Ke Aloha Aina, Volume VII, Number 19, 11 May 1901 — Page 6

KE ALOHA AINA

POAONO MEI 11 1901

 

KA LA 11 O IUNE

O keia malalo iho ka papa kuhikuhi o na lealea heihei e malama ia ana ma ka la 11 o Iune i apono ia e ka hui heihei lio Hawaiian Jockey Club.

            1 - Heihei hookahi mile, makana kiaha, Union Feed Co., noa i na lio a pau.

            2 - Heihei lio kaa, elua eo ana iloko o ekolu, noa i na lio a pau.

            3 - Heihei elima hapawalu mile, no na lio Hawaii.

            4 - Heihei lio kaa, elua eo ana i loko o ekolu, no na lio Hawaii, makana kiaha, California Feed Co.

            5 - Heihei eono-hapawalu mile

            6 - Heihei lio kaa, elua eo ana iloko o ekolu, noa i na lio a pau makana Kiaha Rainier.

            7 - Heihei hookahi mile no na lio Hawaii.

            8 - Heihei lio kaa, elua eo ana iloko o ekolu.

            9 - Heihei eha me ka hapa-hapawalu mile, noa i na lio apau.

            10 - Heihei hookahi mile noa i na lio a pau, makana Kiaha Rosita Challenge Cup.

            11 - Heihei ehiku hapawalu mile no na lio Hawaii.

            12 - Heihei ekolu hapawalu mile, noa i na lio apau.

            13 - Heihei hookahi mile me ka hapaha, noa i na lio apau, makana Kiaha Peresidena.

            14 - Heihei hoki, noa i na hoki apau.

O na heihei no ka la 14 a me 15 o Iune e noonoo ia aku ana ia ma keia hope aku. Nui no na lealea o ka la 11.

 

KA AHAMELE HOOLAULEA

Ma ka po Poaono i hala, Mei 4, 1901, ua wehe ia he Ahamele Hoolaulea, maloko o ka Luakini Hoole Pope, Ka Hau o Heremona, Kalihi waena, no ka pomaikai o ka ekalesia hui ia o Kalihi a me Moanalua, malalo o na hooponopono ana a Mrs. Nakuina, ke Kahu a me ka hoahanau.

Ma keia ahamele ua nui na poe i hiki ae, a ua hoopihaia ka hale a hu mawaho, ua manao ia ina aole na kuia o na kulu pakaua o keia ahiahi ina ua oi loa aku mamua o keia huina i hoike ia ae la maluna.

He mea ku i ka hauoli a me ka ono i ka ike kumaka ana i na leo nani i mele ia mai e na lede a me ua keonimana o na ahahui i hiki mai. Aohe no lakou i nui loa, oiai ua helu ia lakou ma ke kauna wale no, a me na keu, aka, me he la ma ka nana aku he mau haneri lakou.

A i ka panina hope loa o na hana o keia po, oiai hoi ke anaina e hoo nanea ana i ka uwe hone a na kaula o ka Mandolin a me ke Gita a na Prof. E Kaai a me Kaholokahiki, ia manawa pu no i pahola ia mai ai na mea ai mama kaohi puu.

O na loaa o keia ahamele ua manao wale ia, aia maluna aku o ka $160.00, oiai, i ka noho ana o ka Ana Ekalesia i ke Sabati mahope iho, ua ikeia he $130.50 io, mai ka lima mai o na komite, a o ke koena o na komite i hiki ole mai i keia la, me na huina e paa ia ana ma ko lakou mau lima, pela i manao ia ai kela heluna i hoike ia maluna ae.

Nolaila, ke haawi ia aku nei na hoomaikai ana he nui i na poe a pau i kokua pu mai ma keia hana maikai no ka pono a no ka hooholomua ia o ko Iesu Ekalesia ma keia ao iwaena o kakou a pau.

            Me ka haahaa,

            J.K. Malao, Jr.

            Kalihiwaena, Mei 4, 1901.

 

HALA IA KAMAAINA.

Me ka hora 10 o ka po La Pule nei i haalele mai ai i keia ola ana o J. T. Aluli. Ua make hikiwawe oia a ma ka ike a ke @kauka he ma’i puuwai kona kumu i make ai. He ekolu pule i hala ae nei ua hoea mai oia i Honolulu nei n@o ka imi ola ana, mai kona home mai i noho a kamaaina ma Wailuku Maui.

Ua hanau ia o Aluli ma Kalauao, Ewa, i mahina o Augate, 1850. Ua make kona mau makua i ka 1853 i kela kau ma’i kolera nui o Honolulu nei. Ua mare oia i kekahi kaikuahine o Lunakanawai Kepoikai, a no 25 makahiki kena noho ana ma Wailuku, Maui. He aloha aina oiaio.

Ua haale iho la oia mahope nei, a kunewa hookahi aku la ma ke ala polikua a Kane, he wahine, he mau keikikane, he hookahi o laua e noho mai la ma ke kula a’o kanawai o Mikikana, he kaikamahine a me ka ohana.

Ua hoolewa ia aku kona kino puanuanu no ka ilina ohana ma Kalauao, Ewa, a malaila oia e hoomaha aku ai no ka wa mau loa iloko o Karisto. Ke komo pu aku nei KE ALOHA AINA, iloko o na u pu ana me ka ohana o ka mea i hala. Luuluu wale.

 

MAU HANERI LUTANELA.

Wasinetona, Apr. 24. Ma keia la ua hoopuka ae la ke Kuhina Kaua i na inoa o 588 kanaka i wae ia i mau lutanela ekahi a me elua no na pualikoa kumau malalo o ka bila kanawai kaua i kukulu ia ae nei. He lehulehu wale o keia mau inoa i komo i loko o na puali kumau a me kuikawa. Ua kauoha ia aku la no ka niele ia ana, a ina e ike ia ana ko lakou makaukau e haawi ia aku ana ko lakou mau hookohu.

Ua huli hoi aku la ka Elele Wilikoki no Amerika Huipuia maluna o ka mokuahi Mariposa, a o kana mau hana e pomaikai ai ka aina a me ka lahui maloko o ka Ahaolelo Nui o Amerika oia ka kakou e kali aku ai.

 

NUHOU KUWAHO.

HE AIHUE MAKAU OLE.

Anaconda, Mont, Apr. 26. He elua mau kanaka aihue i komo aku iloko o ka hale inu rama Alaska ma keia kakahiaka nui, me ka wawahi ana i ka puka e haliu ana i ke alanui nui. Ua hapai mai la laua he pahu hao o 300 paona a hookau aku la iluna o kekahi kaa ukana. A lawe aku la i keia pahu hao no waho o ka palena o ke kulanakauhale, a malailaa i wawahi ia ai ka pahu i lilo aku la i ke kolohe he $1000 ma ke gula. Ua hookau hou aku la laua i ka pahu hao poino iluna o ke kaa me ka hoohuli ana aku i ka lio no ke kulanakauhale a o laua hoi ua ahai aku la ka pupuhi. Aole he meheu i loaa no keia mau kolohe.

 

LUKU WELIWELI IA HE TAONA.

Parisa, Apr. 26. Ua loaa mai nei he mau hoike i anei na lele kaua aku kekahi puali Arabia maluna o ke taona o Maqueritte, he 100 kilometa mai Algiers mai a luku aku la he 300 kanaka o na taona nei. Ua pepehi a hoea pu aku lakou i na luna aupuni Farani me ka hao ana i na waiwai o ke taona, oki ana i na laina telegrapa, puhi aku la i ka haleleta i ke ahi me ka pepehi ana i ka luna leta Wahine.

Ua hoea mai he wahi puali hoopakele uuku mai Miliana mai nana i hoauhee aku i na Arabia. He hookahi koa i make a me elua i hoea ia. Aia ke hoouna ia la na kokua.

ALA HOU NA BOXER.

Pekina, Apr. 21. O Kenerala A. A. Reid, e alakai ana i ka mahele ekolu o na pualikoa Inia, e noho nei i keia wa ma Shanhai-Kwan, na hoouna aku oia he pualikoa Ini no ka hoopuehu ana aku i na puali powa ma kahi kokoke i Fu-Ming.

Ua halawai aku lakou me kekahi puali o 1000 Boxer a me na powa, a mahope o kekahi hoouka kaua hahana ana ua emihope aku la na koa Inia me ka make ana o Mekia Browning a me hookahi koa a me kekahi mau koa i hoeha ia. Ua hoouna ia aku la he puali nui no ka halawai ana me na Boxer. Ua hoolako ia na Boxer me na pu ano hou loa.

 

Ua loaa mai ia makou he lono kaumaha no ka haalele ana mai la o Miss Hana Hihio i keia ola ana ma ka @na la La Pule nei, mahope o kana kaa ma’i ana no kekahi mau mahina loihi. He kaikamahine oia na Lunamakaainana Hihio, a ua hoihoi ia aku kona kino puanuanu no Maui. Me ka makua i hoonele ia i ke keiki ko makou u pu ana.

 

LILO I HALE NANI I PUU LEHU.

Ma ke awakea Poakahi nei, ua hamu ae la ke ahi i ka hale nani o Myhre, ka luna nana waiu o ka Papa Ola e ku nei ma kahi kokoke i kahi hookio wai o ke aupuni ma Puowaina, a iloko o ka manawa pokole ua lilo iho la oia i puu lehu me ka uuku loa o na waiwai i hoopakele ia.

Mamuli o ke kiekie o kahi o keia hale e ku ana, ua ulolohi loa ka hoea ana aku o na kaa kinaiahi ilaila ma o ka hoopii’na loa o ke alanui ma ia wahi. A ua hala loa hoi ka wa pono no ka hoopakele ana iaia, nolaila o kahi wale no a ka oihana kinaiahi i haawi aku ai i na kokua ana oia na hale e ku kokoke ana malaila.

O ka waiwaiio o keia hale he $2,000, a he hale hou loa no hoi oia o ke kukulu ia ana iho nei. Aole i maopopo o ke kumu i hoea mai ai o keia ahi.

 

LOAA HOU HE LANAKILA I NA BERITANIA.

Ladana, Apr. 27. Ua loaa mai la i ke keena kaua keia mau hoike mai a Haku Kitchener mai:

Pretoria, Apr. 26. Mai ka la inehinei mai o na hoike a ka pualikoa Beritania o ka poino o na Boa he 12 i make, 20 i hoehaia, 47 i hopu pio ia a me 42 i hawaipio mai. Ma ka pakui ana aku i keia mau hoike ua hopu pio ia e Lutanela Reid me iwakalua kanaka, o Alakai Schroeder o na Boa a me 41 kanaka malalo ona a me hookahi pukuniahi wili, ma ka hikina hema aku o Commisie Drift, muliwai Oliphant, ma ia wa naao o kokolo aku na kanaka o Reid a hoopuni ae la i ke kahua o na Boa a hoomaka koke aku la hoi e wehe i na kipu ana ua haawi pio koke mai la na Boa.

Ma kekahi hoike i hoouna ia mai ai na kona hoahanau Kenerala Kitchener mai, penei no ia:

Ua hoike mai la o Kenerala Kitchener mai Pardee Platz, he 18 kanaka i make, 14 i lawepio ia a me 3000 bipi a me 6000 hipa a he nui na kaa i hopupio ia.

 

He 91 ka nui o na make o ke kulanakauhale nei no ka mahina aku la o Aperila, a he 49 oia huina make he mau Hawaii.

He hou pahi kai malama ia mawaena o kekahi mau limahana Porto Rico, ma ka mahiko o Ewa ma ka Poaono nei. O ke kumu i ulu mai ai o keia hana weliweli mamuli no ia o ka hoopuka ia ana o kekahi mau olelo hoohaahaa i ka wahine a ka Porto Rico e paa nei ma ka halepaahao e ka mea e waiho nei maloko o ka haukapila me na palapu kukonukonu loa. O Mato Hamandez ka inoa o ka Porto Rico limakoko e paa nei ma ka halepaahao.