Ke Aloha Aina, Volume VII, Number 20, 18 May 1901 — Page 1

KE ALOHA AINA

 

BUKE VII.     HONOLULU, POAONO, MEI 18, 1901.    HELU 20

 

UA LIKE ME KA HOME RULA

 

            El Paso, Mei 7.  Ua puka ae la i ke akea ua hoouna ia aku he elele mai ke Teritori aku o Nu Mekiko, a ua halawai aku me Peresidena Makinile ma ke kakahiaka La Pule, o ka manao e ae ia mai ke teritori e lilo i mokuaina, a o kekahi o na manao e ae e noi aku ana i ka Mea Mana Kiekie e hoopau aku ia Kiaaina Ortero mai kona kulana luna aupuni aku.  O Kiaaina Ortero, i ohohia nui ia e ka hapanui o na Repubalika, he nui kona mau enemi iwaena o na aoao kalaiaina okoa ae, me ka hoakaka pu aku i ka Peresidena o ke kiaaina e noho hoomalu nei, oia ke kumu keakea i ka holomua o ke teritori.

            O ka pane a ka Peresidena i na elele la, aole e hiki iaia ke noonoo ia kumuhana ma keia huakai ana, oiai, ua hooholo oia he huakai keia no ka hoomaha me ka haawi ole aku hoi i ka hoolohe ana i kekahi hana a hiki i kona huli hoi ana aku no Wasinetona.—S. F. Call.

            Ina he oiaio keia mau hoike mai El Paso mai, alaila, he mea maopopo loa e loaa mai ana no ia pane hookahi i ka Elele F. W. Bekele i hala aku la me kana hoopii no ka hoopau ana ia Dole, aka, e kali aku nae hoi kakou.

 

NA HANA HOAPAAPA.

 

            Ua hoopanee ka hale o na Senate ma ka Poaha nei la 16, a ma ka Poakahi la 20 e noho hou ai, ke hana nui hou mai nei no ua poe nei i na hana hoapaapa a lakou, a aole ana no paha auanei e pau koke ana keia Kau Kuikawa iloko o kanakolu la (mahina hookahi).  O ka makou koho wale no keia.

 

            O ke Zealandia ke lawe ae ana ma kahi o ka mokuahi Mariposa, a e hoea mai ana oia ma keia Poaono aku mai Kapalakiko mai, a o ka Mariposa hoi e pani aku ana oia ma ka hakahaka o ke Sonoma no na panalaau hema, pela na lono i loaa mai la ma ke Sierra.

 

Hopena Weliweli i Loaa i Kekahi Mau Olulo.

 

            Manila, Apr. 20.  O ka mokuahi Denbighshire i hoea mai la ianei mai Singapore mai, ma ka Poalima nei, ua lawe mai la oia he moolelo i piha me ka weliweli, ehaeha, pepehi kanaka a me ka ai kanaka, i hana ia maluna o na ale o ka moana.  I lawe ia mai e kekahi mau olulo elua i pae ae ma Singapore maluna o kekahi moku pake ma ka la 3 o Aperila mai ka mokupuni aku o Soubi, ma ka paemoku o South Natuna, ma na kapakai hikina akau o Sarawak.  Wahi a ka nupepa Strait Times:  O keia mau kanaka i ike i keia mau ehaeha oia o Johansen, he Suedena a me Marticorena he Sepania.  A o laua elua wale no kai pakele mai o ka moku kiapa poino Angola, i haalele aku ia Cavite Bay, Manila no Singapore, ma ka la 12 o Okatoba o kela makahiki aku nei me na luina he 19 maluna ona.

            Ua ili ua moku la maluna o kekahi kuaau ma kekahi po, he hookahi pule mahope iho o ka haalele ana ia Manila, a oiai, ua pau aku na waapa i ka nahaha ua hana iho la na luina poino he elua mau lana mai na apana papa mai o ka moku.

            O ka poe maluna o kahi lana uuku aole he mea i lohe ia no lakou, a no luna o ka lana nui i pakele mahunehune mai ai keia mau luina elua.

            He 42 la ko laua paialewa ia ana iluna o na ale o ka moana me ko laua mau hoa i hoi aku la i ka make mamua o ka pae ana i ka aina, a o keia na mea i ike ia e laua.

            He kanaka Farani ka olulo mua i pupule, a ua pepehi aku oia i ka malama moku ekahi me kekahi koi, a inu aku la i kona koko me ka ai ana i kona lolo.

            A ma na la mahope a lakou e paialewa ia ana malalo o ka wela hahana o ka poai wela (equator) ua hoomaka aku la ka make e ohi liilii i na luina popilikia, me ke kiola ia aku hoi na na mano o ke kai e hahai ana mahope o ke alahele o ka lana.  A o keia ka hoike a Johansen, kekahi o na olulo i pakele mai.

            Ua haalele iho makou ia Cavite, Manila; no Singapore ma ka la 12 o Okatoba o keia makahiki aku nei maluna o ka moku kiapa Angola e noho kapena ia ana e Kapena Crocker a e lawe ana hoi ua moku la he 19 mau luina.

            He eono la mai Manila mai ua halawai iho la makou me ka makani ikaika a ma ka hora 11 o ka po la 17 o Okatoba ua ili aku la ka mokuiluna o kekahi kuaau he 600 mile mai Manila mai a he 150 mile mai Kina mai.  Ua hoomaka koke no ka moku e nahaha, a ua hoao makou e hookuu i kekahi waapa, aka, ua pau koke no ia i ka weluwelu.

            Ua hookuu hou ia he waapa a owau a me elima poe e ae maluna ona, ua hoao aku la makou e ho lo, aka, ua naha koke no oia a au hou mai la makou i ka moku.  A he elua o makou i piholo aku mamuli o ka ike ole i ka au.

            Ua huli pu aku ka moku a ua pii aku makou a noho iho la ma ka aoaoa no eha la me ka ai ole a me ke komo wahi wai ole.  Ua noho makou e kukakuka a ua hooholo iho la makou he mea pono e haalele makou i ka moku, oiai, aole makou e ola ana ina no e noho ana malaila.  Nolaila, ua hana iho la makou he elua lana mai na apana papa mai o ka aoao o ka moku.  Elima kanaka i kau aku maluna o kalana uuku a ma ka lana nui au a me 11 mau luina e ae i kau aku ai, a hookuu aku la na ka makani e lawe ia makou.

 

(E nana ma ka Aoao 3.)

 

            Jacksonville, Fla., Mei 4.  O ka pauahi nui o Jacksonville nei, ua pio iho la ia.  He hookahi haneri me kanaha-kumamawalu mau pauku o ke kulanakauhale nani i hooneoneoia.  O ka nui o na poino aole ia e hiki ke ikeia maloko o hookahi pule, aka, ua manaoio ia ma kahi no ia o $10,000,000.  He nui na lohe e hanawa nei no ka nui o na ola i poino, aka, ua hiki ole nae ke loaa ka mea oiaio, no ka mea, ua pau loa na hale hana kupapau o ke kulanakauhale nei i ke ahi.  O kekahi o na lono i hauwawaia ae ua kipakuia he puulu o na kane me na wahine e ke ahi no na uwapo a i ka hiki hou ole ana aku ia lakou ke pakele ua lele aku lakou iloko o ka wai a ua piholo kekahi poe o lakou.  O ke kino make o Mrs. Hogan, he wahine paele kai loaa aku ua papaa i ke ahi.

            O ke akea kahi a ke ahi i pulumi ai a neoneo, he umikumamawalu pauku a he elua mile ka loihi, e holo ana ma ka muliwai St. John, a na pau he umi pauku ma ia aoao o ke kulanakauhale, a i ke alanui Catherine ma ka hikina alanui Alani ma ka akau, alanui Davis ma ke komohana.

            Eia ke kulanakauhale malailo o ka hoomalu ana a na koa a na kukala ia ae ke kanawai koa i wahi e loaa ai ka maluhia.  He umi tausani ka nui o na kanaka i hoonele ia me na home, a he lehulehu o lakou i haalele iho ma na kaaahi no St. Augustine a me na kulanakauhale pili kokoke mai.

            Ma na kahua akea a pau e hoopuni ana i ke kahua pauahi e hoolulu nei na ohana pilikia me ko lakou mau pono hale a me kino i pakele mahunehune mai.  O kekahi poe ua hoonee aku lakou i ko lakou mau ukana no hapalua a i ole hookahi mile me ka manao ana na palekana ia, aka, ua hoea aku no nae ke ahi ilaila, @ lawe h@ aku la lakou i ko lakou mau ukana no kekahi wahi okoa aku.  Eia ke aupuni a ma na makaainana o Florida ke haawi nei i na kokua ana i ka poe pilikia.