Ke Aloha Aina, Volume VII, Number 18, 4 May 1901 — Page 6

KE ALOHA AINA, Poaono, Mei 4, 1901

 

POHA KA LAWE KIPE MAI KA LEHELEHE MAI O DOLE

 

      Elike me ke kanoha a kela halawai makaainana i malama ia ai ma ka po Poaono nei, e hoounaia aku he komite o elima lala ma ka aoao o ka lahui, no ke noi ana aku ia Dole e ae mai oia e hooloihi aku i keia Kau no kanakolu hou aku la, ua hooko ia aku ia ma ke kakahiaka Poakahi nei. 

      O na komite i koho ia ma ia halawai no ka lawe ana aku i keia olelo hooholo, oia o Robt. N. Boyd, C. B. Maile, J. W Bipika @e, G. W. Kualaku a me T. C. Polikapa. 

      He mea oiaio, ua hoea aku keia komite imua o Dole, a na R. N. Boyd i heluhelu aku i ka olelo hooholo.  I ka pau ana o kana heluhelu ana, ua ninau mai la o Dole:  "Ua hiki anei i keia poe ke lohe i ka olelo Enelani?"  Ua pane aku o Boyd, e hoopuka mai no oe i kau pane ma ka olelo Hawaii.

      Ua pane mai o Dole imua o ke komite:  "Ua hiki ole loa iaʻu ke ae mai i keia manao e hooloihi aku i keia Kau, no ka mea, ua hoopaa manawa wale no keia Ahaolelo, a ua nui hoi na dala i hoolilo ia me ka waiwaiole.  A ua kaumaha no hoi au i ka lohe i ka lawe o kekahi mau hoahanohano i ke kipe."

      Ua hoohikilele koke ia o Boyd no keia olelo a ke Kiaaina, a ninau aku la:  "Ua hiki anei ia oe ke hooiaio mai, ua lawe kekahi poe i ke kipe?"

      "Na ka Loio Kuhina aku ia e huli pono." wahi a ke Kiaaina.

      I ka lohe ana o ke komit i na pane a Dole, ua ku ae la lakou a hoi mai la me ka @ele, a hoike mai la i keia mau kukai ana i ka lehulehu.

      He oiaio anei e huli pono aku ana ka Loio Kuhina i keia mau hauwawa kipe?  O ke poha ana mai o ka huaolelo kipe mai ka lehelehe ponoi mai o ke Kiaaina he mea ano nui no ia na ka lehulehu e noonoo aku ai.

 

KUE O HILO I KA HOO-REPUBALIKA IA.

Hilo, Apr. 28, 1901,

 

Aloha oe:---

      O ka mea hou o Hilo nei, aohe makemake o kanaka e lilo i Repubalika, ua noho he halawai makaainana ma Puueo a ua hoole ke lehulehu a pau me ka huhu pu i ka Elele.  Ina no e holo mai ana o Wilikoki ianei aole loa no e hele ana kanaka e hoolohe iaia.  Aohe makemake, ke hooikaika nei makou i ko kakou poe e hoomau no e kupaa no ka pono o ka aina a me ka lahui.

      Me ka mahalo,

 

AIE O KE SENATE

 

      Ma ka noho ana o ke Senate ma ka Poakahi nei ua waiho mai la ke Komite o na Hoolilo i ka lakou hoike no na aie i koe i uku ole ia o ke Senate $2,527.25, a ua manao ia e waiho ia keia mau aie iloko o ka bila haawina, oiai, o ke alahele wale no ia e hiki ai ke uku @@, a penei na hoolilo like ole i hana ia.

      J. T. Ryan, no ke pai ana, $133

      Hui Kaa Uwila (Automobile)

Hoolimalima no ka holo ana i Kalihi a hoi mai, $4

      Hui Hana Hau, 260 paona hau ma ka $2.60 no ka mahina o Aperila.

      F. F. Fernandes, no ke kikokiko ana i kekahi mau manao, $1.50:  no kekahi mau kikokiko hou, 50 keneta.

      D. H. Kahaulelio, hooponopono ana i na bila kanawai ma ka olelo Enelani a me Hawaii, $257; unuhi ana ma ka olelo Hawaii, $321.50;  hooponopono ana i na olelo Enelani a me Hawaii a me ka unuhi ana ma ka olelo Hawaii, $36.50.

      Enoka Johnson, no ka hooponopono ana i na olelo, $326.

      Kaapio helu  255, hoolimalima ia, $1.50.

      J. M. Riggs, 27 la hana ma ke ano kakauolelo a pela aku, $69.80.

      H. Hackfeld & Co., hoolimalima mekini kikokiko $6.

      Hui Pai Gazette, no ke pai ana, $144.

      John Kahiolani, holoi a me aiana, $1.90.

      P. M. McMahon, kakau ana i ka moolelo o ke Senate, $225.45.

      Hui Pai Buletina, no ke pai ana, $10.50.

      Wall Nichols Co., pepa, $17.50.

      Hui Pai Hoku, no ke pai ana, $72.50.

      Keoki Makamu, unuhi ana $34.

      Hawaiian News Co., pepa, $374.05.

      Hui Pai Buletina, no ke pai ana, $69.

      T. J. Ryan, no ka noii ana i ka buke a ka Luna Hooia, $10; kakau kikokiko, $7.55; kakau kikokiko, $64.75.

      P. M. McMahon, no ke kakau ana i ka moolelo o ke Senate, $59.90.

      Huina a pau, $2,527.25.

      Ma keia ae la e ike iho ai ka lehulehu pela iho la i nui hewahewa ai ka hoolilo o keia Ahaolelo, oia hoi, ma ka hooponopono ana i na hewa, ka unuhi ana i na olelo, a me ke pai ana i na bila kanawai hookahi, ua pii mahuahua loa ae la ka uku oia bila.

 

NA HOOKOHU I KUE IA.

 

      Ma ka noho ana o ke Senate ma ka Poakahi nei no ka noonoo ana i na hookohu a Dole, ua hooholo iho la na Home Rula e kue aku i keia mau hookohu a Dole oia o J. A. McCandless, Luna Nui o na Hana Hou; T. F. Lansing, Puuku; J. F. Bara@n@, o na Aina Aupuni a me na @a@a a pau o ka Papa Ola.  O na kumu o ko lakou hoopau ia ana aole ia i waiho pu ia aku me na kue e hiki ai hoi ke ike maopopo ia na hewa keia poe.  Ke hoole nei kekahi poe aohe kuleana o keia hoopau ana me ka hewa ole.  Aka, na mua aku nae e hoike mai ia na mea apau o keia mau hana a na Home Rula.

 

ULU KA HOOPAAPAA NO NA LA HANA.

 

      Ma ka noho ana o ke Hale o na Lunamakaainana ma ke kakahiaka Poalua nei, Aperila 30, ua lawe ia mai ka noonoo i na paha o ka la keia i piha ai na la hana o ka Ahaolelo i ke kanaono.  Ma ka hoike a ke Kakauolelo o ke kanalima-kuma-mahiku no ia o na la, a ma ka Poalima ae nei e piha ai na la hana kanaono ma kana moolelo.  Ua kue mai o Lunamakaainana Robikana i keia hoike a kakoo mai la o ka piha ana no keia o na la hana o ka Ahaolelo he kanaono.  A penei kana hoonohonoho ana, he 70 la mai ka noho ana o ka Ahaolelo mai ka la 20 o Feberuari a hiki i keia la 30 o Aperila. 

      A iloko o keia mau la he 70, he umi La Pule.  He hookahi la kulaia iloko o keia mau la, oia ka la hanau o Keoki Wasinetona, maloko o ke kanawai aole i hookaawale ia a i ole hoike ia he la kulaia aupuni ia, e hiki ole ai ke lawelawe ia kekahi hana.  Ua noho no ka hale ma ia la a hoopanee, o ka elua o na la a ke Kakauolelo i helu ole ai oia no ka la i hoopanee wale ai o ka Hale mamuli o ka uuku o na hoa i akoakoa mai, aka, ua noho no nae ka Hale ma ia la a hoopanee, nolaila, ma ka houluulu ana i keia mau la i hana ole ia ua piha no na la hana he kanaono.

      Ma ka ninau ana he 14 i apono o ka la hana kanaono, a he 15 kue.  Nolaila, ma ka hooholo ana a ka hapanui o ka Hale o ka la hana 57 no keia, ua loaa hou ia lakou ka mana o ka noho hou ana he ekolu la.

      HE keaka ko keia po.

      I ko makou nei keena kekahi o ko makou makamaka W. H. Kapu, kekahi o na keiki ulele hua kepau kaulana o ka nupepa namu Hilo Tribune, i hoea hou mai la oia i ke kapitala nei malalo o kekahi huakai oihana a me hoomaha.  Hauoli no na maka i ka halawai hou ana. 

 

KE KUMU I HOOLE AI I KA HOOLOIHI ANA.

 

      Maloko o ka nupepa Repubalika i ike iho ai makou o ke kumu hoole loa o Kiaaina Dole i ka noho hou ana o keia Ahaolelo, mamuli no ia o ka hoike ia ana aku iaia i ka lawe ana o kekahi poe o ka Hale Ahaolelo i ke kipe a me ka nui o na hana ekaeka e ae i lawelawe ia.  Wahi a Dole ma ke ahiahi Poakahi nei i kekahi mea kakau nupepa.

      Ua hoole au i ka ae ana aku e hooloihi ia keia kau o ka Ahaolelo o ke Teritori, no ka mea, ua loaa mai iaʻu he hoike mai kekahi mea i hiki ke hilinai ia ua lawe na hoa o ka Ahaolelo i ke kipe i wahi e hooholo ia ai kekahi mau kumuhana maloko ona, a ua hiki ole iaʻu ke hoole aku i ka oiaio oia mau hoike.

 

ALOHA NO LAKOU

 

      Ma keia awakea Poakahi i ka wa i loha i maopopo loa ia ai ua hoole pau pele pau mano mai la o Kiaaina Dole, aole loa oia e ae ana e hooloihi ia aku keia kau Ahaolelo, ua ike ia aku la kekahi mau hoa hanohano e liuliu ana i ko lakou mau wahi opeope no ka haalele ana iho i ka hale kaukanawai, kahi hoi a ka lehulehu i hoouna mai ai ia lakou no ka naʻi ana i ko lakou mau pono.  He mea oiaio, imua iho la no e lakou ka ulu a o ka hala no ka ia, @ he mea makekewa ka imihala ana aku nana Repubalika wale no i hoopahua i ka lakou hana.  O ka makou i ike maoli ai na Senetoa Rusela i lawe mai he bila kanawai a na White, Home Rula no i kue ikaika aku.  Aka, i ike ana o Senatoa Kalauokalani e hele aku ana keia hoopaapaa i ka nui ua ku mai @a oia a noi mai la e hoopanee ke Senate, a apono ia, a noho wale ia hale ia la me ka hana ole no ka lilo o na Senatoa Home Rula i ka hoopaapaa.

      A nolaila, na lakou no kekahi mau hana hoapaapa aole wale no na na Repubalika.  Aloha no lakou i ka huli hoi aku aole nae he mau @ua ohaha o ka pomaikai no ka haawi ana aku i ka poe nana lakou i koho mai nei.

 

HOOLAHA HOOKAPU AINA.

 

      O wau o Naholowaa (k), ke papa a ke hookapu loa aku nei au, aole e hele wale kekahi kanaka maluna o kuu aina e waiho la ma Waimanalo, Koolaupoko, Oahu, i kapa ia o Kamahiili, me ke kuleana ole, a aole pu hoi e lawe i @@ waiwai maluna o ka aina.  O ka mea e hoolohe ole ana a hana i kekahi mau hana e hoopi@ ia no ma ke kanawai no ke ko@@hewa.  Ke hookohu aku nei au ia Kaleikini (k) i hope noʻu ma ke kanawai.

      Owau iho no me ka oiaio,

      Naholowaa.

      Honolulu, Apr. 23, 1901