Ke Aloha Aina, Volume VII, Number 21, 25 May 1901 — Page 6

KE ALOHA AINA

 

6  KE ALOHA AINA, POAONO, MEI 25, 1901

 

HOOUNAIA NA PALAPALA KII

 

            O ka hihia lawe kipe a me na hana ekaeka e ae a na hoa o ka Ahaolelo oia ka mea ano nui e hauwawa ia nei i keia mau la mawaena o na poai like ole o ke kulanakauhale nei. A ke hoomau nei no hoi ka Aha Kiure Kiekie i ka huli ana i ka poe i hana hewa.

            Ua hoopuka ia na palapala kii e Lunamakanawai Humphrey no ka lawe hou ana mai ia Loio Kuhina E. P. Dole, Kuhina H. E. Kupa a me Loio L. A. Kakina e pane pololei i ka lakou mau ike imua ona, oiai, ma ko lakou lawe mua ia ana mai e niele ma kela pule aku nei ua hoole loa lakou i ka hoike ana i ka lakou mau ike o ka Aha Kiure Kiekie.

            Wahi a E. P. Dole imua o ka Aha Kiure Kiekie i kona lawe mua ia ana e niele ma la ka la 15 o Mei: Ua loaa mai ia'u he mau hoike mai kekahi poe mai. O kekahi mea nana au i hai mai a i hoike mai ia'u i na inoa o kekahi poe aole au e hoike ana koe wale no ma ka hoopii ia ana ma ke kanawai. Ua haawi ia mai keia mau inoa ia'u malalo o ke lakou hilinai ia'u a nolaila, he mea pono ole ia'u ke hoike aku i ko'u mea i lohe mai ai.

            O ka Henry E. Cooper pane ma ia la hookahi no o Mei 15 imua o ka Aha Kiure Kiekie.

            Ua loaa mai ia'u he mau hoike no kekahi waihona haumia i hoa@ ia, ua kuka maua i keia hoike me Kiaaina Dole, a ua kue au i ka hoike ana aku ia mea i ka Aha Kiure Kiekie.

            Ma ko Loio Kakina ninau ia ana hoi ma ia la no, o kana pane

            O na hoike wale no i loaa mai ia'u mai kekahi kanaka no ia a'u e noho loio nei, a ua hiki ole hoi ia'u ke hoike aku i kona inoa me kona ae ole mai. Wahi a ko'u mea nana au i hoike mai: He ekolu mau hoa o ka Ahaolelo i noi dala aku iaia mamua o ko lakou ae ana e kakoo i kana bila, ua uku ia aku ke dala i kekahi hoa o ka Ahaolelo no kona kokua ana i keia bila, ke hoole loa nei au i ka haawi ana aku i ka inoa o ka mea a'u e noho loio nei, ma muli o ko'u manaoio he loio au nona pela au e hoole nei, a ke hoole pu nei hoi i ka hoike i ka bila a ua mea nei i manao nui ai.

            Ua hoole na Senatoa Rusela a me Kale Aki i ko laua hoea ana mai maloko oia palapala kii, oiai, e noho ana ka Ahaolelo he mau hoa kiekie laua e hiki ole ai i ke aupuni ke hopu aku ia laua.

            Mamua o ko Kiaaina Dole haalele ana iho i ke Kapitala nei no ka hoomaha ana ma Waianae i kela Poakolu aku nei ua waiho aku oia i kana hoike imua o ka Aha Kiure Kiekie.

           

UA HOEA AKU IMUA O HUMEPERA.

 

            Ma ke kakahiaka Poalua nei i hoea ae ai o Loio Kuhina Dole, Kakauolelo Kupa a me L. A. Kakina imua o Lunakanawai Humepera o ka Aha Kaapuni Ekahi. No ka pane ana aku imua o ua aha la i ka lakou mau ike e pili ana no ka lawe kipe e hauwawa nui ia nei. Oiai, ua hoole loa aku lakou i ka hoike ana i ka lakou mau ike i ka Aha Kiure Kiekie.

            Ua hoopiha ia ae ke keena hookolokolo me na poe makaikai no ka hoolohe ana i keia hihia ano nui, a he hapanui o lakou he poe loio, mau hoa hanohano o ka Ahaolelo a me ka lehulehu.

            Ma ka ninau ia ana o Loio Kuhina Dole no kana ike, ua hoike mai oia ua pau no kana mau hoike i ka Aha Kiure Kiekie me na inoa o ka poe nana oia i hoike mai. Ua ike ka aha ua pololei kana mau olelo a ua hookuu ia mai oia.

            Ma keia wahi i ku aku ai o Loio Kuhina Dole ma ka aoao o Kiaaina Dole a me Kakauolelo Kupa a pale aku ia me ka olelo aku i ka Lunakanawai aole loa he mana oia aha e hookolokolo ai ia laua, oiai laua e paa ana i na oihana kiekie loa o ke aupuni. Ua heluhelu aku oia i na buke kanawai i kahi e hoole loa ana i ka mana o ka Aha Kaapuni i ka niele ana ia laua. A iaia wale no ka manawa o ia kakahiaka a hiki i ka hoopanee ana o ka aha ma ke awakea.

            Eia no ka Aha Kiure Kiekie ke hookolo mai nei i ka meheu kipe, a i ka Poalua nei iwaena o na poe i hoea aku imua o ia aha o Senatoa D. Kalauokalani, Senatoa S. E. Kaiue a me Lunamakaainana Mokimana a me Jas. Kaulia.

 

HAKAKA HOOKALAKUPUA O KE KULUAUMOE.

 

            Ma ka hora 10 o ka po Poakahi nei, ua hoohikilele ia na poe e hele ana ma na huina alanui o Puowaina a me Beritania i ka leo uwe kapalili o kekahi wahine e kahea ana i mau kokua no ka hoopakele ana iaia.

            Ua holo aku kekahi poe me ka manao e haawi i na kokua i ka mea nona ka leo uwe a lakou e lohe nei, aka, i ka hoea ana aku nae ma ka ipuka hale o ka leo uwe e pae mai ana, ua ike aku la lakou mahope o ka pale puka hakahaka he kane e pepehi ana i kana wahine, iloko o ko kaua mau aahu moe po.

            E hoao ana ka wahine e hoopakele iaia iho mai na puupuu a kana kane e hoolei pau ana maluna ona, a i ka hope loa ua hina aku la ua wahine nei iluna o ka papahele, a ike ia aku la ua kane la i ka lalau ana iho iaia a kiola aku la iluna o ka moe.

            Me ka menemene o na poe e ku aku nei a me ka manao kuhihewa ua make loa ka wahine, ua holo koke aku la kekahi mea e hoike i ka halewai.

            I ka hoea ana aku o ka makai i ka hale o keia hakaka i malama ia ai, ua oili mai la ke kanaka i hoeha ai i ka wahine a hoike mai la aole mau uluaoa i malama ia malaila, a ua hoea pu mai hoi kana wahine a hoike mai la, aole i hoeha kana kane iaia. A ma ia wahi i hoike mai ai ke kane he loaa mau keia wahine i ka ma'i huki, a ma na minute mamua iho ua loaa iho la oia i ua ma'i nei, nolaila, ma keia hoike ua hoi nele mai la na makai me ka lawehala ole.

 

NA LONO O PILIPINE.

 

            Manila, Mei 10. Aia o Cailles, ke alakai o na Pilipine o ka apana o Laguna ke uhai ia la e na pualikoa Amerika. Ua manao ia ua hala aku la oia no ka hema o Laguna, a aole loa hoi oia e haawi pio ana, ma o kona hopohopo e kau mai ana he hoopai koikoi maluna ona no ka nui o na ola ana i pepehi ai. Ua lele kaua mai na Pilipine ma ke ahiahi Poalua nei ia Paglibac, a ua hoauhee ia aku me ka poino ole o kekahi ola. He puali o ka regimana 21 kai halawai aku me na Pilipine ma kahi kokoke i Luhban a ua hopu pio ia e na Amerika he lehulehu wale o na lako ai.

 

MOKUAHI NO NA ONA MILIONA.

 

            Eia o J. P. Morgan ke hoolala nei no ke kapili ana aku he elua mokuahi Amerika no na ohua noonoo ole i ke dala. O keia mau moku e holo ia ana e laua mai Amerika no Enelani maloko o na la he elima, e lawe ana laua i na ohua o ka papa ekahi wale no, aole lakou iloko o na keena pakahi, aka, iloko o ekolu a i ole eha rumi i hoonani ia me na nani like ole. O ka rumi hooluana o ka lehulehu e hoonani ia ana ia e na poe kahakii akamai, o loko o ka rumi aina e hoolako ia ana ia me na pakaukau liilii e like me ka Hotele Ritz. E lawe pau ia ana na bipi waiu Jersey a me na moa ola no ka hoolako ana i ka papaaina me ka waiu a me na mea ai makamaka hou loa. E hoolaku pu ia ana ka moku me na keena hooikaika kino, keena heluhelu, lapaau, kauka akamai, kakau pokole, ako lauoho a me na keena no na ilio. O ka auhau haahaa loa maluna oia mau moku no ka huakai hookahi he $1000.

 

HOKU HAULE NUI.

 

            Cumberland, Mei 9. He hoku haule i like me ka la kona nui a me ka malamalama, ua haule iho la ia ma ka po nei ma kahi kokoke i Hyndam, he 14 mile ma ke komohana akau mai keia wahi aku, a pahu ae la ma kahi kokoke i ka hale olo papa o Close i kona wa he 100 kapuai mai ka honua ae.

            Ua hoonaueue ia ke taona, me ka hoonakeke ia o na puka aniani a me na pa, a o na apanapana hao mai ua hoku haule nei ua lele liilii ae la maluna o na kaupoku hale. He nui na apanapana o keia hoku i loaa. Ua hoomalamalama ae oia he mau mile i kona wa e iho mai ana no ka honua. O kona malamalama oikelakela a me kona pahu ana ua hookomo aku ia i ka piha weliweli iloko o na mea a pau, a ua haule iho kekahi poe maluna o ko lakou mau kuli a haawi ae la i na leo pule. Kupaianaha no na hana a ke Akua.

 

OIHANA KAUA MOANA MA KA HOIKEIKE O BUFFALO.

 

            O kekahi o na mea ano hou loa ma ka hoikeike o ka oihana kaua moana i ka hoikeike nui ma Buffalo, Nu Ioka, oia no keia:

            Aia maloko o kekahi keena he palapala aina nui o ka honua nei nona ka loihi he 16 kapuai, laula 8 kapuai, a maluna ona e hookau ia ana na kii o na mokukaua a pau o ka oihana kaua moana o Amerika Huipuia.

            Ma kela a me keia la e loaa mai no na hoike telegarapa o kela a me keia wahi a na mokukaua e hoolulu ana a i ole e nee, a oia mau hoolulu a ole nee ana e hoike ia ana no ia maluna o ua palapala aina. Nolaila, maluna o laila e ike ai na makaikai i ke kahua o kela a me keia mokukaua Amerika e ku ana a i ole i nee aku ai.

            Ua hana pu ia he awai o 16 kapuai ka loihi i hoohalike ia me ka oneki o ka moku, a maluna olaila e ku ana he mau kii kulana aliimoku kiekie a hiki i ka luina haahaa.

            O keia mau kii moku Amerika, he eha o na mokukaua i komo ai ma ka hakaka o Manila, elima o ka hakaka mawaho o Santiago, ka moku luu Holland, ka Vesuvius, ka moku kiola dainamita kaulana a me ka moku haukipila Solace.

 

            Ma ka Zealandia e hoea mai ana i ka Poaono ae nei e loa mai ai na hoike o ka hoea ana ae la o Makinile i Kapalakiko.

            Ma ke Zealandia e loaa mai ai na hoike a ka Elele Bekele no kana huakai hoopii aku nei ia Dole imua o Makinile. E ku mai ana ma keia Poaono.