Ke Aloha Aina, Volume VII, Number 20, 18 May 1901 — Page 7
| This text was transcribed by: | Aki Astrid Dinda |
| This work is dedicated to: | a Luisa a me Paulina |
KE ALOHA AINA
POAONO, Mei 18, 1901. 7
MOOLELO HOONI PUUWAI
---: NO :---
Kuu Aloha i na Pua, Kuu Ipo o na Launahele!
---
Ka Makaikiu Kupaianaha!
---
MOKUNA VII.
HANU KE KIU MA KA MEHEU. – KE KUPAIANAHA O NA KUPAIANAHA.
Ua hawi mai ua lede kauwa ala i ka nana pono ana mai i ke ano o ke kii me ka ninau pu ana mai. Ua maopopo no anei ia oe ka inoa o ka lede nona keia kii?
Ae hoi paha, aka, eia no nae paha hoi ua lede ala maloko nei o keia hale? wahi hou a ka makaikiu.
Aole ia o ka’u ninau, e pane mai oe i ka haina, a i ole pela, alaila, e pani aku no wau i ka puka imua o kou mau maka, wahi a ka lede kauwa me na huaolelo o ka pane pakike ana mai.
Alaila, aole no hoi ia o ka’u ninau ia oe, he okoa mai nei hoi kau pane. O ka inoa o keia lede nona keia kii aia no ia me ia, aka, o ka’u wale no i makemake ai, oia kuu ike eia paha oia maloko nei o keia hale aole paha, nolaila, e ka lede, ke hoao oe e pani mai i ka puka imua o kuu maka me ko hai ole mai i ka haina o ka’u ninau, alaila, e lohe na lani, me ka oiaio loa, o ka’u hookani iho la no ia i keia bele a hiki i kona kani hou ole ana iluna o ka papahele. Iloko keia pane piena a okalakala a makaikiu, ua hoopuiwa loa ia ka lede kauwa a holo aku la oia iloko o ka hale me ka mama nui me ke pani ana mai i ka puka.
MOKUNA VIII.
FEA IU WELA E KUU HOME – KA ULUWEHI O LADANA – KE ALOHA HOOLUHI I KE KINO – KA HAKU O DANEKOTA KAKELA.
Ma ke ahiahi o ka la a kela leta a ka makaikiu Beleinehama i loaa mai ai me kela mau huaolelo e olelo ana. Imi au i ko aloha i Parisa aole i loaa, no ka mea, ua hala e aku la ka puulena ua au i ke kai, alaila, me na manaolana poho o ua Silevia nei, ku ae la ia iluna me ka huli ana ae a nana i na paia mehameha o Lokowai Home, a kamailio hope ae la ia i keia mau olelo:
O! E na lani, o keaha la oe i hoehaeha mai ai i kuu uhane? O ka manaolana a kela keonimana opio i haawi mai ai ai’u, eia kana mau olelo ke hoike moakaka mai nei me ka hoohewahewa ole aole loa he manaolana, aole hoi he manao io hou ana aku e loaa mai ana ia’u he wahi pono. Nolaila, elike me ka’u i hooholo hope loa ai i ka’u i hooholo hope loa ai i ka’u olelo, e haalele iho ana au ia Lokowai Home nei a aea aku iluna o ka loa a me ka laula o ka aina, ma ke ano he wahine malihini i nele i kahi makamaka ole, aka, hookahi no nae o’u makamaka o kuu luhi a me kuu milimili o na kau a kau, a ina he mea hiki i ke koko o na luhi ala a’u ke hookau aku maluna o ke poo o keia kanaka lokoino, alaila, e aloha mai ia’u e na lani. Ae, e na lani, aole loa au e noho hou ana malalo o ka malumalu o keia home mehameha. Aole hoi i ka hoi hou ana aku imua o ke alo o kuu makuahine aloha a’u i hanaino ai me ka he wa ole e hiki ole ai ke kala ia, a e kuu kamaiki bebe i haalele ia i keia ao, ano, ua hiki mai ko kaua hora hope ma keia home mehameha.
Mahope iho o kela mau olelo a Silevia, kahea ae la ia i ka wahine malama keiki, a imua o ua wahine ala, i hoike aku ai oia i kona manao no ka haalele ana ia Lokowai Home. Ua kamailio aku ua Silevia nei me na olelo ku i ke aloha e hiki ole ai i na waimaka o Jinnie ke paa, alaila, elike me ke kulana o ka haku wahine hoopono e makee ana i ka hanohano o kona inoa, wehe ae la ia i kana ekeeke a lalau iho la i na okeni elike me ka nui o kona aie i ka wahine malama keiki, alaila, me na huaolelo hope o ke aloha haawi aku la ia i ua mau dala ala, wahi a ua Silevia nei, lawe aku i keia, no ka mea, o ko’u aie keia ia oe, a e hoomanao iho, i keia hora e kaawale ai oe mai ia’u aku a pela hoi au ia oe, a na na lani e hoopomaikai mai ia kaua.
Aole he huaolelo e ae o ka mahalo a me ka makee a ua wahine malama keiki ala i haawi mai ai maluna o kona haku wahine aloha, aka, he hookahi wale no, o na kulu waimaka e hanini ana, alaila, ua hoouna aku la oia (Silevia) no Hana ka lede kauwa a lawelawe o ka hale, a elike me kana i hana aku ai ia Jinnie, pela no i keia wahine, a he mea oiaio e ka mea heluhelu ma ka olelo pokole ana ae, aohe minute e ae i ike ia ai mawaena o ka haku a me ke kauwa elike iho la me keia mawaena o Silevia a me kela mau wahine kauwa.
Alaila, mahope iho o na minute o ke aloha a me ka walohia, aia ua ui Silevia nei a me kana lei bebe ua makaukau no ko laua minute hope loa e haalele iho ai ia Lokowai Home. O ka lole a ua Silevia nei i komo ai ma kona la i haalele hope aku ai i kona home kulaiwi aloha, oia kana e aahu a e komo ana ia minute, a o na aui, a me na nana hope ana ae maloko o na paia o Lokowai Home, oia ka ua Silevia nei i haawi hope ae ai, alaila, kanaenae hope ae la ia i keia mau olelo maluna o kona mau lehelehe.
Gude bai! Ma keia wahi au i noho ai iloko o ka hauoli nui, ma keia wahi hoi au i ke kakahiaka a me ke ahiahi i kukuli mau iho ai a haawi aku i ka’u mau leo pule nona imua o ka paepae ihiihi o na lani, aka, ma keia wahi eia au ke waiho a ke haalele iho nei i ka’u mau kue ana no ka poino a me ka ehaeha ana i lawe mai ai maluna o’u, a ke haalele a ke waiho pu iho nei au i ka’u mau kue ana iaia no kuu inoa maemae, kuu ola i mae a me kuu puuwai i weluwelu, a e lilo hoi ka’u mau kue ana a pau e haalele iho ai mahope nei i mea e loaa ae iaia na hooluolu ia, ke hoea mai ka la ana e nonoi a e imi ai i na huikala ana ia, no ka mea, aole loa e loaa ana iaia ua mea ala, oiai, o Silevia i haalele ia me ka hoowahawaha iloko o keia ao, aole ia malalo o kou mau kaupoku e Lokowai Home.
Me kela mau olelo kanaenae a Silevia, owili ae la ia i kana bebe iloko o kekahi kihei huluhulu manoanoa, a he kani ana no ka laka a me ke koele bang ana o ka puka, aia ua Silevia nei e ku ana me kana bebe iwaho o ke ala loa malalo o ka malamalama o na hoku o ka lani, alaila, huli hope mai la ia a nana maluna o ka home ana i haalele iho la, a kahoahoa hope ae la i keia kanaenae: Fea iu wela e kuu home, Fea iu wela; Fea iu wela hoi e kuu aloha lokoino. Fea iu wela kaua no ka wa mau loa.
Alaila, leha ae la oia iluna i ka poiuiu o na paia lani, a me kona mau waimaka e hiolo ana, puili ae la ia i kana bebe iloko o kona poli a nonoi aku la i na lani e haawi mai i kana mau hoomaikai ana maluna o laua, no ka mea, wahi a ua Silevia nei, eia laua iluna o ke ao akea he mau kuewa a aea i haalele ia e ke kane mare, a i ole e ka makuakane.
Alaila, iloko o kela pouia o ka po a me ka nele i ka makamaka ole, heaha ka hana a ua Silevia ehaeha nei? Haawi aku oia i kana mau paulele a hilinai ana i ka mana lani a iloko o kana mau kiai a malama ana e loaa ai ia laua ka maha a me ka palekana, aka, i ka hahai a hookolo ana aku mahope o ka meheu o ua Silevia ala, alaila, e loaa aku ana no oia ia kaua he mau la lehulehu loa mahope iho o kona haalele ana ia Lokowai Home, e maalo a e komo aku ana iloko o ka nani a me ka uluwehi o Ladana, ma ke ano he wahine opio hune a me ka nele, no ka mea, maloko o kana wahi aa moni, aia he mau wahi keneta kakaikahi wale no koe.
Ae, aia ua Silevia nei ua komo aku ia iloko o ka uluwehi o Ladana kela kulanakauhale pookela o ka haaheo i olelo ia, aole loa e napoo kona la, o na hoao a me na hooikaika ana e loaa iaia he hana, oiai, na la e puipui ana kona waihona ua ko ole, alaila, mai ka piha a mahuahua o kona waihona a hiki wale i ka alualu ana iho la, akahi no a komo iloko o Ladana, a ina aole e loaa ana iaia he wahi hana, alaila, he mea maopopo e make ana laua i ka pololi, a ehia mea aloha o kela kamaiki bebe hewa ole, ka ili ana mai o ka ehaeha ona hala a kona mau makua maluna o kona kino palupalu.
Ma ka aoao o kela makuakane, aia he karaima koikoi o ka pepehi kanaka ke kau a ke kuni ia ma kona lae, ina e haule a make ana keia keiki bebe no ka pololi, a ma ka aoao hoi o keia makuahine, aole no oia e hemolele loa ana mai na ahewa ia ana mai e ko keia ao, no ka mea, aia no he waihona i hookaawale ia no laua e Ailika Lema, aka, aole nae ua makuahine ala i lawe ae ia mea i mea e hoopakele ia ae ai ke ola o kana keiki mai ka pololi ae, ua haalele aku oia (Silevia) i ka home a kana kane i hooili mai ai, a elike me kona haalele ana i na pono a ke kane iloko o kona inaina a me ka huhu, pela no hoi oia i haalele aku ai i na ao ana Dagalasa, ke kahunapule lima kokua a puuwai hamama, a ina oia i hoolohe a maliu i na kokua ana a Heneri Beleinehama ka makaikiu, ina la eia oia ke hui a ke noho pu hou nei me Ailika Lema kana kane, aka, aole nae pela aia oia mahope o ke aloha hooluhi i ke kino, a eia oia ke ike nei i na hana a ua aloha hooluhi nei o ke kane ke ku mai la ka hune a me ka nele imua o kona alo.
Nolaila, iloko o ka hune me ka nele, me na helehelena ehaeha o ka mihi, aia ua Silevia ala e hii ana i kana bebe, a e koele wawae ana hoi iloko o ke aluka a me ka huikau o na kanaka e hele aku ana a e hele mai ana ma ke alanui a laua e hele aku nei. O ka luhi a me ka ehaeha oia ka ua Silevia nei i hoike aku ai maluna o na maka o ka poe a pau e nana mai ana ia laua, aka, o na kokua ana ia mai, aole loa ia i aloha ia mai e na puuwai makona o ko Ladana.
O ka haawi ana iho i mau minute no ka hoomaha ana i na maopaopa a me ka maluhiluhi o kona kino, oia ka ua ui Silevia nei i lawe ae ai maluna o kekahi o na pohaku o ka uwapo Ladana, alaila, o ka ninau mua i ala mai iloko o kona noonoo. Ihea la o Ladana oia e hele ai?
O kela ninau i ala mai la iloko ona, ua like ia me kakahi kuikele e houhou ana i kona puuwai, e hiki ole ai iaia ke hoomanawanui, aka, o kana huaolelo hoopaa o ka hoohiki, oia wale no kona wahi hookanaaho ana i koe. Nolaila, iaia e noho ana me kela puuwai ehaeha ona, aia he makai ua maalo ae la ma kela kihi mao o ka uwapo, a na ka leo okalakala o ka ninau a ua makai ala i hoala ae iaia mai na poluluhi ae o na minute mua iho a pane i keia mau olelo: Aole o’u wahi e ae e hele aku ai, he malihini au ia Ladana nei.
Alaila, heaha ke kumu nui nana i lawe mai ia oe i Ladana nei ina aole oe i ike i kou wahi e hele aku ai? wahi a ka makai.
Ua hoea mai la au i Ladana nei no ka huli ana i hana na’u, wahi a Silevia.
Aha! He huli hana kau iloko o Ladana nei ea? Alaila, he lede oe i na hoaaloha ole ea? Ua make anei kau kane, no ka mea,eia au ke ike nei aia ke paa ala ma kou manamanalima he komo mare? O, he lede wahine kanemake ka oe! wahi a ka makai me ka luliluli ana iho o ke poo.
Aole i pau.