Ke Aloha Aina, Volume VII, Number 21, 25 May 1901 — Page 4

KE ALOHA AINA

POAONO, MEI 25, 1901.

Ke Aloha Aina

Hookumuia no ka

Pomaikai o ka Lehulehu, a he Nupepa na ka Lahui Hawaii.

EDWARD L.LIKE

Lunahooponopono.

HOGAN E. KALUNA

Kuna Hoopuka

ALEX NAWAHI.

Luna Hoohana.

EMMA A. NAWAHI

Puuku o KE ALOHA AINA.

 

PUKA PULE.

E hoopuka ia ana ma na kakahiaka

l@oao@o a pau.

No ka Makahiki                     $2.00

No ka Eono Mahina               $1.00

No ke Kope Hookahi                 .50

 

KEENA HANA.

  Ma alanui Moi, Leleo, Helu 370, Kokoke ma ka Hale Hoolulu Kaaahi.

Pahu Leta 512.

HONOLULU                         MEI. 25, 1901

 

KO KE ALOHA AINA KULANA.

  He nui ke ohohia ia o KE ALOHA AINA i keia mau la ma ke kulanakauhale nei a ma na kuaaina pu.

  Ma ke Kinau a me Mauna Loa, a pela pu hoi me na mokuahi mai Kauai mai la i hiki hou mai ai i ko makou keena nei na kauoha pepa i aneane e haneri mau inoa hou loa, he mau inoa malihini loa i ko makou keena nei ka hapanui oia poe.

  Maloko o elima makahiki o ko makou noho lawelawe ana ma keia hana, aohe makahiki i oi ka lawe nui ia o ka pepa e like me keia; i ia mai no ka nui maoli no o na mea hou a kona poe heluhelu e hoohiala ai iho ai a lawa ka makemake. Oi-a no.

  Nolaila, he mea pono io no e lawe nui i ka nupepa e ka poe aloha aina Kuokoa oiaio i ike mau i ke ano o ko kakou kulana kalaiaina, a i ike pu hoi i na mea hou o na aina e a me na mea pili i ka Elele a ka poe Home Rula Repubalika.

 

UA MIMINO KOKO NO.

   Iloko o keia mau la pokole wale no mahope o ke kakauinoa ia ana o ka bila haawina o $30,000 e Kiaaina Kuikawa Kupa no na hoolilo o ke kau Ahaolelo Kuikawa a me na aie i uku ole ia o ke kau mua i pau iho nei, na ike ia he aneane loa ia e puehu, penei ke ano o ka puunaue ia ana o na mau dala la:

  He $18,17736 o loko o ua haawina la e lilo no ka uku ana i na hoa hanohano o ka Ahaolelo a me na kanaka lawelawe o loko o na hale kau kanawai, oia hoi, he $9,000 e lilo ana ka uku ana i na Senatoa a me na Lunamakaainana he 45; $600 no ka uku ana i ko lakou mau uku mile o 10 keneta o ka mile hookahi, a ke hui ia na lilo i na hoa hanohano wale no e hoea aku ana no ia ka $9,600.

  He $8,577.36 ka lilo no na poe lawelawe o na hale elua e like me ke Kakauolelo, Hope Kakauolelo, Kakau Pokole, Makai, Elele, me Pulumi Hale, lilo no na bila o ke pa’i ana, pepa a me na lilo e ae.  E koe ana iloko o ka waihona o ka Ahaolelo he $11,822.64, aka, ina e uku ia ana ka aie e ku nei o ka Ahaolelo mau i pau iho nei e koe ana i ka Ahaolelo he puu dala o $3000 wale no maloko o ka waihona.

 

MANA KUPAIANAHA I LOAA IA KANAKA.

  He mea pahaohao kai ike ia mai nei ma Sepania, oia hoi ka hiki ana ia Tancredo Lopez, he kanaka opio ke hooiakalaka i na bipi bulu ahiu loa me ka mana i loaa i kona onohi ike.  E kahiko ia ana, ua moi nei o ka wiwo ole (oia ka inoa kapakapa i haawi ia aku nona) iloko o ka aahu keokeo a lawe ae la i kona kulana maloko o ka rina o na holoholona hihiu e hookuu ia mai ai.  A me kona oiwi kilakila e ku oni ole ana me kona mau lima hoi e pea ana ua nana pololei aku la oia i ka bipi bulu ahiu e holo mai ana imua ona.  He mau minute keia o ka weliweli a me ka pihoihoi, a he manaolana hoi ko na mea a pau e make ana ke kanaka opio, aka, i ka wa nae a ka bipi bulu i hoea mai ai imua o kona alo ua ku koke iho la oia, a mahope o kona hanuhanu ana i ke kanaka opio ua huli ae la ua bipi la me ka hoopoino ole aku a haalele aku la iaia. O Tancredo mamua aku nei he kanaka haahaa hana kamaa wale no oia, aka, i keia wa ke loaa nei iaia he $200 pakahi i kona wa e hoike ai i keia mana kupaianaha i loaa i kona maka.

 

HOOLE  O  LANSING  I  KA  HOIKE  ANA.

   Ua lawe ia aku ka hoike a ka Aha Kiure Kiekie imua o ka Aha Hookolokolo Kaapuni no ka mea e pili ana ia T.F. Lansing, oia hoi, ua hoole oia i ka hoike ana aku i na inoa o na poe i noonoo ia ma kekahi halawai a ka Mana Hooko o ke Aupuni i hilinai ia ua komo pu ma keia hihia kipe.  Ua like kana mau kumu i haawi ai me ka McCandless, koe wale no ua kaawale oia mai ka oihana aupuni he ekolu ae nei pule i hala a ua maopopo ole iaia na loli i ike ia mahope mai oia manawa.-Mai ka Hoku mai.

 

  Ua hoea mai la maluna o ka mokupea S. C. Allen, he mau kaa ohua no ka hui kaa uwila Rapid Transit mai Kapalakiko mai.

 

E HOOLOHE I KEIA

  Ke kauoha ia aku nei na Luna a me na poe ma ka owili pakahi he aie ko lakou i ka Nupepa KE ALOHA AINA e hookaa koke mai.

MA KE KAUOHA.

 

WEHEIA KA AHAOLELO O AUSETERALIA

  Melbourne, Mei 9.    O ke Duke o Cornwall a me York, ke keiki a ka Moi Edewada VII, ua wehe ae la oia i ka Ahaolelo Auseteralia ma Melbourne, i keia awakea.  O ka hale kahi i malama ia ai e na kanaka maluna aku o 12,000. Ua haawi ae ke Duke he haiolelo a i ka pau ana ua loaa mai la keia telegarapa mai ka Moi mai: “O ko’u noonoo aia ia me oukou ma keia la hauoli.  Ke iini nei au i ke aupuni o Auseteralia e loaa ka hauoli a me ka holomua.”  Mahope o ka hoohiki ia ana o na hoa ua hookaawale ae la ua mau hale nei a hoomaka aku la laua i ka laua mau hana.

 

EIA AE O AGUINALDO.

  Ma na lono i loaa mai la maluna o ka mokuahi Pekina mai Iapana mai.  Ua manao loa ia aia o Aguinaldo, ke ahikanana o na Pilipine maluna o ka mokukaua Oregona e huli hoi nei no Amerika.  Ua hoea ae ka Oregona i Iokomama he la mamua o ka haalele ana aku o ka Pekina ia awa, no ka hoopiha nanahu ana a holo mai no keia awa.

  Ua oleloia ua hoopaaia o Aguinaldo iluna o ka mokukaua Nashville a mailaila oia i hookauia mai ai iluna o ka Oregona.  Ina he oiaio keia mau lono i hoea mua mai la, alaila, e ike ana kakou i kekahi kanaka kaulana o ke ao nei.  Ka mea hoi i hoike ia ma na manawa lehulehu ua make i na poka a na Amerika.  O ke kumu o kona laweia ana no Amerika aole he maopopo, aka, malia paha no ka hoopaa no ia ma ka hale paahao koa ma Alacatraz.

 

HE  MA’I  SAMOLA  POKI  HOU.

  Ua ike hou ia ae la he ma’i samola poki iwaena o na limhana Porto Rico o ka hui mahiko o Waimea,  O ka mea i loaa iho la i ka ma’i he Porto Rico hapa paele, e ua ike ia kona ma’i ma kela Poalima aku nei, Mei 17.  He oi ae ka ikaika o kona ma’i i ko na mea mua.  Aia ke kiai paa ia la kona hale, a ma keia wa e hooiloa ia aku ai ka ikaika o ka hoomalu ana ma na wahi a ka ma’i e oili ai.  Aia ka mea i loohia i ka ma’i ke waiho la iloko o ke kulana ehaeha loa me ka maopopo ole o kona hopena.

 

LA  HAUOLI  O  KA  UHANE  HEMOLELE.

  E haawi ia ana e na hoahanau Katolika he elua la hauoli Uhane Hemolele maloko o ka pa luakini o Malieokamalu ma ke ahiahi Poaono a me ka La Pule, a o keia iho ka papa kuhikuhi.

 

POAONO MEI 25.

  Hora 7p.m. hoomaikai ia ana o na makana e haawi ia aku ai i ka poe ililhune, wehe ia ana o na mea kuai no ka pomaikai o ka ahahui.  He mau leo puhi ohe mai ka bana aupuni mai.  E hoomalamalama ia ana ke pa luakini me na kukui uwila o na waihooluu like ole.

 

LA PULE MEI 26.

  Hora 7 a.m. haawi ia ana o na makana i na poe ilihune a pau.

  Hora 10:30 a.m. pule mesa ma ka olelo Pukiki.  E hoonani ia ana e ka bana o Sana Lui.  He kai huakai ana me na hae mamua a mahope o ka mesa.

  Hora 1 p.m. ahaaina a ka poe ilihune he umi –kumamalua.

  Hora 3 p.m. ahamele na ka ka bana aupuni.

  Hora 5 p.m. panina o na hana lealea.

 

HALAWAI ME KA ULIA POINO.

  Ma ka hoea ana mai nei a ka Mauna Loa ua lawe mai la oia i kekahi lono o kekahi ulia weliweli i ike ia ma ka mahiko o Holualoa, ma ka Poaono aku nei.  A ua make o Miss Kekoa nona na makahiki he 11 a pakele mahunehune mai hoi kona kokoolua nona ka inoa o Noa Kealoha he 9 makahiki.

  E paani ana keia mau opio ma ke alahao kahi kokoke i ko laua home, a ma ka hora 11 o kakahiaka la ua hoopiha iho la he mau kanaka i kekahi mau kaa pohaku no ka lawe ana aku ma kekahi aoao aku a na keiki e paani ana.  Oiai he iho’na keia wahi a ke kaa e holo aku ai ua ikaika loa kona holo, aole no hoi i ike ka mea maluna o ke kaa i keia mau opio e paani nei a hiki i ke kokoke loa ana, aka, ua hala nae ka wa pono no ka hoopakele ana ia laua.

  Ua hookui ia aku o Kekoa e ke kaa ma kona umauma a pii aku la kona mau huila maluna o ke kino o ka opio, he nanaina kona i piha me ka mainoino a iloko o ka wa pokole mahope iho ua lele loa ae la kona aho.  O Noa ua hookui pu ia no oia e ke kaa, aka, o kekahi wawae wale no nae kona i pii ia a ua manao ia e oki ia aku ana ia.

  Ua noho ka Aha Koronero a ua hooholo he make ulia keia me ka hoahewa ole ia o kekahi mea.