Ke Aloha Aina, Volume VII, Number 12, 23 March 1901 — Page 8
| This text was transcribed by: | Kawena Komeiji |
| This work is dedicated to: | Mika Nupepa Hawaii |
KE ALOHA AINA, POAONO, MARAKI 23, 1901.
HE KAAO HAWAII
NO
HAINAKOLO
-----
Ka Ui Nohea o Waipio. Ke Kaikamahine Nana i Wawahi i na Pani Paa o Kuaihelani a Haule Kona Kapu Ilihune.
-----
Ma ka hoailona pohihihi a Luukia ua loaa hou he lanakila mai ka nuu mai ia'u, a oia ka kakou e hui nei ma keia kuka ana, nolaila, na keia mau kumu a Luukia e hapai nei oia kuu lanakila a me ka hoailona pohihihi, oia ka hoike a ka nuu ia'u, wahi a Hainakolo i ka nuu.
Maanei i ka hala ana o na la ehiku ua hiki hou mai la o Luukia imua o lakou me kona akua nui.
Ua pane mai oia imua o lakou a me kona akua, ke makaukau nei ko kakou akua ma kana huakai hope loa no ka imi ana i na pono kaulike no kakou a pau, he oiaio ia, aka, ma kuu hoailona ua pani ia ka puka no'u, ua pohihihi ke alahele no'u iho, aohe mana e ae maluna o'u, o ka mana kuka o'u me ke akua nui o kakou oia wale no.
E makaukau na kiai o Keaoolino nei ma ka lakou apana hana, no ka mea, aia malaila ke kulai mua ana a na enemi mahope na wahi e ae, nolaila, e makaala loa oukou a mai hoopalaleha, ina hana ole oukou e hiki kino mai ana au me kuu puali kaua no ka hoopakele ana i ka hanohano o Keaoolino.
Ua pane mai o Kuahailo imua o Luukia, ua makaukau ma na ano a pau aohe wahi hemahema i loihi i ka enemi ke komo ia he lehua ia no Keaoolino nei, oia kuu ike mai ka nuu mai.
Ua pane mai ka moiwahine o ka papaku, he oiaio ma na kulana o ka oihana kiai ua makaukau au aohe manao hopohopo iloko no ka lanakila o na enemi.
Ua pane mai o Hainakoloikanuu, aohe makau, aohe he hohe iloko no ka hanohano o Keaoolino.
Pane hou mai o Luukia imua o na kiai o Keaoolino, ola o Keaoolino, hanohano o Keaoolino, no ka mea, ua lokahi oukou i ka mea hookahi.
Pane mai o Keaniniulaokalani imua o lakou, eia au ke hele nei e imi i na pono kaulike mawaena o oukou me a'u, nolaila, e hana oukou me ka maluhia a me ka oiaio a hui hou kakou maanei.
A nou hoi e Luukiaikaihuhukapu e hoomanao oe i na loina o ka hoailona elike me na mahele pela oe e hana ai maluna o kau papakonane pohihihi, aohe mea i ike o oe wale no.
Pane mai o Luukia imua o kona akua, he oiaio he nui na mea pohihihi i koe aohe maopopo ia'u a oia no hoi ka'u e imi nei, nolaila, oia ka'u i inaina nui ai i kuu kane no ka loaa ole o ka'u mea e noonoo ana nolaila, pani au i kona kuleana me a'u ma ia mea, aka, i keia wa ua maopopo ia'u ko'u alahele aohe pohihihi, a me keia hoailona ua loaa ia'u he hoakaka maikai ma na ano a pau.
Ua pane hou aku o Luukia imua o kona akua, ke hele nei oe no kau huakai a me na hana i loaa ia oe ma keia alahele, nolaila, ke ike nei au maluna o kuu papakonane he m @ ulia e hahai mai ana mahope o kuu meheu me ka manao e kaili aku ma kona ikaika e nele ai au a ko kela, nolaila, o ka'u ninau wale no imua o kou kiekie, owai keia kupua e aa mai nei e kaua i ka mea hala ole, owai keia enemi e hookolo mai nei i kona meheu mahope o'u.
Olioli loa au i na e halawai ana maua he alo a he alo aole o'u makau ka make imua o kuu enemi.
Pane o Keaniniulaokalani imua o Luukia, aole ia he kupua, aole no hoi he enemi, aka, he hoaloha i ka hoaloha, e kakele ana ma ka ikaika o na mea kaua i loaa ia oe a me ia, nolaila, mai makau oe.
Pane mai o Kuahailo ia Luukia, hoao kaua imua oia kapuahi enaena no ka mea, o na hoike a ka hoailona ua oiaio, mai hoi hope imua a loaa ia haawina hoopomaikai.
Pane mai o Leimakani imua o Luukia kana wahine, he oiaio he manao no kahi mea aole nae kakou i ike ia mea huna, oia kai ike ia mea, nolaila, oia na hoike ia'u mai ka nuu mai.
Pane hou mai o Luukia ia Leimakani kana kane, ina he oiaio ua loaa keia mea huna mai ka nuu mai a'u e meepoli nei, pono no ia Leimakani ke hoike mai ia mea huna iloko o'u i lohe kakou a lohe ke akua o kakou.
E Leimakani kuu akua i ka mahaku mai hookelakela kaua maluna o Luukia, wahi a Keaniniulaokalani.
E kuu akua i ka mahaku i na e oluolu ia mai ana e kou kiekie ka ninau a kau wahi kauwa haahaa nei. Ua komo pu anei ko'u aupuni a me ko'u lahui ma ka olelo kuahaua a Luukia no Lonokaiolohia wale no ka papaku aohe mea kuleana oia wale no?
Pane mai o Keaniniulaokalani i kana moopuna aole i komo kou aupuni ma ia olelo kuahaua a Luukia, o kona aupuni wale no kai lilo ia Lonokaiolohia a me na aupuni e kue mai nei ia kakou.
Ua pane mai o Hainakolo imua o lakou ua oiaio na olelo a Luukia imua o kakou ua koikoi na hana ma ko laua aoao aohe a kakou hana no ia mea o ke kali wale aku no no kona wa e hiki mai ai.
Ua hoike mai nei o Leimakani ia'u, e hoi ana oia no kona mau aupuni, a malaila oia e noho ai me kona lahui no ka wa mau loa, aohe ana noonoo ana no keia mau hana, no ka mea, ua haule oia mamuli o kana mau hana hookiekie.
LOAA I KA MAKANI PUAHIOHIO.
-----
Ma ke kakahiaka Poakahi nei i hoea mai ai ka mokupea kiaha Olympia he 33 la holo mai Kapalakiko mai. Ua haalele aku oia ia awa ma ka la 12 o Feberuari, a ma ka la 22 o ia mahina ka la i halawai ai ka Rio Janeiro me ka poino, ua halawai iho la oia me kekahi ino nui ma ka moana. Ma ia po i ka wa a ka moku e paio ana me na ale kawahawaha o ka moana, ua loaa iho la oia i kekahi makani puahiohio, a mamua o ka hiki ana ke hoomaopopo i ke kulana, ua haki pu ae la o luna o ekolu mau kia, a maluna o ua mau kia la he ekolu mau kanaka e pu'a ana i ka pea, ua lawe koke ia aku he elua o lakou no loko o ke kai, a o ka ekolu hoi ua haule iho la oia iluna o ka oneki. Ua haawi koke ia na hoopakele ana i na kanaka iloko o ke kai, aka, he hookahi wale no nae i pakele mai, a o ka lua ua hoi aku la oia no ka opu ana ole o ka moana.
He elua minute o ka wili ana o ka makani puahiohio ua meha iho ia, ma ka wa i hoi hou mai ai ka malie, ua hooponopono hou ae la ke kapena i na pea o kona moku a hoea mai la i anei me na kia poomoku, aka, me ka maalahi nae.
Eia no ke kuai hoemi nei ka halekuai o L.B. Kerr & Co. i na Keokeo Pale Uluna a me na Keokeo Uhi Moe.
NALOWALE.
-----
Ke hoike ia aku nei ka lohe i na mea a pau, ua haule a nalowale ma ka hora 10 o ke kakahiaka La Pule nei, ma ke alanui Moi, mawaena o Niuhelewai a me ka pa ma'i o Kalihi, he Ie ohe paa lima. He mau dala kekahi maloko nona ka waiwai io he $6.00 a oi, elua buke hoomanao me hookahi huihui ki. O ka mea i loaa ai keia Ie e hoihoi pololei mai ke Keena o KE ALOHA AINA, a i ole ia Hoke, e loaa no he uku makana kupono.
MARY HIPA.
Kalihikai, Mar. 19, 1901. 3ts.
HE LOEA HANA I NA MAKA
-----
O ka loaa pono ana o na MAKA ANIANI kupono no na poe i nawaliwali ka ike ana, oia ka mea nana e hoihoi hou mai ka ike e like me kinohi a'u hoi e hooiaio nei oia no ke alahele e loaa hou ai ia oe ka ike.
O na mea au e ike powehiwehi ana ma kahi kaawale loa e ike moakaka aku ana oe maloko o keia MAKA ANIANI.
O keia mau MAKA ANIANI wale no ka mea nana e haawi ia oe i na kokua ana. Aole he uku o ka nana i ka maka.
S.E. LUCAS.
Kanaka Hana Maka Parisa.
Halepohaku Love, Alanui Papu, Rumi Helu 1. Pahu Leta 351. Ma ka hale maluna. feb20-3m
E alawa ae no i ka makou mau hoolaha.
HOOLAHA KUAI A ME HOOPAA A KA MEA MORAKI.
-----
Ke hoolahaia aku nei ma keia no ka hooko ana aku i ka mana o ka hoolilo ana i kekahi moraki i hana ia ma ka la 14 o Ianuari, 1899, e C.H. Patzig o Honolulu, Mokupuni o Oahu, Teritori o Hawaii, mea moraki, ia John Radin o Honolulu, i olelo ia, mea paa moraki, a i hoopaa ia ma ke Keena Kope ma Honolulu, ma ka Buke Aupuni 187, ma na aoao 263 a ka 264, he manao ko ka mea paa moraki e paa i ua moraki la no ka hahaki ia ana o ka aelike, oia hoi, ka uku ole ia ana o ke kumupaa a me ka uku panee i kona manawa i olelo ia.
Ke hoolaha pu ia aku nei, o na waiwai i paa maloko o ua moraki la i olelo ia, e hoolilo ia aku ana no ia ma ke kuai kudala ia ana ma ke keena kudala o James F. Morgan, ma alanui Moiwahine, Honolulu, ma ka Poaono, Maraki 30, 1901, ma ka hora 12 awakea. O na waiwai i hoakaka ia maloko o ka moraki i oleloia, oia keia: -
Oia no kela apana aina a pau e waiho la ma ke kihi o ke alanui Metcalf a me ke alanui Beckwith, kokoke ma Punahou, i olelo ia ma Honolulu, e hoakaka ia ana, penei:
E hoomaka ana me ke kihi, a i ole, ka hui ana o ka aoao komo o ke alanui Metcalf me ka aoao hema o ke alanui Beckwith, a e holo ana:
1. Hema 75º 40! Komohana, Hookahi Haneri ame Iwakaluakumamahiku (127) kapuai, ma keia alanui Metcalf i oleloia ae nei.
2. Akau 54º 50! Komohana, ma ka laina e kaulike ana a hoea i alanui Beckwith, ma ke Komohana Kanahiku (70) kapuai ma ka aina o A. Marques.
3. Ma ka laina e kupono ana i keia i hoike hope ia ae la maluna, ma ka palena o kekahi apana aina o Sacinto de Monte. Hookahi Haneri (100) kapuai e holo iuka a hui me kona pili ana me ke alanui Beckwith i olelo ia ae nei.
4. Ma ke alanui Beckwith i oleloia ae nei, Hema 54º 50! Hikina Hookahi Haneri a me Kanalima (150) kapuai ma ka Hikina, a holo i kai a hoea i kahi i hoomaka ai, maloko olaila, he Ili o 11,000 kapuai kuea, oi aku a emi mai paha, he hapa hoi ia o ka Aina i hoike ia maloko o ka Palapala Sila Nui 1945 a i hoolilo aku ia C.H. Patzig ma ka Palapala Kuai a John Radin i olelo ia, ma ka la 14 o Ianuari, 1899, i kope ia maloko o ke Keena Kope, Oahu, maloko o ka Buke 189, Aoao 204.
Pela me na waiwai a pau maluna o keia mau wahi i hoakakaia.
(Kakauia)
JOHN RADIN, Mea Paa Moraki.
Kulike ma ke Dala Gula Amerika. Na hoolilo palapala kuai ma ka aoao no ia o ka mea kuai.
No na mea i koe e ninau ia Stanley & Holmes, na loio o ka mea paa moraki.
Hanaia ma Honolulu, Maraki 7, 1901. mar 8.