio a no ka haawi ana mai i kona mahalo ua hoopuka ae la oia i kekahi mau olelo hoomaikai e like me na olelo a ke kanaka makua, a na ia mea i hoohikilele ae i ke Duke o Cornwall, a puana ae la oia:  He oi ae ka naauao o keia wahi keiki i ke kamailio ana mamua o`u, he oiaio keia mau olelo a ka Duke, no ka mea, he kanaka pihiohio a hiki ole maoli no oia ke haiolelo aku imua o kekahi anaina kanaka nui.

 

POWA HE LUNA AUPUNI IAPANA.

 

            Iokohama, Iune 21.  O Hoshi Toru, ke Kuhina Kukai o ka Aha Kuhina o Ito, ua hou ia oia i ka pahi i keia la ma ka noho ana o ka halawai a ka ahaolelo Kulanakauhale, a make koke no mahope iho.  O Hoshi Toru he Kuhina Iapana oia ma Wasinetona, a he Peresidena no ka Hale.  O ke kumu o kona powa ia ana mamuli no ia o na manao pili kalaiaina.

            O ka mea nana oia i powa he kanaka ia i hiki aku kona mau makahiki i ke 50, a he mea hoi e paa ana i kekahi kulana aupuni maikai.  Ua olelo ae oia o ka hana ana i lawelawe aku la no ka pono no ia o ka aina.

            Wasinetona, Iune 21.  Ua hookaumaha ia na luna aupuni o ke Keena Kanikela Iapana maanei i ka wa i loaa mai ai o keia lono powa.  Ua noho o Hoshi ma ke ano Kuhina no elua makahiki mai ka 1896 a hiki i ka 1898.  He kanaka oia i kamaaina i ka poai o na luna aupuni a me kalaiaina o Wasinetona nei.

            Ua haalele iho o Hoshi he wahine a me ke keiki nona na makahiki he 9.  He 48 ka nui o kona mau makahiki, a mawaho ae o kona ike kalaiaina he kanaka naauao oia ma ka haiolelo.

 

PALAMA ICE CREAM PARLOR

------------

            Maanei e loaa ai na Hau Kilima ono loa.  No ke pa hookahi me ka mea ono 10 keneta.  Na ano wai momona a pau 5 keneta o ke kiaha.

            O na poe a pau e waiho mai ana i ka lakou kauoha e hooko ia no me ka eleu nui, he $1.75 o ke galani.  E loaa pu no ua Mea Ono.

            Nolaila, e na makamaka hawaii mai poina i ke kipa mai i kahi e loaa he olu i kou puu.  Eia keia hale malalo iho o ka Oahu Lumber Co.

                        C. A. Gett,

            Honolulu, Iune 19, 1901.

 

THE WHITE HOUSE

420-- Alenui Papu—420

 

EIA IHO HE MAU LOLE HOU.

CROSS BARS MASELINA                         15c o ka ia

DIMITI KEOKEO                             10c, 12 ½c  “  “

LINONS INIA                         15c, 10c, 25c     “  “

MULLS INIA                                                25c, 30c    “  “

CONFECTIONS                                30c, 40c    “  “

PERSIANS LAWNS                         35c, 40c    “  “

VICTORIA LAWNS                75c, 1.00, 1.25

THE WHITE HOUSE.