Ke Aloha Aina, Volume VII, Number 18, 4 Mei 1901 — Page 8

KE ALOHA AINA, POAONO, MEI 4, 1901.

 

HE KAAO KAILI PUUWAI

NO KA

UI MINEWA

A ME NA

Kaikunane Eiwa

I Hooliloia i mau Manu Nene Ahiu a i ole na keiki i Hoehaehaia

Kakauia no KE ALOHA AINA!

 

            Aole he mau leo koe i puke mai mai ko lakou mau lehelehe mai, aka, ua ike ia aku la nae ko lakou mau poo i ke kulou ana iho ilalo me na waimaka e helelei ana, a i ka aea ana ae ua pane mai ia lakou me ka walohia.

            He mea ehaeha no keia hookaawale ana o ko kakou noho aloha ana, aka, ua hiki ole nae ia makou ke kue aku i kou makemake, nolaila, ke hoohiki aku nei makou imua ou a imua hoi o ka mea kiekie loa.  Ke lawe mai nei makou i na opio alii i haku no makou, aole loa hoi makou e k@pi aku ana ia lakou elike me ka loihi o ko makou ola ana, aka, o ko lakou makemake oia ka makou e hooko aku ai ina no ke ola a make paha aole no ia he mea no makou e hoi hope ai.

            He nani, a he nani kena mau olelo a oukou, wahi a ka moi i hooho mai ai, elike me ka oukou i hoohiki mai nei ia’u pela na lani e lawe aku ai i ka oukou hoohiki a kuni aku i kana buke hoomanao.

            A maanei i huli ae ai ua moi Miro nei a pane hou aku la i kana mau keiki, ano, aole a oukou mea i koe e hopohopo ai, no oukou keia mau kauoha a pau, e hoi aku a e hooluolu ia oukou iho ma na keena like ole o ka halealii nei, a mamua ae o ko oukou kaawale ana aku mai o’u aku nei, ua makemake au e lohe hou i k ooukou manao e a’u mau keiki aloha, oia hoi keia, e ae mai ana anei oukou e hoopakele ia ke ola o ko oukou makuahine alii mai ka hoopai weliweli a oukou i hookau aku ai maluna o kona poo?  E ae mai i keia wa ano, a e lelele no ko’u uhane me ka hauoli.  E ae mai hoi i ka leo uwalo a ko oukou wahi makuakane nei.

            Haka pono aku ia na maka o na opio maluna o ko lakou wahi makuakane me ke ekemu ole aku nae, me he la, e hoike okoa aku ana he noi paakiki loa kena, a i ka hala ana he mau minute o ka hamau ana o na mea a pau.  Ua poha mai la ka leo o kekahi o na opio no ka pane ana aku i ke noi a ko lakou makuakane.

            E ko makou papa he hana paakiki loa keia na makou e ae aku ai ia oe, oiai, ua paa ka makou olelo hooholo e hookau ia kekahi hoopai koikoi maluna o ko makou makuahine kolea no kana mau hana lokoino i hookau mai ai maluna o makou, no ka mea, aole olua ike pehea la ka nui o na ehaeha a makou i alo ai i keia mau makahiki loihi i kaaope ae nei.  E hoolilo ana hoi i na piko mauna huihui, na waonahele, na waoakua a me na lae kahakai, e kaniuhu aku ana kekahi i kekahi i ka ehaeha o keia ola ana, a puka ae la na huaolelo awaawa ua oi aku ka pono e make mamua o ke ola ana, i wahi e ike hou ole ae ai keia kino i na @ea o keia ao luhi.  Aka, ma ka lokomaikai nae o na lani ua hoea hou mai la makou imua ou, ma ia kumu ua hiki ole ia makou ke aku i kou manao.  E ola, e ola oe e ko makou papa aloha, a e make, e make hoi kela wahine puuwai lokoino e pono ai.  Nolaila, e huikala mai ia makou no ka ae ole ana aku i kou manao.

            Ua lawa e kuu mau keiki, ua noi aku la au a ua hoole ia mai la, heaha hoi, na mua aku nei e hoike mai i na haawina weliweli o ko oukou hoole ana mai i ka’u noi.  E hoi e na mea a pau no ko oukou mau rumi me ka hopo ole no ka hoohalua ia aku e kekahi enemi.

            Me keia mau olelo i puili mai ai ua moi aoo nei i kana mau keiki a a haawi iho la i na muki aloha hope ma ko lakou mau papalina.  A i halawi aku oukou me ke kaikuahine o oukou e haawi aku i ko’u aloha a nui nona.

            Ma keia wahi i hookuu ae ai ko lakou mau puili aloha ana, a hoi aku la kela a me keia no ko lakou mea rumi e hooluolu ai ia koe na po me he mea ala, aole he mea uluaoa i malamaia mamua iho.

            Me ka manao ole o na opio e hooko ana ko lakou makuakane i kana hoohiki weliweli, ua haalele iho la lakou iaia me na manaolana no ka hui hou ana aku ma kekahi la ae, a hahai aku la mahope o na alakai ana a na kauwa o ka halealii no na keena moe.

            No ka moi Miro hoi, i ka wa o na mea a pau i kaawale aku ai mai kona alo aku a hookuu iho la iaia e noho mehameha maluna o ua alea nei, ua ku koke ae la oia me na kapuai kaumaha a hoi aku la no ko laua rumi moe me kana aliiwahine e noho mai la iloko o ka ehaeha.

            A i kona hoea ana aku ma ka ipuka e komo aku ai iloko o ko laua keena moe, a haule aku la hoi kona mau maka maluna o ko laua moe me na lihilihi wai gula e kuu welu ana, a o ka bela a me ka uluna e waiho mai ana me ka makaukau, no ka hookipa aku i ka moi hapauea no ka aina moeuhane, aka, ua puanuanu nae laua i kona manao no ka mea, aole kana aloha malaila.

            Na keia mau hiohiona ana e ike nei i hooi loa ae i na haawina kaumaha o na moi nei a me na kapuai e naka haalulu ana a me na waimaka e hiolo makawalu ana o ke aloha wahine oiaio i komo aku ai oia me ka malie a noho iho la maluna o ka moe e hoao ana hoi e kaomi iki iho i kona mau ehaeha, aka, me he wai mapuna ia e huahuai ana ka hiki ole ke hoopio ia aku, pela iho la ke aloha o ua Miro nei no kana wahine e lupea nei ia loko o kona puuwai, a iloko o keia mau hoomanao aloha e lauwili ana iloko o kona nui kino, ua ku ae la oia a hele holoholo ae la maloko o ua keena nei me ka puana ana ae.

            Ae, ua hiki ole ia’u ke ola loihi hou aku me ka mea ole nana e hoonana mai i ko’u mau manao kaumaha, a nolaila, ua lilo iho la keia ola ana i mea waiwai ole.  Ae, e keia rumi i hoopumehana mau ia me ke aloha o Anita i na la i kaahope aku, ke aliiwahine hoi a’u i poni ai i moiwahine no kuu mau la kani koo, ke ike aku nei au na puanuanu kou mau paia, no ka mea, aole kuu aloha maloko ou.

            Me keia mau huaolelo kaukau i puka ae la ma kona lehelehe, ua kii aku la oia i kona aahu alii piha a kahiko iho la iaia me ka lalau ana aku i kana pahikaua punahele e kakua ae la ma kona puhaka, a i ka paa ana o kona kahiko alii a pau a me kona mau hoku alii hoi e anapanapa ana ma kona umauma, a ma kona poo hoi e papahi ana oia i kona papale mahiole, ua lohe ia aku la oia i ka puana ana ae.

            Ano, ua hoea mai la ka hora hope a’u e aahu ai i ko’u mau aahu alii a haalele iho ia no keia kino lepo.  I keia po he moi au e rula ana maluna o na miliona kanaka, aka, ma ka la apopo he kino puanuanu au ua pau hoi ka ike i na inea o keia ola ana.  A i ka rumi i hoope mau ia e ke ala o na pua, o kou mau sekona keia e ike hope ai ia’u, no ka mea, he alahele hoi ole mai ko’u ihope nei e makaikai hou aku i kou mau p@a nani.  Aloha, aloha no paha oe.

            Me keia mau huaolelo hope i oili aku ai oia iwaho me ka holoi ana ae i kona mau waimaka e kiheahea ana maluna o kona mau papalina.  A i kona ike ana aku i ke koa kia e holoholo ana mawaho o kona rumi moe, ua kahea koke aku la oia iaia no ka hele ana mai imua ona.

            A he mea oiaio, i loko o na minute pokole wale no aia ua kiai la imua o ke alo o kona haku moi kahi i kukuli ai me ka ninau ana aku i ka makemake o kona h@@@.

            Aole i pau.

 

            Pau ka Ahaolelo me ka waiwai ole.  Aloha no kakou ka lahui.

            He nani ke kai huakai a me na himeni a na opio i malama ia ae ma ke kakahiaka Poakolu nei maloko o ke Kapitala.

            He elua mau kaikamahine i maule i ka wa o na hana lealea a na opio e malamaia ana maloko o ke Kapitala, a ua pohala no nae.

            Ma ka la hookahakaha o na kamalii kula ma ke Kapitala, ua aihue ia aku la ka uwati a kekahi haole nona ka inoa o G. W. Torrddt mai ke eke aku o kona puliki, o ka mea nana keia hana aihue makau ole, aole he mea i maopopo, aka, ua manao ia na kekahi mea no ia i lehia ma keia hana.

 

OLELO HOOLAHA

            Oiai, ua waiho mai nei ka Papa Kahu Waiwai o ke Alii Pauahi i ke koho ana o ka Luna Nui o ka Pa Ilina o Kalaepohaku, e waiho nei ma Kapalama-uka, a na ka poe i kuleana maoli i ua Pa Ilina la, ma ke ano he mau iwi ka lakou malaila.

            A oiai hoi o makou na moho e holo ana ma ke ano Luna Nui i olelo ia.

            Nolaila, ke kauoha aku nei makou i na poe a pau i kuleana i ua Pa Ilina la, elike me na mea i olelo ia maluna, e akoakoa ae ma ka halawai e malama ia ana ma ka Pa Ilina o Kalaepohaku i olelo mua ia ae nei ma ka Poakolu, la 8 o Mei, M. H., 1901, ma ka hora 10 o ke kakahiaka, no ke koho ana i Luna Nui.

Iokua Keau,

John Kala@awa,

J. K. Maunakea.

 

W. & M. Ltd.

KUAI HOOPAU O NA PAHULOLE

No Elua Pule Wale e Hoomaka Ana i keia Poakahi, April 29.

Na Pahu Lole, na Paiki Lole, a me na Paiki Paa Lima o na ano a pau ke hoolilo ia aku nei ma ke kumukuai haahaa loa e loaa ai i na mea a pau.

Na Pahu Lole Holomoku, 28, 30 iniha loihi, $9.90, $10.65 a pii.

Pahu Lole o na Kane, 30, 32 iniha loihi, $16.50, $17.50.

Pahu Lole o na Wahine, 28, 30 iniha loihi, $4.60, $4.90.

Nolaila, e na Hawaii mai poina i ke kipa ana ae malaila a e kuai i mau paiki nou.

WHITNEY & MARSH.

I KAUPALENAIA

1045 Alanui Papu.