Ke Aloha Aina, Volume VII, Number 18, 4 Mei 1901 — Page 5
This text was transcribed by: | Kathy Kennedy |
This work is dedicated to: | Awaiaulu |
KE ALOHA AINA
POAONO, MEI 4, 1991
O LILIU, O LOLOKU, O WALANIA I KE KE ONOHI O KAMAKAEHA E O MAI ANA HOI,
O ke ‘Lii wale no ka’u makemake,
O ka luhi a maua me ia nei,
O ko makou lealea no ia:
Ae, ua ike, ua ike i na maka aloha o ko kakou Makuahine Alii, me na helehelena makalapua ulumahiehie e haiamu ana maluna iho o Kona mau papalina nohea.
I ka uwila e anapu ana ma ua paialani o ke kulanakauhale o Honolulu, a e hoonakulukulu ana hoi ka leo o ka hekili ma ka huli komohana mai o ke kulanakauhale nei me ka hooma’u ana iho o na kuluwai ua maluna o ka piko o ko kakou kulanakauhale nei i na hora poniponi wale o ke kakahiaka o ka la Sabati, Aperila 28, iho nei.
He mau hiohiona ia a ka pae opua lani e hoike mai ana i kona nani nui, eia mai kou Makuahine Alii ke hele aku ia e ike ia oukou Kana mau keiki aloha o oloko o ka Hoomana Karistiano Naauao o Kealaulaokamalamalama, i ka La Pule nei.
Ke kapu wai mua loa a ko kakou Makuahine Alii i kipa aloha ae ai iloko oia anaina hoomana ia Iehova Sabaota, ua ai, a ua inu a lawa ka puuwai o na hoahanau oia ekalesia i ka olioli nui palena ole, a i ka ike ana aku no hoi ia mau maka Alii malihini i piha i ke aloha e haiamu ana maluna o Kona mau papalina Kapu Alii mai ka po mai, me ke anoano eehia i malamaia ai ke anaina hoomana ia mau hora o ka la.
Oiai, na kapu Akua elua i hui ia maloko oia anaina hoomana, aohe mea e ae ko’u puuwai e nape malie ana, o ke kupaianaha o ke kupainaha o ko na Akua huipu ana iloko o ke anaina hoomana, o ka Hoomana Karistiano Naauao o Kealaulaokamalalama.
Me ia mau hiohiona i ike’a maopopo ia, aia hoi, e hoea mai ana no he la nui. He la nui hauoli e poina ole ai i ka puuwai o ka poe a pau e hoomana ana o Iehova ke Akua, a e loaa ana he kaipuu like ana o na pomaikai huiia o ke kino a me ko ka uhane, maluna o na makaainana hoomana oiaio ia Iehova ke Akua ola hookahi wale iho no. A e paho@a koke aku no ia mau auwai o ka pomaikai maluna o na ekalesia hui ia o ka Hoomana Karistiano Naauao mai Hawaii a Kauai ma keia hope aku.
I hoonani ia ae ai ke Akua, ka Makua me Iesu ko kakou Haku, me ka mana o Kona Uhane Hemolele, ko kakou kokua, pela no e loaa ai ke ola ma ke kino a me ka uhane mai ke ao kumu ole, a i kea o pau ole. – Amene.
Ea o Painapa ke kuai hoemi mai nei i na palule wahine paikini hou loa.
HE HALAWAI MAKAAINANA.
Ma ke kahua paikau o Haimoeipo i wehe hou ia ae ai he halawai makaainana e kekahi mau Senatoa a me na Lunamakaainana o ka aoao Repubalika Home Rula, imua o kekahi anaina i like ole aku ka mahuahua me ko ka halawai makaainana o ka po Poakolu i malama ia ai ma la kahua hookahi no. E hoike moakaka mai ana no hoi ua pau ke ohohia ia o na Senatoa a me na Lunamakaainana e ka lahui Hawaii, ka poe nana i hoohanohano aku ia lakou i mau hoa hana kanawai no ka Ahaolelo mua o ke Teritori o Hawaii.
O ka manao o keia halawai i kahea ia ai oia no ke noi ana aku o ka lehulehu i ke kiaaina e ae mai oia e hooloihi ia aku keia kau ahaolelo no kekahi mau la hou aku i pau pono ai no hana a na hoa Home Rula i ka noonoo ia. Mahope hoi o ka ike ana o ua mau hoa hanohano la ua hoole pau pele a pau mano mai la o Dole ia lakou aole e hooloihi ia aku keia kau.
O ka haiolelo mua oia po oia no o Sebatoa Kalauokalani. Ua hoike mai oia i ka manao o keia halawai i kahea ia ai, oia hoi, no ke noi ana aku no ia ai Kiaaina Dole e hooloihi ia aku keia kau Ahaolelo.
O ka elua o na haiolelo i hoolauna ia mai oia no o Lunamakaainana Kaniho o Kohala. Ua haawi mai oia i na hailuku ana i ko Honolullu nei no ke koho ana ia ana o Kikila Baraunu a me Kale Aki, a mamuli o laua ua hiki ole na hana a ka aoao Home Rula ke hoonee ia aku imua me ka holopono, Wahi ana: Ua kapaia mai makou e Ka Lahui Hawaii he poe hoopilo noho, aole pela ka oiaio, aka, ua hana makou i ka hana. Ua lawe mai au he bila e haaheo ai na Kohala, he bila e hoopau ana i ke o, aka ua vito ia mai e ka kiaaina.
Mahope mai ona o Kanuha e hooili ana i na hewa a pau o ka holopono ole o ka lakou mau hana maluna o na Repubalika a noi mai la e haawi hou ia aku i mau la no lakou e hoopau i ka lakou mau hana.
O Hihio ka haiolelo mahope aku ona, aole i loihi kana kamailio ana no ka paa o kona leo, aka, oia manao hookahi no e hooloihi aku i keia kau oia kai puka mai kona mau lehelehe mai.
I ka pau ana o kana ua ku mai o Bekele, a noi pu mai la i ka lehulehu e ae ia aku lakou e loaa hou i mau la hana.
O ka haiolelo hope oia po oia o R. Puiki, ua ku kaliki Nuuanu mai oia no ka hoka o ka lunahoo ponopono o KE ALOHA AINA, a he hoopunipuni na olelo na lawe kipe kahi poe o lakou, aka, eia ka mea kupanaha eia o Dole ke hooiaio nei ua lawe kipe kekahi poe hoa o ka Ahaolelo, a malia paha o ua hoa nei kekahi iloko oia al@ka, a pela i ae ole mai ai o Dole e hooloihi akuiI keia kau.
O ka panina hope o na hana oia po oia no ka heluhelu ia ana mai he olelo hooholo e noi aku ana ia Dole e hooloihi ia aku ke ia kau no kekahi mau lahou aku. He elima lala i koho ia o ke komite o lawe aku ai i keia olelo hooholo imua o Kiaaina Dole.
PILIKIA ANA PAHA NA BOA.
Pretoria, Apr. 22. O ka puali Boa malalo o Kapena Bokburg, nona ka nui o na kanaka he 106 me na kaa a me na pu raifela, ua haawi pio mai la ia ma kahi kokoke i Middleburg, Panalaau Transvaal.
Ladana, Apr. 22. Ma kekahi hoike a Haku Kitchener i ke keena kaua mai Pretoria aku no ka la 21 o Aperila, e olelo ana: Mai ka’u hoike hope a hiki i keia wa he 242 Boai hopu pio ia e na kolamu koa Beritania, 248 pu raifela me na poka a me na kaa. He poe kakaikahi kekahi i haawi pio mai.
Cape Town, Apr. 22. Ua hoopuka ae la o Haku Kitchener he kuahaua i na makaainana a pau e noho ana ma na apana e hoomalu ia nei e ke kanawai koa o Cape Colony, ina e loaa aku ana kekahi o lakou me na lako kaua, e liuliu ana no ka hakaka, e kokua ana i na enemi, a i ole e lawelawe ana i na hana e hoopilikia ai i na pualikoa Beretania, e hookolokolo ia no lakou malalo o ke kanawai koa me ka hookau ia o na hoopai koikoi maluna o lakou, a ua hiki no hoi ke kipu ia.
Cape Colony, Apr. 23. Aia na Boa ke hoopilikia mau ia la ma na nee hoomaha ole ana a na kolamu Beretania, a ma ka nana aku he malaelae ke alahele no na Beretania. Ua hoike pili aupuni ia ae, o ka nui o na Boa i hopu pio ia ua hiki no ia i keia wa i ka 17,823.
He emi loan a @ea kuai o kahi o L. B. Kerr,
Na kakini o na kane 70 keueta o ke kakini ma kahi o L. B. Kerr.
E lawe nui I KE ALOHA AINA i ike mau i na mea hou o keia mau la e nee nei.
Ua hoole loa o Viviana Rikikini i kona holo ana aku i haumana no ke kula ao koa West Point, a eia ka Elele a me na Home Rula ke huli hou mai nei i keiki e hoouna aku ai i ke kula koa.
ULUMAHIEHIE KA LA NUI O NA OPIO
Elike me na mea i hoike ia aku malama ia ana ka la 1 o Mei i la hauoli no na opio, ua ikela ia ma na hora o ia kakahiaka maloko o ke kahua akea o ka kapitala.
Ma ka hora 10 o ia kakahiaka ua akoakoa ae la na kula aupuni a me na kula kuokoa ma ke kahua paikau o Haimoeipo. He ku i ka nani na hiohiona o na opio o na lahui like ole, Hawaii, Amerika, Beretania, Pukiki, Iapana, Pake, a me na lahui e aku iloko o ko lakou mau kahiko maemae, a ma ko lakou mau papale e kau ana na lei pua maoli a me na pua pepa, a ma ko lakou mau umauma @a ribine o na waihooluu like ole e hoike ana hoi i ka waihooluu o kela a me keia kula.
I ka akoakoa pono ana mai o na kula a pau ua hoomaka aku la ka nee ana iloko o ke kapitala kahi a kekahi mano kanaka nui e kal@ mai ana no ka makaikai ana i keia kai huakai nui ana a na opio. Ua alakai ia ka huakai e ka bana o ke kula Kamehameha a me ka bana aupuni. Mahope o ka bana o ke kula Kamehameha i ukali mai ai na keikikane a me @a kaikamahine oia kula, kula kaikamahinee Kawaiahao, Kalihiwaena, Maemae, Pauoa, Moiliili, Manoa, Pohukaina, St. Andrew’s Priory, Oahu a me Punahou, High School a @e Kaakopua.
Ua koho wale ia o ka nui o na keiki i komo ma keia kai huakai ua hiki aku no ia i ka 4000. A o lakou a pau ua hoowehiwehi ia me na lei, a e alakai ia ana hoi keia ame keia kula e kona hae.
Iloko o keia mau hiohiona ulu mahiehie i hoea aku ai na opio iloko o ke kahua o ke kapitala, ma kahi a ka lanai puhi ohe e ku nei a hoolulu iho la malaila. Ua lawelawe ia na hana hauoli e like me keia papa kuhikuhi.
Mele – America, na ka Bana.
Haiolelo – Kahukula Atkinson.
Himeni – Hawaii, Kula Kamehameha.
Himeni – Welcome my Woods, na Kula Aupuni.
Himeni – Daybreak, Kula Punahou
Himeni – Sunny Manoa, Kula Kawaiahao.
Himeni – Forest Ramble High School.
Himeni – Home Sweet Home, Kula o na Opio.
Hulahula May Pole, Kula Kaiulani.
Mele Lahui – Hawaii Ponoi a me Star Spangled Banner.
O ka hulahula May Pole i hoikeike ia mai e na haumana o ke kula Kaiulani he nani maoli ho. Mahope o ka pa@ ana o keia mau hana, ua naue aku la na opio no na pakaukau i hoopiha ia mea ai a hoopiha iho la i ka lua inaina.
No na poe nana i hapai keia hana nui no ka hanohano o na opio ko makou mau hoomaikai nui.
E loaa hou ana i na hoa hanohano o ka Ahaolelo i pau iho ia ae puu dala o $200 no keia Kau Ahaolelo Kuikawa a Dole i kahea ae nei no ka noonoo ana i ka bila haawina.
Maluna o ka Solace o loaa mai ai na lono ua pau ke kipa ana mai o na moku lawekoa ma Honolulu nei a e holo pololei ana no lakou mailaila mai no Manila. A pela i nele ai keia pule me ka hoea ana mai o kekahi mau moku iawekoa.