Ke Aloha Aina, Volume VII, Number 24, 15 June 1901 — Page 5

KE ALOHA AINA

POAONO, IUNE 15, 1901

 

            Ua hoea mai la a hala aku ia ka la 11 o Iune me kona ohohia nui ia e ko ke kulanakauhale nei.  Ma ia la ua hoohala ae kekahi poe i ko lakou la hauoli mawaho o Kapiolani Paka, a o kekahi poe hoi, ma na paina luau, ma ka ho lo kaaahi a pela aku.

            Ma ke kahua heihei o Kapiolani ua hoea ae kekahi puulu kanaka nui no lakou ka huina ma kahi o eono a i ole ehiku tausani, a mawaho mai o ke kahua heihei a malalo hoi o na malumalu laau e hoopuni ana i ka rina poepoe o ke kahua heihei e noho ana he mau tausani o na makaikai, a ua olelo ia ae o kekahi la piha kanaka nui keia o ka paka mai kona la i hoau mua ia ai, no ka maikaikai i na lealea e malama ia ana ma ua kahua heihei kaulana Ia.  A malaila i ike ia aku ai na mea a pau iloko o na helehelena hauoli e haawi ana i na leo huro no na lio e lawe ae ana i ka hanohano o ka la, e pili ana hoi kekahi poe me ka lakou mau dala i hoomakaulii ai no na lio a lakou i manao ai e papahi ae ana i ka lanakila o ka la, a o ka hopena i ike ia ua oiahaka ka inipakeke o kekahi poe i ka wa i huli hoi mai ai mai ke kahua heihei mai.  A o na poe i pomaikai ua ike ia aku kekahi poe o lakou e holo ana maluna o na kaapio, e luhe ana hoi kahi i ka wai o Paleie, a pela aku.

            Ma ka heihei eiwa ua haule o Opiopio kekahi o na keiki kau lio heihei mailuna aku o ka lio heihei Garteline i ka wa e malama ia ana o ia heihei, a ua laki nae aole i mahuahua loa na palapu i loaa iaia.

            Ma ka heihei umi na nui na hoopaapaa i hana ia ua komo mua mai ka lio o ke Koikialii Kawanakoa, (Wela), i ka pahu eo aka, ua hoole aku nae na lunakanawai aole i pololei ia heihei ana, nolaila, ua malama ia he holo hou ana o keia heihei, a o ka hopena i ike ia ua lilo no ka eo ia Wela.

            O ka heihei lealea a hoomakeaka oia la oia ka heihei hookahi mile mawaena o kekahi mau miula no laua na inoa o Aina Nui a me Kikapu.  Ua haalele like iho laua i ka pahu holo iloko o ka leo uwauwa o na kanaka, a mamua o ka hoea ana i ka hapaha mile ua ike ia aku la o Kikapu i ka nuha ana iho me ka ae ole aku e holo hou imua, a iloko o keia wa a Kikapu e nuha nei aia no o Aina Nui ke kuupau la i kena mama holo me kona huelo e ku pololei ana i hope.  Aole o Aina Nui i hoomaha a hiki i kona kaalo ana i ka pahu eo o hookahi mile.  I ka ike ana o Henry Viera ka mea nana e kau ana o Kikapu he mea makehewa nona ka hoomau ana aku i ka hookikina ana i kona miula imua, oiai o Aina Nui e ahai la ka pupuhi, ua hoohuli ae la oia i kona hoki a hoi nele mai la no kahi a ka lehulehu e uwa aku ana a ma ke alo iho o na lunakanawai ua hapai ae la oia i kana uwepa a uhau iho la ma ke kikala a ia wa i kalamoe pololei aku ai ua wahi hoki la no ka ipuka pa e komo aku ai i kahi hoolulu o na lio heihei a i kona ike ana na paa ka puka pa i ke pani ia ua owala ae la oia a kiola aku la ia Viera iluna o ka lepo.

            O ka la heihei ulolohi loa keia i ike aole ia mai kinohi loa mai o ka malama ia ana o na lealea heihei malaila, a ua hookuu ia na lealea ma ka hora 7 ponoi o ua ahiahi la.

 

HANAU KA MOIWAHINE O ITALIA

 

           Roma, Iune 1.  Ma ka hora 10 o keia kakahiaka i hanau mai ai ka Moiwahine Helena o Itlaia he kaikamahine.  Eia ka makuahine a me ke kamaiki ke ola nei me ka maikai.  E kapaia aku ana ka inoa o ke Kama # lii opio o Yolanda Margherita.

            Ua nui na hoomaikai i pahola ia aku, aka, ua poho nae na manaolana o ka moi i hoopuka ai he makemake oia i keikikane.  Ua haawi ia na kipu aloha no ka malihini hou ma na wahi a pau o Italia.

            O ka uku o ke kahu malama keiki mawaho ae o kona uku mahina e loaa ana iaia he $2000 i ka wa e oili ai ka niho mua loa o ke kama # liiwahine Margherita, a e loaa hou no hoi iaia he $2000 i ka wa e hiki ai i ka opio ke kamailio, a e loaa hou ana he huina oia ano i ka wa e hiki ai i ke Kama # lii opio ke hele nona ponoi iho me ke kokua ole ia aku.

            Ua pulelo ae na hae maluna o ka halealii a me na hale aupuni me ke kani olowalu pu ana o na leo hauoli o na bele no ka opio a puni o Italia.  Maloko o ka Hale Ahaolele ua hoike aku o Signor Zanardelli, ke Kuhina Nui, i ka hanau ana o ke Kama # lii opio, ua hoopaanee koke ka Hale me ka hele ana aku o na hoa e haawi i ko lakou mau kahoahoa ana no ka lakou malihini hou ma ka halealii.

            Ua hoolaha ae nei ka Papa Ola he rula e papa loa ana i na poe a pau aole e kuha maluna o na kaa hoolimalima a pau, a o ka mea e kue ana i keia rula e hoopai ia no oia he $10 a pu aku.

            Ua apono aku la ka mana hooko o ke aupuni i ke noi a ka hui kaa uwila e hoomoe ia i alahao pololei no lakou ma ke alanui Moi mai kahi hoolulu kaa @apaumi mai mauka o Kapalama hoea iwaho o Pawaa.

 

KANAHIKU OLA I POINO I KE # AHI

 

            Kikako, Iune 2.  He lono kui kawa kai loaa mai nei i ka Tribune mai Oaxaca, Mekiko mai, e olelo ana:

            O na hoike e pili ana no kela pauahi nui i pahola ae ai ma ka puali o Tehuantic no kekahi mau la ua loaa mai nei ia i anei.  Ma kahi o 70 poe i hiki ole ke pakele mai ka pahola awiwi ana a na alelo o ke ahi a ua pau lakou i ka make i ke ahi.  Ua hoomaka ka a ana a ke ahi mai kekahi mahikope, a mamuli o ka maloo o na laau ulu malaila, iloko o ka manawa pokole ua hiki ole ia ke hoopio ia aku.  He mau tausani eka o na mahi kope, maia, alani a me kekahi mau hua ai e ae i hoopoino ia.  O na poe i make o na ohana no ia o na limahana e noho ana ma keia mau aina, a ua make no kekahi poe iloko o ko lakou mau papai hale.  He umi la o ka a ana o ke ahi, a na kekahi mau kuaua koikoi i hoopio aku iaia.

 

HALAWAI HOU NA BERITANIA ME NA BOA.

 

            Pretoria, Iune 5.  O Konela Wilson me 240 kanaka o Kitchener e hakilo ana i ke kulana o na enemi, ua lele kaua aku lakou maluna o 400 Boa malalo o Beyer iloko o ko lakou nanea nui a hoauhoe aku la ia lakou, ma kahi he 34 mile ma ko komohana o Warm Baths.  Ua kue mai na Boa me ka ikaika, aka, ua nahaha lulii nae lakou a pahee aku la me ka haalele ana iho he 37 i make, 100 i lawe pio ia, a o na kaa a me na lako ai a me 8,000 bipi ua haule pu aku ia iloko o ka poho lima o na Beritania.  O ka poino o na Beritania he 3 i make a me 15 i hoeha ia.  Ua hoea hou mai ka puali holookoa o Beyer mahope iho o ka hoouka kaua ana, aka, ua hiki ole nae ia lakou ke lawe pio hou mai i na lako ai.  Nolaila, ua hoonele ia ka puali holookoa o Beyer me ka ai a me na kaa haliahli ukana.

 

E HOLO AKU ANA NO AMERIKA.

 

            Maluna o ka mokuahi @Kina e hoea mai ana i anei i keia la mai Kina a me Iapana mai, e haalele iho ai o Lunakanawai Humepera ma kana wahine no Kapalakiko.  Mailaila aku e holo aku ai laua no ka home o Humepera ma Columbus, Misisipi, a mahope o ka hoomaha ana malaila no kekahi mau la e holo loa aku ai laua no ka Hikina a me he mea la e kipa aku ana laua i Wasinetona e ike ai ia Peresidena Makinile @@ mea i ike ia iho nei maanei.

 

HALAWAI ME KA ULIA POINO.

 

            Oiai, kekahi kanaka Geremania e kalaiwa ana ke kaa ukana e huki ia ana e kekahi hoki mawaho iho o ka hale hana uwila ma ke alanui Alakea, ma ka Poakolu nei, ua hili aku la oia i ka hoki ana e kalaiwa ana, aka, ia wa no ua haule aku la oia mai kana wahi e noho ana mawaena o ke kaa a me ka hoki.  Ua haawi koke mai ka hoki i na peku mahanahana ana, a i ka wa i hoea aku ai na kokua ua eha loa oia.  Ua hoea koke aku ke kaa makai no kahi a ka mea poino e waiho ana a lawe aku la iaia no ka haukipila, aka, he hookahi hora wale no nae ona maloko olaila ua lele laoa ae la kona hanu.  O Wilhelm ka inoa o keia haole, a he 45 ka nui o kona mau makahiki.

 

            Ma keia Poalima i piha ai ka makaniki o ka hoomalu ana mai o na kaa wai o Amerika Huipuia maluna o keia mau Paemoku.

 

NA ME E HAUOLI AI OE.

 

            Ma ka heluhelu ana i keia hoolaha aole wale no oukou e ike iho ana i keia mau waiwai, aka, e ike pu iho ana oukou i na kumukuai hoemi loa a Painapa ma e malama nei i kela mau la.

Na Uhimoe Nani

            O ka loaa ana mai la no ia ia makou o na Uhimoe nani, Kihei Puu, a me kekahi mau waiwai e ae mai.

Enelani Pololei Mai,

            Ua kau aku makou ma na kumukuai e loaa ai ia oukou apau: C

                        NA UHIMOE C No na moe pakahi $1.25 a me $3.00

                        NA UHIMOE C No na moe palua, $1 a pu aku i ka $9.

            O na mea a makou e hoolilo nei no ka $5, $6.50, $7.50, $8 a me $9 he nani no ia a ka maka e ike iho ai.

Na Pale Hoonani Moe.

            He nui a he lehulehu na ano like ole i hana maiau ia o keia au ou o na lihilihi, a pela aku, ma @ @ @ kou halekuai.

Na Uhi Pale Kaa.

            He mea oiaio, he nui no na pale uhi kaa ma Honolulu nei, aka, ma kahi wale no a Painapa ma e loaa ai na mea maikai loa.  Na Pale Lilina o na ano a pau a me na waihooluu like ole mai ke 75 c, 90c, a ka $1.25.

B. F. EHLERS & CO.

(PAINAPA MA)

Alanui Papu.