Ke Aloha Aina, Volume VII, Number 16, 20 ʻApelila 1901 — Page 3

KE ALOHA AINA, POAONA, APERILA 20 1901.

 

AOLE E HOOLOIHI IA ANA.

        Ke manao loa ia nei aole e ae ana o Kiaaina Dole e hooloihi ia aku keia kau Ahaolelo mahope o ka pau ana o kona manawa. O na bila a pau e waiho ana iloko o ka Ahaolelo ia wa e lilo ana lakou he mau mea waiwai ole.

        Ina aole e holo ana ka bila haawina i keia mau la pokole i koe o ka Ahaolelo, alaila e kahea ia ana he kau kuikawa, a oia bila hookahi wale no kai ae ia e noonoo ia ma ia manawa. No ka mea ua manaoia mamuli o ka hoopalaleha o na hoa o ka Ahaolelo i ka hoonee mua ana i ka lakou mau hana i pau ole ai ka hapanui o ka lakou mau bila i ka lawe ia imua o Dole.

 

 

KE KU NEI "KE ALOHA AINA" MA KONA ANO HE UWAO NO KONA LAHUI HAWAII PONOI.

        A na oukou e ike iho, ua alakai oia a kuhikuhi ia oukou i ka aoao pololei e kakoo ai, aka, mamuli o na leo apuka a keia poe i aahu i na koloka o ka hookamani i hoohaule ia oukou iloko o ke kuhihewa nui, a pela auanei e loaa ai ka poino ia kakou ma keia hope aku.

        Nolaila, e hoomaopopo i kela wahi olelo kahiko o kakou. Aohe i make o Pamano ia hai, aka, i make no i ka io ponoi, pela hoi keia, ma ke no kakou lahui la ia kakou poe Hawaii ponoi no. Heaha no ke ano o keia poe alakai hupo, hookamani, ake oihana, puni hanohano, lima paumaele. Lapuwale o na lapuwale pau loa na mea i ka lapuwale, wahi a ke Kahuna.

 

 

MAI KA NUPEPA LAHUI HAWAII MAI O APERILA 13, 1901.

        Ma ka halawai mua loa a ke komite ninaninau no kela kipe kaulana, ua ku mai o J. W. Keliikoa e pale kanawai i ke kulana o ka Lunahooponopono o KE ALOHA AINA, a pilikia maoli no na Home Rula o Honolulu nei ia Keliikoa ma kona ano loio. Pilikia ko Honolulu nei poe la i ko kuaaina mai.

        Auwe, e ole ke pakuikui mau ia o kela kipe e na nupepa, ala ae nei kela olelo hooholo huli, ina no ua lawe ia na tikiki holo kaa i mea haawi wale i na hoa, ua lawe no ia no ke kipe e imi pono aku a loaa ia wai la i loaa mua mai ai kela mau tikiki, ua like no ka hewa o ka lawe ana i na mea liilii me na mea nui, oiai, o ke ano hoowalewale ua like no ke ano.

 

 

ELUA O NA BILA I VITO IA.

        Ma ka noho ana o ka Ahaolelo ma ke kakahiaka Poaha nei, i lawe ia mai ai ka hoike o ka bila e hoopau ana i ke o ua vito ia e ke Kiaaina, no ka mea, he manao io kona o ka hoopau ia ana o ke o he alahele ia e hoopoino ia ai ka lahui hou aku, a pela no hoi ka manaoio o na kauka naauao.

        E hoea hou mai ana o Hokana me kona puali keaka paele i na holopono ua kuka ana me ko Honolulu nei poe.

 

 

KE KEHUA A NA BERITANIA E HAKAKA LA.

        Ua hiki ke hoomaopopo ia o ka hakaka e lawelawe ia la ma Aferika Hema aole ia iloko o ka nuku, aka, aia, na koa ke nee la ma na kahua akea. O na hoike a Haku Robata oia iho keia i na mile kuea o na apana like ole a na pualikoa Pelekane e nee la.

                                        Mile Kuea

Cape Colony.................. 277,151

Panalaau Muliwai Alani..... 48,326

Transvaal .................... 113,640

Natal .......................... 18,913

                                ___________

        Huina                      458,030

Rhodesia..................... 750,000

        Ka loihi a na koa e hele ai ma ka aina mai kahi kulanakauhale a kahi kulanakauhale.

                                                Mile

Cape Town a Pretoria             1,040

Pretoria a Komipoort              250

Cape Town a Kimberley                647

Kimberley a Mafeking           223

Mafeking a Pretoria                        160

Mafeking a Beira                    1,135

Durban a Pretoria                   511

        Maluna o keia mau wahi akea o Aferika Hema i hoonoho liilii ia aku ai na koa Beritania, a ua oi loa aku ke akea o keia mau wahi mamua o Germania a me Farani ke hui ia, a ina o na hakaka ana ma Rhodesia kekahi e lawe pu ia mai, e noonoo ia, e hoea aku no ka nui o na ili aina a na Beritania e hakaka nki me Farani, Geremania a me Ausetu ria i hui ia. O kahi ikaika o na hakaka e lawelawe ia la e na Boa maluna no ia o na aina mauna kahi i hiki wale no ke ku pale mai, a me ka paakiki hoi e lawepio ia aku ai.

 

 

HOALOHALOHA NO MRS. M. S. KAIUAOLA.

        Ua oluolu i ke Akua Mana Loa ka lawe ana aku i ka uhane o ko makou hoaloha i hilinai nui ia, Mrs. Maraea S. Kaiuola, ka mea hoi i waiho iho mahope nei kana mau hana i kia hoomanao e hiki ole ai ke hoopoino ia, oia hoi, ka oluolu, haahaa, aloha, mikiala, hoomanawanui, a pela wale aku, ka mea hoi i opiopi ae i kona mau kaumaha a hooili iho la iluna ona, a pii aku la i ka piina ikiiki o ka ehaeha, a hoomaha iki iho la ma ka puu oioina o ka manaolana e nana aku ana maluna o ka muliwai o ka make i kela aina nani kamahao mao maluna.

        Nolaila, o makou o na lala o ka Ahanui Paio i kapaia "Ka Hoku o Kauakanilehua," e ku nei ma Puueo, Hilo, Hawaii. Ma keia ke komo pu aku nei e haawe i na luuluu a me na kaumaha i ili iho maluna ou e Sam Kaiuaola, ko makou hoaloha maikai.

        1. Olelo Hooholo, Hooholoia:- O makou o na lala a pau o keia Ahahui Paio, ke komo pu aku nei me oukou na ohana me ke kanikau ana me ke kaana pu ana i na ehaeha no ka mea i hala ma o.

        2. E Hooholoia: Ke noi nei k@ makou leo pule e hoomama mai ko kakou Haku aloha i na luuluu a me na kaumaha i kau iho maluna o oukou a me makou.

        3. E Hooholoia: E hoouna ia i hookahi kope i ka mea i hoonele ia i ke hoapili he wahine, i hookahi i ka nupepa KE ALOHA AINA, a o ke kumu o keia Palapala Hoalohaloha me ke Kula Paio ia.

        Ma o ko makou mau komite,

                        Miss Maraea Lo,

                                J. P. Hale

                                Jos@ Oliver.

 

 

HOOPUIPUI O RUSIA I KONA MAU KOA MA KINA.

        Ladana, Apr. 5. ma ka la hope o Mei, wahi a ka mea kakau o ka nupepa Daily Graphic ma Moscow, e hoea aku no ka huina o na koa Rusia maloko o ka apana o Manchuria i ka 300,000. Ua hoomao popo pu ia aia ke Kuhina Kaua Rusia, Kenerala Kourouptkin, ke noonoo la i ka hoouna ana aku he pulikoa i ka hema iloko o Korea.

        Ua telegarapa mai la ke Kuhina Italia ma Pekina, wahi a ka mea kakau o ka Daily Mail ma Roma, e olelo ana: Ua hooweliweli aku la ke Kuhina Rusia M. de Giers, e haalele aku no o Rusia i ka noho lokahi ana, ina na mana nui e hoo mau ana i ke kue ana i ke kuikahi o Manchuria.

        Ua hoopuka ae la ka nupepa Daily Chronicle i kakahi lono mai Berlin mai, e olelo ana: Ua hoouna aku la o Kauna von Waldersee he lono telegarapa i ka Emepera Wili ama e koi ikaika aku ana iaia e hooholoholo ia na hana no ka noonoo ana no ka unuhi ana aku i na koa o na lahui like ole, maluna o ke kahua he hana paakiki loa ka malama ana ia lakou mai ke komo ana iloko o na hakaka ana maluna o ko lakou kulana lahui, a he manaoio kona e hoea mai ana no he haunaele nui mawaena o keia poe koa.

 

 

HUI KAAPIO IAPANA

KIHI ALANUI LILIHA ME MOI

        E loaa no na Kaapio i na Hora a pau o ke Ao a me ka Po. He oluolu ka auhau. Mai poina i ka hookahi mai i ke Telepona, Helu

Blue 851.

 

OLELO HOOLAHA.

        Ke hoike ia aku nei ka lohe i na mea a pau he mau umeke ka lakou a me ka mea nona ka Moe Ko'a e waiho loihi nei ma kuu keena nei e kii koke mai lakou iloko o na la he 15 me ka uku pu mai i ka luhi o ko'u ho'omaemae a malama ana a me ka hoolaha ana, a ke hala keia mau la i hoolahaia ai he mana ko'u e hoolilo ai i keia mau waiwai.

Owau no me ka oiaio

        JOHN MALEY.

                        Honolulu, Mar. 30, 1901.

 

 

MAKEMAKE E HULI PONOIA

        Eia ka Nupepa Avalataisa ke makemake nei e huli pono ia ka mea nana ke dala a Mokimana a me Penikalaka i uku wale ai i ka ai ana a na hoa Home Rula no kekahi mau la loihi ma kahi o Nolte, e ka Ahaolelo. No ka mea, ua ike ia aole na laua pono keia dala e lu nei, aka, na na kekahi aka kupaianaha no ia mahope o ko laua mau kua. Ea, he oia@o anei kela?

 

HE OIA MAU KA PAUAKA O NA HANA.

        He oia mau ka pauaka o na hana e lawelawe ia nei e ka Ahaolelo i keia mau la, a iloko no o ka pokole loa o na la i koe aole no i hoeneu aku na Home Rula i na hana imua, aka, ke hookomo mai nei no lakou i na bila liilii ano ole, a kapae ia ae na bila e ola ai ka lahui a me ka aina.

        He 11 la hana wale no i koe no lakou, aka, iloko nae oia mau la he 1 wale no la i koe no lakou a he 10 no ke Kiaaina e noonoo ai ka bila mamua o kona koike ana mai i kona manao apono a i ole vito.

        O ke kulana o na hana mai kanohi mai o ka Ahaolelo a hiki i ka Poaha iho nei, Aperila 18 o ka la hana 47 ia, he 99 bila i lawe ia mai la e ka Ahaolelo e noonoo he 16 bila i waiho ia aku no ke kakaninoa ana o Dole a he 2 bila i vito ia mai. Iloko no o ka haiki loa o ka manawa i koe, ua kue mau aku ka hapanui o na Home Rula i ka noho ana o ka Hale i ka po e lawelawe ai i kekahi mau hana a na hoea loa mai no ia kue ana a hiki i keia wa.

 

 

ALOHA NO IA HOA PAAUA O KEIA HANA.

        Ua loaa mai ia makou na hoike no ka haalele ana mai la o Thos. Poka Spencer i keia ola ana ma kona home ma ke alanui Liliha, ma ka Poakahi nei. He kanaka unuhi moolelo kaulana oia, a ua noho lunahooponopono no kekahi mau nupepa Hawaii like ole i pau aku i ka make. A he kanaka oia i makaukau i na hana a pau o keia oihana hoolaha nupepa, aka, mamuli nae o ka hoomailo ana a ka ma'i i kona kino, ua haalele oia i keia hana. Aloha no oia.

 

        Ke manao loa nei no kakahi mau hoa hanohano o ka ahaolelo, aole ha manawa i koe no lawe ana mai a hoolohe i ka bila pauahi, oiai, ua kokoke loa mai na la e hookuu ia ai ka Ahaolelo.

 

 

KA HALE HANA PAPALE HOU

.... O....

Y. Wakamoto.

Alanui Moi, Kokoke i ke kihi o na alanui Moi a me Beritania.

Helu ma ka Puka 422.

_____________

Ua hiki iaia ke humuhumu i na papale, ka holoi ana, a pela aku.

Aia pu ma kona hale hana papale he heluna nui o na papale like ole a e hoolilo ia aku ana hoi lakou ma ke kumukai haahaa loa.