Ke Aloha Aina, Volume VII, Number 20, 18 May 1901 — Page 6

KE ALOHA AINA

 

6  KE ALOHA AINA, POAONO, MEI 18, 1901

 

W. & M. Ltd.

KUAI HOOPAU O NA PAHULOLE

No Elua Pule Wale e Hoomaka Ana

i keia Poakahi, April 29.

 

         Na Pahu Lole, na Paiki Lole, a me na Paiki Paa Lima o na ano a pau ke hoolilo ia aku nei ma ke kumukuai haahaa loa e loaa ai i na mea a pau.

         Na Pahu Lole Holomoku, 28, 30 iniha loihi, $9.90. $10.65 a pii.

         Pahu Lole o na Kane, 30, 32 iniha loihi, $16 50, $17 50.

         Pahu Lole o na Wahine, 28, 30 iniha loihi, $4 60, $4 90.

         Nolaila, e na Hawaii mai poina i ke kipa ana ae malaila a e kuai i mau paiki nou.

 

WHITNEY & MARSH.

I KAUPALENAIA.

1045 Alanui Papu.

 

 

NA HANA A KA AHAHUI EU

ANELIO HAWAII MA

HILO.

 

         Eia malalo iho nei ka papa hoonohonoho o na hana a ka Ahahui Enanelia Hawaii e malama ia ana ma Hilo, mai ka la 6 aku a hiki i ka la 12 o Iune, 1901 penei:

 

PAPA HOONOHONOHO HANA.

POAHA, Iume 6 - 9 a.m. me 1.30 p. m. Ahahui Kula Sabati; 7:30 p. m. Halawai Pule, Anaina      Hui, Haili.

POALIMA, Iune 7 - 9 a m. me 1:30 p. m. Ahahui Euanelio, Haili; 6:30 p. m., Halawai o ka          Ahahui Hooikaika no na Hana Karistiano o ka Poe Opio, ma ka Luakini Haole.

POAONAO, Iune 8 - 9 a. m. me 1:30 p. m., Ahahui Euanelio; 7:30 p. m , Ahamele, Haili.

SABATI, Iune 9 - 9 a. m., Hoike Kula Sabati; 22 a. m. Haiolelo a Rev. W. N. Lono; 2:30 p.m., ka            poniia ana o C W. P. Keeo; 3:30 p. m., Ahaaina a ka Haku; 7:30 p.m.,n Halawai Hui, Haili.

POAKAHI, Iune 10 - 9 a. m., ahahui Euanelio, Hoolauna ana i na Makamaka o na Misiona o na   Lahui Like Ole; 10 a m., Hoike Makahiki a ke Kakau Leta a me ke Puuku a me ke koho   na o na Luna nui a me ka Papa Ekahi o na Hoa o ka Papa Hawaii, Hili; 3 p. m., Hoike o           ke Kula Hanai o Hilo; 7:30 p. m. Halawai Haipule Haili.

POALUA, Iune 11 - Holo makaikai ka Aha ma ke kaaahi i Puna; po Poalua, Anaina Hoolaulea a na Wahine Haole a ka Luakina Haole.

POAKOLU Iune 12 - 9 a. m. me 1:30 p. m., Ahahui Euanelio, Ho ike a Rev. J. Leadingham me   ka ninaninau ia ana o na Keiki o ke Kula Kahunapule no na luakini haiolelo; 7:30 p. m.     Haiolelo a na Haumana o ke Kula Hanai. Haili.

 

         E loaa no na lolewawae ona keiki ma kahi o L. B Kerr no ke kumukuai haahaa o 20 keneta.

 

EIA KE HULI IA NEI.

 

         Eia ka oihana makai ke huli nei he Pukiki nona ka inoa o J. J. Silva e noho ana mauka o Puowaina malalo o kekahi kumu hoohuoi.

         He pule ae nei i hala na make ka wahine a keia Pukiki mahope o kona kaa ma’i ana no hookahi wale no la, a na kanu ia oia ma Manana, Ewa, he mau la pokole wale no i koe a oili mai he hua ohaha mailoko mai o kona puhaka.

         Mahope o ka nalo ana aku o keia wahine ua hoomaka mai la ka oili liilii ana ae o kekahi mau hoike iwaena o na Pukiki, aole keia wahine i make ma’i maoli, aka, mamuli o ia o ka hoeha ana o kana kane iaia.

         Ua hoea loa mai keia lohe i ka halewai, a o ka hopena ua hoouna aku ka oihana maikai he makai no ka lawe ana mai ia Silva e niele ia no ka oiaio o keia mau lohe, aka, aole nae oia i loaa aku ma kona home, a ke huli ia nei kona wahi i hele ai.

 

HE HOKU WELOWELO.

 

         No kekahi manawa loihi o ka nalowale ana o ka hoku welowelo mai kona ike ia ana ma keia mau pae moku ua kipa hou mai la ia, a ke ike ia nei ma ke kukulu komohana hema o ka poai lani i keia mau ahiahi.

         Ua ike mua ia keia hoku welowelo e Chas. Elston, ka hope peresidena o ke kula kiekie, ma ka hora 8 o ke ahiahi La Pule nei, malalo iho o ka huihui hoku Oriona, a nana i hoike ae i ke akea. Ua ike hou kekahi poe i ua hoku la ma ka po Poakahi nei, a he nui a lehulehu na poe e makemake nei e ike i keia mea kino lai kupanaha i hoea hou mai la.

 

         He keaka ko ka Ofiuma i keia po.

 

EKOLU MAU MA’I SAMOLA POKI HOU.

        

         Ma ke kakahiaka La Pule nei na loaa mai la na hoike makamaka no ke poha hou ana ae la o ka ma’i samola poki iwaena o na limahana Porto Rico o ka mahiko o Lihue.

         Ma kela Poalua aku nei Mei 7, na loaa aku la i ke kauka aupuni he wahine Porto Rico me na helehelena o ka ma’i samola poki maluna ona, me elua ma’i hoohuoi, aka, mahope koke iho no nae ua ike ia iho la ua hoike mai la ia i na hiohiona o ka ma’i samola poki maluna o na mea i hoo huoi ia.

         Ua hookaawale koke ia aku lakou me ke puhi ia o ko lakou mau wahi pono kino i ke ahi, a o na keena hoi a lakou i noho ai na puhi kukaepele ia.

         O ka ma’i mua i poha ae malaila aia kona kulana ke pii mau ae la i ke palekana, a o na poe e noho pu ana me ia i kona wa i loohia ai i ka ma’i aia no lakou me na ola kino maikai. Ua hoike mai no ke kauka o Lihue aole he mau kumu e hopohopo ai.

 

         MAKEMAKE E HOOKAAWALE IA.

 

         Ua waiho ia aku la e Kalani Noholoa he hoopii o ki mare i ka Aha Keapuni Ekahi i kaua kane mare ia David Noholoa, e noho mai la i ka aina o ka ehaeha i loohia me ka ma’i hookaawale ohana.

         Wahi a Kalani ua mare ia laua ma Waimanalo i ka la 15 o Dekemaba, 1878, ua noho mare laua no 19 makahiki a hiki i ka 1897, ua kikoo mai la na lima o ke aupuni a ooki ae la i ka piko o ke kaula gula o ka mare a lilo aku la oia i Molokai a noho iho la ka mea aloha he wahine mahope nei. Aole he kuonoono o ko laua noho ana a ua hooikaika ponoi iho ka wahine i kona ola mai ko laua wa i hookaawale ia ai.

 

         E HOLO MAI ANA INA E AE IA AKU.

 

          E lawe ia mai ana na lio heihei o Hilo i Honolulu nei e heihei ai ma ka la 11 o Iune, ina e ae aku ana na lio o Honolulu nei e holo aku i ke kahua heihei o Hilo e heihei ai ma ka la 1 o Iulai, a ina hoi e ae ana ka hui mokuahi o Waila ma e paa ia ke Kinau a hiki i ke ahiahi Poaono, no ka hoihoi ana mai i na poe o Honolulu kei. Alaila, e malama ia ana he ekolu la heihei Poaha, Poalima a me ka Poaono.

         E hoohui ia ana ma ka berita laahia o ka mare o Lunmamakaainana Jonah Kumalae me Miss Lena Ahana, ma ka la 28 o keia mahina. He mau opio laua i kamaaina nui i ko keia kulanakauhale.

 

HAUNAELE NUI MA KA UWAPO.

 

         Ua malama ia he haunaele nui mawaena o na kanaka makua a me na kamalii mai Kakaako mai me na luina o na mokuahi holo pili aina ma kahi kokoke i ka uwapo Pakipika, ma ka hora 10  o ka po La Pule nei.

         Aole he maopopo o ke kumu i hoea mai ai o keia haunaele, aka, na manao ia mai loko mai no ia o na nilaui ana a ka daimonio (suaipa) e noho alii ana iloko o lakou.

         Ua koho wale ia o ka nui o na poe i komo maloko o keia haunaele ua hiki aku no ia i ka haneri a oi, iloko o keia uluaoa ua hoeha ia kekahi poe ma o ka pa ana i na pohaku i pehi ia mai a me na pauku laau hoi i hoohana pu ia.

         Ua hoike koke ia aku keia haunaele nui i ka halewai, a iloko o ka wa pokole ua hoea aku la he puulu nui o na makai ma kahi o ka haunaele i malama ia ai a hopu iho la he eha poe o Kakaako mai, a o ka nui ua pau aku i ka nalowale iloko o ka pouli. Aole i hopu ia na keiki o ke kai, no ka mea, ua hoomaopopo ia aole na lahou i hooulu keia haunaele, a ua kokua hoi lakou ma ka hopu ana i na poe hoohaunaele mai Kakaako mai.

 

NA LIMAHANA PORTO RICO.

          Ma ke ahiahi Poakahi nei i hoea mai ai ka mokuahi Colon me 522 limahana Porto Rico maluna ona no na mahiko like ole o Hawaii nei. He 525 ko lakou huina a pau, aka, he ekolu nae i make ma ke alahele moana. Maloko o keia huina i hoea mai la he 361 he mau makua, 112 opio mawaena o na makahiki 4 a ka 12, a he 49 opio malalo o ka 4 makahiki.

         He nawaliwali a he omaimai ko lakou kulana ola kino i kupono ole no ka hana koke ana maloko o na mahiko. O ka eono keia o na huakai limahana Porto Rico i hoea mai la i Hawaii nei, a e huli hoi hou aku ana no ke Colon no ke kii hou ana i na limahana Porto Rico.

 

MAKE I KA RAMA.

 

         Ma ka nana ia ana o ke kumu i make ai o Kaonohi he wahine opio nona na makahiki he 23 i noho iho iho nei mawaho o Kapalahulu, ua hoike ae na kauka ua make oia ma o ka inu nui ana i kekahi mau waiona i pa’i ia me ka alakahola ino.

         E na wahine opio e akahele i ka lawe ana i ke kiaha o ka lealea, no ka mea, he hopena awahia no ke hoea mai ana. E hoaokanaka ae ia kakou a e hahai hoi ma ke alahele o ka ai pakiko.