Ke Aloha Aina, Volume VII, Number 12, 23 March 1901 — Page 6

KE ALOHA AINA

6        KE ALOHA AINA, POAONO, MARAKI 23, 1901.

 

HE KAAO KAILI PUUWAI

- NO KA -

UI MINEWA

- A ME NA -

Kaikunane Eiwa

I Hooliloia i mau Manu Nene Ahiu a i ole na keiki i Hoehaehaia

Kakuia no KE ALOHA AINA.

          Na keia mau olelo uwalo a na opio i hoopiha aku i ka puuwai o na koa kakaikahi o ua mau alii opio nei i na manaolana hou no ko lakou lanakila, a ia wa no i huli ae ai lakou a lele aku la maluna o na enemi me na leo hooho hauoli e wawalo hele ana i ke kulu aumoe nana hoi i hookomo aku i ka lia maaele o ka makau iluna o na kamaaina o ua wahi mokupuni la.

          A he mea oiaio no hoi iloko no o keia mau minute i ike ia aku ai ka hoomaka ana mai o ke kulana pani paa o na enemi e nahaha, a ma ia wa no i hoomaka aku ai na koa malihini e komo ma ia mau wahi, a i ka hoao ana o na enemi e pani ia mau makalua ua hiki ole nae ia no ka mea, ua loaa aku la i na opio he kulana maikai me ka wawahi liilii ana aku i ke kulana o na enemi, a ia wa no i halawai aku ai lakou me ke alihikaua wahine o na puali o ka halealii e haawi ana i na leo hookikina i na koa no ka nee ana mai imua.

          Aka, ua piha kona mau koa me na manao weliweli, a emi aku la ihope me ka ae hou ole e nee mai imua me ka haalele iho i ko lakou alakai a moiwahine hoi e imi aku i kona wahi e pakele ai. He oiaio i keia wa o ua moiwahine nei i ike ae oia hookahi wale no keia e ku nei i ahona hoi i na koa make a hoehaia, ua ike ia aku la na haawe o ke kaumaha e hekau ana maluna ona me ka aaki ana iho o kona mau ku'i no na hana hohewale i hana ia e kona mau kanaka. Nolaila, me keia mau nanaina luuluu maluna ona loheia aku la kona leo ehaeha i ka hooho ana ae.

          Aole, aole loa au e haalele ana i ke kahua a'u e ku nei me keia kino ola, aka, me kuu kino uhane, no ka mea, aole au e ae ana e hoomaewaewa ia au e keia poe aeahaukae e nee mai nei imua me ka manao ana e hopu pio ia'u. A na ka maka o kuu pahikaua i hilihili i na kulu koko o ko'u mau enemi e ako ae i kuu ola makamae.

          I ka pau ana o keia mau huaolelo oia no ka wa i hapai ae ai ua moiwahine nei i kana pahikaua i haukae i na kulu koko a hoopololei iho la ma kona puuwai, a oiai oia e liuliu ana no ka lumai ana aku i kana pahi iloko ona, aia hoi, ua lilo aku la kana pahikaua i ka muli loa ona opio me ka panai pu ana mai.

          E ka wahine puuwai eleele aole keia o kou wa i makemake ia ai e make, aka, e ike mua oe i na poe au i hana hoomainoino mamua o kou hele ana aku ma ke alahele au e iini nei e hooko aku.

          Me keia mau huaolelo i huli ae ai ua koa opio nei a kauoha aku la i kona mau koa kakaikahi e kupee ia na lima o ka lakou pio me na kupee hao kaumaha. A iloko o na leo huro e hoonaueue ana i na paia lewa i hooko aku ai na kanaka, a lilo ae la ua moiwahine nei he pio na kana mau keiki ana i hoomaewaewa ai.

 

HALA IA KAMAAINA.

          Mamua koke iho o ke koele ana ae o ka manamana kuhikuhi i ka hora 12 o ka po Poalua nei i haalele mai ai i keia ola ana o Maka Kolopana, kekahi o na Hawaii i ike nui ia, mahope hoi o ka hoomailo ikaika ana a ka mai no kekahi mau la pokole.

          He kanaka oia i kamaaina i ko ke kulanakauhale nei, a no kekahi mau makahihi he ona oia no kekahi mau kaa kikane. He luna hana oia no ka hui mokuahi Okeanika no kekahi mau makahiki.

          Ua haalele iho oia he wahine me na keiki eono, he hoahanau Keoni Kolopana, he kaikuahine Mrs. Parmenter a me ka lehulehu e u aloha aku ana nona. Aloha no oia.

          Iloko o ke kau e noho moi ana o Kalakaua a me Liliuokalani, he nui kana mau oihana aupuni i paa ai. He 43 ka nui o kona mau makahiki a hala aku la.

 

(Mai ka Aoao 5 mai.)

          Bila 43, e pili ana i ke kuleana hoopii o kekahi mea i ka aha kiekie no ka hoowahawaha aha, heluhelu elua ia a waiho ia i ke komite hookolokolo.

          Bila 44, no ke kukulu ana i mau keena waiho buke no na kula, heluhelu elua ia a waiho ia i ke komite hoonaauao.

          Bila 45, e pili ana i na hale haumia, waiho ia i ke komite ola mahope o ka heluhelu ia ana.

          Bila 46, e pili ana i ka auhau ia o na kaa, ua waiho ia aku i ke komite auhau mahope o ka heluhelu elua ia ana.

          Heluhelu elua ia ka bila a Keiki e haawi ana i uku makahiki o $12,000 no ka moiwahine, a e uku mua ia i kela a me keia mahina.

          Bila a na Senate, 10, 13 ame 14 i hoouna ia mai e Kakauolelo Caypless i ka Hale o na Lunamakaainana, ua aponoia. Hoopanee ka hale a noho hou i ka hora 9 o ka Poakolu.

HALE O NA LUNAMAKAAINANA.

          I ka noho ana o ka hale o na Lunamakaainana ma ka Poakolu nei, ua heluhelu ia mai la kekahi mau leta a ke Kiaaina a me ke Kakauolelo Kupa no kekahi mau noi a ka Hale, a ua waiho ia ka noonoo ana no ia mau pane i keia Poaha.

          Noonoo ia ka bila 5 a ke Senate he kanawai no ka hoomaka ana o ka makahiki haawina dala no elua makahiki.

          Na Penikalaka i ka la 1 o Ianuari, a na Bokele i ka la 1 o Iulai i hiki ai ke hoohana ia na bila a pau o ka Ahaolelo i hooholo ai ma ia manawa.

          He nui na poe i kamailio maluna o keia bila, a na Makekau he noi e kiola ia keia bila, aka, ma ka ninau ana ua haule kana noi.

          Ua heluhelu ia mai he noi na ka hui mokuahi pili aina Steam Navigation Co. e hoihoi hou ia mai he $136.10 o na dala he $163.50 i uku ia aku i ke aupuni no ka laikini o ka ka mokuahi Kilohana i ili mamua aku nei.

          He olelo hooholo e noi mai ana i $100,000 no na alanui o Hawaii kai heluhelu ia mai a waiho ia ma ke pakaukau no ka hapai ana mai me ka bila haawina.

          Na Robikana i waiho mai he noi mai a H. M. Levy mai e uku la aku iaia he $5,000 no na ehaeha a ka Papa Ola i hana aku ai iaia i ka wa bubonika. Waiho ia no ka noonoo ana me ka bila koi poho pauahi.

          Ua hapai mai o Emaluka he bila e hooponopono i ka auhau o na waiwai paa, i hiki ai hoi ke auhau ia na aina e like me ko lakou waiwai io a hoopanee ka Hale a noho hou i ka auina la.

 

HALE O NA SENATE.

          Ma ka noho ana o ke Senate i keia la ua waiho mai la o Senatoa Balauwina i na mea i makemake ia no Makawao e ka papa alanui no na makahiki elua, a me kekahi palapala noi i ka huina dala i makemake ia no ia hana. Mahope iho oia manawa ua komo aku la ka hale iloko o ka noonoo na no kekahi mau bila.

HALE O NA SENATE.

          Ma ka noho ana o ke Senate ma ke kakahiaka Poalua nei, ua hoike mai la ke kakauolelo no ka loaa ana mai o ka hoike a ka Papa Ola no na makahiki elua i hala ae nei.

          Na kauka Rusela he noi mamuli o ka hoohemahema ia o ke komite no na bila i hooholo ia. Oiai, ua hoike ia mai iaia e ka Lunawalaau o ka Hale o ka bila no na hoolilo o ka Ahaolelo i hooholoia e na hale elua, aole ia e hiki ke hooko ia aku, no ka mea, aole keia komite.

          Na White mai he manaoio kona ua hiki no ke hoouna ia ke kakauolelo, a i ole o ka elele, a i ole o kekahi mea e ae i koho ia e hui me ke kiaaina me na bila i hooholoia.

          Na Kalauokalani he noi e koho ia no ke kakauolelo a i ole kona kokua i komite no na bila i hooholoia.

          Ua nui na poe i kamailio loihi maluna o keia kumuhana oia o Kale Aki, Balauwina ame Kikila Balaunu e kue ana i ke koho ia ana o ke kakauolelo i komite. Ua lilo ia kakahiaka holookoa ma ka hoopaapaa a hiki i ka hoomaha ana me ka loaa ole he wahi kumuhana e ae.

          I ka wa i noho hou ai ke Senate ma ka auina la Poalua nei, aole he mau hoopaapaa hahana e like me ke kakahiaka aku.

          Na Bila Waita he noi e laweia aku na bila i heluhelu ekolu ia i ke Kiaaina Aponoia.

          Na Kaohi he noi e hoololi ia ka pauku 837 o ke kanawai e pili ana i ka hookuu ia ana mai ka auhau mai. A o na bila i heluhelu ekolu ia oia keia:

          Bila 9, e pili ana i ke o ana.

          Bila 2, no ka hooponopono ana i na wahi i hoopoino ia e ka ino nui iho nei.

          Bila 13, no ka hoopau ana i kekahi mau kanawai.

          Bila 18, he hoololi i ka pauku 2 o ka mokuna 1 o ke kanawai hoopai karaima.

          Bila 16, he hoololi i ka pauku 1 o ka mokuna 40 o ke kanawai o ka 1896 a me ka pauku 11 o ka mokuna 57 o ke kanawai o ka 1892. Hoopanee ke Senate a noho hou i ka Poakolu.

NA SENATOA POAKOLU.

          Mahope o ka pule ana ua waiho mai la o Parisa he palapala noi i kakau inoa ia e 158 makaainana o Kona Akau, penei:

          1.       $8,500 no ke alanui mai Kailua aku a hiki i ka hui ana me ke alanui Keauhou.

          2.       $18,000 no ka hoakea ana i ke alanui maluna o Kona Akau.

          3.       $24,000 no ka hoopaa ana i kahi koe o ke alanui mai Kona Akau a hiki i Kohala Hema.

          4.       $6,000 no ka hooponopono ana i na uwapo a me na alanui o Kona Akau. Waiho ia keia noi ma ka pakaukau no ka hapai hou ia ana i ka wa e noonoo ia ai ka bila haawina.

          Na Kanuha he leta mai ka Papa Ola mai e noi mai ana i haawina o $6,258.78 no ka uku ana i kekahi mau aie bubonika.

          Na Kahilina i waiho mai he olelo hooholo no na alanui o Kauai, penei:

          1. E hookaawaleia i bila haawina o $6,000 no ke alanui mai Hanalei a hiki i Kawaihau, Kauai.

          2. E hookaawale ia i bila haawina o $3,000 no ke alanui o Moloaa, Kauai.

          He mau bila mai ka hale mai olalo kekahi i heluhelu ia, a ua nee aku na hana imua me ka maikai a hiki i ka wa i hoea mai ai ka bila 1, e pili ana i ka haawina dala no na hoolilo o ka Ahaolelo.

          Ua ulu koke na hoopaapaa ana no na hoololi i hana hou ia mai e ka hale olalo i ka wa i lawe ia aku ai ua bila la e hooponopono i ka hua i pela hewa ia. O na Senatoa Kikila Baraunu, Kale Aki a me Bila Waita na poe i kamailio ikaika maluna o na hana rula ole a ka Hale o lalo no hookahi hora a oi o ka walaau wale ana o na hoa i ka makani, ua ku ae la o Senatoa Kalauokalani a noi mai la e hoopanee ka hale a noho hou i ka Poaha, oiai, ua lilo na hora oia auina la no kekahi hana okoa.

 

E IKE IA KAUA HOA KANAKA

          E o'u mau kini makamaka o ka mokupuni o Kakuihewa, he mea e hoohikilele ia ai paha no oukou ka ike ana mai hoi i ko'u helehelena e lawelawe hou ana i ka oihana a'u i noho ai a kamaaina i na makahiki i hala hope ae nei. Ae, no ka pono o oukou e kuu io o na io, a me kuu iwi o na iwi, ua auamo hou ae la au i keia hana nui o ka maauauwa i'a, a e loaa no hoi ko'u pakaukau ma ka makeke kuai i'a hou, ma Ainahou.

          Ke poloai aloha nei au i na lawaia kaulana o kuu aina kulaiwi, ina he mau i'a ka lakou i makemake e hoolilo aku e lawe mai i ke pakaukau o kou hoakanaka nei a mai kipa hewa ae hoi ke aloha i ka ilio. Nou e Waikiki i ke ala lipoa keia leo kahea o ka hoaloha oiaio, a ua komo pu hoi oe e Waialae ma keia mau upu ana. E na pali hauliuli o na Koolau e ike i ka malihini e kahea mai e komo maloko e hanai ai a hewa e ka waha. Pela hoi oe e Waialua i ka ehukai o Puaena eia mai hoi au he kauwa kunukunu ole nau, a o ko leo oia ka'u e hooko ai. E Waianae e, e hoohewahewa mai anei oe ia kaua? Aole no ka mea, he Hawaii oe a he Hawaii au, hookahi ke kupuna Kakuihewa. Ia Ewa i ka i'a hamau leo a me Puuloa Awalau no olua ko'u manaolana e haawi mai ana olu i na kokua ana ia kaua. No oukou no a pau ka ko'u puuwai e iini aku nei e hoolohe mai ana oukou i keia leo uwalo aloha. A o ka pono hoi ke hana ia a haule mai na lani.

          Ma ka Poalua nei, Maraki 19, i wehe ae ai au i ka'u pakaukau, a e loaa no malaila na kamano momona o Keomolewa. Ua lawa au maanei me ke aloha i na makamaka a pau. Ka oukou kauwa haahaa.

J. KULIA MOKUMAIA.

 

 

 

 

 

 

ojnh/,'/ttfvybgunhimjo,kp.l[/;]"